Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Ulih Dipelajarka Kitai Ari Bup Kudus?

 PELAJAR 2

Bup Kudus—Bup Ari Petara

Bup Kudus—Bup Ari Petara

1, 2. Nama kebuah Bup Kudus nya pemeri ti chukup manah ari Petara?

BAKA NI asai ati nuan lebuh pangan nuan meri nuan pemeri tauka hadiah? Nuan tentu enda sabar deka muka pemeri nya, lalu nuan gaga ati laban pangan nuan ibuhka nuan. Nuan beterima kasih ngagai iya ke pemeri nya.

2 Bup Kudus nya pemeri ari Petara. Bup Kudus meri kitai penerang ke enda ulih ditemu kitai ba endur bukai. Ngambika chunto, Bup Kudus madahka, Petara nempa serega, dunya, sereta lelaki enggau indu ti keterubah. Bup Kudus meri prinsip ke ulih nulung kitai lebuh napi penanggul. Dalam Bup Kudus, kitai belajarka chara Petara deka nembuka tuju Iya ngaga dunya nyadi endur ti manah agi. Bup Kudus endang pemeri ti chukup manah!

3. Nama deka ditemu nuan seraya nuan belajarka Bup Kudus?

3 Seraya nuan belajarka Bup Kudus, nuan deka nemu Petara deka nuan nyadi pangan Iya. Mayuh agi utai ti dipelajarka nuan pasal Iya, rapat agi kaul nuan enggau Iya.

4. Nama utai ti ngerinduka ati nuan pasal Bup Kudus?

4 Bup Kudus udah disalin ngagai lebih ari 2,800 bengkah jaku, lalu bebiliun iti udah dichelak. Bebiliun iku orang di serata dunya ulih macha Bup Kudus dalam jaku sida empu. Lalu ninting minggu, lebih ari sejuta iku orang bulih Bup Kudus! Amat, nadai bup bukai ke baka Bup Kudus.

5. Nama kebuah kitai ulih ngumbai Bup Kudus endang ‘bepun ari Petara’?

 5 Bup Kudus endang ‘bepun ari Petara.’ (Bacha 2 Timoti 3:16.) Tang sekeda orang engka berunding, ‘Bup Kudus ditulis mensia, nya alai baka ni iya tau datai ari Petara?’ Bup Kudus nyaut: ‘Mensia, nyebut pesan Petara ti dibai [tauka, diiring] roh kudus.’ (2 Peter 1:21) Tu baka seiku tuke ke ngasuh kerani iya nulis siti surat. Sapa pengarang surat nya? Tuke, ukai kerani. Baka nya mega, Pengarang Bup Kudus nya Petara, ukai bala mensia ke dikena Iya nulis Bup Kudus. Petara ngiring sida ngambika nulis runding Iya. Bup Kudus endang amat ‘jaku Petara.’—1 Tesalonika 2:13; peda Nota Penutup 2.

New World Translation of the Holy Scriptures udah bisi dalam mayuh bansa jaku

 BUP KUDUS ENDANG BETUL

6, 7. Nama kebuah kitai ulih ngumbai semua begian dalam Bup Kudus sejalai enggau pangan diri?

6 Bup Kudus ditulis dalam kandang lebih ari 1,600 taun. Bala penulis Bup Kudus idup ba jeman ti enda sebaka. Sekeda ari sida orang ke tepelajar, lalu sekeda da agi enda. Ngambika chunto, seiku ari sida nya lutur. Iya ke bukai nya orang ke betanam, orang berikan, pengibun jelu, nabi, hakim, sereta raja. Taja pan bala penulis Bup Kudus ukai orang ti sama, tang semua begian dalam Bup Kudus sejalai enggau pangan diri. *

7 Bup ti keterubah dalam Bup Kudus, Pemungkal, nerangka baka ni penusah ba dunya berengkah, lalu bup ti penudi, Pemandang, madahka baka ni Petara deka mutarka penusah nya enggau ngaga bumi nyadi paradais. Bup Kudus mungkur beribu taun sejarah mensia, sereta nunjukka tuju Petara endang seruran dikeamatka.

