Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Ulih Dipelajarka Kitai Ari Bup Kudus?

 PELAJAR 18

Patut Aku Nyerahka Pengidup Diri Ngagai Petara Lalu Dibaptisa?

Patut Aku Nyerahka Pengidup Diri Ngagai Petara Lalu Dibaptisa?

1. Nama engka diperunding nuan pengudah belajarka bup tu?

NUAN udah belajarka mayuh pemendar ari Bup Kudus lebuh nuan belajarka bup tu. Nuan belajar pasal pengidup ti belama iya ke disemaya Petara, nama nyadi ngagai orang ke udah mati, sereta pengadang diangkatka idup baru. (Pengajar 9:5; John 5:28, 29; Pemandang 21:3, 4) Nuan engka udah berengkah datai ngagai gempuru Saksi-Saksi Jehovah, lalu pechaya sida ngembuan sembah ti bendar. (John 13:35) Nuan engka udah berengkah ngemansangka kaul ti rapat enggau Jehovah, lalu engka udah mutus deka nyembah Iya. Nya alai nuan engka  berunding, ‘Nama patut digaga aku diatu ngambika ulih nyembah Petara?’

2. Nama kebuah pemesai ari Etiopia nya deka dibaptisa?

2 Nya meh utai ti diperunding seiku pemesai ari Etiopia ke idup maya jeman Jesus. Enda lama pengudah Jesus diangkatka idup baru, murid Jesus ke benama Philip nginjil ngagai lelaki nya. Philip nerangka ngagai iya, Jesus nya endang Messiah. Lelaki nya berasai diperansang enggau utai ti udah dipelajarka iya, nya alai iya jejampat madahka: “Peda nuan, ditu bisi ai. Nama utai ti tau nagang aku dibaptisa?”—Kereja Rasul 8:26-36.

3. (a) Nama pesan ti diberi Jesus ngagai bala murid iya? (b) Baka ni orang patut dibaptisa?

3 Bup Kudus enggau terang madahka, enti nuan deka gawa ke Jehovah, nuan patut dibaptisa. Jesus madah ngagai bala murid iya: ‘Gaga sida nyadi murid aku, maptisa sida.’ (Matthew 28:19) Jesus mega nyadi chunto lebuh iya empu dibaptisa. Iya diselam abis dalam ai, ukai semina dipechik tauka ditata ngena ai ba atas pala. (Matthew 3:16) Kemaya hari tu, lebuh orang Kristian dibaptisa, iya mega enda tau enda diselam abis dalam ai.

4. Nama ditunjukka nuan ngagai orang bukai lebuh nuan baptisa?

4 Lebuh nuan dibaptisa, nya nunjukka ngagai orang bukai, nuan amat deka nyadi pangan Petara sereta gawa ke Iya. (Masmur 40:7, 8) Nya alai nuan engka berunding, ‘Nama patut digaga aku ngambika tau dibaptisa?’

KITAI PATUT NGEMBUAN PENEMU SERETA PENGARAP BA JEHOVAH

5. (a) Nama patut digaga nuan dulu sebedau tau dibaptisa? (b) Nama kebuah gempuru Kristian nya beguna?

5 Sebedau nuan tau dibaptisa, nuan enda tau enda ngelala Jehovah enggau Jesus. Nuan udah berengkah ngereja tu lebuh nuan belajarka Bup Kudus. (Bacha John  17:3.) Tang nya enda chukup. Bup Kudus madahka, nuan enda tau enda “dipenuhka enggau penemu” ti betul pasal peneka Jehovah. (Kolosi 1:9) Gempuru Saksi-Saksi Jehovah deka nulung nuan bisi kaul ti rapat agi enggau Jehovah. Tu meh siti kebuah nuan patut datai ngagai gempuru enggau bejarit.—Hebrew 10:24, 25.

Sebedau dibaptisa, nuan enda tau enda belajarka Bup Kudus

6. Ni pemayuh utai dalam Bup Kudus ke patut ditemu nuan sebedau tau dibaptisa?

6 Endang amat, Jehovah enda ngarapka nuan nemu semua utai dalam Bup Kudus sebedau nuan dibaptisa. Iya enda ngarapka pemesai ari Etiopia nya nemu semua utai sebedau iya dibaptisa. (Kereja Rasul 8:30, 31) Lalu kitai deka terus belajar pasal Petara belama iya. (Pengajar 3:11) Tang ngambika tau dibaptisa, nuan patut nemu sereta nerima abis nadai pan batang ajar ari Bup Kudus.—Hebrew 5:12.

