Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 15

Baka Ni Nuan Ulih Ngelala Pengarap ti Bendar?

Baka Ni Nuan Ulih Ngelala Pengarap ti Bendar?

1. Sapa patut madah ngagai kitai chara ngelala pengarap ti bendar?

MAYUH pengarap ngumbai sida ngajar pemendar pasal Petara. Tang tu enda amat, laban sida ngajar utai ti bebida pasal sapa Petara sereta chara kitai patut nyembah Iya. Baka ni kitai ulih ngelala pengarap ti bendar? Semina Jehovah aja ke ulih madahka chara kitai patut nyembah Iya.

2. Baka ni nuan ulih ngelala pengarap ti bendar?

2 Jehovah udah meri kitai Bup Kudus ngambika ulih ngelala pengarap ti bendar. Nya alai pelajarka Bup Kudus, lalu Jehovah deka nulung nuan meretika sereta nitihka ajar Bup Kudus, laban Iya balat ibuhka nuan.—Isaiah 48:17.

3. Nama dikedekaka Petara ari kitai?

3 Sekeda orang madahka Petara nerima semua pengarap, tang Jesus nadai ngajar baka nya. Ku Jesus: ‘Ukai semua orang ke ngangauka aku “Tuan, Tuan” deka tama ngagai Perintah serega, tang semina orang ke ngereja peneka Apai aku.’ Nya alai kitai patut belajarka peneka Petara, lalu ngereja iya. Tu pekara ti berat laban Jesus nyemaka orang ke enda ngasika Petara baka orang “ke ngereja penyai.”—Matthew 7:21-23.

4. Nama dipadah Jesus pasal ngereja peneka Petara?

4 Jesus madahka, kitai enda seruran senang ngereja peneka Petara. Ku Jesus: “Tama nengah pintu ti sempit, laban pintu ti besai enggau jalai ti luas nuju ngagai pengerusak,  lalu mayuh orang nengah jalai nya. Tang pintu ti sempit, enggau jalai ti mar, nuju ngagai pengidup, lalu semina mimit aja orang tetemuka iya.” (Matthew 7:13, 14) Jalai ti mar, tauka pengarap ti bendar, nuju ngagai pengidup ti meruan belama iya. Jalai ti besai, tauka pengarap pelesu, nuju ngagai pemati. Tang Jehovah enggai orang mati. Iya meri semua orang peluang belajar pasal Iya.—2 Peter 3:9.

BAKA NI ULIH NGELALA PENGARAP TI BENDAR?

5. Baka ni nuan ulih ngelala pengarap ti bendar?

5 Jesus madahka, kitai ulih ngelala bagi pengarap ti bendar. Kitai ulih nemu tu ari meresa utai ti dipechaya sereta utai ti dikereja orang ke enggau pengarap nya. Ku Jesus madahka: “Kita deka ngelala sida ari buah sida.” Lalu ku iya agi: “Semua kayu ti galak mansutka buah ti manah.” (Matthew 7:16, 17) Tu ukai reti orang ke nyembah Petara nya sempurna. Tang nembiak Petara seruran nguji deka ngereja utai ti ngena. Kitai diatu deka meda utai ke ulih nulung kitai ngelala pengarap ti bendar.

6, 7. Nama kebuah pengarap ti bendar nitihka ajar ari Bup Kudus? Nama ulih dipelajarka kitai ari chunto Jesus?

6 Pengarap kitai patut nitihka ajar Bup Kudus. Bup Kudus madahka: ‘Semua Bup Kudus endang bepun ari Petara magang, lalu beguna kena ngajar, kena ngerara, kena ngaduka utai ti salah, enggau kena matihka orang diau lurus, ngambika semua nembiak Petara chukup disikap ngereja genap macham pengawa ti badas.’ (2 Timoti 3:16, 17) Rasul Paul nulis ngagai orang Kristian: ‘Lebuh kita nerima jaku Petara ti didinga kita ari kami suba, kita nerima iya ukai baka ke nerima jaku mensia, tang nerima jaku Petara, laban iya endang amat jaku Petara.’ (1 Tesalonika 2:13) Pengarap ti bendar semina  nitihka ajar ari Bup Kudus, ukai nitihka runding, adat mensia, tauka utai bukai.

7 Semua utai ti diajar Jesus nitihka Jaku Petara. (Bacha John 17:17.) Iya suah ngena ayat Bup Kudus. (Matthew 4:4, 7, 10) Nembiak Petara ti bendar nitihka chunto Jesus, lalu semua utai ti diajar sida nitihka Bup Kudus.

