Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Ulih Dipelajarka Kitai Ari Bup Kudus?

 PELAJAR 8

Nama Reti Perintah Petara?

Nama Reti Perintah Petara?

1. Nama sampi ti tebilang ke deka dikerandauka kitai?

BEJUTA iku orang nemu pasal sampi Apai Kami ti tebilang. Jesus ngena sampi tu ngajar bala murid iya chara besampi. Nama utai ti disampika iya? Lalu nama kebuah sampi tu beguna ba kitai kemaya hari tu?

2. Nama tiga iti pekara ti beguna ke diasuh Jesus sampika kitai?

2 Jesus madahka: ‘Nya alai, baka tu ku chara kita patut besampi: “Apai kami ti di serega: Kudus meh nama Nuan. Datai meh Perintah Nuan. Nyadi meh peneka Nuan di dunya enggau di serega.”’ (Bacha Matthew 6:9-13.) Nama kebuah Jesus ngajar kitai besampika tiga iti pekara tu?—Peda Nota Penutup 20.

3. Nama patut ditemu kitai pasal Perintah Petara?

3 Kitai udah belajar, nama Petara nya Jehovah. Lalu kitai udah berandau pasal peneka Petara bekaul enggau mensia sereta dunya. Tang nama reti utai ku Jesus lebuh iya nyebut: “Datai meh Perintah Nuan”? Kitai deka belajarka reti Perintah Petara, nama deka digaga Perintah nya, lalu baka ni Perintah nya deka nguduska nama Petara.

NAMA RETI PERINTAH PETARA?

4. Nama reti Perintah Petara, lalu sapa Raja ba Perintah nya?

4 Jehovah numbuhka siti Perintah di serega, lalu Bup Kudus ngumbai Perintah nya, Perintah Petara. Jehovah  milih Jesus nyadi Raja ba Perintah nya. Jesus nya ‘Tuan ari atas semua tuan, Raja ari atas semua raja.’ (Pemandang 17:14) Jesus ulih ngereja mayuh agi utai manah ari ke kala digaga semua pemerintah mensia, lalu iya bekuasa agi ari semua pemerintah nya.

5. Dini alai Perintah Petara merintah? Perintah nya deka merintah atas nama?

5 Empat puluh hari pengudah Jesus diangkatka idup baru, iya pulai ke serega. (Kereja Rasul 2:33) Nyau kelama, Jehovah nyiri iya nyadi Raja ba Perintah Petara. Perintah nya deka merintah atas dunya ari serega. (Pemandang 11:15) Nya kebuah Bup Kudus ngumbai Perintah Petara nya “di serega.”—2 Timoti 4:18.

6, 7. Nama ke ngasuh Jesus manah agi ari semua raja mensia?

6 Bup Kudus madahka, Jesus tinggi agi ari semua raja mensia laban iya “siku aja ke enda nemu mati.” (1 Timoti 6:16) Semua pemerintah mensia ulih mati, tang Jesus enda. Semua utai manah ti dikereja Jesus ke kitai deka meruan belama iya.

7 Bup Kudus madahka, Jesus deka nyadi Raja ti lurus sereta ngembuan penyinu: ‘Roh Jehovah deka meri iya penemu-dalam, penemu enggau pengelandik kena merintah bala nembiak iya. Iya deka nemu peneka Jehovah, lalu deka ngemesaika Jehovah, sereta deka lantang ati nangika Iya. Iya enda ngakim beduduk ba utai ti dipeda iya, tauka ba utai ti ditusui orang ngagai iya. Iya deka ngakim orang ke seranta ngena atur ti lurus.’ (Isaiah 11:2-4) Kati nuan deka raja nuan baka nya?

8. Baka ni kitai nemu Jesus enda kediri merintah?

8 Petara udah miih sekeda mensia merintah enggau Jesus ba Perintah ti di serega. Ngambika chunto, rasul Paul madah ngagai Timoti: ‘Enti kitai tan, kitai deka  mega merintah enggau iya.’ (2 Timoti 2:12) Ni penyampau orang ke deka merintah nyadi raja enggau Jesus?

9. Ni penyampau orang ke deka merintah enggau Jesus? Kemaya Petara belabuh milih sida?

9 Baka ke udah dipelajarka kitai ba Pelajar 7, rasul John nerima siti genera ke alai iya meda Jesus nyadi Raja di serega enggau 144,000 iku raja ti bukai. Sapa 144,000 iku nya? John madahka, sida ‘bisi nama Anak Domba [Jesus] enggau nama Apai iya ditulis ba kening sida.’ (Bacha Pemandang 14:1.) Ku iya agi: ‘Sida nya meh orang ke nitihka Anak Domba [Jesus] ngagai sebarang endur iya bejalai. Sida udah ditebus ari semua bansa mensia.’ (Pemandang 14:4) Petara milih 144,000 iku orang Kristian ke tetap ati “merintah” enggau Jesus atas dunya. Lebuh sida mati, sida diangkatka idup baru ke serega. (Pemandang 5:10) Kenyau ari abad keterubah, Jehovah udah belabuh milih orang Kristian ke tetap ati nyadi raban 144,000 iku raja.

