Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Kita Sebilik Ulih Gaga Ati

 Pelajar 3

Baka Ni Mutarka Penanggul

Baka Ni Mutarka Penanggul

“Seruran rinduka pangan diri, laban pengerindu muai mayuh macham dosa.”1 Peter 4:8

Maya seduai berengkah idup begulai, mayuh penanggul deka nuntung. Tu engka ketegal seduai enda sama runding, asai ati enggau chara pengidup. Pia mega, penanggul engka datai ari luar tauka utai ti enda disadang.

Kitai engka tusah nerima penanggul tu, tang Bup Kudus ngasuh kitai napi penanggul tu. (Matthew 5:23, 24) Nuan deka bulih chara ti pemadu manah kena mutarka penanggul enti nitihka ajar Bup Kudus.

 1 BERANDAU PASAL PENANGGUL

NAMA DIPADAH BUP KUDUS: Semua utai bisi “maya bejaku.” (Pengajar 3:1, 7) Tentuka nuan bisi awak bejaku pasal penanggul. Terus terang madahka kaling nuan asai ati enggau runding nuan pasal utai ti dikerandau. Seruran “nyebut utai ti bendar” ngagai kaling nuan. (Epesus 4:25) Taja pan pedis ati, anang belaya. Nyaut enggau nelap ulih nyeliahka laya.Jaku Dalam 15:4; 26:20.

Taja pan enda setuju, nuan patut ngayanka penyayau enggau basa ngagai kaling nuan. (Kolosi 4:6) Putarka penanggul enggau jampat. Anang enda betanya enggau pangan diri.Epesus 4:26.

NAMA PATUT DIGAGA NUAN:

  • Pilih ni maya berandauka penanggul

  • Anang guai nyaut maya kaling nuan bejaku. Nganti maya nuan patut bejaku

 2 DINGA LALU PERATIKA

NAMA DIPADAH BUP KUDUS: “Rinduka pangan diri . . . awakka kita berebut ngayanka basa ngagai pangan diri.” (Rome 12:10) Dingaka enggau manah. Uji peratika penemu kaling nuan enggau “siruka pangan diri . . . sereta baruh ati.” (1 Peter 3:8; James 1:19) Anang pepura ninga. Enti ulih tinggalka dulu utai ti dikereja nuan, lalu dingaka kaling nuan enggau manah, tauka ngasuh iya nganti enda lama. Enti nuan sepenemu enggau kaling nuan, nuan enda jampat “lengkar.”Pengajar 7:9.

NAMA PATUT DIGAGA NUAN:

  • Dingaka enggau manah, taja pan nuan engka enda setuju

  • Dingaka penemu iya. Peratika chara iya bejaku

3 NITIHKA PEMUTUS JAKU

NAMA DIPADAH BUP KUDUS: “Enti nuan gawa, nuan deka bulih pengidup. Enti nuan duduk berandau ngapa, nuan deka idup seranta.” (Jaku Dalam 14:23) Setuju enggau chara mutarka penanggul enda chukup. Nuan patut nitihka pemutus jaku ti udah digaga seduai. Tu engka enda senang. Tang enti dititihka, nuan deka bulih penguntung. (Jaku Dalam 10:4) Enti seduai begulai manah, seduai deka “bulih” asil ti manah.Pengajar 4:9.

NAMA PATUT DIGAGA NUAN:

  • Tentuka chara ti ulih dikena seduai mutarka penanggul

  • Selalu beratika pemujur ruang bilik seduai