Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 2

Sapa Petara?

Sapa Petara?

1. Nama kebuah kitai patut nyembah Petara?

Petara ti bendar ngaga semua utai. Iya nadai pun sereta nadai ujung. (Masmur 90:2) Semua berita manah ba Bup Kudus datai ari Iya. (1 Timoti 1:11) Kitai patut nyembah Petara seiku aja laban Iya meri kitai pengidup.​—Bacha Pemandang 4:11.

2. Baka ni Petara tu?

Nadai orang udah kala meda Petara laban Petara nya roh. Reti nya, Petara ngembuan pengidup ti tinggi agi ari utai ke idup ba dunya. (John 1:18; 4:24) Taja pen Iya tinggi agi ari kitai, kitai ulih nemu pasal Iya ari utai ti udah digaga Iya. Ngambika chunto, Petara ngaga bemacham-macham bengkah buah enggau bunga. Tu nunjukka pengerindu enggau pemandai Iya. Pemesai dunya nyengkaum utai luar baka langit, bintang enggau mata hari nunjukka kuasa Iya.​—Bacha Rome 1:20.

Kitai ulih ngelala Petara enggau dalam agi ari macha Bup Kudus. Bup Kudus bisi madahka kitai utai ti dikerinduka tauka dipegedika Iya, pemanah Iya ngagai mensia enggau chara Iya mutarka pekara.​—Bacha Masmur 103:​7-10.

3. Petara bisi nama?

Ku Jesus: “Apai kami di serega: Kudus meh nama Nuan.” (Matthew 6:9) Taja pen Petara bisi mayuh gelar, nama Iya semina siti aja. Tiap-tiap bansa bisi chara sida empu nyebut nama Petara. Ba jaku Iban, nama tu disebut “Jehovah.” Sekeda orang nyebut nya “Yahweh.” *

 Dalam mayuh Bup Kudus, nama Petara udah dibuai lalu diganti ngena gelar TUHAN tauka Petara. Tang lebuh Bup Kudus ditulis, nama Jehovah bisi dikena urung 7,000 kali. Jesus ngena nama Petara maya iya ngajar orang pasal Petara.​—Bacha John 17:26.

Peda video Kati Petara Bisi Nama?

4. Kati bisi Jehovah ibuhka kitai?

Baka apai ti rinduka anak, Petara nulung kitai bulih pemaik belama-lama

Amat enda pemerinsa ti majak nyadi diatu nunjukka Petara nadai ibuhka kitai? Sekeda orang ngumbai kitai diperinsa Petara kena nguji kitai, tang tu enda betul.​—Bacha James 1:13.

Petara ngemendarka mensia bibas milih peneka sida. Kati patutka kitai nyembah Petara kena kitai nunjukka kitai beterima kasih ngagai Iya? (Josua 24:15) Tang mayuh orang milih ngereja penyai ngagai orang bukai, tu ngasuh penyai makin nyadi. Jehovah pedis ati meda utai baka tu.​—Bacha Pemungkal 6:​5, 6.

Jehovah nya Petara ti ibuhka kitai. Iya deka meda kitai idup lantang. Enda lama agi Iya deka muai semua pemerinsa enggau orang ti mai pemerinsa. Tang diatu, Iya nejuka pemerinsa nyadi dulu. Kitai deka nemu kebuah tu ba Pelajar 8.​—Bacha 2 Peter 2:9; 3:​7, 13.

5. Baka ni kitai ulih nyemakka diri ngagai Petara?

Jehovah mai kitai nyemakka diri ngagai Iya ngena chara besampi. Iya bisi pengerindu ba tiap-tiap iku kitai. (Masmur 65:2; 145:18) Iya sanggup ngampun penyalah kitai. Iya ulih meda pemendar kitai ngereja utai ti ngenyamaika ati Iya, taja pan kadang-kadang kitai enda ulih. Nya alai taja pan kitai enda sempurna, kitai ulih nyemakka diri ngagai Petara.​—Bacha Masmur 103:​12-14; James 4:8.

Kitai patut rinduka Jehovah lebih ari kitai rinduka orang bukai laban Iya udah meri kitai nyawa. (Mark 12:30) Nuan ulih nunjukka pengerindu nuan ngagai Iya ngena chara belajar dalam agi pasal Iya sereta ngereja utai ti dipadah Iya.​—Bacha 1 Timoti 2:4; 1 John 5:3.

^ per. 4 Ba Bup Kudus Baru Iban, bacha Jaku Penerang Bup Kudus enggau Penerang Leka Jaku, “Tuhan.”