10. Nama kebuah kitai ngumbai Jehovah bisi pengerindu lebuh Iya milih Jesus enggau 144,000 iku merintah atas mensia?

10 Jehovah balat ibuhka kitai, nya alai Iya milih mensia sama merintah enggau Jesus. Jesus deka nyadi pemerintah ti manah laban iya nemu gaya kitai. Iya nemu baka ni asai nyadi mensia sereta ngasaika pemerinsa. Paul madahka, Jesus nemu asai ati kitai, iya nemu “sinu ati ke pengelemi kitai,” lalu iya “udah diuji ngena semua macham chara baka kitai empu.” (Hebrew 4:15; 5:8) Sida ke 144,000 iku nya mega nemu, baka ni asai nyadi mensia. Lalu sida udah belaban enggau tubuh ti enda sempurna sereta penyakit. Nya alai kitai tau arap, Jesus enggau 144,000 iku nya nemu asai ati sereta penusah ke ditapi kitai.

 NAMA DEKA DIGAGA PERINTAH PETARA?

11. Nama kebuah Jesus ngajar bala murid iya besampi ngambika peneka Petara nyadi di serega enggau di dunya?

11 Jesus ngajar bala murid iya besampi ngambika peneka Petara nyadi di serega enggau di dunya. Nama kebuah Jesus minta peneka Petara nyadi di serega? Kitai udah belajar ba Pelajar 3 pasal Antu Sitan ke angkat ngelaban Jehovah. Pengudah Sitan ngelaban, Jehovah agi ngemendarka iya enggau bala melikat ke enda tetap ati, tauka bala antu, mengkang diau di serega enda lama. Nya alai, ukai semua melikat ti di serega ngereja peneka Petara. Ba Pelajar 10, kitai deka belajar mayuh agi pasal Sitan enggau bala antu iya.

12. Nama dua iti pekara besai ke dipadah ba Pemandang 12:10?

12 Bup Kudus madahka, enda lama pengudah Jesus dichiri nyadi Raja ba Perintah Petara, iya beperang ngelaban Sitan. (Bacha Pemandang 12:7-10.) Ayat 10 madah pasal dua iti pekara ti besai. Perintah Petara berengkah merintah lebuh Jesus Kristus nyadi Raja, lalu Sitan dibuai ari serega ke dunya. Baka ke deka dipelajarka kitai, dua iti pekara nya udah nyadi.

13. Nama nyadi di serega pengudah Sitan dibuai ari serega?

13 Bup Kudus ngambarka pengaga ati bala melikat ke tetap ati pengudah Sitan enggau bala antu iya dibuai ari serega. Kitai macha: “Rami gaga ati meh kita serega, enggau semua kita ke diau dia!” (Pemandang 12:12) Diatu bisi pemaik sereta penyerakup di serega laban semua melikat ngereja peneka Petara.

Pengudah Sitan enggau bala antu iya dibuai ari serega, pemerinsa majak nambah ba dunya. Enda lama agi pemerinsa tu deka nadai agi

14. Nama nyadi ba dunya pengudah Sitan dibuai ari serega?

14 Tang pengidup ba dunya balat tusah. Utai jai nyadi ba mensia “laban Sitan udah nurun,” lalu iya “balat pedis ati, laban iya nemu timpuh diri nyau deka abis.”  (Pemandang 12:12) Sitan balat pedis ati. Iya udah dibuai ari serega, lalu iya nemu diri deka dipunaska enda lama da agi. Iya enggau naka ulih ngenataika pengachau, pemedis, sereta pemerinsa di serata dunya.

15. Nama peneka Petara bekaul enggau dunya?

15 Tang peneka Petara bekaul enggau dunya enda berubah. Iya agi dekaka mensia ti sempurna idup belama iya ba paradais di dunya. (Masmur 37:29) Tang, baka ni Perintah Petara deka ngamatka utai tu?

16, 17. Nama dipadah Daniel 2:44 pasal Perintah Petara?

16 Ayat ba Daniel 2:44 madahka: ‘Lebuh bala raja nya megai perintah, Petara ti di serega deka numbuhka siti perintah ti enda nemu abis. Perintah nya ila enda ulih dialahka, tang iya deka ngerusak semua perintah bukai, lalu udah nya iya deka meruan belama iya.’ Nama dipadahka ayat tu pasal Perintah Petara?

