Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Ulih Dipelajarka Kitai Ari Bup Kudus?

 PELAJAR 12

Baka Ni Nuan Ulih Nyadi Pangan Petara?

Baka Ni Nuan Ulih Nyadi Pangan Petara?

1, 2. Sapa sekeda ari pangan Jehovah?

SAPA dikedekaka nuan nyadika pangan? Orang ti dikerinduka nuan. Nuan ulih begulai enggau orang nya, lalu orang nya ulih begulai enggau nuan. Orang ke bisi personaliti sereta kualiti ti dikerinduka nuan.

2 Petara Jehovah milih sekeda mensia nyadi pangan Iya. Ngambika chunto, Abraham nya seiku ari pangan Jehovah. (Isaiah 41:8; James 2:23) Jehovah mega rinduka David. Iya ngumbai David, ‘orang ke ngerinduka ati Iya.’ (Kereja Rasul 13:22) Lalu Jehovah mega “rinduka” nabi Daniel.—Daniel 9:23.

3. Nama kebuah Abraham, David, enggau Daniel nyadi pangan Jehovah?

3 Baka ni Abraham, David, enggau Daniel nyadi pangan Jehovah? Ku Jehovah bejaku ngagai Abraham: “Nuan udah ngasika jaku Aku.” (Pemungkal 22:18) Jehovah nyadi pangan orang ke ngasika Iya enggau ati ti baruh. Indah siti raban bansa ulih nyadi pangan Iya. Ku Jehovah madah pasal bansa Israel: ‘Aku amat ngasuh sida ngasika Aku, ngambika Aku nyadika Petara sida, lalu sida nyadi nembiak Aku.’ (Jeremiah 7:23) Nya alai, nuan mega patut ngasika Jehovah enti nuan keran deka nyadi pangan Iya.

JEHOVAH NYAGA BALA PANGAN IYA

4, 5. Baka ni Jehovah nyaga bala pangan Iya?

4 Bup Kudus madahka, Jehovah ngiga chara mandangka  “pengering ngagai orang ke taluk ngagai Iya.” (2 Bansa Israel 16:9) Ba Masmur 32:8, Jehovah besemaya ngagai bala pangan Iya: “Aku deka nunjukka jalai ti patut ditengah nuan. Aku deka ngajar sereta meri nuan jaku lalau.”

5 Seiku munsuh ke kering deka nagang kitai nyadi pangan Jehovah. Tang Jehovah deka nyaga kitai. (Bacha Masmur 55:22.) Ketegal nyadi pangan Jehovah, kitai nyembah Iya enggau pengabis ati. Kitai taluk ngagai Iya indah lebuh napi penanggul. Lalu kitai bisi pengandal ti sama baka David. Ku iya nulis pasal Jehovah: “Iya semak aku, lalu nadai utai ulih ngelebuka aku.” (Masmur 16:8; 63:8) Baka ni Sitan nguji nagang kitai nyadi pangan Petara?

SITAN NUDUH MENSIA

6. Nama dipadah Sitan pasal mensia?

6 Ba Pelajar 11, kitai udah belajar pasal Sitan ke nyakap Jehovah, lalu nuduh Iya bula sereta bechiping laban enda ngemendarka Adam seduai Hawa mutuska bagi utai ti betul enggau utai ti salah kediri empu. Dalam Bup Kudus, bup Jop madahka, Sitan mega nuduh mensia ke deka nyadi pangan Petara. Sitan ngumbai sida nyembah Petara ketegal deka bulih utai ari Iya, ukai ketegal sida rinduka Iya. Sitan indah ngumbai diri ulih ngelimpangka semua orang ngelaban Petara. Aram kitai meda utai ke ulih dipelajarka ari Jop sereta chara Jehovah nyaga iya.

7, 8. (a) Sapa Jop? (b) Nama dipadah Sitan pasal Jop?

7 Sapa Jop? Iya seiku lelaki ke manah ti idup kira-kira 3,600 taun menya. Jehovah madahka, maya nya nadai orang ke baka Jop ba dunya tu. Jop bebasaka Jehovah,  lalu iya begedika utai ti jai. (Jop 1:8) Amat, Jop nyadi pangan ti bendar ke Jehovah.

8 Sitan ngumbai Jop nyembah Jehovah ketegal deka bulih penguntung. Ku Sitan madah ngagai Jehovah: “Ukai enda Nuan ke seruran nyaga iya, nyaga ruang bilik enggau semua utai ti diempu iya? Nuan udah merekatka semua utai ti dikereja iya, lalu jelu bedus enggau jelu sapi iya udah nambah-menambah di menua tu. Tang enti Nuan ngunjurka jari Nuan, lalu ngambi semua utai ti dikemisi iya, iya tetap deka nyumpah Nuan mua mata!”—Jop 1:10, 11.

9. Jehovah ngemendarka Sitan ngereja nama?

9 Sitan nuduh Jop nyembah Jehovah ketegal Jop deka bulih utai ari Jehovah. Sitan mega ngumbai diri ulih nagang Jop nyembah Jehovah. Jehovah enda setuju enggau utai ku Sitan, tang Iya ngemendarka Sitan nguji Jop kena nemu sekalika Jop nyadi pangan Jehovah ketegal pengerindu ke Jehovah tauka ukai.

