Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Ulih Dipelajarka Kitai Ari Bup Kudus?

 PELAJAR 1

Sapa Petara?

Sapa Petara?

1, 2. Nama tanya ke suah ditanya orang?

ANAK mit selalu betanya. Lebuh nuan nerangka utai ngagai sida, sida suah nanya, ‘Nama kebuah?’ Lalu lebuh nuan meri saut, sida nanya, ‘Tang nama kebuah?’

2 Enda ngira tuai tauka biak, semua kitai bisi tanya. Kitai bisi tanya pasal utai ti deka diempa, dibeli tauka gari ti deka dikena. Tauka kitai bisi tanya ti beguna pasal pengidup sereta pasal jemah ila. Tang lebuh kitai enda tetemuka saut ti ngemuaska ati ngagai tanya nya, kitai engka ngetu ngiga saut iya.

3. Nama kebuah mayuh orang ngumbai sida enda ulih tetemuka saut ngagai tanya sida ti beguna?

3 Kati Bup Kudus bisi saut ngagai tanya kitai ti beguna? Sekeda orang ngumbai bisi saut, tang sida ngasaika Bup Kudus tusah amat deka dimeretika. Sida ngumbai semina bala pengajar tauka bala paderi ke bisi saut iya. Lalu sekeda ke bukai berasai malu deka madahka diri enda nemu saut iya. Nama runding nuan?

4, 5. Nama tanya ti beguna ke dikemisi nuan? Nama kebuah nuan patut terus ngiga saut iya?

4 Nuan engka deka nemu saut ngagai tanya baka: Nama tuju pengidup? Nama nyadi pengudah kitai mati? Kati Petara amat bisi? Jesus, Pengajar ti tebilang, madahka: “Pinta, lalu kita deka nerima. Giga, lalu kita deka nemu. Tekung, lalu utai nya deka dibuka ke kita.” (Matthew 7:7) Anang ngetu sebedau nuan tetemuka saut ti tau diandalka.

5 Amat, enti nuan terus ‘ngiga,’ nuan deka tetemuka  saut iya dalam Bup Kudus. (Jaku Dalam 2:1-5) Saut iya enda kelalu tusah dimeretika. Utai ti dipelajarka nuan deka meri pengidup ti lantang agi diatu sereta meri pengadang ti ngerinduka ati ke jemah ila. Aram kitai berandauka siti tanya ke udah nyarutka runding mayuh orang.

KATI PETARA IBUHKA KITAI?

6. Nama kebuah sekeda orang ngumbai Petara enda ibuhka pemerinsa sida?

6 Mayuh orang ngumbai Petara enda ibuhka kitai. Sida ngumbai gaya utai ba dunya tentu bebida enti Petara amat ibuh. Kitai meda perang, pemenchi enggau pemerinsa bisi ba dini-dini endur. Orang ulih sakit, merinsa sereta mati. Sekeda engka berunding, ‘Enti Petara ibuhka kitai, nama kebuah Iya enda nagang semua pemerinsa tu?’

7. (a) Baka ni bala tuai pengarap ngasuh orang pechaya Petara nya jai? (b) Nama kebuah kitai pechaya Petara enda tau disalahka ketegal utai jai ke nyadi?

7 Kekadang bala tuai pengarap ngasuh orang pechaya Petara nya jai. Lebuh utai ke enda manah bisi nyadi, sida ngumbai nya peneka Petara. Sida madahka, Petara dekaka utai nya nyadi. Lebuh sida madah baka nya, kebendar sida nyalahka Petara. Tang Bup Kudus ngajar, penyai endang ukai bepun ari Petara. James 1:13 madahka, Petara enda nguji orang ngena penyai. Ayat nya madahka: “Orang ke kena laban penguji, enda tau nyebut, ‘Aku diuji Petara,’ laban Petara enda ulih diuji penyai, lalu Iya Empu enda nguji orang.” Reti nya, taja pan Petara bedau nagang utai jai ari nyadi, tang Iya nadai ngasuh utai nya nyadi. (Bacha Jop 34:10-12.) Aram kitai meda siti chunto.

