Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Ajar Meh Anak Nuan

 PELAJAR 9

Jeremiah Enda Ngetu Madah Pasal Jehovah

Jeremiah Enda Ngetu Madah Pasal Jehovah

Nama kebuah orang nganu Jeremiah?

Jehovah nyelamatka Jeremiah

Kekadang orang ngemelika kitai tauka nganu kitai maya kitai madah pasal Jehovah. Tu ulih ngasuh kitai ngetu madah pasal Jehovah. Kala nuan ngasaika nya?— Bup Kudus madah pasal seiku lelaki ti agi biak ke sayauka Jehovah. Tang, iya kala deka ngetu madah pasal Jehovah. Nama iya Jeremiah. Aram belajar pasal iya.

Maya Jeremiah agi biak, Jehovah ngasuh iya madah ngagai orang badu agi ngereja utai ti jai. Tu tusah dikereja Jeremiah, lalu iya mega takut. Iya madahka Jehovah: ‘Aku enda nemu nama utai ti deka disebut. Aku agi biak.’ Tang, Jehovah madah: ‘Anang takut. Aku deka nulung nuan.’

 Nya alai, Jeremiah belabuh madah ngagai orang sida deka diukum enti sida enda ngubah diri. Kati orang nitihka jaku Jeremiah?— Enda. Sida ngemelika iya tauka nganu iya. Bisi sekeda deka munuh iya! Baka ni asai ati Jeremiah?— Iya takut lalu madah: ‘Aku enggai agi madah pasal Jehovah.’ Kati iya amat enggai agi?— Enda. Iya sayau amat ke Jehovah. Nya alai, iya enda ngetu madah pasal Jehovah. Laban Jeremiah enda ngetu, Jehovah nyaga iya.

Bisi sekali, sekeda orang ke jai muai Jeremiah ke dalam telaga ti nadai ai, tang semina bisi tanah luchak. Iya nadai utai diempa tauka ai diirup. Sida deka Jeremiah mati dia. Tang, Jehovah nyelamatka iya.

Nama ulih dipelajar nuan ari Jeremiah?— Taja pan bisi maya iya takut, tang iya iya enda ngetu madah pasal Jehovah. Maya nuan madah pasal Jehovah, orang engka ngemelika nuan tauka nganu nuan. Nuan engka malu tauka takut. Tang, anang ngetu madah pasal Jehovah. Iya selalu deka nulung nuan, baka Iya nulung Jeremiah.

BACHA BUP KUDUS NUAN

  • Jeremiah 1:4-8; 20:7-9; 26:8-19, 24; 38:6-13