Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Ulih Dipelajarka Kitai Ari Bup Kudus?

 PELAJAR 13

Bebasaka Nyawa ti Diberi Petara

Bebasaka Nyawa ti Diberi Petara

1. Sapa ke meri kitai pengidup?

‘NUAN, Jehovah, endang Petara ti bendar, Nuan endang Petara ti idup.’ (Jeremiah 10:10) Iya Penempa kitai, lalu Iya udah meri kitai pengidup. Bup Kudus madahka: “Nuan udah ngaga semua utai, lalu ulih peneka Nuan, sida ditempa, lalu diberi pengidup.” (Pemandang 4:11) Amat, Jehovah deka kitai ngembuan pengidup. Pengidup nya pemeri ti berega ari Iya.—Bacha Masmur 36:9.

2. Baka ni kitai ulih mujur ba pengidup?

2 Jehovah meri kitai utai ti diguna kena idup, baka pemakai enggau ai. (Kereja Rasul 17:28) Tang lebih agi ari nya, Iya deka kitai lantang ati enggau pengidup. (Kereja Rasul 14:15-17) Ngambika mujur ba pengidup, kitai patut ngasika adat Petara.—Isaiah 48:17, 18.

RUNDING PETARA PASAL NYAWA

3. Nama digaga Jehovah pengudah Kain munuh Abel?

3 Bup Kudus madahka, nyawa kitai enggau nyawa orang bukai berega ba Jehovah. Ngambika chunto, lebuh Kain—anak lelaki Adam seduai Hawa—balat ringat enggau menyadi biak iya, Abel, Jehovah ngasuh Kain nagang pengeringat diri. Tang Kain enggai mending, lalu iya balat ringat nyentukka iya “ngamuk lalu munuh menyadi iya.” (Pemungkal 4:3-8) Jehovah ngukum Kain ketegal munuh Abel. (Pemungkal 4:9-13) Nya alai, pengeringat enggau pemenchi tau ngenusah laban ulah nya ulih ngasuh kitai nyadi mangah tauka jai. Orang ke baka nya enda tau bulih pengidup ti meruan  belama iya. (Bacha 1 John 3:15.) Kena ngelantangka ati Jehovah, kitai enda tau enda belajar rinduka semua orang.—1 John 3:11, 12.

4. Nama dipelajarka kitai pasal nyawa ari siti adat ke diberi Petara ngagai orang Israel?

4 Beribu taun udah nya, Jehovah nunjukka nyawa berega ba Iya lebuh Iya meri Sepuluh Pesan ngagai Moses. Siti ari adat nya: “Anang munuh orang.” (Ulang Adat 5:17) Enti orang sengaja munuh orang bukai, iya deka dibunuh.

5. Nama runding Petara pasal bebuai anak?

5 Nama runding Petara pasal bebuai anak? Indah nyawa anak mit ke bedau ada berega ba Jehovah. Ba Adat ke diberi Jehovah ngagai orang Israel, Jehovah madahka, enti orang ngemakalka indai lalu ngujungka anak iya mati, orang nya deka dibunuh. “Enti orang lelaki belaya, lalu ngemediska siku indu ke ngandung, lalu anak iya ada muda, tang nadai lenyau nyawa, orang ke ngemediska iya enda tau enda diasuh mayar ukum nitihka pinta laki indu nya, sereta dikemendarka bala hakim. Tang enti bisi nyawa lenyau, ukum ti dikena nya: nyawa balas nyawa.” (Pemansut 21:​22, 23, NW; Masmur 127:⁠3) Ari tu kitai nemu, pengawa bebuai anak nya salah.—Peda Nota Penutup 28.

6, 7. Baka ni kitai nunjukka ngagai Jehovah kitai sayauka nyawa?

6 Baka ni kitai ulih nunjukka ngagai Jehovah, kitai sayauka nyawa diri sereta nyawa orang bukai? Kitai enda ngereja sebarang utai ti tau nganu nyawa diri tauka nyawa orang bukai. Nya alai kitai enda nginsap, makai buah pinang tauka salah nguna dadah, laban utai nya ulih ngemedis sereta munuh kitai.

 7 Petara meri kitai nyawa enggau tubuh, lalu kitai patut ngena utai ke diberi Iya nya nitihka chara ti dikedekaka Iya. Nya alai kita patut nyaga tubuh diri enggau manah. Enti enda, kitai enda tuchi ba mata Petara. (Rome 6:19; 12:1; 2 Korint 7:1) Kitai enda ulih nyembah Jehovah ke meri kitai nyawa, enti kitai enda sayauka nyawa. Taja pan engka tusah deka ngelengkaka tebiat ke enda manah, tang Jehovah deka nulung kitai enti kitai bebendar muai tebiat nya ketegal kitai sayauka nyawa.

