Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 16

Bepegai Teguh ba Sembah ti Bendar

Bepegai Teguh ba Sembah ti Bendar
  • Nama ajar Bup Kudus pasal ngena engkeramba?

  • Nama penemu orang Kristian pasal hari besai ke bekaul enggau pengarap?

  • Baka ni nuan nerangka utai ti dipechaya nuan ngambika enda ngasuh orang bukai enda nyamai ati?

1, 2. Udah nuan ninggalka pengarap pelesu, nama patut ditanya nuan, lalu nama kebuah tanya tu beguna?

NYEMA nuan nemu bisi orang udah mubuh rachun ba tangki ai irup nuan, lalu utai tu tau munuh. Nama patut digaga nuan? Nuan tentu deka enggau jampat ngiga endur ke bisi ai ti selamat diirup. Tang, nuan engka bisi siti tanya ti berat, ‘Kati aku bisi kena rachun?’

2 Utai ti sama mega nyadi ba pengarap pelesu. Bup Kudus ngajar sembah pengarap pelesu baka rachun, laban ajar enggau pengawa sida enda tuchi. (2 Korint 6:17) Nya kebuah, nuan patut pansut ari ‘Babilon ti Besai,’ gerempung pengarap pelesu ba serata dunya tu. (Pemandang 18:2, 4) Kati nuan udah ngereja tu? Enti udah, nuan patut dipuji. Tang, semina nyeraraka diri tauka pansut ari pengarap pelesu aja enda chukup. Udah nya, nuan patut nanya diri empu, ‘Kati sekeda pengawa ti bekaul enggau pengarap pelesu agi bisi ba aku?’ Peratika sekeda chunto.

 PATUT KITAI NGENA UTAI NYEMBAH PETARA?

3. (a) Nama ajar Bup Kudus pasal ngena engkeramba, lalu nama kebuah orang tusah nerima chara Petara meda utai tu? (b) Nama patut digaga nuan enggau semua utai ti bekaul enggau sembah ti bula?

3 Sekeda orang bisi ngena tanda regang, patung Maria tauka patung Jesus. Kati nuan empu bisi? Nuan engka tusah tauka enda nyamai ati maya besampi ngagai Petara enti enda ngena utai nya. Nuan engka sayauka utai nya. Tang, Petara madahka chara Iya patut disembah, lalu Bup Kudus ngajar Iya enda ngasuh kitai ngena engkeramba. (Pemansut 20:4, 5; Masmur 115:4-8; Isaiah 42:8; 1 John 5:21) Nyadi nuan ulih bepegai teguh ba sembah ti bendar, enti nuan ngemunaska semua utai ti bekaul enggau sembah ti bula. Nya alai, kitai patut nunda chara Jehovah meda utai tu—utai ti “dipegedika.”—Ulang Adat 27:15.

4. (a) Baka ni kitai nemu nyembah bala peturun ke udah mati nya nadai guna? (b) Nama kebuah Jehovah nagang nembiak Iya enggau sebarang pengawa bemanang?

4 Mayuh pengarap pelesu mega nyembah bala peturun ke udah mati. Bisi mega ngagai pendam minta tulung ari  orang ke udah mati. Sebedau belajarka pemendar ari Bup Kudus, sekeda pechaya orang ke udah mati idup ba dunya sebayan, lalu sida ulih nulung tauka ngemedis orang ke agi idup. Nuan engka bebendar deka ngenyamaika ati bala peturun ke udah mati. Tang, baka ke udah dipelajarka ba Pelajar 6, orang mati enda idup ba endur bukai. Nya alai, nadai guna minta tulung tauka bejaku enggau orang ke udah mati. Sebarang pesan ke dikumbai datai ari orang ke udah mati nya, datai ari bala antu. Jehovah nagang orang Israel bejaku enggau orang ke udah mati tauka enggau sebarang pengawa bemanang.—Ulang Adat 18:10-12.

5. Nama patut digaga nuan enti nuan bisi ngena engkeramba tauka nyembah bala peturun ke udah mati?

5 Enti nuan bisi ngena engkeramba, nyembah tauka minta tulung ari bala peturun ke udah mati, nama patut digaga nuan? Peratika jaku Bup Kudus ke madah ngagai nuan baka ni Petara meda utai tu. Seruran besampi ngagai Jehovah pasal pengeran ati nuan ke deka bepegai teguh ba sembah ti bendar, lalu minta tulung ari Iya ngambika bisi runding ti sama enggau Iya.—Isaiah 55:9.

