Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Ulih Dipelajarka Kitai Ari Bup Kudus?

 PELAJAR 5

Tebus—Pemeri Petara ti Pemadu Berega

Tebus—Pemeri Petara ti Pemadu Berega

1, 2. (a) Nama ke ngasuh siti-siti pemeri berega ba nuan? (b) Nama kebuah tebus nya pemeri ti pemadu berega ari Petara?

NAMA pemeri ti pemadu berega ke kala diterima nuan? Pemeri ti berega enda ibuh mar. Enti pemeri nya ngasuh nuan gaga ati tauka iya utai ti amat diguna nuan, nuan beterima kasih ke pemeri nya.

2 Ari semua pemeri ke udah diberi Petara, bisi siti pemeri ke beguna agi ba kitai ari iya ke bukai. Nya pemeri ti pemadu berega ari Petara ke mensia. Ba pelajar tu, kitai deka belajar pasal Jehovah ke ngirumka Anak Iya, Jesus Kristus, ngambika kitai ulih idup belama iya. (Bacha Matthew 20:28.) Enggau nyerahka Jesus nyadika tebus, Jehovah udah nunjukka Diri amat rinduka kitai.

NAMA RETI TEBUS?

3. Nama kebuah mensia mati?

3 Tebus nya chara ti dikena Jehovah ngelepaska mensia ari dosa enggau pemati. (Epesus 1:7) Kena nemu kebuah tebus nya beguna, kitai patut nemu utai ke udah nyadi ba Kebun Eden beribu taun menya. Apai indai kitai ti keterubah, Adam seduai Hawa, bedosa. Ketegal seduai iya bedosa, seduai iya mati. Kitai mega mati laban bulih dosa ari seduai iya.—Peda Nota Penutup 9.

4. Sapa Adam, lalu nama dikembuan iya?

 4 Lebuh Jehovah nempa mensia ti keterubah, Adam, Iya meri Adam utai ti berega amat. Iya meri Adam pengidup ti sempurna. Adam ngembuan runding enggau tubuh ti sempurna. Iya enda nemu sakit, mansang tuai, tauka mati. Ketegal Jehovah nempa Adam, Jehovah baka Apai ke iya. (Luke 3:38) Jehovah selalu bejaku enggau iya. Jehovah enggau terang madahka ngagai Adam utai ti dikedekaka Iya ari Adam, lalu meri Adam kereja ti ngerinduka ati.—Pemungkal 1:28-30; 2:16, 17.

5. Nama reti lebuh Bup Kudus madahka Adam ditempa ‘neladan gamal Petara’?

5 Adam ditempa ‘neladan gamal Petara.’ (Pemungkal 1:27) Jehovah meri Adam kualiti ke sebaka enggau enggi Iya Empu, nyengkaum pengerindu, penemu-dalam, pengelurus, sereta kuasa. Jehovah meri Adam peluang bibas milih. Adam ukai robot ke patut ngereja semua utai ti diasuh. Petara nempa iya ngambika iya ulih milih deka ngereja utai ti ngena tauka salah. Enti sema Adam milih ngasika Petara, iya tentu idup belama iya ba Paradais.

6. Lebuh Adam enda ngasika Petara, nama utai ti dilenyauka iya? Baka ni tu bekaul enggau kitai?

6 Lebuh Adam enda ngasika Petara, iya diukum mati. Adam mayar rega ti mar amat. Adam lenyau kaul ti spesial enggau Jehovah, pengidup ti sempurna, sereta Paradais ke alai iya diau. (Pemungkal 3:17-19) Adam seduai Hawa milih enggai ngasika Petara, nya alai nadai agi pengadang ke seduai iya. Ketegal utai ti dikereja Adam, ‘dosa datai ngagai dunya . . . lalu pemati datai laban dosa, nya alai pemati ngelekai ngagai semua  mensia, laban semua bela udah bedosa.’ (Rome 5:12) Lebuh Adam bedosa, iya ‘nyual’ diri empu sereta kitai, nyadika ulun dosa enggau pemati. (Rome 7:14) Kati bisi pengadang ke kitai? Bisi, Jehovah nyediaka tebus.

7, 8. Nama reti tebus?

7 Baka ni kitai ulih nerangka tebus Jesus? Tebus ulih dibandingka enggau (1) rega ti dibayar kena ngelepaska orang tauka nebus utai pulai baru, (2) rega ti dibayar kena nutup utai ti rusak.