8. Nama deka digaga kitai kena nyaga nyawa diri tauka nyawa orang bukai?

8 Kitai nemu nyawa nya pemeri ti berega. Jehovah pechaya, kitai deka enggau naka ulih nyaga nyawa diri tauka nyawa orang bukai. Kitai ngereja tu enti kitai bejimat lebuh deriba kerita, motosikal, tauka perengka pengangkut ke bukai. Kitai nyeliahka lumba ti tau nganu sereta kasar. (Masmur 11:5) Kitai mega enggau naka ulih nyaga pengelikun rumah kitai. Jehovah ngasuh orang Israel: “Lebuh kita ngaga rumah baru, gaga reraga ba tisi perabung rumah nya. Nya baru kita enda betanggungjawap enti orang labuh ari perabung nya lalu mati.”—Ulang Adat 22:8.

9. Baka ni kitai patut ngintu jelu?

9 Jehovah mega beberatka chara kitai ngintu jelu. Iya ngemendarka kitai munuh jelu ke pemakai sereta ke gari, lalu Iya ngemendarka kitai munuh jelu enti jelu nya nganu nyawa kitai. (Pemungkal 3:21; 9:3; Pemansut 21:28) Tang kitai enda tau jai enggau jelu tauka munuh sida ke pemerindang.—Jaku Dalam 12:10.

BEBASAKA PENGUDUS NYAWA

10. Baka ni kitai nemu darah ngambarka nyawa?

10 Darah nya kudus ba Jehovah laban darah ngambarka  nyawa. Pengudah Kain munuh Abel, ku Jehovah madah ngagai Kain: “Darah menyadi nuan nyabak ngangauka Aku ari tanah.” (Pemungkal 4:10) Darah Abel ngambarka nyawa iya, lalu Jehovah ngukum Kain ketegal munuh Abel. Pengudah Bah Besai maya jeman Noah, Jehovah sekali agi nunjukka darah ngambarka nyawa. Jehovah madah ngagai Noah enggau sida sebilik: “Kita enda tau makai dagin ti agi bedarah, laban darah ngundan seput.”—Pemungkal 1:29; 9:3, 4.

11. Nama pesan pasal darah ke diberi Petara ngagai orang Israel?

11 Kira-kira 800 taun pengudah Jehovah enda ngasuh Noah makai darah, Iya agi ngingatka nembiak Iya: “Anang makai darah, tang tuang darah nya ngagai tanah baka ke nuang ai.” (Ulang Adat 12:24) Jehovah agi deka nembiak Iya ngumbai darah nya kudus. Sida tau makai dagin tang enda tau makai darah. Lebuh sida munuh jelu ke pemakai, sida nuang darah nya ke tanah.

12. Nama runding orang Kristian pasal darah?

12 Beberapa taun pengudah Jesus mati, bala rasul enggau bala tuai ba eklisia Kristian di Jerusalem baum laban deka nentuka bagi Adat ti diberi ngagai orang Israel ke agi ulih dikena orang Kristian. (Bacha Kereja Rasul 15:28, 29; 21:25.) Jehovah nulung sida nemu, darah agi berega ba Iya lalu sida agi patut ngumbai darah nya kudus. Orang Kristian ba abad keterubah enda makai tauka ngirup darah tauka makai dagin jelu ke enda dibunuh enggau manah. Enti sida ngereja nya, sida sama baka nyembah engkeramba tauka ngereja ulah seks ti kamah. Kenyau ari hari nya, orang Kristian ti bendar enda makai tauka ngirup darah. Baka ni enggau kemaya hari tu? Jehovah agi deka kitai ngumbai darah nya kudus.

13. Nama kebuah orang Kristian enda nerima darah?

 13 Kati reti nya orang Kristian mega patut nulak nerima darah? Au. Jehovah enda ngasuh kitai makai tauka ngirup darah. Enti sema lutur enda ngasuh nuan ngirup ai bisa, kati nuan deka namaka ai bisa nya ngagai tubuh ngena jarum? Tentu enda! Pia mega, pesan ke enda ngasuh makai tauka ngirup darah reti nya kitai enda nerima darah.—Peda Nota Penutup 29.