7. Baka ni belajarka Bup Kudus udah nulung nuan?

7 Bup Kudus madahka: ‘Nadai orang ulih ngerinduka ati Petara enti iya enda arapka Petara.’ (Hebrew 11:6) Nya alai nuan patut arapka Petara sebedau nuan tau dibaptisa. Bup Kudus madahka, sekeda orang di nengeri Korint kelia ninga utai ti diajar bala murid Jesus, lalu enggau tu sida berengkah “arap lalu dibaptisa.” (Kereja Rasul 18:8) Pia mega, belajarka Bup Kudus udah nulung nuan arapka semaya Petara sereta genselan Jesus ke ulih nyelamatka kitai ari dosa enggau pemati.—Josua 23:14; Kereja Rasul 4:12; 2 Timoti 3:16, 17.

MADAHKA PEMENDAR BUP KUDUS NGAGAI ORANG BUKAI

8. Nama deka meransang nuan madahka utai ti udah dipelajarka nuan ngagai orang bukai?

8 Seraya nuan belajar mayuh agi ari Bup Kudus sereta beratika baka ni Bup Kudus nulung nuan ba pengidup,  pengarap nuan deka teguh agi. Nuan deka madahka utai ti dipelajarka nuan ngagai orang bukai. (Jeremiah 20:9; 2 Korint 4:13) Tang ngagai sapa kitai patut madah?

Arapka Jehovah patut meransang nuan madahka utai ti dipechaya nuan ngagai orang bukai

9, 10. (a) Ngagai sapa nuan ulih berengkah bekunsi utai ti udah dipelajarka nuan? (b) Nama patut digaga nuan enti deka nginjil enggau bala menyadi Kristian?

9 Nuan ulih madahka utai ti dipelajarka nuan ngagai diri sebilik, bala pangan, orang ke diau berimbai enggau nuan, tauka orang ke sama kereja enggau nuan. Nya endang manah, tang seruran ngereja tu enggau chara ti nelap sereta bisi pengerindu. Nyau kelama nuan tau berengkah nginjil enggau bala menyadi Kristian. Lebuh nuan ngasaika diri sedia ngereja nya, nuan ulih bejaku enggau Saksi ke ngajar nuan Bup Kudus, lalu madah ngagai iya, nuan deka enggau bala menyadi Kristian nginjil. Enti iya ngasaika nuan udah besedia, lalu enti nuan udah idup sejalai enggau standard Bup Kudus, seduai udah nya tau betemu enggau dua iku tuai gempuru ba eklisia.

10 Nama deka nyadi ba aum nya? Tuai gempuru nya deka berandau enggau nuan kena nentuka nuan nemu sereta pechayaka batang ajar Bup Kudus, nuan nitihka utai ti dipadah Bup Kudus ba pengidup besehari-hari, lalu nuan amat deka nyadi Saksi Jehovah. Kingatka, tuai gempuru ibuhka semua bala menyadi Kristian, nyengkaum nuan, nya alai anang takut bejaku enggau seduai iya. (Kereja Rasul 20:28; 1 Peter 5:2, 3) Pengudah aum nya, tuai gempuru nya deka madah ngagai nuan sekalika nuan ulih berengkah nginjil enggau bala menyadi Kristian.

11. Nama kebuah nya beguna ngaga ubah sebedau nuan ulih nginjil enggau bala menyadi Kristian?

11 Tuai gempuru nya engka madahka nuan patut ngaga  mayuh agi ubah sebedau nuan ulih berengkah nginjil enggau bala menyadi Kristian. Nama kebuah beguna bendar ngaga ubah nya? Laban lebuh kitai bejaku pasal Jehovah ngagai orang bukai, kitai ngarika Iya lalu enda tau enda idup enggau chara ti ngemuliaka Iya.—1 Korint 6:9, 10; Galatia 5:19-21.

