Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Ulih Dipelajarka Kitai Ari Bup Kudus?

 PELAJAR 7

Deka Bisi Pengangkat Ari Mati!

Deka Bisi Pengangkat Ari Mati!

1-3. Semua kitai enda ulih lepas ari utai nama, lalu baka ni Jehovah deka ngelepaska kitai?

UJI gambarka, nuan diukum jil seumur idup ketegal penyalah ke enda dikereja nuan. Nuan nadai peluang dilepaska. Pengidup nuan baka ke nadai reti agi, lalu nuan nadai ulih ngereja nama-nama utai kena mutarka nya. Tang lebuh nuan udah ngumbai diri nadai pengadang agi, nuan nemu bisi orang ke ulih ngelepaska nuan, lalu iya udah besemaya deka nulung nuan! Baka ni asai ati nuan?

2 Semua kitai enda ulih lepas ari pemati. Enda ngira nama utai ti dikereja kitai, kitai enda ulih lepas. Tang Jehovah bisi kuasa kena ngelepaska kitai ari pemati. Lalu Iya udah besemaya, “munsuh ti pemadu dudi dirusak nya pemati.”—1 Korint 15:26.

3 Uji gambarka pengelantang ba ati ke deka diasaika nuan lebuh badu agi irau pasal pemati! Tang Jehovah ukai semina deka muai pemati. Iya mega deka ngidupka orang ke udah mati. Pikirka baka ni tu meri penguntung ngagai nuan. Jehovah besemaya, orang ke udah mati deka idup baru. (Isaiah 26:19) Tu utai ke dikumbai Bup Kudus, pengangkat ari mati.

LEBUH ORANG TI DIKESAYAUKA MATI

4. (a) Nama ulih ngelantangka ati kitai lebuh diri sebilik tauka pangan mati? (b) Sapa sekeda ari pangan rapat Jesus?

4 Lebuh diri sebilik tauka pangan rapat mati, kitai berasai balat merinsa sereta tusah ati. Kitai berasai nadai  daya. Kitai enda ulih ngangkatka orang nya idup baru. Tang Bup Kudus meri kitai pengelantang ba ati. (Bacha 2 Korint 1:3, 4.) Aram kitai berandauka siti chunto ke nunjukka, Jehovah enggau Jesus keran deka ngangkatka orang ti dikesayauka kitai idup baru. Lebuh Jesus ba dunya, iya suah nemuai ngagai Lasarus sereta menyadi indu iya, Marta seduai Maria. Sida tiga nya pangan rapat Jesus. Bup Kudus madahka: “Jesus rinduka Marta, Maria enggau Lasarus.”—John 11:3-5.

5, 6. (a) Nama digaga Jesus lebuh iya meda sida ke sebilik enggau Lasarus sereta bala pangan iya tusah ati? (b) Nama kebuah nemu asai ati Jesus pasal pemati ulih ngelantangka ati kitai?

5 Udah nya, Lasarus mati. Jesus datai ngelantangka ati Marta seduai Maria. Lebuh Marta ninga Jesus baru deka datai, iya lalu ngambat Jesus. Iya gaga meda Jesus, tang ku iya madah ngagai Jesus: ‘Enti nuan bisi ditu lebuh maya nya, menyadi aku tentu enda mati!’ Marta ngumbai Jesus udah laun datai. Udah nya Jesus meda Maria nyabak. Lebuh meda semua orang ke dia tusah ati, Jesus berasai tusah ati lalu nyabak. (John 11:21, 33, 35) Iya ngasaika pemerinsa ke ditapi kitai lebuh lenyau orang ti dikesayauka kitai.

6 Penusah ati ke diayanka Jesus ulih meransang kitai. Tu nulung kitai nemu, Jesus enggau Apai iya, Jehovah, begedika pemati. Jehovah bisi kuasa kena muai pemati belama iya, lalu tu meh utai ti deka dikereja Iya enda lama da agi.

“LASARUS, PANSUT NUAN!”

7, 8. Nama kebuah Marta nagang orang maringka batu ari kubur Lasarus, tang nama digaga Jesus?

7 Lebuh Jesus datai ba lubang gua ke endur nguburka Lasarus, pintu penama ngagai lubang gua nya ditutup  ngena sigi batu ti besai. Ku Jesus madahka: “Baringka batu nya ke tisi!” Tang Marta nagang sida. Bangkai Lasarus udah empat hari dalam kubur nya. (John 11:39) Marta enda nemu utai ti deka dikereja Jesus kena nulung menyadi iya.

