Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Berita Manah Ari Petara!

 PELAJAR 4

Sapa Jesus Kristus?

Sapa Jesus Kristus?

1. Ari ni asal Jesus?

Nama pemanah Jesus ti ngasuh iya nyamai diadap?MATTHEW 11:29; MARK 10:13-16.

Enda baka mensia bukai, Jesus kala nyadi orang roh ba serega sebedau iya datai ngagai dunya. (John 8:23) Iya utai keterubah ditempa Petara, lalu iya nulung Petara nempa semua utai bukai. Semina Jesus aja ditempa Jehovah kediri. Nya alai Jesus dikumbai “Anak Tunggal Apai.” (John 1:14) Jesus mega nyadi tuai pengari jaku Petara. Nya kebuah Jesus mega dikumbai “Jaku.”Bacha Jaku Dalam 8:22, 23, 30; Kolosi 1:15, 16.

2. Nama kebuah Jesus datai ka dunya?

Petara nganjung anak Iya ka dunya. Iya diadaka seiku dara tuchi bansa Yahudi ke benama Maria. Nya alai Jesus nadai beapaika mensia. (Luke 1:30-35) Jesus datai ka dunya (1) ngajar pemendar pasal Petara, (2) meri teladan ba pengawa ngereja peneka Petara, taja pen bisi penanggul, lalu (3) meri nyawa iya nyadika tebus.Bacha Matthew 20:28.

3. Nama kebuah kitai begunaka tebus tu?

Tebus nya rega ke dibayar kena ngelepaska orang ari pemati. (Pemansut 21:29, 30) Pemati enggau umur tuai ukai tuju asal Petara ka mensia. Baka ni kitai nemu nya? Petara madah ngagai Adam, mensia ti keterubah, enti iya ngereja penyalah ti dikumbai “dosa” dalam Bup Kudus, iya tentu mati. Tang enti iya enda bedosa, iya sigi enda mati. (Pemungkal 2:16, 17; 5:5) Bup Kudus madah, Adam mai pemati “datai” ngagai semua mensia. Adam mai dosa enggau upah dosa, iya nya pemati ngagai  peturun iya. Nya alai kitai begunaka tebus kena ngelepaska kitai ari pemati.Bacha Rome 5:12; 6:23.

Sapa ulih mayar tebus kena ngelepaska kitai ari pemati? Maya kitai mati, kitai semina ulih mayar ungkup dosa kitai empu. Nadai mensia ti enda sempurna ulih mayar dosa orang bukai.Bacha Masmur 49:7-9.

4. Nama kebuah Jesus mati?

Jesus sempurna enda baka kitai. Nya alai iya enda ibuh mati ketegal dosa iya. Iya nadai kala ngereja dosa. Tang, iya mati ketegal dosa orang bukai. Petara nunjukka pengerindu ti pemadu besai ngagai mensia ari nganjung anak iya mati ketegal dosa kitai. Jesus mega nunjukka pengerindu iya ngagai kitai ari ngasika Apai iya lalu meri nyawa iya ketegal dosa mensia.Bacha John 3:16; Rome 5:18, 19.

5. Nama utai dikereja Jesus diatu?

Lebuh ba dunya, Jesus ngerai orang ti sakit, ngangkatka orang mati idup baru, enggau nulung orang ti bisi penusah. Tu nunjukka nama utai ti deka dikereja iya ngagai mensia ti taluk jemah ila. (Matthew 15:30, 31; John 5:28) Udah Jesus mati, Petara ngangkatka iya idup baru nyadi orang roh. (1 Peter 3:18) Udah nya, iya nganti ba sepiak kanan Petara sampai Jehovah meri iya kuasa nyadi Raja merintah dunya. (Hebrew 10:12, 13) Diatu Jesus benung merintah nyadi Raja ba serega. Bala murid iya benung madahka berita manah tu ba serata dunya.Bacha Daniel 7:13, 14; Matthew 24:14.

Enda lama agi, Jesus deka nguna kuasa Raja iya muai semua pemerinsa enggau orang ti mai pemerinsa. Semua orang ti ngasika iya deka bulih pengelantang ba dunya ti manah jemah ila.Bacha Masmur 37:9-11.

Enti nuan ka penerang lebih agi, peda pelajar 4 enggau pelajar 5 bup Nama Utai ti Bendar Diajar Bup Kudus?