NESAL ATI LALU PULAI BARU

12. Nama kebuah semua orang patut nesal ati?

12 Bisi utai bukai ke enda tau enda digaga sebedau nuan tau dibaptisa. Rasul Paul madahka: ‘Nesal ati meh kita lalu pulai baru ngagai Petara, ngambika dosa kita diampun.’ (Kereja Rasul 3:19) Nama reti nesal ati? Nya asai ati ti balat nesal ke penyalah ti udah digaga kitai. Ngambika chunto, enti nuan ngereja ulah seks ti kamah ba pengidup, nuan patut nesal ati. Lalu taja pan nuan udah enggau naka ulih nguji ngereja utai ti ngena, nuan mega patut nesal ati, laban semua kitai bedosa lalu patut minta ampun ari Petara.—Rome 3:23; 5:12.

13. Nama reti “pulai baru”?

13 Kati nya chukup semina nesal ati ke penyalah ti udah digaga nuan? Enda. Peter madahka, nuan mega patut “pulai baru.” Reti nya nuan patut nulak semua pendiau lama ti salah, lalu berengkah ngereja utai ti ngena. Ngambika chunto, uji gambarka nuan baru ke terubah iya ngagai siti endur. Enda lama udah nya, nuan ngasaika diri nuju ngagai endur ti salah. Nama deka digaga nuan? Nuan tentu deka ngurangka pengelaju kerita, ngetu, nikal baru, lalu udah nya nuju ngagai endur ke betul. Pia mega, lebuh belajarka Bup Kudus, nuan engka beratika tebiat tauka utai ba pengidup ti patut diubah. Nya alai, patut deka “pulai baru”—iya nya, ngaga ubah ti patut—lalu berengkah ngereja utai ti ngena.

 NYERAHKA DIRI EMPU NGAGAI PETARA

Kati nuan udah besemaya ngagai Jehovah, nuan deka gawa ke Iya?

14. Baka ni nuan nyerahka diri empu ngagai Petara?

14 Siti agi utai beguna ke patut digaga nuan sebedau dibaptisa, iya nya nyerahka diri empu ngagai Jehovah. Lebuh nuan ngereja tu, nuan nyebut dalam sampi, madahka diri deka nyembah Iya aja, lalu nyadika peneka Iya utai ti pemadu beguna ba pengidup nuan.—Ulang Adat 6:15.

15, 16. Nama meransang orang deka nyerahka diri ngagai Petara?

15 Besemaya semina deka gawa ke Jehovah aja sama baka besemaya deka ngena sepemanjai pengidup nuan enggau orang ti dikesayauka nuan. Uji gambarka, seiku lelaki enggau seiku indu benung bedating. Seraya lelaki nya ngelala indu nya enggau manah agi, iya belabuh sayauka indu nya lalu deka jadi enggau indu nya. Taja pan tu pemutus ti besai, lelaki nya sanggup nerima tanggung pengawa tu laban iya sayauka indu nya.

16 Seraya nuan belajar pasal Jehovah, nuan belabuh rinduka Iya sereta deka enggau naka ulih gawa ke Iya. Tu meransang nuan nyebut dalam sampi, madahka diri deka gawa ke Iya. Bup Kudus madahka, barang sapa ke deka nitihka Jesus enda tau enda “badu agi berundingka diri empu.” (Mark 8:34) Nama reti nya? Reti nya, nuan patut ngasika Jehovah dulu ba pengidup nuan. Utai ti dikedekaka Jehovah berat agi ari pengingin sereta juluk ati diri empu.—Bacha 1 Peter 4:2.

ANANG TAKUT ENDA MUJUR

17. Nama kebuah sekeda orang enda nyerahka diri empu ngagai Jehovah?

17 Sekeda orang enda nyerahka diri empu ngagai Jehovah, laban sida takut enggaika diri enda ulih ngamatka semaya ti deka gawa ke Iya. Sida enggai ngelebuka Jehovah,  tauka sida engka ngumbai enti sida enda nyerahka diri ngagai Iya, Jehovah enda minta sida betanggungjawapka utai ti dikereja sida.

18. Nama deka nulung nuan mutarka asai ati ti nangi enggai ngelebuka Iya?

18 Pengerindu ngagai Jehovah deka nulung nuan mutarka asai ati ti nangi enggai ngelebuka Iya. Ketegal rinduka Iya, nuan deka enggau naka ulih ngamatka semaya diri ngagai Iya. (Pengajar 5:4; Kolosi 1:10) Nuan enda ngumbai ngereja peneka Jehovah nya utai ti kelalu mar. Rasul John nulis: ‘Reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’—1 John 5:3.