Uji gambarka pengaga ati sida ke sebilik enggau Lasarus sereta bala pangan lebuh iya diangkatka idup baru! —John 11:38-44

8 Jesus ngangauka Lasarus: “Pansut nuan!” Lalu utai ke dipeda Marta seduai Maria udah nya ngalitka ati. “Orang ke mati nya lalu pansut. Kaki jari iya ditanchang ngena urik kain.” (John 11:43, 44) Lasarus udah diangkatka ari mati! Iya begulai baru enggau diri sebilik sereta bala pangan iya. Sida ulih megai, negu, sereta bejaku enggau iya. Nya endang kereja ajih! Jesus udah ngangkatka Lasarus idup baru.

“ENDU, ANGKAT NUAN!”

9, 10. (a) Sapa ke meri Jesus kuasa kena ngangkatka orang idup baru? (b) Nama kebuah cherita pasal pengangkat ari mati beguna ba kitai?

9 Kati Jesus ngangkatka orang ari mati ngena kuasa iya empu? Enda. Sebedau Jesus ngangkatka Lasarus idup baru, iya besampi ngagai Jehovah, lalu Jehovah meri iya kuasa kena ngidupka Lasarus. (Bacha John 11:41, 42.) Ukai semina Lasarus aja ke diangkatka idup baru. Bup Kudus madah pasal seiku anak mit indu ke beumur 12 taun ti balat sakit. Apai iya, Jairus, balat irau, lalu minta Jesus ngeraika anak iya. Anak mit indu nya anak tunggal Jairus. Lebuh iya benung bejaku enggau Jesus, sekeda orang datai lalu madahka: “Anak nuan udah mati. Anang agi ngiruh Pengajar.” Tang ku Jesus madah ngagai Jairus: “Anang takut. Arap aja. Iya deka idup.” Udah nya, Jesus mupuk enggau Jairus. Lebuh datai semak rumah Jairus, Jesus meda sereta ninga orang nyabak. Jesus ngasuh sida: “Anang nyabak, laban iya ukai mati, tang tinduk!”  Apai enggau indai anak mit nya tentu deka nemu utai ku Jesus nya. Jesus ngasuh semua orang pansut ari rumah nya, lalu mai apai enggau indai anak mit nya ngagai bilik ke alai sida ngalika iya. Jesus megai jari anak mit nya, lalu ngangau: “Anak, angkat nuan!” Uji gambarka pengaga ati apai indai anak mit nya lebuh iya tekala nya angkat lalu bejalai! Jesus udah ngangkatka anak seduai iya idup baru. (Mark 5:22-24, 35-42; Luke 8:49-56) Kenyau ari hari nya, lebuh apai indai nya meda anak indu seduai iya, seduai iya ingatka utai ti udah dikereja Jehovah ke sida nengah Jesus. *

10 Orang ke diangkatka Jesus idup baru nya agi ulih mati. Tang utai ti dibacha kitai pasal sida beguna laban nya meri kitai pengadang ti bendar. Jehovah deka ngangkatka orang idup baru, lalu Iya endang deka ngereja nya.

UTAI TI DIPELAJARKA KITAI ARI CHERITA PASAL PENGANGKAT ARI MATI

Rasul Peter ngangkatka seiku indu Kristian ke benama Dorkas idup baru.—Kereja Rasul 9:36-42

Elijah ngangkatka anak lelaki seiku indu balu idup baru.—1 Raja 17:17-24

11. Nama dipelajarka kitai pasal Lasarus ari Pengajar 9:5?

11 Bup Kudus enggau terang madahka, “orang ke mati nadai nemu utai.” Tu ulih ditemu ari Lasarus. (Pengajar 9:5) Baka ke dipadah Jesus, Lasarus baka ke tinduk. (John 11:11) Lebuh dalam kubur, Lasarus “nadai nemu utai.”

12. Baka ni kitai nemu pengangkat Lasarus ari mati nya endang amat nyadi?

12 Lebuh Jesus ngangkatka Lasarus idup baru, mayuh  orang meda pengawa tu. Indah bala munsuh Jesus nemu, iya udah ngereja kereja ajih. Lasarus idup, lalu tu nunjukka pengangkat ari mati nya amat bisi nyadi. (John 11:47) Pia mega, mayuh orang ngusung Lasarus, lalu ketegal tu, sida berengkah pechaya Jesus udah dikirumka Petara. Bala munsuh Jesus enda nyamai ati enggau utai tu, nya alai sida bekira deka munuh Jesus enggau Lasarus.—John 11:53; 12:9-11.