HARI KRISMAS—ENDA DIINTU ORANG KRISTIAN KETERUBAH

6, 7. (a) Nama kebuah Hari Krismas diintu, lalu bisi bala murid Jesus keterubah ngintu hari nya? (b) Orang Kristian keterubah madahka hari pengada bekaul enggau nama?

6 Sembah orang ulih dikamahka hari besai ti bekaul enggau pengarap pelesu. Chunto, Hari Krismas. Hari Krismas diintu kena ngingatka hari pengada Jesus Kristus, lalu mayuh pengarap ke ngumbai diri Kristian ngintu hari besai tu. Tang, bala murid Jesus nadai kala ngintu hari pengada iya. Bup Sacred Origins of Profound Things madahka: “200 taun pengudah Jesus ada, nadai seiku nemu, lalu mimit aja orang ibuhka ni maya iya ada.”

 7 Enti sema bala murid Jesus nemu ni maya iya ada, sida mega enda ngintu hari pengada iya. Nama kebuah? Laban The World Book Encyclopedia madah, orang Kristian keterubah “ngumbai pengerami hari pengada bekaul enggau adat orang ke enda arapka Petara.” Bup Kudus madah hari pengada semina diintu dua iku pemerintah ke enda nyembah Jehovah. (Pemungkal 40:20; Mark 6:21) Hari pengada mega diintu kena bebasaka petara orang ke enda arapka Jehovah. Chunto, kena 24 haribulan 5, orang Rome ngintu hari pengada petara indu, Diana. Hari siti, sida ngintu hari pengada petara-matahari, Apollo. Nya alai, hari pengada bekaul enggau orang ke enda arapka Petara, ukai pengarap Kristian.

8. Terangka kaul entara hari pengada enggau pengarap lama.

8 Orang Kristian keterubah mega enda ngintu hari pengada Jesus laban iya bekaul enggau pengarap lama. Chunto, mayuh orang Gerika enggau orang Rome kelia menya pechaya bisi roh datai maya mensia ada, lalu nyaga sida sepemanjai sida idup. Pia mega, orang ke ukai Kristian maya nya ngintu hari pengada laban sida pechaya petara ke sama enggau hari pengada sida ulih nyaga sida. Jehovah enda nerima pengerami ti ngaul Jesus enggau pengarap lama. (Isaiah 65:11, 12) Nyadi, nama kebuah mayuh orang ngintu Hari Krismas?

PUN PENATAI HARI KRISMAS

9. Nama kebuah 25 haribulan 12 dipilih kena ngintu hari pengada Jesus?

9 Kira-kira 300 taun pengudah Jesus datai ke dunya tu, orang belabuh ngintu hari pengada iya kena 25 haribulan 12. Tang, nya ukai maya Jesus ada. * Nyadi, nama kebuah 25 haribulan 12 dipilih? Sekeda ke ngumbai diri Kristian “deka maya nya diintu sama enggau maya  orang Rome ngintu ‘hari pengada mata hari.’” (The New Encyclopædia Britannica) Maya musin chelap, mata hari enda terang. Orang ke enda arapka Petara ngintu pengerami nya kena ngambi terang enggau pengangat mata hari pulai baru. Sida pechaya mata hari belabuh pulai kena 25 haribulan 12. Kena meransang orang ke enda arapka Petara nukar pengarap sida, bala tuai pengarap ngaga pengerami tu, nyadi pengerami “Kristian.” *

10. Nama kebuah sekeda orang dulu suba enda nyambut Hari Krismas?

10 Ari dulu suba, orang udah nemu Hari Krismas bepun ari orang ke enda arapka Petara. Laban penatai iya ukai ari Bup Kudus, nya alai Hari Krismas enda dikemendarka ba England enggau sekeda menua ke dipegai Amerika ba kurun ke-17. Barang sapa ke enda kereja maya Hari Krismas deka bebayarka ukum. Tang, enda lama udah nya, adat lama tu disambut orang baru, lalu ditambah enggau adat bukai. Hari Krismas nyadi hari besai baru, lalu hari tu mengkang nyadi hari besai ba mayuh menua. Laban Hari Krismas bekaul enggau pengarap pelesu, nya alai orang ke deka ngerinduka ati Petara enda nyambut Hari Krismas tauka hari besai ti bukai ke bepun ari sembah orang ke enda arapka Petara. *

 KATI NEMU PASAL PENATAI HARI BESAI BEGUNA?