19. Nama kebuah nuan enda patut takut nyerahka diri empu ngagai Jehovah?

19 Nuan tau enda ibuh nyadi orang ti sempurna enti deka nyerahka diri empu ngagai Jehovah. Iya enda kala ngarapka kitai ngereja utai ti lebih ari ke ulih dikereja kitai. (Masmur 103:14) Iya deka nulung nuan ngereja utai ti ngena. (Isaiah 41:10) Arapka Jehovah enggau pengabis ati, lalu “Iya deka nunjukka jalai ti ngena ngagai nuan.”—Jaku Dalam 3:5, 6.

NGAKU NGENA MULUT, LALU DISELAMATKA

20. Pengudah nyerahka diri empu ngagai Jehovah, nama patut digaga nuan udah nya?

20 Kati nuan ngasaika diri udah sedia deka nyerahka diri empu ngagai Jehovah? Pengudah nyerahka diri empu ngagai Jehovah, nuan udah sedia ngagai pemutus ke nangkanka nya. Nuan patut dibaptisa.

21, 22. Baka ni nuan ulih ngaku pengarap nuan “ngena mulut”?

21 Awakka tuai ti ngatur tuai gempuru ba eklisia nuan nemu, nuan udah nyerahka diri empu ngagai Jehovah  lalu deka dibaptisa. Udah nya iya deka ngatur beberapa iku tuai gempuru berandauka batang ajar Bup Kudus enggau nuan. Enti sida beratika nuan udah sedia, sida deka madahka nuan tau dibaptisa ba gempuru besai tauka konvensyen Saksi-Saksi Jehovah ti deka datai. Ba gempuru besai, bisi siti  cheramah ke nerangka reti baptisa. Pencheramah deka nanya chalun baptisa dua iti tanya ti mudah. Enggau nyaut tanya nya, nuan ngaku pengarap nuan “ngena mulut.”—Rome 10:10.

 22 Udah nya nuan tau dibaptisa. Nuan deka diselam abis dalam ai. Baptisa deka nunjukka ngagai semua orang, nuan udah nyerahka diri empu ngagai Jehovah lalu diatu nuan nyadi seiku ari Saksi-Saksi Jehovah.

UTAI TI DIGAMBARKA BAPTISA NUAN

23. Nama reti dibaptisa ‘dalam nama Apai, Anak enggau roh kudus’?

23 Jesus madahka, bala murid iya deka dibaptisa ‘dalam nama Apai, Anak enggau roh kudus.’ (Bacha Matthew 28:19.) Nama reti nya? Reti nya, nuan ngaku penuduk Jehovah sereta ungkup Jesus dalam tuju Petara nyengkaum baka ni Petara ngena roh kudus Iya ngamatka peneka Iya.—Masmur 83:18; Matthew 28:18; Galatia 5:22, 23; 2 Peter 1:21.

Lebuh nuan dibaptisa, nuan nunjukka diri deka ngereja peneka Petara

24, 25. (a) Nama digambarka baptisa? (b) Nama deka dikerandauka kitai ba pelajar ke penudi?

24 Baptisa ngambarka utai ti besai amat reti. Lebuh nuan diselam dalam ai, reti nya nuan mati, tauka ninggalka chara pengidup ti lama. Lebuh nuan pansut ari ai, nuan deka bisi pengidup ti baru iya nya ngereja peneka Petara. Tu nunjukka, berengkah ari maya nya nuan deka gawa ke Jehovah. Kingatka, nuan ukai nyerahka diri ngagai mensia, gerempung, tauka kereja. Nuan udah nyerahka pengidup diri ngagai Jehovah.

25 Pengawa nyerahka diri ngagai Jehovah deka nulung nuan ngemansangka kaul ti rapat enggau Iya. (Masmur 25:14) Tu ukai reti orang deka selamat ketegal iya udah dibaptisa. Rasul Paul nulis: “Awakka kita bekereja enggau ati ti nangi sereta getar-getar ngenyukupka pengelepas kita.” (Pilipi 2:12) Baptisa nya semina pun aja. Tang baka ni nuan ulih meruan semak ngagai Jehovah? Pelajar ke penudi ba bup tu deka nyaut tanya nya.