13. Nama kebuah kitai pechaya Jehovah deka ngangkatka orang ke udah mati idup baru?

13 Jesus madahka, “semua orang ke udah mati” deka diangkatka idup baru. (John 5:28) Reti nya bisi orang ke deka diangkatka Jehovah idup baru. Tang ngambika Jehovah ulih ngangkatka orang nya idup baru, Iya patut ngingatka semua utai pasal orang nya. Ulih Iya ngingatka semua nya? Ba dunya raya bisi bebiliun bintang. Bup Kudus madahka, Jehovah nemu nama tiap igi bintang. (Bacha Isaiah 40:26.) Enti Iya ulih ngingatka nama tiap igi bintang, Iya tentu ulih ngingatka semua utai pasal semua orang ke deka diangkatka Iya idup baru. Keberat agi, Jehovah nempa semua utai, nya alai kitai nemu Iya bisi kuasa kena ngangkatka orang idup baru.

14, 15. Nama dipelajarka kitai ari jaku Jop pasal pengangkat ari mati?

14 Jop, seiku lelaki ke tetap ati, pechayaka pengangkat ari mati. Ku iya nanya: “Enti orang mati, kati iya ulih angkat idup baru?” Udah nya ku iya madah ngagai Jehovah: “Nuan deka ngangau, lalu aku deka nyaut.” Amat, Jop nemu Jehovah keran sereta nganti maya alai Iya deka ngangkatka orang ke udah mati idup baru.—Jop 14:13-15.

15 Baka ni asai ati nuan pasal pengadang diangkatka idup baru? Nuan engka berunding, ‘Baka ni enggau  kami sebilik sereta bala pangan ke udah mati, kati sida mega deka diangkatka idup baru? Endang ngelantangka ati kitai ulih nemu Jehovah keran deka ngangkatka orang ke udah mati idup baru. Aram kitai meda nama ku Bup Kudus pasal dini alai sida deka diau sereta sapa ke deka diangkatka idup baru.

SIDA “DEKA NINGA NYAWA IYA, LALU DEKA PANSUT ARI KUBUR”

16. Pengidup ke baka ni ti deka dikembuan orang ke diangkatka idup baru ba dunya?

16 Menya, orang ke diangkatka idup baru ulih begulai enggau sida sebilik sereta bala pangan ba dunya tu. Tu mega deka nyadi jemah ila, tang iya deka jauh manah agi. Nama kebuah? Laban orang ke diangkatka idup baru ba dunya deka bisi peluang idup belama iya, lalu enda nemu mati. Lalu gaya utai ba dunya ke alai sida diau bebida ari enggi kitai kemaya hari tu. Dia nadai perang, penyai, sereta penyakit.

17. Sapa ke deka diangkatka idup baru?

17 Sapa ke deka diangkatka idup baru? Jesus madahka, ‘semua orang ke udah mati deka ninga nyawa iya, lalu deka pansut ari kubur.’ (John 5:28, 29) Lalu Pemandang 20:13 madahka: “Tasik lalu nyerahka orang ke mati dalam iya. Pemati enggau Dunya pemati nyerahka orang ke mati dalam seduai iya.” Amat, bebiliun iku orang deka idup baru. Rasul Paul mega madahka, “semua orang ke lurus enggau ke enda lurus” deka diangkatka ari mati. (Bacha Kereja Rasul 24:15.) Nama reti nya?

Ba Paradais, orang ke udah mati deka diangkatka idup baru lalu begulai baru enggau orang ti dikesayauka sida

18. Sapa “orang ke lurus” ke deka diangkatka idup baru?

18 “Orang ke lurus” nya nyengkaum nembiak Jehovah ke tetap ati ke idup sebedau Jesus datai ke dunya. Noah,  Abraham, Sarah, Moses, Rut, enggau Ester nya orang ke deka diangkatka idup baru ba dunya. Nuan ulih macha pasal sida ba Hebrew bab 11. Baka ni enggau nembiak Jehovah ke tetap ati ke mati maya jeman kitai? Sida  mega “orang ke lurus,” nya alai sida deka diangkatka idup baru.