8 Nadai seiku mensia ulih mayar pengerusak besai ke digaga Adam pengudah iya bedosa, lalu mai pemati ngagai kitai. Tang Jehovah nyediaka chara kena ngelepaska kitai ari dosa enggau pemati. Aram kitai belajarka baka ni tebus nya dibayar, lalu baka ni kitai tau bulih penguntung ari tebus nya.

BAKA NI JEHOVAH NYEDIAKA TEBUS

9. Nama bansa tebus ke diguna?

9 Nadai seiku ari kitai ulih nebus pengidup sempurna ti dilenyauka Adam. Nama kebuah? Laban semua kitai enda sempurna. (Masmur 49:7, 8) Tebus patut dibayar ngena siti agi tubuh mensia ti sempurna. Nya kebuah Jesus ‘nyerahka diri’ laban iya ngembuan tubuh mensia ti sempurna baka ke dilenyauka Adam. (1 Timoti 2:6) Tebus patut sama rega enggau pengidup ke dilenyauka Adam.

10. Baka ni Jehovah nyediaka tebus?

10 Baka ni Jehovah nyediaka tebus? Jehovah ngirumka Anak ti pemadu dikesayauka Iya ke dunya. Anak tu, Jesus, utai ti keterubah ditempa Iya. (1 John 4:9, 10) Jesus sanggup ninggalka Apai iya enggau rumah iya ti di serega. (Pilipi 2:7) Jehovah mindahka pengidup  Jesus ari serega ke dunya, lalu Jesus ada nyadi mensia ti sempurna, nadai dosa.—Luke 1:35.

Jehovah meri Anak ti dikesayauka Iya nyadika tebus kitai

11. Baka ni seiku mensia ulih nyadi tebus ke semua mensia?

11 Mensia ti keterubah, Adam, ngelenyauka pengidup ti sempurna ke semua mensia pengudah iya enda ngasika Jehovah. Ulih seiku agi mensia muai pemati ari semua bala anak Adam? Ulih. (Bacha Rome 5:19.) Jesus, ke nadai kala bedosa, nyerahka pengidup diri ti sempurna nyadika tebus. (1 Korint 15:45) Pengidup iya ti sempurna ulih dikena muai pemati ari semua bala anak Adam.—1 Korint 15:21, 22.

12. Nama kebuah Jesus balat merinsa?

12 Bup Kudus nerangka pemalat pemerinsa ke ditapi Jesus sebedau iya mati. Iya balat disipat, dipantang ba tiang, lalu mati enggau penuh pemerinsa. (John 19:1, 16-18, 30) Nama kebuah Jesus balat merinsa? Laban Sitan ngumbai nadai mensia deka taluk ngagai Petara enti balat diuji. Jesus nunjukka, mensia ti sempurna ulih taluk ngagai Petara taja pan balat merinsa. Uji gambarka, Jehovah tentu temegah ati ke Jesus!—Jaku Dalam 27:11; peda Nota Penutup 15.

13. Kemaya tebus dibayar?

13 Kemaya tebus dibayar? Tebus dibayar pengudah Jesus pulai baru ngagai Apai iya ti di serega. Ba taun 33, kena 14 Nisan kelinda orang Judah, Jehovah ngelakka bala munsuh Jesus munuh iya. (Hebrew 10:10) Tiga hari udah nya, Jehovah ngidupka Jesus ari mati, ukai nyadi mensia tang nyadi orang roh. Di serega, Jesus nyerahka rega nyawa iya ti sempurna nyadika tebus kena nebus bala peturun Adam. (Hebrew 9:24) Jehovah nerima tebus nya, nya alai kitai bisi peluang  dilepaska ari dosa enggau pemati.—Bacha Rome 3:23, 24.

BAKA NI NUAN TAU BULIH PENGUNTUNG ARI TEBUS

14, 15. Nama patut digaga kitai ngambika dosa diampun?

14 Kitai udah bulih penguntung ari pemeri Petara ti berega nya. Aram kitai meda baka ni kitai tau bulih penguntung diatu sereta ke jemah ila.

15 Dosa kitai diampun. Endang tusah deka seruran ngereja utai ti ngena. Kitai ngereja penyalah, lalu kekadang kitai nyebut sereta ngereja utai ti salah. (Kolosi 1:13, 14) Baka ni kitai ulih diampun? Kitai patut amat nesal ati ke penyalah ti udah dikereja kitai sereta enggau baruh ati minta Jehovah ngampun kitai. Lalu kitai tau arapka dosa diri diampun.—1 John 1:8, 9.

