Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Berita Manah Ari Petara!

 PELAJAR 8

Nama Kebuah Petara Ngemendarka Penyai enggau Pemerinsa Nyadi?

Nama Kebuah Petara Ngemendarka Penyai enggau Pemerinsa Nyadi?

1. Baka ni penyai berengkah?

Petara udah chukup lama nejuka mensia merintah diri kena nunjukka sida enda ulih ngemutarka penusah ti ninggang sida

Penyai berengkah ba dunya maya Sitan terubah bula. Sebedau nya, Sitan seiku malikat ti sempurna, tang “iya endang nadai kaul enggau pemendar.” (John 8:44) Iya keran deka bulih sembah ti patut diberi semina ngagai Petara. Sitan bula ngagai Hawa, lalu ngasuh Hawa ngasika iya, ukai Petara. Adam nitihka Hawa enda ngasika Petara. Pengawa Adam tu mai pemerinsa enggau pemati.Bacha Pemungkal 3:1-6, 19.

Lebuh Sitan ngasuh Hawa enda ngasika Petara, Sitan mungkal pengawa ngelaban kuasa merintah Petara, tauka penuduk ti Pemadu Tinggi. Mayuh agi mensia ti nitih Sitan enda nerima Petara nyadi Raja sida. Nya alai, Sitan digelar “pemerintah dunya.”Bacha John 14:30; 1 John 5:19.

2. Amat utai ditempa Petara enda sempurna?

Semua pengawa Petara sempurna. Mensia keterubah enggau malikat ke ditempa Petara sigi ulih ngasika Iya enggau sempurna. (Ulang Adat 32:4,5) Petara ngelak mensia bibas milih ngereja utai ti manah tauka utai ti jai. Nya alai, kitai tau milih ngayanka pengerindu kitai ngagai Petara.Bacha James 1:13-15; 1 John 5:3.

3. Nama kebuah Petara neju pemerinsa nyadi sampai diatu?

Jehovah neju orang ngelaban kuasa merintah Iya enda lama aja. Nama kebuah? Tu kena nunjukka mensia enda ulih merintah enggau manah enti ngelaungka kuasa merintah Petara. (Pengajar 7:29; 8:9) Udah lebih 6,000 taun penyadi  mensia, nadai pemerintah mensia ti ulih muai perang, penyai, tauka penyakit.Bacha Jeremiah 10:23; Rome 9:17.

Enda baka perintah mensia, perintah Petara meri pemaik ngagai sida ti nyukung iya. (Isaiah 48:17, 18) Enda lama agi, Petara deka ngerusak semua perintah mensia. Semina sida ti nyukung perintah Petara deka diau ba dunya tu.Isaiah 11:9.Bacha Daniel 2:44.

4. Nama pemanah ba penyabar Petara?

Sitan madahka orang deka nyembah Petara laban semina deka bulih penguntung ngagai diri empu. Ka nuan nyangkal jaku bula Sitan tu? Nuan ulih enti nuan ka! Penyabar Petara meri kitai awak kena nunjukka sekalika kitai nyukung perintah Petara tauka perintah mensia. Kitai nunjukka perintah ni ti disukung kitai ari chara idup kitai.Bacha Jop 1:8-12; Jaku Dalam 27:11.

5. Baka ni chara kitai milih Petara nyadi pemerintah kitai?

Pemilih kitai ulih nunjukka sekalika kitai nyukung Petara nyadi Pemerintah kitai

Kitai ulih milih Petara nyadi pemerintah kitai ari ngiga lalu ngereja pengarap ti amat nitihka Jaku Petara, iya nya Bup Kudus. (John 4:23) Kitai ulih nulak Sitan nyadi pemerintah kitai enti kitai nitihka chunto Jesus, enda enggau pengawa politik enggau perang.Bacha John 17:14.

Sitan ngena kuasa iya ngemansangka ulah ti nadai moral, ulah ti tau ngerusakka diri. Sekeda pangan tauka kaban belayan deka nundi tauka bejaika kitai enti kitai nulak ulah baka tu. Nya alai kitai patut milih. Deka kitai milih begulai enggau sida ti rinduka Petara? Deka kitai milih ngasika atur Petara? Enti kitai milih tu, kitai ulih nunjukka Sitan nya bula maya iya madahka mensia enggai nyembah Petara enti bisi penguji.Bacha 1 Korint 6:9, 10; 15:33.

Pengerindu Petara ngagai mensia meri jamin nya penyai enggau pemerinsa deka nadai agi. Sida ti nunjukka pengarap ba janji tu deka bulih pengidup belama-lama ba dunya.Bacha John 3:16.

Enti nuan ka penerang lebih agi, peda pelajar 11 bup Nama Utai ti Bendar Diajar Bup Kudus?