Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Ajar Meh Anak Nuan

 PELAJAR 5

Samuel Seruran Ngereja Utai ti Betul

Samuel Seruran Ngereja Utai ti Betul

Ari mit Samuel diau enggau bekereja ba Langkau Kain, endur orang nyembah Jehovah. Nemu nuan baka ni Samuel tau ba Langkau Kain? Aram belajar pasal indai Samuel, Hanah.

Hanah enda ulih beranak. Tang, iya deka bisi anak. Nya alai, iya besampi minta tulung ngagai Jehovah. Iya besemaya enti iya bisi seiku anak lelaki, iya deka nganjung anak iya diau enggau bekereja ba Langkau Kain. Jehovah nyaut sampi iya, lalu iya bulih seiku anak lelaki. Iya ngaga nama anak iya, Samuel. Baka ke udah disemaya Hanah, maya umur Samuel tiga tauka empat taun, Hanah mai iya ngagai Langkau Kain ngambika ulih bekereja ke Petara.

Eli nya imam besai ba Langkau Kain. Dua iku anak lelaki iya pan kereja dia. Kingatka, Langkau Kain nya endur orang nyembah Petara. Nya alai, orang patut ngereja utai ti manah dia. Tang anak Eli, ngereja utai ti jai. Samuel meda utai ti dikereja sida. Bisi Samuel ngereja utai ti jai baka anak Eli?— Nadai, Samuel seruran ngereja utai ti betul, baka ke udah diajar apai indai iya.

Nama patut digaga Eli ngagai dua iku anak iya nya?— Iya patut ngukum seduai iya. Iya enda patut ngelakka sida kereja ba rumah Petara agi. Tang, Eli enda ngereja nya, nya alai Jehovah ringat ngagai iya enggau anak iya. Jehovah deka ngukum sida.

Samuel ngenataika ­pesan Jehovah ngagai Eli

Bisi sekali, maya Samuel benung tinduk, iya ninga orang ngangauka iya: ‘Samuel!’ Iya belanda ngagai Eli, tang Eli madah: ‘Nadai aku ngangauka nuan.’ Tu nyadi tiga kali. Tang, udah kali ketiga, Eli ngasuh Samuel enti iya agi ningaka nyawa nya baru, iya patut nyaut: ‘Bejaku meh Jehovah; aku mendingka Nuan.’ Nya meh utai ti digaga Samuel. Udah nya Jehovah bejaku enggau Samuel: ‘Padahka Eli, Aku deka ngukum sida sebilik laban sida ngereja utai ti jai.’ Kati senang  Samuel madahka utai tu ngagai Eli?— Enda. Taja pan Samuel takut, iya ngereja utai ti diasuh Jehovah. Utai ti dipadah Jehovah amat nyadi. Dua iku anak Eli mati dibunuh, lalu Eli mega mati.

Samuel nyadi teladan ti manah ngagai kitai. Iya ngereja utai ti betul taja pan iya meda orang bukai ngereja utai ti jai. Baka ni nuan deh? Deka nuan nunda Samuel, lalu seruran ngereja utai ti betul? Enti deka, nuan ulih ngasuh Jehovah enggau apai indai nuan gaga ati.

BACHA BUP KUDUS NUAN

  • 1 Samuel 2:22-26; 3:1-21