Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 14

Kita Sebilik Ulih Lantang

Kita Sebilik Ulih Lantang

1, 2. Nama dikedekaka Jehovah ba diri sebilik?

PETARA JEHOVAH ngepunka tikah tauka pengawa jadi melaki-bini ti keterubah. Bup Kudus madahka, Iya nempa indu ti keterubah, lalu “mai indu nya ngagai iya [Adam].” Adam balat gaga ati lalu ku iya: “Tu baru sedarah, segetah enggau aku saum tulang, saum isi enggau aku.” (Pemungkal 2:22, 23) Tu nunjukka Jehovah deka orang ke jadi melaki-bini diau lantang.

2 Tang sayau amat, mayuh orang enda kala ngasaika pengelantang ba ruang bilik. Taja pia, Bup Kudus ngundan mayuh prinsip ke ulih nulung tiap iku diri sebilik bulih pemujur sereta rindu begulai enggau pangan diri.—Luke 11:28.

UTAI TI DIKEDEKAKA PETARA ARI LAKI

3, 4. (a) Baka ni laki patut ngintu bini iya? (b) Nama kebuah laki enggau bini patut ngampun pangan diri?

3 Bup Kudus madahka, laki ti menyana patut ngintu bini iya enggau pengerindu sereta basa. Aram macha Epesus 5:25-29. Laki deka seruran ngintu bini iya enggau chara ti bisi pengerindu. Iya mega deka nyaga, ngibun, sereta enda ngemediska bini iya.

4 Tang nama patut digaga laki enti bini iya bisi ngereja penyalah? Laki diasuh “terus rinduka bini, lalu anang kasar enggau sida.” (Kolosi 3:19, NW) Kita ke laki, kingatka, kita mega bisi ngereja penyalah. Lalu enti nuan deka Petara ngampun nuan, nuan enda tau enda ngampun bini nuan. (Matthew 6:12, 14, 15)  Lebuh laki enggau bini sama deka ngampun, tu deka nulung seduai iya bisi rumah tangga ti lantang.

5. Nama kebuah laki patut masa bini iya?

5 Jehovah dekaka laki masa bini iya. Laki patut mikirka utai ti diguna bini iya ba tubuh sereta emosi. Tu utai ti beguna bendar. Enti laki enda ngintu bini iya enggau manah, Jehovah enggai mendingka sampi iya. (1 Peter 3:7) Utai ke ngasuh orang berega ba Jehovah nya pengerindu sida ke Iya. Iya enda ngumbai orang ke lelaki manah agi ari orang ke indu.

6. Nama reti laki enggau bini nyadi “siku”?

6 Jesus madahka, laki enggau bini “ukai dua iku agi, tang siku.” (Matthew 19:6) Seduai iya taluk sereta mengkang tetap ati ngagai pangan diri. Laki semina tau ngembuan seiku aja bini, lalu bini semina tau ngembuan seiku aja laki. (Jaku Dalam 5:15, 18-21; Hebrew 13:4) Laki enggau bini patut ibuhka utai ti diguna pangan diri ba pengawa besetubuh. (1 Korint 7:3-5) Laki patut ingat, “nadai orang kala begedika tubuh diri, tang iya nupi sereta bejimat ngintu tubuh nya.” Nya alai, laki patut rindu sereta ngintu bini iya. Lebih ari semua utai, bini dekaka laki iya siru sereta sayauka iya. (Epesus 5:29) Tikah ti betul ba mata undang-undang amat beguna ngambika diri sebilik ulih lantang lalu bala anak ulih besai enggau meruan dalam ruang bilik ti likun. Orang Kristian patut nithka undang-undang ti ngasuh sida ngerejista tikah sida.

UTAI TI DIKEDEKAKA PETARA ARI BINI

7. Nama kebuah tiap iti ruang bilik patut bisi seiku tuai bilik?

7 Tiap iti ruang bilik patut bisi seiku tuai bilik, iya nya orang ke ngiring ba ruang bilik ngambika tiap iku diri  sebilik ulih sama bekereja enggau pangan diri. Ayat Bup Kudus ba 1 Korint 11:3 madahka: ‘Kristus nyadi kepala semua lelaki, lalu laki nyadi kepala bini, lalu Petara nyadi kepala Kristus.’