8. Beri chunto ke nunjukka Bup Kudus sejalai enggau sains.

8 Bup Kudus ukai ditulis kena ngajar sains, tang pekara ti disebut iya bekaul enggau sains endang seruran betul. Tu meh utai ti dikearapka kitai ari bup ke datai ari Petara. Ngambika chunto, bup Adat Lewi ngundan atur ari Petara pasal chara orang Israel ulih nagang penyakit ari ngelekai. Atur tu udah lama ditulis sebedau orang nemu baka ni bakteria enggau virus ulih ngasuh penyakit nyadi. Bup Kudus mega betul lebuh iya madahka, dunya begitang ba langit puang. (Jop 26:7) Lalu lebuh mayuh orang bisi runding ti salah pasal gamal dunya  tu, Bup Kudus madahka dunya tu segala.—Isaiah 40:22, nota kaki.

9. Nama ulih ditemu kitai pasal Bup Kudus ari ulah bala penulis iya ke enda bula?

9 Lebuh Bup Kudus nyebut pasal sejarah, iya endang seruran betul. Tang mayuh bup sejarah enda seruran betul laban bala penulis enda nulis utai ti amat. Ngambika chunto, sida enda selalu nulis pasal kemaya bansa sida alah ba perang. Tang bala penulis Bup Kudus enda bula, indah lebuh orang Israel dialahka. Sida mega nulis pasal penyalah diri. Ngambika chunto, ba bup Penyampau, Moses madahka diri ngereja penyalah ti besai, lalu ketegal nya Petara disiplin iya. (Penyampau 20:2-12) Ulah bala penulis Bup Kudus ke lurus nunjukka Bup Kudus datai ari Petara, lalu kitai tau arapka Bup Kudus.

BUP KE NGEMBUAN MAYUH JAKU AJAR TI MANAH

10. Nama kebuah jaku ajar ari Bup Kudus beguna ba kitai kemaya hari tu?

10 Bup Kudus endang ‘bepun ari Petara magang, lalu beguna kena ngajar, kena ngerara, kena ngaduka utai ti salah.’ (2 Timoti 3:16) Amat, jaku ajar ari Bup Kudus beguna ba kitai kemaya hari tu. Jehovah nemu baka ni kitai ditempa, nya alai Iya nemu runding sereta asai ati kitai. Iya ngelala kitai lebih agi ari kitai empu, lalu Iya deka kitai lantang ati. Iya nemu utai ti manah enggau utai ti enda manah ke kitai.

11, 12. (a) Nama jaku ajar ti manah ke diberi Jesus ba Matthew bab 5 ngagai 7? (b) Nama agi ulih dipelajarka kitai ari Bup Kudus?

11 Ba Matthew bab 5 ngagai 7, kitai macha jaku ajar ti manah ari Jesus pasal chara ngulihka pengelantang, chara begulai enggau orang bukai, chara besampi, sereta chara ngena duit. Taja pan Jesus meri jaku ajar tu  2,000 taun ti udah, jaku ajar tu agi ulih dikena sereta beguna kemaya hari tu.

12 Dalam Bup Kudus, Jehovah mega ngajar kitai prinsip ke nulung kitai bulih pengidup ti manah agi ba ruang bilik, nyadi pekereja ti manah, sereta idup bebaik enggau orang bukai. Prinsip Bup Kudus seruran ulih nulung kitai, enda ngira sapa kitai, dini alai kitai diau, tauka nama penusah ti dikemisi kitai.—Bacha Isaiah 48:17; peda Nota Penutup 3.

UAN TAU ARAPKA UTAI TI DIPADAH DALAM BUP KUDUS

Penulis Bup Kudus, Isaiah, madahka Babilon deka dialahka

13. Nitih ku Isaiah, nama deka nyadi ngagai menua Babilon?

13 Mayuh utai ke deka nyadi ti dipadah dalam Bup Kudus udah dikeamatka. Ngambika chunto, Isaiah madahka menua Babilon deka dialahka. (Isaiah 13:19) Iya enggau nyemetak madahka baka ni menua nya deka dialahka. Menua nya bisi sungai sereta pintu kuta ti tegap. Tang Isaiah madahka, sungai nya deka dirangkai lalu pintu kuta deka ditejuka tebuka. Bala soldadu ke nyerang ngalahka menua nya enggau enda beperang. Isaiah mega madahka, orang ke benama Sairus deka ngalahka Babilon.—Isaiah 44:27–45:2; peda Nota Penutup 4.

14, 15. Baka ni utai ti dipadah Isaiah dikeamatka?

14 Dua ratus taun pengudah utai ke deka nyadi nya ditulis, seraban soldadu datai nyerang Babilon. Sapa nguluka sida? Baka ke udah dipadah, orang nya Sairus, raja menua Persia. Kati bala soldadu Sairus ulih ngalahka Babilon, baka ke dipadah nabi Isaiah?