8, 9. Nama kebuah kitai enda patut nyalahka Petara ketegal penusah ti ninggang kitai? Beri siti chunto.

 8 Uji gambarka, seiku lelaki ke biak diau begulai enggau apai indai iya. Apai iya balat sayauka iya, lalu udah ngajar iya chara ngaga pemutus enggau manah. Udah nya iya angkat ngelaban apai iya, lalu ninggalka rumah. Iya ngereja utai ti enda manah lalu bulih penusah. Kati nuan deka nyalahka apai nya ketegal utai ke nyadi laban enda nagang anak iya ninggalka rumah? Tentu enda! (Luke 15:11-13) Baka apai nya, Petara enda nagang mensia lebuh sida milih deka ngelaban sereta ngereja utai ti enda manah. Nya alai lebuh utai ke enda manah bisi nyadi, kitai patut ingat, Petara nadai ngasuh utai nya nyadi. Endang enda patut nyalahka Petara.

9 Petara bisi kebuah bedau nagang penyai ari nyadi. Ba Pelajar 11, nuan deka belajarka utai ti dipadah Bup Kudus pasal pekara tu. Tang nuan tau pechaya, Petara rinduka kitai, lalu endang enda patut nyalahka Iya ketegal penusah ti ninggang kitai. Iya ke amat, semina Iya aja ke ulih mutarka penusah nya.—Isaiah 33:2.

10. Nama kebuah kitai pechaya Petara deka ngaduka semua pengerusak ti udah digaga orang ke jai?

10 Petara endang kudus. (Isaiah 6:3) Semua utai ti dikereja Iya tuchi, beresi, sereta badas. Nya alai kitai ulih arapka Iya. Mensia enda baka nya. Kekadang sida ngereja utai ti salah. Lalu pemerintah ti pemadu lurus pan nadai kuasa dikena ngaduka semua pengerusak ti udah digaga mensia ke jai. Nadai seiku orang ngembuan kuasa ti besai baka enggi Petara. Iya ulih sereta deka ngaduka semua pengerusak ti udah digaga orang ke jai. Iya deka muai semua penyai belama iya.—Bacha Masmur 37:9-11.

 BAKA NI ASAI ATI PETARA LEBUH ORANG MERINSA?

11. Baka ni asai ati Petara pasal pemerinsa ke ditapi nuan?

11 Baka ni asai ati Petara lebuh Iya meda utai ke nyadi ba dunya sereta utai ke ditapi nuan? Bup Kudus madahka, Petara “rinduka atur ti lurus.” (Masmur 37:28) Nya alai Iya balat ibuhka utai ti betul enggau utai ti salah. Iya begedi meda pemerinsa orang. Bup Kudus madahka, “Iya balat amat ngesalka nya” lebuh Iya meda dunya tu kelia penuh enggau penyai. (Pemungkal 6:5, 6) Petara enda berubah. (Malaki 3:6) Bup Kudus madahka, Petara amat ibuhka nuan.—Bacha 1 Peter 5:7.

Bup Kudus madahka, Jehovah nya Penempa dunya raya ti ngembuan pengerindu

12, 13. (a) Nama kebuah kitai rindu sereta ibuhka orang bukai, lalu baka ni asai ati kitai pasal pemerinsa ke bisi ba dunya? (b) Nama kebuah kitai pechaya Petara deka muai semua pemerinsa enggau pengawa ke enda lurus?

12 Bup Kudus mega madahka, Petara nempa mensia neladan gamal Iya. (Pemungkal 1:26) Reti nya, Petara ngaga kitai ngambika ngembuan kualiti manah ti sebaka enggau enggi Iya. Nya alai, enti nuan berasai tusah ati lebuh meda orang ke enda salah merinsa, Petara tentu balat agi tusah ati lebuh Iya meda nya! Baka ni kitai nemu?