8. Baka ni bini ngayanka basa ngagai laki iya?

8 Semua laki bisi ngereja penyalah. Tang lebuh bini nyukung pemutus ke digaga laki iya sereta deka sama bekereja enggau laki iya, tiap iku diri sebilik deka bulih penguntung. (1 Peter 3:1-6) Bup Kudus madahka: “Bini patut masa laki.” (Epesus 5:33) Baka ni enti laki enda sama pengarap enggau bini iya? Bini mega patut masa laki iya. Bup Kudus madahka: ‘Baka nya mega kita ke bini: nunduk ngagai laki kita, ngambika enti sida enda ngasika jaku Petara, sekeda sida ulih dibai arap ketegal ulah kita, ukai ketegal jaku kita, lebuh sida meda pengudus enggau pemadas ulah kita.’ (1 Peter 3:1, 2) Chunto bini ke manah ulih nulung laki iya meretika sereta masa pengarap bini.

9. (a) Nama patut digaga bini enti iya enda setuju enggau pemutus ke digaga laki iya? (b) Nama jaku ajar ke bala bini ba Titus 2:4, 5?

 9 Nama ulih digaga bini enti iya enda setuju enggau pemutus ke digaga laki iya? Bini patut madahka runding diri enggau chara ti bebasa. Ngambika chunto, Sarah nyebut utai ti enda dikerinduka Abraham, tang Jehovah ngasuh Abraham: “Kereja aja sebarang utai ti diasuh Sarah.” (Pemungkal 21:9-12) Lebuh laki udah ngaga pemutus ke enda ngelanggar ajar Bup Kudus, bini patut nyukung pemutus laki iya. (Kereja Rasul 5:29; Epesus 5:24) Bini ti menyana deka ngintu ruang bilik iya. (Bacha Titus 2:4, 5.) Lebuh laki enggau bala anak meda pemagas iya ngintu sida, tu ngasuh sida deka agi rindu sereta masa iya.—Jaku Dalam 31:10, 28.

Baka ni Sarah nyadi chunto ti manah ke bala bini?

10. Nama dipadah Bup Kudus pasal serara enggau sarak?

10 Kekadang laki bini beguai-guai deka beserara tauka sarak. Taja pia, Bup Kudus madahka “bini enda tau ninggalka laki,” lalu “laki enda tau muai bini.” (1 Korint 7:10, 11) Reti nya, laki enggau bini enda patut beserara. Tang bisi pekara berat ke ulih ngasuh laki bini beserara, lalu tu pemutus ti besai. * Baka ni enggau sarak? Bup Kudus madahka, semina siti aja kebuah tau sarak iya nya enti laki tauka bini beleman enggau orang bukai.—Matthew 19:9.

UTAI TI DIKEDEKAKA PETARA ARI APAI INDAI

Jesus nya chunto ti manah ke tiap iku diri sebilik

11. Nama utai ke beguna agi ba anak?

11 Kita ke apai indai, enggau naka ulih meh ngena awak begulai enggau anak kita. Sida begunaka kita, lalu kelebih agi ngajar sida pasal Jehovah.—Ulang Adat 6:4-9.

12. Nama patut digaga apai indai kena nyaga anak sida?

 12 Dunya Sitan majak jai-sejai, lalu sekeda orang engka deka ngemediska anak kitai, indah ngachau sida ngena chara seksual. Sekeda apai indai berasai tusah deka berandau pasal pekara tu. Tang apai indai patut nangkan anak sida pasal orang ke baka nya sereta ngajar sida chara nyeliahka diri ari orang ke baka nya. Kita ke apai indai, anang enda nyaga anak kita. *1 Peter 5:8.