8. Nama diajar Jesus pasal nyembah Jehovah?

8 Kitai patut nyembah Jehovah seiku aja. Masmur 83:18 madahka: ‘Awakka sida nemu Nuan siku aja ti Jehovah, Raja ti Pemadu Tinggi ke serata dunya.’ Jesus deka orang ngelala sapa Petara ke bendar, lalu iya ngajar orang pasal nama Petara. (Bacha John 17:6.) Jesus madahka: ‘Sembah Jehovah Petara nuan, lalu betuaika Iya siku aja!’ (Matthew 4:10) Nya alai, ketegal kitai nembiak Petara, kitai nitihka chunto Jesus. Kitai nyembah Jehovah seiku aja, ngena nama Iya, lalu ngajar orang bukai pasal nama Iya sereta utai ti deka dikereja Iya ke kitai.

9, 10. Baka ni kitai ngayanka pengerindu ngagai pangan diri?

9 Kitai patut ngembuan pengerindu ti bendar ngagai pangan diri. Jesus ngajar bala murid iya rinduka pangan diri. (Bacha John 13:35.) Tu enda ngira ari ni penatai kitai, nama adat kitai, tauka sekalika kitai kaya tauka miskin. Pengerindu ngagai pangan diri patut ngempung kitai nyadi menyadi Kristian. (Kolosi 3:14) Nya alai, kitai enda enggau beperang sereta munuh orang. Bup Kudus madahka: ‘Baka tu ku jalai kita ngelala sapa ke anak Petara, enggau sapa ke anak Sitan: barang sapa enda diau lurus, ukai anak Petara. Orang ke enda rinduka menyadi diri, ukai anak Petara.’ Lalu ku Bup Kudus agi: “Rinduka pangan diri. Kitai enda tau baka Kain ke endang enggi Sitan, lalu iya munuh menyadi iya Abel.”—1 John 3:10-12; 4:20, 21.

 10 Kitai ngena jam, pengering, enggau utai ti dikemisi kitai nulung sereta meransang pangan diri. (Hebrew 10:24, 25) Kitai ‘ngereja pengawa ti badas ngagai semua orang.’—Galatia 6:10.

11. Nama kebuah kitai ngasika Jesus?

11 Kitai patut ngasika Jesus laban Jehovah ngena iya nyelamatka kitai. Bup Kudus madahka: “Pengelepas semina ditemu dalam orang siku aja, laban nadai nama bukai di baruh langit ti diberi ngagai mensia ti ulih nyelamatka kitai.” (Kereja Rasul 4:12) Ba Pelajar 5 bup tu, kitai udah belajar pasal Jehovah ke ngirumka Jesus ngambika nyerah nyawa diri kena nebus mensia ti ngasi. (Matthew 20:28) Jehovah udah milih Jesus nyadi Raja merintah atas dunya. Nya kebuah Bup Kudus ngasuh kitai enda tau enda ngasika Jesus enti deka idup belama iya.—Bacha John 3:36.

12. Nama kebuah kitai enda enggau politik?

12 Kitai enda patut enggau politik. Jesus nadai enggau politik. Lebuh iya dipechara, iya madah ngagai Pilate ke nyadi pemerintah Rome: ‘Perintah aku ukai ari dunya tu.’ (Bacha John 18:36.) Baka Jesus, kitai taluk ngagai Perintah Petara ti di serega. Lalu ketegal tu, kitai enda enggau politik enda ngira dini alai kitai diau. Taja pia, Bup Kudus ngasuh kitai ngasika “perintah ti megai menua,” iya nya bala perintah. (Rome 13:1) Kitai ngasika undang-undang ba menua ke alai kitai diau. Endang amat, lebuh undang-undang enda sejalai enggau adat Petara, kitai nunda bala rasul ke madahka: ‘Kami enda tau enda ngasika Petara, ukai ngasika mensia.’—Kereja Rasul 5:29; Mark 12:17.

13. Nama ditusui kitai pasal Perintah Petara?

13 Kitai pechaya semina Perintah Petara ke ulih  mutarka penusah ba dunya. Jesus madahka, ‘Berita Manah pasal Perintah Petara’ deka ditusui di serata dunya. (Bacha Matthew 24:14.) Nadai perintah mensia ke ulih ngereja utai ti deka dikereja Perintah Petara ke kitai. (Masmur 146:3) Jesus ngajar kitai besampika Perintah Petara lebuh iya nyebut: “Datai meh Perintah Nuan. Nyadi meh peneka Nuan di dunya enggau di serega.” (Matthew 6:10) Bup Kudus madahka, Perintah Petara deka ngerusak semua perintah mensia, lalu “iya [Perintah Petara] deka meruan belama iya.”—Daniel 2:44.

