Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 10

Baka Ni Ngiga Pengarap ti Bendar

Baka Ni Ngiga Pengarap ti Bendar

Enti nuan deka nyadi pangan Petara, nuan patut nitihka pengarap ti dikemendarka Petara. Jesus madahka “orang ke amat nyembah” deka nyembah Petara sejalai enggau “pemendar”. (John 4:23, 24) Semina siti aja chara ti betul kena nyembah Petara. (Epesus 4:4-6) Pengarap ti bendar ngiring ngagai pengidup, tang pengarap ti pelesu ngiring ngagai pengerusak.—Matthew 7:13, 14.

Nuan ulih ngelala pengarap ti bendar ari ulah orang ke nitihka ajar nya. Laban Jehovah nya manah, nya alai orang ke nyembah Iya mega ulih nyadi manah. Nya baka pun kayu limau ke ngasilka buah limau ti manah, pia mega pengarap ti bendar ulih ngasuh orang nyadi manah.—Matthew 7:15-20.

Pangan Jehovah bisi basa ti dalam ngagai Bup Kudus. Sida nemu Bup Kudus nya ari Petara. Sida nejuka ajar Bup Kudus nya ngiring pengidup sida, mutarka penanggul sida, enggau nulung sida belajar pasal Petara. (2 Timoti 3:16) Lalu sida nguji nitihka utai ke diajar sida.

 Pangan Jehovah ngayanka pengerindu ngagai pangan diri. Jesus ngayanka pengerindu enggau ngajar sida pasal Petara, ari ngeraika orang ti sakit. Orang ke nitihka pengarap ti bendar mega deka ngayanka pengerindu ngagai orang bukai. Baka Jesus, sida enda ngemaruhka orang ke seranta tauka orang ari bansa bukai. Jesus madah, orang ulih ngelala nya murid iya ari pengerindu ke diayanka sida ngagai pangan diri.—John 13:35.

Pangan Petara ngemuliaka nama Jehovah. Enti seiku orang enggai ngena nama nuan, kati orang nya pangan rapat nuan? Ukai! Lebuh kitai bisi pangan rapat, kitai deka ngena nama iya enggau madahka utai ti manah pasal iya ngagai orang bukai. Nya alai, orang ke deka nyadi pangan Petara patut ngena nama Iya enggau bejaku pasal Iya ngagai orang bukai. Jehovah deka kitai ngereja nya.—Matthew 6:9; Rome 10:13, 14.

Baka Jesus, pangan Petara ngajar orang pasal Perintah Petara. Perintah Petara nya perintah ke deka nganti dunya tu enggau Paradais. Pangan Petara bekunsika berita manah pasal Perintah Petara ngagai orang bukai.—Matthew 24:14.

Saksi-Saksi Jehovah nguji deka nyadi pangan Petara. Sida bebasaka Bup Kudus enggau bisi pengerindu ba entara pangan diri. Sida mega ngemuliaka nama Petara sereta ngajar orang bukai pasal Perintah Petara. Kemaya hari tu, Saksi-Saksi Jehovah nitihka pengarap ti bendar.