16. Nama patut digaga kitai ngambika ngembuan ati ti beresi?

16 Kitai ulih ngembuan ati ti beresi. Enti ati madahka kitai udah ngereja utai ti salah, kitai berasai besalah, indah engka berasai nadai daya sereta enda beguna. Tang anang lemi semengat. Enti kitai minta ampun ari Jehovah, kitai ulih pechaya Iya deka ninga sereta ngampun kitai. (Hebrew 9:13, 14) Jehovah deka kitai bejaku pasal penanggul sereta pengelemi diri ngagai Iya. (Hebrew 4:14-16) Asil iya, kitai ulih bebaik enggau Jehovah.

17. Nama berekat ke diulih kitai ketegal Jesus mati ke kitai?

17 Kitai bisi pengadang idup belama iya. ‘Upah dosa nya pemati, tang pemeri ti diberi Petara pechuma nya pengidup ti meruan belama iya dalam Jesus Kristus Tuan kitai.’ (Rome 6:23) Ketegal Jesus mati ke kitai, kitai ulih idup belama iya sereta ngembuan pengerai ti  sempurna. (Pemandang 21:3, 4) Tang nama patut digaga kitai ngambika tau bulih berekat nya?

KATI NUAN BETERIMA KASIH KE TEBUS?

18. Baka ni kitai nemu Jehovah rinduka kitai?

18 Pikirka baka ni asai ati nuan lebuh orang meri nuan pemeri ti manah. Ari semua pemeri, tebus nya ti pemadu berega, lalu kitai patut beterima kasih ngagai Jehovah ke pemeri nya. John 3:16 madahka, ‘Petara balat rinduka dunya, nya alai Iya meri Anak Tunggal Iya.’ Amat, Jehovah balat rinduka kitai, nya alai Iya meri kitai, Jesus, Anak ti dikesayauka Iya. Lalu kitai nemu, Jesus mega rinduka kitai, laban iya sanggup mati ke kitai. (John 15:13) Tebus patut ngasuh nuan pechaya, Jehovah enggau Jesus amat sayauka nuan.—Galatia 2:20.

Seraya kitai belajar pasal Jehovah, kitai deka nyadi pangan Iya, lalu pengerindu kitai ngagai Iya deka dalam agi

19, 20. (a) Baka ni nuan ulih nyadi pangan Jehovah? (b) Baka ni nuan ulih nunjukka diri arapka genselan tebus Jesus?

19 Diatu nuan udah belajar pasal pengerindu Petara ti besai, baka ni nuan ulih nyadi pangan Iya? Enda senang rinduka orang ke enda dikelala nuan. John 17:3 madahka, kitai ulih ngelala Jehovah. Seraya nuan ngereja tu, pengerindu nuan ngagai Iya deka dalam agi, nuan deka ngelantangka ati Iya, lalu nuan deka nyadi pangan Iya. Nya alai, terus belajar pasal Jehovah ngena pengawa belajarka Bup Kudus.—1 John 5:3.

20 Arapka genselan tebus Jesus. Bup Kudus madahka, “barang sapa arapka Anak, bulih pengidup ti meruan belama iya.” (John 3:36) Nama reti arapka? Reti nya ngereja utai ti diasuh Jesus. (John 13:15) Semina madahka diri pechayaka Jesus, enda chukup. Kena nunjukka diri arapka tebus, kitai patut nunjukka nya  ngena pengawa kitai. Ba James 2:26, kitai macha: “[Pengarap] mati enti iya nadai pengawa.”

21, 22. (a) Nama kebuah kitai patut datai Ngingatka Pemati Jesus ninting taun? (b) Nama deka dikerandauka ba Pelajar 6 enggau 7?

21 Datai Ngingatka Pemati Jesus. Kena lemai sebedau Jesus mati, iya ngasuh kitai ngingatka pemati iya. Kitai ngereja pengawa tu ninting taun, lalu pengawa tu dikumbai Ngingatka Pemati Jesus. (Matthew 26:26-28) Jesus deka kitai ngingatka iya ti udah nyerahka nyawa diri ti sempurna nyadika tebus kitai. Ku iya madahka: ‘Kereja tu kena ngingatka aku.’ (Bacha Luke 22:19.) Lebuh nuan datai Ngingatka Pemati Jesus, nuan nunjukka diri ingatka tebus sereta pemesai pengerindu Jehovah enggau Jesus ngagai kitai.—Peda Nota Penutup 16.

22 Tebus endang pemeri ti pemadu berega ke kala diterima kitai. (2 Korint 9:14, 15) Pemeri ti berega tu mega deka meri penguntung ngagai bejuta iku orang ke udah mati. Pelajar 6 enggau 7 deka berandauka baka ni tu ulih dikeamatka.