11. Nama kebuah sekeda orang ngintu hari besai, lalu nama utai ti pemadu beguna ba pengidup kitai?

11 Sekeda orang setuju hari besai baka Hari Krismas bepun ari orang ke enda arapka Petara. Tang, sida ngasaika enda salah ngintu hari besai. Mayuh orang enda berunding pasal sembah ti bula maya sida ngintu hari besai. Sida ngumbai nya peluang ti manah begelumu enggau pangan diri. Kati nuan bisi ngasaika nya? Enti bisi, pengerindu ngagai diri sebilik ke nagang nuan bepegai teguh ba sembah ti bendar, ukai pengerindu ngagai pengarap pelesu. Pechaya meh, Jehovah, ke ngepunka ruang bilik deka nuan bisi kaul ti manah enggau kaban belayan. Tang, nuan ulih semak ngagai kaban belayan enggau nitihka chara ti diterima Petara. Nya alai, utai ti pemadu beguna ba pengidup kitai, rasul Paul nulis: ‘Uji giga utai ti ngerinduka ati Tuan.’—Epesus 5:10.

Deka nuan makai kue kulum ke diambi ari parit?

12. Terangka nama kebuah kitai patut nyeliahka adat enggau pengerami ti enda tuchi.

12 Nuan engka ngumbai penatai hari besai enda entu bekaul enggau chara iya disambut kemaya hari tu. Kati nemu pasal penatai hari besai beguna? Ya! Chunto: Nyema nuan meda kue kulum dalam parit. Deka nuan ngambi lalu makai iya? Tentu enggai! Taja pan kue kulum nya manis, tang iya kamah. Pia mega, hari besai baka ke manah diintu, tang penatai iya ari endur ti kamah. Enti deka bepegai teguh ba sembah ti bendar, kitai patut sama runding enggau nabi Isaiah ke madah: “Anang negu utai ti enda tuchi.”—2 Korint 6:17; Isaiah 52:11.

NERANG ENGGAU JAKU TI MANAH

13. Nama kebuah enda senang enti nuan enda enggau orang ngintu hari besai?

13 Engka enda senang nuan enda enggau orang ngintu  hari besai. Chunto, orang ke sama kereja enggau nuan engka bepikir nama kebuah nuan enda enggau sida ngintu sekeda pengawa ti bekaul enggau hari besai. Baka ni enti orang bisi meri nuan hadiah maya hari besai? Tau nuan nerima hadiah nya? Kati enti diri melaki-bini enda sama pengarap? Baka ni nuan ulih ngasuh anak nuan enda tusah ati ketegal enda ngintu hari besai?

14, 15. Nama patut digaga nuan enti nuan dikangauka datai ngabang, tauka enti bisi orang deka meri nuan hadiah?

14 Nuan patut berunding enggau manah maya nerangka utai tu. Enti nuan dikangauka datai ngabang, nuan ulih nyebut “terima kasih” aja. Enti orang nya sama kereja tauka selalu begulai enggau nuan, nuan patut nerangka enggau mayuh agi ngena jaku ti manah. Bup Kudus madah: “Awakka jaku kita seruran badas sereta ngenyamaika ati orang, ngambika kita nemu jalai kita patut nyaut semua orang.” (Kolosi 4:6) Bejimat ngambika enda ngemediska ati orang. Tang, terangka enggau manah kebuah nuan enda ngintu. Lalu padahka mega, nuan enda nagang enti orang meri hadiah tauka begelumu enggau pangan diri. Nuan semina deka enggau pengawa tu maya bukai, ukai maya hari besai.

15 Kati enti bisi orang deka meri nuan hadiah? Orang ke meri hadiah engka madah: “Aku nemu nuan enda ngintu hari besai. Tang, aku deka meri hadiah tu ngagai nuan.” Nuan patut mikirka kebuah iya meri hadiah. Nuan engka ngumbai nerima hadiah nya enda sama enggau ngintu hari besai. Endang amat, enti orang ke meri hadiah enda nemu pasal pengarap nuan, nuan patut nerangka kebuah nuan enda ngintu hari besai. Tu ulih nerangka kebuah nuan nerima hadiah iya, tang nuan enda malas hadiah iya maya nya. Enti iya sengaja ngasuh nuan enda bepegai ba pengarap nuan, nuan tau enda nerima hadiah nya.