19. Sapa orang “ke enda lurus”? Nama peluang ke deka diberi Jehovah ngagai sida?

19 Orang “ke enda lurus” nya nyengkaum bebiliun iku orang ke nadai peluang ngelala Jehovah. Taja pan sida udah mati, Jehovah ingatka sida. Iya deka ngangkatka sida idup baru, lalu sida deka bisi peluang belajar pasal Iya sereta nyembah Iya.

20. Sapa ke enda diangkatka idup baru?

20 Kati reti nya semua orang ke udah mati deka diangkatka idup baru? Enda. Jesus madahka, sekeda orang ke ba “neraka” enda diangkatka idup baru. Ba Bup Kudus Baru, “Gehenna” dikumbai “neraka.” (Luke 12:5, peda nota kaki) Sapa ke nentuka sekalika orang nya deka diangkatka idup baru tauka enda? Jehovah nya Hakim ke nentuka pekara nya. Tang Iya mega udah meri Jesus kuasa ‘nyadi hakim ke orang ke idup enggau ke orang ke mati.’ (Kereja Rasul 10:42) Semua orang ke udah ditentuka jai sereta enggai berubah, enda diangkatka idup baru.—Peda Nota Penutup 19.

DIANGKATKA IDUP BARU KE SEREGA

21, 22. (a) Nama reti diangkatka idup baru ke serega? (b) Sapa orang ti keterubah diangkatka idup baru ke serega?

21 Bup Kudus mega madahka, sekeda orang deka diau di serega. Lebuh orang diangkatka idup baru ke serega, iya enda diangkatka idup baru nyadi orang ke ngembuan tubuh mensia. Tang, iya deka diangkatka idup baru ke serega nyadi orang roh.

22 Jesus nya orang ti keterubah diangkatka idup baru ke serega. (John 3:13) Tiga hari pengudah Jesus dibunuh, Jehovah ngangkatka iya idup baru. (Masmur 16:10;  Kereja Rasul 13:34, 35) Jesus enda diangkatka idup baru ngena tubuh mensia. Rasul Paul madahka, Jesus “dibunuh batang tubuh, tang diidupka dalam roh.” (1 Peter 3:18) Jesus diangkatka idup baru nyadi orang roh ti bekuasa! (1 Korint 15:3-6) Tang Bup Kudus madahka, ukai semina Jesus aja ke baka nya.

23, 24. Sapa sida ke “mimit” ti disebut Jesus, lalu ni penyampau sida?

23 Sebedau Jesus mati, iya madah ngagai bala murid iya ti tetap ati: ‘Aku deka kin [ke serega] lalu nyediaka endur ke kita.’ (John 14:2) Reti nya, sekeda bala murid iya deka diangkatka idup baru lalu diau di serega enggau iya. Ni penyampau sida? Jesus madahka, penyampau sida “mimit” aja. (Luke 12:32) Rasul John madahka penyampau ti nyemetak lebuh iya meda Jesus ‘bediri ba Bukit Sion [ti di serega]. Lalu sama bediri enggau iya mega 144,000 iku orang.’—Pemandang 14:1.

24 Kemaya 144,000 iku orang Kristian nya deka diangkatka idup baru? Bup Kudus madahka, tu deka nyadi pengudah Jesus berengkah merintah di serega. (1 Korint 15:23) Kitai benung idup ba maya nya diatu, lalu mayuh ari 144,000 iku orang nya udah diangkatka idup baru ke serega. Sekeda sida ke agi ba dunya, lalu ke mati maya jeman kitai deka tekala nya diangkatka idup baru ke serega. Taja pia, kemayuh agi orang deka diangkatka idup baru diau ba Paradais di dunya tu jemah ila.

25. Nama deka dipelajarka kitai pengudah pelajar tu?

25 Enda lama da agi, Jehovah deka ngelepaska semua mensia ari pemati, lalu pemati deka nadai agi! (Bacha Isaiah 25:8.) Tang nama deka digaga orang ti ke serega? Bup Kudus madahka, sida deka merintah enggau Jesus ba Perintah Petara ti di serega. Kitai deka belajar mayuh agi pasal Perintah nya pengudah pelajar tu.

^ per. 9 Ba cherita ke bukai, Bup Kudus madahka pasal pengangkat ari mati ke nyadi ba orang ke tuai enggau ke biak, lelaki tauka indu, sereta orang Israel enggau orang bansa bukai. Nuan ulih macha cherita nya ba 1 Raja 17:17-24; 2 Raja 4:32-37; 13:20, 21; Luke 7:11-17; 8:40-56; Kereja Rasul 9:36-42; 20:7-12.