SITAN NYERANG JOP

10. Baka ni Sitan nyerang Jop, lalu nama digaga Jop?

10 Terubah, Sitan ngenchuri tauka munuh semua jelu Jop. Udah nya, nyauka semua orang gaji Jop dibunuh Sitan. Jop lenyau semua utai. Penudi iya, Sitan munuh sepuluh iku anak Jop ngena kabut ti besai. Tang Jop mengkang taluk ngagai Jehovah. ‘Dalam semua utai nya, Jop enda bedosa, laban iya enda besalah Petara.’—Jop 1:12-19, 22.

Jehovah merekatka Jop ketegal iya nyadi pangan ti taluk

11. (a) Nama agi digaga Sitan ba Jop? (b) Nama digaga Jop?

11 Sitan enda ngetu. Iya nyakap Petara enggau nyebut: ‘Tegu tulang enggau isi iya, iya tentu deka nyumpah Nuan mua mata!’ Nya alai, Sitan nguji Jop ngena penyakit  ti balat ngemediska. (Jop 2:5, 7) Sekali agi Jop taluk ngagai Jehovah. Bup Kudus madahka: “Dalam semua utai nya Jop nadai bedosa ngena mulut iya.”—Jop 2:10.

12. Baka ni Jop nunjukka Sitan nya pemula?

12 Jop enda nemu pasal semua tuduh ari Sitan tauka kebuah iya balat merinsa. Jop ngumbai penusah iya datai ari Jehovah. (Jop 6:4; 16:11-14) Taja pia, Jop mengkang taluk ngagai Jehovah. Tang diatu udah nyata. Jop enda berundingka diri empu aja. Iya pangan Petara laban iya rinduka Petara. Semua jaku tuduh Sitan nya bula magang!

13. Nama nyadi ketegal Jop taluk?

13 Taja pan Jop enda nemu utai ke nyadi di serega, iya taluk ngagai Petara lalu nunjukka Sitan nya jai. Ketegal Jop nyadi pangan ti taluk, Jehovah merekatka iya.—Jop 42:12-17.

CHARA SITAN NUDUH NUAN

14, 15. Nama dipadah Sitan pasal semua mensia?

14 Nuan ulih belajarka utai ti beguna ari utai ke nyadi ba Jop. Kemaya hari tu, Sitan nuduh kitai nyembah Jehovah ketegal deka bulih utai ari Iya. Ba Jop 2:4, Sitan ngumbai: “Mensia deka ngelengkaka semua utai, asal nyawa iya idup.” Nya alai, Sitan ukai semina nuduh Jop aja. Iya nuduh semua mensia, enda ngira indu tauka lelaki, berundingka diri empu aja. Beratus taun pengudah Jop mati, Sitan agi bejai Jehovah sereta nuduh bala nembiak Iya. Ngambika chunto, ba Jaku Dalam 27:11, kitai macha: “Nuan enda tau enda bepenemu-dalam, anak, nya baru aku deka lantang ati, lalu ulih nyaut semua orang ke nganu [tauka, bejai] aku.”

15 Enggau milih deka ngasika Jehovah sereta nyadi  pangan Iya ti taluk, nuan nunjukka Sitan nya pemula. Taja pan nuan patut ngaga ubah ti besai ba pengidup ngambika ulih nyadi pangan Petara, nya pemutus nuan ti pemadu badas! Pemutus tu pekara ti besai. Sitan ngumbai nuan enda ulih taluk ngagai Petara lebuh nuan napi penusah. Iya nguji nipu kitai ngambika enda taluk ngagai Petara. Baka ni?

16. (a) Nama chara ke dikena Sitan nguji nagang orang nyembah Jehovah? (b) Baka ni Sitan nguji nagang nuan nyembah Jehovah?

16 Sitan ngena mayuh bengkah chara nguji nagang kitai nyadi pangan Petara. Sitan nyerang “baka singa ti negung, begigaka orang ke deka diempa iya.” (1 Peter 5:8) Anang tekenyit enti bala pangan, diri sebilik, tauka orang bukai nagang nuan belajarka Bup Kudus sereta nagang nuan ngereja utai ti ngena. Nuan engka ngasaika diri baka ke benung diserang. * (John 15:19, 20) Sitan mega nyaru diri “nyadi melikat penampak.” Nya alai iya nguji nipu kitai ngambika enda ngasika Jehovah. (2 Korint 11:14) Siti agi chara ke dikena Sitan nagang kitai nyembah Jehovah, iya nya ngasuh kitai ngumbai diri enda layak nyembah Jehovah.—Jaku Dalam 24:10.