 NERANG NGAGAI DIRI SEBILIK

16. Baka ni nuan ulih nerang enggau jaku ti manah pasal pengawa ti bekaul enggau hari besai?

16 Baka ni enti diri sebilik enda sama pengarap enggau nuan? Nuan mega patut nerang enggau jaku ti manah. Anang bekelikuh enggau kaban belayan nuan enti sida ngintu adat tauka pengerami ti dikedeka sida. Bebasaka sida, baka nuan deka sida bebasaka nuan. (Matthew 7:12) Seliahka semua pengawa ti ulih ngaul nuan enggau hari besai. Taja pia, nuan ulih milih, sekalika enggau ngintu tauka enda, enti hari besai nya nadai kaul enggau pengarap bula. Endang amat, nuan patut bepegai ba pengarap enggau ati ti beresi.—1 Timoti 1:18, 19.

17. Nama patut digaga nuan ngambika anak nuan enda tusah ati ketegal sida meda orang bukai nyambut hari besai?

17 Nama patut digaga nuan ngambika anak nuan enda tusah ati ketegal enda nyambut hari besai? Sekeda apai indai netapka ni maya meri hadiah ngagai anak sida. Hadiah ti pemadu manah nya, meri awak begulai sereta ngayanka pengerindu ngagai sida.

TERUS NGEREJA SEMBAH TI BENDAR

Terus ngereja sembah ti bendar meri pengelantang ati

18. Baka ni gempuru Kristian nulung nuan bepegai teguh ba sembah ti bendar?

18 Enti deka ngerinduka ati Petara, kitai patut nulak sembah ti bula, lalu bepegai teguh ba sembah ti bendar. Kelimpah ari nya, nama agi patut digaga kitai? Bup Kudus madah: “Aram kitai berundingka chara kitai tau nyungkak pangan diri ngayanka pengerindu lalu ngereja pengawa ti badas, enda ngelengkaka pengawa begempuru, baka sekeda orang, tang meransang pangan diri, lalu bebendar agi ngereja nya laban kita meda Hari Tuhan nyau semak.” (Hebrew 10:24, 25) Gempuru  Kristian ngasuh kitai gaga ati laban kitai ulih nyembah Petara ngena chara ti diterima Iya. (Masmur 22:22; 122:1) Ba gempuru nya, orang Kristian ke tetap ati ulih “diperansang” enggau pengarap pangan diri.—Rome 1:12.

19. Nama kebuah nuan patut madah ngagai orang bukai utai ti udah dipelajarka nuan ari Bup Kudus?

19 Chara bukai nuan ulih bepegai teguh ba sembah ti bendar nya madah ngagai orang bukai utai ti udah dipelajarka nuan ari Bup Kudus enggau Saksi-Saksi Jehovah. Mayuh orang “tusah” ketegal semua utai jai ti benung nyadi ba dunya kemaya hari tu. (Esekiel 9:4) Nuan engka nemu sekeda orang ke tusah nya. Nama kebuah enda madah ngagai sida berita manah ari Bup Kudus pasal jemah ila? Maya nuan begulai enggau orang Kristian ti bendar, lalu madah ngagai orang bukai pasal pemendar ti ngerinduka ati ari Bup Kudus ke udah dipelajarka nuan, nuan deka ngasaika pengawa bekaul enggau sembah ti bula belubah-lubah lenyau ari ati nuan. Pechaya meh, nuan deka gaga ati enggau bulih mayuh agi berekat enti nuan bepegai teguh ba sembah ti bendar.—Malaki 3:10.

^ per. 9 Pengerami Saturnalia mega kebuah 25 haribulan 12 dipilih. Pengerami ke dikena meri basa ngagai petara umai orang Rome tu diintu kena 17-24 haribulan 12. Maya pengerami Saturnalia, orang Rome gaga ati berami enggau meri hadiah ngagai pangan diri.

^ per. 10 Peda Penerang ba lambar 222-223, kena nemu nama runding orang Kristian ti bendar pasal hari besai.