13 Bup Kudus madahka, ‘Petara endang pengerindu.’ (1 John 4:8) Semua utai ti dikereja Petara diperansang ulih pengerindu. Nya alai kitai bisi pengerindu laban Petara bisi pengerindu. Pikirka tu: Enti sema nuan bisi kuasa, deka nuan muai semua pemerinsa enggau pengawa ti enda lurus ke bisi ba dunya? Tentu deka, laban nuan rinduka orang. Baka ni enggau Petara? Iya bisi kuasa, lalu ketegal Iya rinduka kitai, Iya deka muai semua pemerinsa enggau pengawa ke enda lurus. Nuan tau arap,  tiap iti semaya Petara ke disebut ba lambar 4 enggau 5 bup tu deka dikeamatka! Tang ngambika ulih arapka semaya tu, nuan patut ngelala Petara enggau mayuh agi.

PETARA DEKA NUAN NGELALA IYA

Enti nuan deka nyadi pangan seiku-seiku orang, nuan madahka nama diri ngagai orang nya. Petara madahka nama Iya dalam Bup Kudus

14. Sapa nama Petara, lalu nama kebuah kitai patut ngena nama Iya?

14 Enti nuan deka nyadi pangan seiku-seiku orang, nama utai ti keterubah dipadah nuan ngagai iya? Nama nuan. Kati Petara bisi nama? Mayuh pengarap madahka nama Iya, “TUHAN” tauka “Allah Taala.” Tang tu ukai nama. Tu semina gelar, baka “raja” tauka “tuai rumah.” Petara udah madahka nama Iya, Jehovah. Masmur 83:18 madahka: “Awakka sida nemu Nuan siku aja ti TUHAN [Jehovah] *, Raja ti Pemadu Tinggi ke serata dunya.” Bala penulis Bup Kudus ngena nama Petara beribu kali. Jehovah deka nuan nemu sereta ngena nama Iya. Iya madahka nama Iya ngagai nuan ngambika nuan ulih nyadi pangan Iya.

15. Nama reti nama Jehovah?

15 Nama Petara, Jehovah, bisi reti ti dalam. Reti iya, Petara ulih ngamatka semua semaya Iya sereta nembuka tuju Iya. Nadai utai ke ulih  nagang Iya. Semina Jehovah aja ke tau ngembuan nama nya. *

16, 17. Nama reti (a) “ti Pemadu Bekuasa”? (b) “Raja ke belama-lama iya”? (c) “Penempa”?

16 Baka ke udah dibacha kitai tadi, ku Masmur 83:18 madah pasal Jehovah: “Nuan siku aja ti TUHAN, Raja ti Pemadu Tinggi.” Pia mega, Pemandang 15:3 madahka:  ‘Naka meh pemesai enggau pemanah kereja Nuan, O Jehovah Petara ti Pemadu Bekuasa! Jalai Nuan endang lurus sereta betul, O Raja ke belama-lama iya!’ Nama reti gelar “ti Pemadu Bekuasa”? Reti iya, Jehovah nya bekuasa agi ari semua orang ke bisi ba dunya raya. Lalu gelar “Raja ke belama-lama iya” reti iya, Iya endang seruran bisi. Masmur 90:2 madahka, Iya nadai pun nadai ujung. Endaka tu ngerinduka ati!

17 Semina Jehovah aja ti Penempa. Pemandang 4:11 madahka: ‘O Jehovah Petara kami, Nuan endang patut nerima mulia, basa enggau kuasa, laban Nuan udah ngaga semua utai, lalu ulih peneka Nuan, sida ditempa, lalu diberi pengidup.’ Amat, ari bala melikat ti di serega nyentuk ngagai bintang ti ba langit, buah ti ba pun kayu sereta ikan ti ba tasik—Jehovah ke ngaga semua utai tu!

 ULIH NUAN NYADI PANGAN JEHOVAH?

18. Nama kebuah sekeda orang ngumbai sida enda ulih nyadi pangan Petara? Nama dipadah Bup Kudus pasal utai tu?

18 Lebuh sekeda orang macha pasal kualiti Jehovah ti ngerinduka ati, sida berasai takut lalu ngumbai, ‘Petara nya kelalu bekuasa, kelalu kudus, sereta jauh amat, kapa Iya deka kiruhka kitai?’ Kati Petara deka kitai ngembuan runding ke baka tu? Enggai. Jehovah deka semak ngagai kitai. Bup Kudus madahka, Petara “enda jauh ari kitai siku-siku.” (Kereja Rasul 17:27) Petara deka nuan semak ngagai Iya, lalu Iya besemaya “deka datai semak ngagai [nuan].”—James 4:8.