14, 15. Nama kebuah bebasaka nyawa sereta ngasika Jehovah nya utai ti beguna ba orang Kristian?

14 Baka ni enti lutur madahka kitai deka mati enti enda nerima darah? Tiap iku kitai patut mutus sekalika deka ngasika adat Petara bekaul enggau darah. Orang Kristian bebasa bendar ke nyawa ti diberi Petara, lalu kitai deka ngiga chara berubat ke bukai ngambika mengkang idup; tang kitai enggai nerima darah.

15 Kitai bebendar deka mengkang gerai. Tang ketegal darah ngambarka nyawa lalu darah berega ba Petara, kitai enggai nerima darah. Ngasika Jehovah beguna agi ari ke nguji deka ngemanjaika nyawa diri enggau enda ngasika Iya. Jesus madahka: ‘Barang sapa deka ngidupka nyawa diri, deka ngelenyauka iya, lalu barang sapa ngelenyauka nyawa diri ketegal aku, deka tetemuka iya.’ (Matthew 16:25) Kitai deka ngasika Jehovah laban kitai rinduka Iya. Iya nemu utai ti pemadu manah ke kitai, lalu baka Jehovah, kitai ngumbai nyawa berega sereta kudus.—Hebrew 11:6.

16. Nama kebuah nembiak Petara ngasika Iya?

16 Nembiak Petara ke tetap ati keran deka ngasika adat Iya pasal darah. Sida enda makai tauka ngirup darah, lalu sida enggai nerima darah ketegal penanggul  ke datai ari nerima darah. * Taja pia, sida deka nerima chara berubat ke bukai ngambika ulih nyelamatka nyawa sida. Sida pechaya, Penempa nyawa enggau darah nemu utai ti pemadu manah ke sida. Kati nuan pechaya Iya nemu utai ti pemadu manah ke nuan?

SEMINA SITI AJA CHARA NGENA DARAH TI DIKEMENDARKA JEHOVAH

17. Di menua Israel, nama siti chara ngena darah ti dikemendarka Jehovah?

17 Ba Adat ke diberi Jehovah ngagai Moses, Iya madah ngagai orang Israel: ‘Seput semua utai ti idup endang dalam darah. Nya kebuah Jehovah udah bejaku ngasuh semua darah dituang magang ba alta, kena muai dosa orang mayuh. Darah, iya nya nyawa, muai dosa.’ (Adat Lewi 17:11) Lebuh orang Israel bedosa, sida ulih minta Jehovah ngampun dosa sida enggau ngenjuk jelu nyadika pemeri, lalu minta iman nuang sekeda darah jelu nya ba atas alta di rumah sembiang. Semina tu aja chara ngena darah ti dikemendarka Jehovah ngagai orang Israel.

18. Nama peluang ke diulih kitai ari genselan Jesus?

18 Lebuh Jesus datai ke dunya, iya nganti adat ke meri jelu nyadika pemeri lebuh iya nyerahka nyawa, tauka darah iya, kena ngampun dosa kitai. (Matthew 20:28; Hebrew 10:1) Nyawa Jesus berega amat, nya alai Jehovah ulih meri semua mensia peluang idup belama iya bepelasarka genselan nyawa Jesus.—John 3:16; Hebrew 9:11, 12; 1 Peter 1:18, 19.

Baka ni nuan ulih nunjukka diri bebasaka nyawa enggau darah?

19. Nama patut digaga kitai ngambika “enda betanggungjawapka nyawa” orang bukai?

 19 Kitai beterima kasih ngagai Jehovah ke nyawa ti diberi Iya! Lalu kitai deka madah ngagai orang, enti sida arapka Jesus, sida ulih idup belama iya. Kitai rinduka orang, lalu kitai deka enggau naka ulih ngajar sida chara bulih pengidup. (Esekiel 3:17-21) Lalu baka rasul Paul, kitai ulih madah: ‘Aku enda betanggungjawapka nyawa kita, laban aku nadai kala enggai madah ngagai kita semua juluk ati Petara.’ (Kereja Rasul 20:26, 27) Amat, kitai nunjukka diri bebasa bendar ke nyawa enggau darah, enti kitai madah ngagai orang bukai pasal Jehovah sereta pasal nyawa ti berega amat ba Iya.

^ per. 16 Kena nemu penerang pasal nerima darah, peda lambar 77-79 ba bup ‘Meruan Dalam Pengerindu Petara,’ ke dikeluarka Saksi-Saksi Jehovah.