17 Kesatu, ayat nya madahka Perintah Petara deka berengkah merintah “lebuh bala raja nya megai perintah.” Reti nya, perintah ti bukai agi mengkang bisi ba dunya lebuh Perintah Petara berengkah merintah. Kedua, ayat nya madahka, Perintah Petara deka meruan belama iya, lalu iya enda diganti enggau perintah ti bukai. Lalu ketiga, deka bisi perang entara Perintah Petara enggau semua perintah ba dunya tu. Perintah Petara deka menang, lalu semina Perintah nya aja ti deka merintah serata dunya. Lalu mensia deka bisi Perintah ti pemadu badas.

18. Perang ti penudi entara Perintah Petara enggau semua perintah ba dunya dikumbai nama?

18 Nama deka nyadi sebedau perang entara Perintah Petara enggau semua perintah ba dunya tu berengkah? Bala antu deka nesatka ‘semua raja di dunya tu,  lalu ngempuruka sida beperang lebuh Hari Besai Petara ti Pemadu Bekuasa.’ Amat, perintah mensia deka angkat ngelaban Perintah Petara, tang Perintah Petara deka menang. Perang ti penudi tu dikumbai Armagedon.—Pemandang 16:14, 16; peda Nota Penutup 10.

19, 20. Nama kebuah kitai begunaka Perintah Petara merintah atas dunya?

19 Nama kebuah kitai begunaka Perintah Petara? Bisi tiga iti kebuah. Kesatu, kitai bedosa, nya alai kitai ulih sakit sereta mati. Tang Bup Kudus madahka, di baruh Perintah Petara, kitai deka idup belama iya. Indah John 3:16 madahka: ‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka iya enda mati tang bulih pengidup ti meruan belama iya.’

20 Kedua, kitai dikelingi orang ke jai. Mayuh orang bula, nipu, sereta ngereja ulah ti kamah. Kitai enda ulih muai semua penyai nya, tang Petara ulih. Orang ke majak ngereja utai ti jai deka dipunaska maya Armagedon. (Bacha Masmur 37:10.) Ketiga, perintah mensia jai, makai suap, sereta nadai kuasa mutarka penusah. Sida nadai ati nulung orang ngasika Petara. Bup Kudus madahka, “orang bukai ke natka diri merinsa dipegai sida.”—Pengajar 8:9.

21. Baka ni Perintah Petara deka nentuka peneka Petara dikereja ba dunya?

21 Pengudah Armagedon, Perintah Petara deka nentuka peneka Petara dikereja ba dunya. Ngambika chunto, Perintah nya deka muai Sitan enggau bala antu iya. (Pemandang 20:1-3) Orang enda agi sakit tauka mati. Ketegal tebus, semua mensia ke tetap ati ulih idup belama iya ba Paradais. (Pemandang 22:1-3) Perintah nya  deka nguduska nama Petara. Nama reti tu? Reti iya, lebuh Perintah Petara merintah dunya, semua mensia deka ngemuliaka nama Jehovah.—Peda Nota Penutup 21.

NI MAYA JESUS NYADI RAJA?

22. Baka ni kitai nemu Jesus enda nyadi Raja lebuh iya ba dunya tauka sepengudah iya diangkatka idup baru?

22 Jesus ngajar bala murid iya besampi: “Datai meh Perintah Nuan.” Nya alai, Perintah Petara amat deka datai jemah ila. Jehovah deka numbuhka Perintah Iya dulu, lalu nyiri Jesus nyadi Raja. Kati Jesus terus nyadi Raja lebuh iya pulai ke serega? Enda, iya patut nganti. Nyau kelama pengudah Jesus diangkatka idup baru, Peter seduai Paul enggau terang nunjukka jaku Petara ke disebut ba Masmur 110:1 nyadi ba Jesus. Ba ayat nya Jehovah madahka: ‘Duduk muak ari kanan Aku datai  ke Aku udah ngaga munsuh nuan nyadika pelasar kaki nuan.’—Kereja Rasul 2:32-35; Hebrew 10:12, 13.

Perintah Petara deka nentuka peneka Petara dikereja ba dunya

23. (a) Ni maya Jesus berengkah merintah nyadi Raja ba Perintah Petara? (b) Nama deka dipelajarka kitai pengudah pelajar tu?

23 Ni maya Jesus berengkah merintah? Ba taun 1914. Betaun sebedau 1914, seraban orang Kristian ti ngembuan ati ti bendar nemu, nya taun ti besai reti ba Bup Kudus. Utai ke nyadi ba dunya kenyau taun 1914 udah nunjukka utai ku sida nya amat. Jesus berengkah merintah nyadi Raja ba taun nya. (Masmur 110:2) Enda lama udah nya, Sitan dibuai ke dunya, lalu diatu “iya nemu timpuh diri nyau deka abis.” (Pemandang 12:12) Pengudah pelajar tu, kitai deka meda mayuh agi bukti ke nunjukka kitai benung idup ba hari ti penudi. Kitai mega deka belajar, enda lama da agi Perintah Petara deka nentuka peneka Petara dikereja ba dunya.—Peda Nota Penutup 22.