19. (a) Baka ni nuan ulih nyadi pangan Petara? (b) Ni bagi kualiti Jehovah ke pemadu dikerindu nuan?

19 Baka ni nuan ulih nyadi pangan Petara? Ku Jesus madahka: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’ (John 17:3) Terus belajar, lalu nuan deka ngelala Jehovah enggau Jesus. Enggau tu, nuan deka bulih pengidup ti meruan belama iya. Ngambika chunto, kitai udah nemu, ‘Petara nya pengerindu.’ (1 John 4:16) Iya mega bisi mayuh kualiti manah ke bukai. Bup Kudus madahka, Jehovah “kasih sereta siru, lubah ringat, sereta mandangka penetap ati enggau pengerindu ti besai.” (Pemansut 34:6) Jehovah “manah . . . sereta ngampun.” (Masmur 86:5) Jehovah sabar sereta kudus. (2 Peter 3:9; Masmur 18:25) Nuan deka belajar mayuh agi pasal kualiti manah Iya seraya nuan macha pasal Iya dalam Bup Kudus.

20-22. (a) Baka ni kitai ulih ngasaika diri semak ngagai Petara taja pan kitai enda ulih meda Iya? (b) Nama patut digaga nuan enti bisi orang ngasuh nuan badu belajarka Bup Kudus?

20 Baka ni nuan ulih ngasaika diri semak ngagai  Jehovah taja pan nuan enda ulih meda Iya? (John 1:18; 4:24; 1 Timoti 1:17) Lebuh nuan macha pasal Jehovah dalam Bup Kudus, nuan ulih ngelala Iya enggau dalam agi. (Masmur 27:4; Rome 1:20) Seraya nuan belajar mayuh agi pasal Jehovah, nuan deka majak rinduka Iya sereta ngasaika diri semak agi ngagai Iya.

Apai rinduka bala anak iya, tang Apai kitai ti di serega rindu agi ke kitai

21 Nuan ulih nemu, Jehovah nya Apai kitai. (Matthew 6:9) Iya meri kitai pengidup, lalu Iya mega deka kitai ngembuan pengidup ti pemadu manah. Tu meh utai ti dikedekaka apai ti bisi pengerindu ba bala anak Iya. (Masmur 36:9) Amat, Bup Kudus madahka, nuan ulih nyadi pangan Jehovah. (James 2:23) Uji gambarka. Jehovah, Penempa dunya raya, deka nuan nyadi pangan Iya!

22 Sekeda orang engka ngasuh nuan badu belajarka Bup Kudus. Sida irau enggaika nuan nukar pengarap nuan. Tang anang ngelakka orang nagang nuan nyadi pangan Jehovah. Iya nya Pangan nuan ti pemadu badas.

23, 24. (a) Nama kebuah nuan patut terus betanya? (b) Nama deka dipelajarka kitai pengudah pelajar tu?

23 Seraya nuan belajarka Bup Kudus, tentu bisi utai ke enda entu ditemu nuan. Anang malu betanya tauka minta tulung. Jesus madahka, kitai patut baruh ati baka anak mit. (Matthew 18:2-4) Lalu anak mit selalu betanya. Petara deka nuan ngiga saut ngagai utai ti ditanya nuan. Nya alai, pansik Bup Kudus kena nentuka utai ti dipelajarka nuan nya endang pemendar.—Bacha Kereja Rasul 17:11.

24 Chara pemadu manah belajar pasal Jehovah, iya nya belajarka Bup Kudus. Pengudah pelajar tu, kitai deka mansik kebuah Bup Kudus enda sebaka enggau bup bukai.

^ per. 14 Peda ba Jaku Penerang dalam Bup Kudus Baru.

^ per. 15 Enti Bup Kudus nuan nadai ngembuan nama Jehovah tauka enti nuan deka bulih mayuh agi penerang pasal reti sereta chara nyebut nama Jehovah, peda Nota Penutup 1.