14. Ba runding nuan, sapa ke nyembah Petara ngena chara ti betul?

14 Pengudah belajarka beberapa iti chara nya, tanya diri empu: ‘Sapa ke ngajar nitihka Bup Kudus? Sapa ke madah nama Petara ngagai orang bukai? Sapa ke ngayanka pengerindu ti bendar ngagai pangan diri, lalu pechaya Petara ngirumka Jesus kena nyelamatka kitai? Sapa ke enda enggau politik? Sapa ke madah semina Perintah Petara aja ke ulih mutarka penusah kitai?’ Semina Saksi-Saksi Jehovah aja ke ngereja semua utai nya.—Isaiah 43:10-12.

NAMA DEKA DIGAGA NUAN?

15. Nama patut digaga kitai enti deka Petara nerima pengarap kitai?

15 Semina pechayaka Petara nya bisi, enda chukup. Indah bala antu pechaya Petara bisi, tang sida enda ngasika Iya. (James 2:19) Enti kitai deka Petara nerima pengarap kitai, kitai enda tau enda pechayaka Iya bisi, lalu ngereja utai ti dipadah Iya.

16. Nama kebuah kitai patut nulak pengarap pelesu?

16 Ngambika Petara nerima pengarap kitai, kitai enda tau enda nulak pengarap pelesu. Nabi Isaiah nulis: “Kita enda tau enda angkat ari menua Babilon . . . Intu diri  kudus.” (Isaiah 52:11; 2 Korint 6:17) Nya kebuah kitai patut nulak sebarang utai ke bisi kaul enggau pengarap pelesu.

17, 18. Nama reti “Babilon ti Besai,” lalu nama kebuah patut jejampat pansut ari iya?

17 Nama reti pengarap pelesu? Nya semua pengarap ke ngajar kitai nyembah Petara ngena chara ti enda sejalai enggau Bup Kudus. Bup Kudus ngumbai semua pengarap pelesu nya, “Babilon ti Besai.” (Pemandang 17:5) Nama kebuah? Pengudah Bah Besai maya jeman Noah, mayuh ajar ari pengarap pelesu berengkah di menua Babilon. Ajar ti bula nya ngelekai ke serata dunya. Ngambika chunto, orang ke diau di Babilon nyembah seraban tiga iku petara. Pia mega kemaya hari tu, mayuh pengarap ngajar Petara nya Triniti, tang Bup Kudus enggau terang ngajar, Jehovah, Petara ti bendar semina seiku aja, lalu Jesus nya Anak Iya. (John 17:3) Orang ke diau di Babilon mega pechaya, bisi utai dalam tubuh mensia ke agi mengkang idup pengudah tubuh mati, lalu utai nya ulih merinsa ba neraka. Tu enda amat.—Peda Nota Penutup 14, 17, enggau 18.

18 Petara udah madahka, enda lama agi, semua pengarap pelesu deka dipunaska. (Pemandang 18:8) Kala nuan berundingka kebuah patut jejampat pansut ari pengarap pelesu? Petara Jehovah deka nuan ngereja nya kala agi bisi peluang.—Pemandang 18:4.

Enti nyembah Jehovah enggau nembiak Iya, nuan deka nyadi sebegian ari ruang bilik Iya ti besai di serata dunya

19. Lebuh nuan mutus deka nyembah Jehovah, baka ni Iya deka nyaga nuan?

19 Lebuh nuan mutus deka pansut ari pengarap pelesu lalu nyembah Jehovah, sekeda ari bala pangan tauka diri sebilik engka enda meretika kebuah nuan deka pansut, lalu engka nyakal nuan, ngasuh nuan berasai malu  tauka engka enggai begulai enggau nuan. Tang Jehovah enda ninggalka nuan. Nuan deka begulai enggau bejuta iku diri sebilik di serata dunya ke amat rinduka pangan diri, lalu nuan mega deka bulih pengadang idup belama iya ba dunya baru Petara. (Mark 10:28-30) Dudi hari ila, sekeda ari bala pangan enggau diri sebilik ke nyakal pemutus nuan nyembah Jehovah, engka deka belajarka Bup Kudus.

20. Nama kebuah beguna bendar nyembah Petara ngena chara ti betul?

20 Enda lama da agi, Petara deka munaska semua penyai, lalu Perintah Iya deka merintah atas dunya. (2 Peter 3:9, 13) Nya maya ti ngerinduka ati! Semua orang deka nyembah Jehovah nitihka chara ti dikedekaka Iya. Nya kebuah berat bendar nuan ngaga pemutus diatu, lalu nyembah Petara ngena chara ti betul.