15 Kena malam menua nya diserang, orang Babilon benung rami. Sida berasai likun laban sida bisi sungai  sereta dinding kuta ti besai. Ba luar kuta, Sairus enggau bala soldadu iya numbak pemintas kena ngurangka penyampau ai ba sungai. Ai ba sungai chukup langkang alai bala soldadu Persia ngelayang ke seberai. Tang baka ni bala soldadu nya ulih tama ngagai Babilon? Baka ke udah dipadah, pintu menua Babilon ditejuka tebuka,  nya alai bala soldadu ulih ngalahka menua nya enggau enda beperang.

16. (a) Nama dipadah Isaiah pasal utai ke deka nyadi di Babilon jemah ila? (b) Baka ni kitai nemu utai ti dipadah Isaiah udah dikeamatka?

16 Isaiah madahka, pengujung iya nadai mensia deka diau di menua Babilon agi. Ku iya nulis: “Nadai orang deka diau dia agi.” (Isaiah 13:20) Kati tu amat nyadi? Endur alai Babilon menya, kira-kira 80 kilometer ke selatan Baghdad, Iraq, semina bisi tembawai aja. Indah kemaya hari tu, nadai orang diau dia. Jehovah nyapu Babilon “ngena penyapu pengerusak.”—Isaiah 14:22, 23, NW.

Tembawai Babilon

17. Nama kebuah kitai tau arapka semua semaya ari Petara?

17 Laban mayuh utai ke deka nyadi ti dipadah ba Bup Kudus udah dikeamatka, nya alai kitai tau arapka utai ti dipadah Bup Kudus pasal jemah ila. Kitai pechaya, Jehovah deka ngamatka semaya Iya ti deka ngaga dunya nyadi paradais. (Bacha Penyampau 23:19.) Amat, kitai bisi  pengadang ke ‘pengidup ti meruan belama iya, ti udah disemaya Petara (Petara enda kala bula) kenyau ari sebedau penumbuh dunya.’—Titus 1:2. *

BUP KUDUS ULIH NGUBAH PENGIDUP NUAN

18. Nama dipadah Paul pasal ‘jaku Petara’?

18 Kitai udah belajar, nadai bup bukai ke baka Bup Kudus. Semua begian dalam Bup Kudus sejalai enggau pangan diri, lalu lebuh iya nyebut pasal pekara ke bekaul enggau sains tauka sejarah, iya endang seruran betul. Bup Kudus mega meri kitai jaku ajar ti manah sereta ngundan mayuh utai ti dipadah ke udah dikeamatka. Tang Bup Kudus ukai semina bekaul enggau utai tu aja. Rasul Paul nulis: ‘Jaku Petara idup sereta bekuasa.’ Nama reti nya?—Bacha Hebrew 4:12.

19, 20. (a) Baka ni Bup Kudus ulih nulung nuan ngelala diri empu? (b) Baka ni nuan ulih ngayanka diri beterima kasih ke Bup Kudus?

19 Bup Kudus ulih ngubah pengidup nuan. Iya ulih nulung nuan ngelala diri empu. Iya ulih nulung nuan meretika utai ti amat dirunding sereta diasaika nuan. Ngambika chunto, kitai engka ngumbai diri rinduka Petara. Tang kena nunjukka diri rinduka Petara, kitai patut nitihka utai ti dipadah Bup Kudus.

20 Bup Kudus endang bup ari Petara. Petara deka nuan macha, belajar sereta rinduka Bup Kudus. Beterima kasih meh ke pemeri tu, lalu terus belajarka iya. Udah nya, nuan deka nemu tuju Petara ngaga mensia. Pengudah pelajar tu, kitai deka belajar mayuh agi pasal tuju Petara tu.

^ per. 6 Sekeda orang madahka, utai ke bisi dalam Bup Kudus enda sejalai enggau pangan diri, tang tu enda amat. Peda lambar 3 enggau lambar 31 ba brosur BibleApakah Mesejnya-ML, ke dikeluarka Saksi-Saksi Jehovah.

^ per. 17 Pengerusak Babilon nya semina siti ari utai ti dipadah dalam Bup Kudus ke udah dikeamatka. Nuan ulih meda penerang pasal utai ti dipadah pasal Jesus Kristus ba Nota Penutup 5.