NGASIKA PESAN JEHOVAH

17. Nama kebuah kitai ngasika Jehovah?

17 Enti kitai ngasika Jehovah, kitai nunjukka Sitan nya pemula. Nama deka nulung kitai ngasi? Bup Kudus madahka: ‘Kita enda tau enda rinduka Jehovah Petara kita enggau pengabis ati kita, enggau pengabis semengat kita, enggau pengabis pengering kita.’ (Ulang Adat 6:5)  Kitai ngasika Jehovah laban kitai rinduka Iya. Seraya pengerindu kitai ngagai Jehovah nambah, kitai deka ngereja semua utai ti diasuh Iya. Ku rasul John nulis: ‘Reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’—1 John 5:3.

18, 19. (a) Nama sekeda utai ke dikumbai Jehovah salah? (b) Baka ni kitai nemu Jehovah nadai ngasuh kitai ngereja utai ti enda ulih dikereja kitai?

18 Tang nama utai ti dikumbai Jehovah salah? Bisi sekeda chunto ba kutak “ Begedika Utai ti Dipegedika Jehovah.” Terubah iya, nuan engka ngumbai sekeda ari utai nya enda entu salah. Tang lebuh nuan macha ayat Bup Kudus lalu belematika ayat nya, nuan deka nemu kebuah patut ngasika adat Jehovah. Nuan mega engka ngasaika diri patut ngaga sekeda ubah ba pengidup. Taja pan tu kekadang engka tusah, tang enti nuan ngaga ubah nya, nuan deka bisi pemaik sereta pengelantang ke datai  ari nyadi pangan ti taluk ke Petara. (Isaiah 48:17, 18) Baka ni kitai nemu kitai ulih ngaga ubah tu?

19 Jehovah enda kala ngasuh kitai ngereja utai ke enda ulih dikereja kitai. (Ulang Adat 30:11-14) Ketegal Jehovah Pangan ti bendar, Iya ngelala kitai lebih agi ari kitai empu. Iya nemu pengelebih sereta pengurang kitai. (Masmur 103:14) Rasul Paul meransang kitai: ‘Petara endang tau dikarapka, lalu Iya enda nejuka kita diuji lebih ari ti ulih ditatka kita; tang lebuh kita diuji, Iya deka meri kita jalai kena kita ngelepaska diri, ngambika kita tan natka penguji nya.’ (1 Korint 10:13) Kitai pechaya, Jehovah deka seruran meri kitai pengering kena ngereja utai ti ngena. Iya deka meri nuan “kuasa ti besai” kena nulung nuan tan natka penanggul. (2 Korint 4:7) Pengudah ngasaika tulung ari Jehovah ba maya ti tusah, Paul ulih madahka: “Aku ulih ngereja semua utai ulih Iya ke meri aku pengering.”—Pilipi 4:13.

 BELAJAR RINDUKA UTAI TI DIKERINDUKA PETARA

20. Nama kualiti ke patut ditunda nuan, lalu nama kebuah?

20 Enti kitai deka nyadi pangan Jehovah, kitai enda tau enda badu ngereja utai ti dikumbai Jehovah salah. Tang ukai semina nya aja ke enda tau enda digaga kitai. (Rome 12:9) Bala pangan Petara rinduka utai ti dikerinduka Iya. Sida bisi disebut ba Masmur 15:1-5. (Bacha.) Bala pangan Jehovah neladan kualiti Iya, lalu mandangka “pengerindu, pengaga, pemaik, pengeliat ati, penyiru, pemadas, penetap ati [pengarap], penelap, ulih nagang diri.”—Galatia 5:22, 23.

21. Baka ni nuan ulih mandangka kualiti ti dikerinduka Petara?

21 Baka ni nuan ulih mandangka kualiti ti badas tu? Nuan patut belajarka utai ti dikerinduka Jehovah ari macha sereta belajarka Bup Kudus enggau tetap. (Isaiah 30:20, 21) Seraya nuan ngereja tu, pengerindu nuan ngagai Jehovah deka nambah, lalu seraya pengerindu nuan ngagai Iya nambah, nuan deka ngasika Iya.

22. Nama upah enti nuan ngasika Jehovah?

22 Ubah ke patut digaga nuan ba pengidup ulih disemaka baka nukar gari ke lama lalu ngerasuk gari ke baru. Bup Kudus madahka, nuan patut “ngelengkaka pengidup ti lama” lalu “nyadi mensia ti baru.” (Kolosi 3:9, 10) Taja pan tu engka enda senang, tang lebuh kitai ngaga ubah sereta ngasika Jehovah, Iya besemaya deka meri kitai ‘upah’ ti besai. (Masmur 19:11) Amat, ngasi meh ke Jehovah, lalu tunjukka Sitan nya pemula. Sembah meh Jehovah, ukai ketegal deka bulih upah ke jemah ila, tang ketegal rinduka Jehovah enggau enda bebagi ati. Enggau nya nuan ulih nyadi pangan ti bendar ke Petara!

^ per. 16 Tu ukai reti Sitan bekuasa atas orang ke nguji nagang nuan belajarka Bup Kudus. Tang Sitan nya “petara dunya,” lalu “semua dunya di baruh kuasa Sitan.” Nya alai, anang tekenyit enti sekeda orang nguji nagang kitai nyembah Jehovah.—2 Korint 4:4; 1 John 5:19.