13. Baka ni apai indai patut ngajar anak sida?

 13 Apai indai betanggungjawap ngajar anak sida bekaul enggau ulah. Baka ni kita ulih ngajar anak? Bala anak kita begunaka latih, tang enda patut kasar lebuh ngajar sida. Nya alai, anang disiplin anak kita lebuh kita pedis ati. Kita tentu enggai jaku kita baka achuk pedang, lalu ngemediska ati anak kita. (Jaku Dalam 12:18) Ajar anak kita nemu kebuah sida patut ngasi.—Epesus 6:4; Hebrew 12:9-11; peda Nota Penutup 30.

UTAI TI DIKEDEKAKA PETARA ARI BALA ANAK

14, 15. Nama kebuah anak patut ngasika apai indai sida?

14 Jesus seruran ngasika Apai iya, taja pan bisi maya nya enda senang. (Luke 22:42; John 8:28, 29) Jehovah mega deka anak ngasika apai indai sida.—Epesus 6:1-3.

15 Kita ke anak, taja pan kita ngasaika nya tusah deka ngasika apai indai, kingatka, lebuh kita ngasi, kita ngelantangka ati Jehovah enggau ati apai indai kita. *Jaku Dalam 1:8; 6:20; 23:22-25.

Nama ulih nulung orang ke biak tetap ati ngagai Petara lebuh sida bisi pengingin deka ngereja utai ti salah?

16. (a) Baka ni Sitan nguji manjuk orang ke biak ngereja utai ti jai? (b) Nama kebuah patut milih bala pangan ke rinduka Jehovah?

16 Sitan deka ngena bala pangan kita sereta orang biak ke bukai manjuk kita ngereja utai ti salah. Sitan nemu, utai ke baka tu tusah deka diseliah. Ngambika chunto, Dinah, anak indu Jakop bisi bala pangan ke enda rinduka Jehovah. Tu ngasuh mayuh penanggul nyadi ba iya enggau sida sebilik. (Pemungkal 34:1, 2) Enti bala pangan nuan enda rinduka Jehovah, sida engka ngasuh nuan ngereja utai ti dipegedika Jehovah ke ulih ngemediska nuan enggau diri sebilik, sereta ngenusahka ati Jehovah.  (Jaku Dalam 17:21, 25) Nya kebuah nuan patut ngiga bala pangan ke rinduka Jehovah.—1 Korint 15:33.

KITA SEBILIK ULIH LANTANG

17. Nama tanggung pengawa tiap iku diri sebilik?

17 Lebuh semua diri sebilik nitihka iring ari Petara, sida nyeliahka mayuh penusah sereta penanggul. Nya alai, enti nuan nya laki, rindu meh ke bini nuan lalu intu iya enggau pengerindu. Enti nuan nya bini, bebasa sereta nunduk meh ngagai laki nuan lalu neladan chunto bini ke disebut ba Jaku Dalam 31:10-31. Enti nuan nya apai tauka indai, ajar meh anak nuan rinduka Petara. (Jaku Dalam 22:6) Enti nuan nya apai, iring meh ruang bilik nuan “enggau menyana.” (1 Timoti 3:4, 5; 5:8) Lalu kita ke anak, ngasi meh ke apai indai kita. (Kolosi 3:20) Kingatka, tiap iku diri sebilik bisi ngereja penyalah, nya alai patut baruh ati lalu minta ampun ari pangan diri. Amat, Bup Kudus ngundan iring ari Jehovah ke tiap iku diri sebilik.

^ per. 10 Ke penerang mayuh agi, peda lambar 219-222 ba bup ‘Meruan Dalam Pengerindu Petara’, ke dikeluarka Saksi-Saksi Jehovah.

^ per. 12 Nuan tau bulih mayuh agi penerang bekaul enggau chara nyaga anak ba Pasal 32 ari bup Belajarlah dari sang Guru Agung-IN, ke dikeluarka Saksi-Saksi Jehovah.

^ per. 15 Anak tau enda ibuh ngasika apai indai enti apai indai ngasuh iya ngereja utai ti ngelanggar adat Petara.—Kereja Rasul 5:29.