Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 18

Nyadi Pangan Petara Belama Iya!

Nyadi Pangan Petara Belama Iya!

Mayuh pengawa patut digaga enti deka ngiga pangan sereta ngetanka pangan. Pengawa nuan ke deka bebendar nyadi sereta ngetanka kaul nuan enggau Petara deka diberekat. Jesus madahka semua orang ke pechaya iya: “Pemendar deka ngelepaska kita.” (John 8:32) Nama reti nya?

Nuan ulih ngasaika pengelepas nya diatu. Nuan ulih bibas ari ajar ti pelesu sereta pemula ke datai ari Sitan. Nuan mega ulih bibas ari pengidup ti nadai pengadang ke dikembuan bejuta-juta iku orang ke enda ngelala Jehovah. (Rome 8:22) Pangan Petara mega bibas ari ‘penakut ke pemati.’—Hebrew 2:14, 15.

Nuan ulih ngasaika pengelepas ba dunya baru Petara. Chukup manah pengelepas ke deka diasaika nuan jemah ila! Ba dunya Paradais, ulih bibas ari perang, penyakit, enggau penyai. Bibas ari penyeranta enggau lapar pungkang. Bibas ari umur ti tuai enggau pemati. Bibas ari asai ati ti takut, penusah, enggau utai ti enda lurus. Bup Kudus madahka jaku Petara: “Nuan meri sida chukup utai datai ke semua utai ti idup nadai suntuk utai.”—Masmur 145:16.

 Pangan Petara deka idup belama iya. Pengidup ti belama iya nya pemeri ari Petara ngagai orang ke deka bepangan enggau Iya. (Rome 6:23) Perundingka nama reti pengidup belama iya nya ba nuan!

Nuan bisi awak ngereja mayuh utai. Nuan engka deka belajar pasal musik. Tauka nuan engka deka belajar pasal ngelukis gambar tauka nyadi tukang kayu. Nuan mega engka rindu belajar pasal jelu enggau utai tumbuh. Tauka nuan deka bejalai ngagai endur bukai lalu meda bida entara menua sereta mayuh bansa bukai. Semina ngembuan pengidup ti belama iya aja ulih ngasuh semua utai tu dikeamatka!

Nuan bisi mayuh awak ngiga mayuh pangan. Idup belama iya ulih ngelala orang bukai enggau manah agi kelebih agi bala pangan Petara. Nuan deka nemu pasal pengelandik enggau pemanah sida, lalu sida mega nyadi pangan nuan. Nuan rinduka sida, lalu sida mega rinduka nuan. (1 Korint 13:8) Ngembuan pengidup belama iya ulih ngasuh nuan nyadi pangan semua orang ba dunya! Utai ti pemadu manah, makin lama nuan ngelala Jehovah makin rapat kaul nuan enggau Iya. Arapka nuan nyadi pangan Petara belama iya!