Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 4

Sapa Jesus Kristus?

Sapa Jesus Kristus?
  • Nama pengawa dikereja Jesus?

  • Ari ni penatai iya?

  • Nama pemanah ti dikembuan Jesus?

1, 2. (a) Nama kebuah nemu nama orang ke tebilang enda chukup kena kitai ngelala iya? (b) Nama penemu orang ke enda sebaka pasal Jesus?

MAYUH orang tebilang ba dunya tu. Bisi sekeda tebilang ba bansa diri empu, nengeri tauka serata dunya. Tang, semina nemu nama orang ke tebilang nya enda chukup kena kitai ngelala iya, laban kitai enda nemu chara pengidup enggau ulah iya ti bendar.

2 Mayuh orang ba serata dunya tu kala ninga pasal Jesus Kristus, taja pan iya idup ba dunya tu kira-kira 2,000 taun ti udah. Tang, mayuh orang bisi penemu ti enda sebaka pasal Jesus. Sekeda ngumbai Jesus semina seiku orang ke manah. Bisi mega orang ngumbai iya nabi. Tang, mayuh agi orang ngumbai Jesus nya Petara, lalu patut disembah. Patut iya disembah?

3. Nama kebuah nuan patut nemu pemendar pasal Jesus?

3 Nama kebuah nuan patut nemu pemendar pasal Jesus? Laban Bup Kudus madah: ‘Tu pengidup ti meruan belama iya, ngambika sida ngelala nuan, Petara ti bendar, enggau Jesus Kristus, ke dikirumka Nuan.” (John 17:3) Ya, nemu pemendar pasal Petara Jehovah enggau Jesus Kristus ulih meri pengidup belama iya ba dunya paradais. (John 14:6) Pia mega, Jesus meri  teladan ti pemadu manah pasal chara idup ba dunya tu sereta chara begulai enggau orang bukai. (John 13:34, 35) Ba Pelajar 1, kitai udah belajar pasal Petara ti bendar. Diatu aram kitai meda nama ajar ti bendar pasal Jesus Kristus ari Bup Kudus.

MESSIAH KE DISEMAYA

4. Nama reti gelar “Messiah” enggau “Kristus”?

4 Sebedau Jesus ada, Bup Kudus udah lama madahka Petara deka nganjung Messiah tauka Kristus ke dunya tu. Gelar “Messiah” (jaku Hebrew) enggau “Kristus” (jaku Gerika) reti iya, “Orang ke Dipilih  Petara.” Nama kebuah kitai ngumbai orang tu dipilih? Laban Petara milih iya megai pengawa ti istimewa. Pengudah pelajar tu, kitai deka belajar mayuh agi pasal pengawa Messiah ke ngamatka semaya Petara. Kitai mega deka belajarka berekat ti diberi Jesus ngagai kitai kemaya hari tu. Tang, sebedau Jesus ada, mayuh orang bepikir, ‘Sapa ti deka nyadi Messiah?’

5. Pasal Jesus, nama utai ti endang dipechaya bala murid iya?

5 Bala murid Jesus pechaya, Jesus ke ari Nasaret endang Messiah. (John 1:41) Seiku ari murid iya ke benama Simon Peter madah ngagai Jesus: “Nuan tu Kristus.” (Matthew 16:16) Tang, baka ni bala murid Jesus enggau kitai tau pechaya, Jesus endang Messiah ti disemaya?

6. Beri chunto baka ni Jehovah nulung orang ke tetap ati ngelala Messiah.

6 Bala nabi Petara ke idup sebedau Jesus ada, mayuh madah pasal Messiah. Tu ulih nulung orang ngelala iya. Chunto, nuan diasuh ngambi seiku orang ke enda dikelala nuan ba stesen bas tauka padang bilun. Enti nuan udah dipadahka enggau silik pasal orang nya, enda ke senang agi nuan ngelala iya? Baka nya mega, Jehovah udah ngasuh bala nabi Iya madah enggau silik pasal pengawa sereta utai ke deka nyadi ba Messiah. Tu ulih nulung orang ke tetap ati ngelala iya enggau terang agi.

7. Nama dua iti chunto ba Bup Kudus ke nyadi ba Jesus?

7 Peratika dua iti chunto aja. Kesatu, lebih 700 taun sebedau Messiah ada, nabi Mikah madahka iya deka ada ba Betlehem, siti menua ti mit ba nengeri Judah. (Mikah 5:2) Dini endur Jesus ada? Ba Betlehem! (Matthew 2:1, 3-9) Kedua, bup Daniel 9:25 madahka,  Messiah deka datai ba taun 29 M. * Maya utai ti ditulis nya nyadi ba Jesus, tu nunjukka iya Messiah ti disemaya.

Pengudah dibaptisa, Jesus nyadi Messiah, tauka Kristus

8, 9. Nama tanda nunjukka Jesus endang Messiah maya iya dibaptisa?

8 Pengujung taun 29 M., kitai nemu Jesus endang Messiah. Maya taun nya, Jesus dibaptisa John Pemaptisa ba Sungai Jordan. Jehovah udah besemaya deka meri tanda ngagai John ngambika iya ngelala Messiah. John meda tanda nya maya Jesus dibaptisa. Bup Kudus madahka utai tu nyadi: ‘Lebuh Jesus udah dibaptisa, iya pansut ari dalam ai. Langit lalu tebuka. Iya lalu meda Roh Petara nurun lalu inggap ba iya baka burung achang. Siti nyawa lalu bejaku ari serega, “Tu Anak ke dikesayauka Aku. Aku rinduka iya.”’ (Matthew 3:16, 17) Udah John meda enggau ninga utai ke nyadi, iya endang pechaya Jesus nya dikirum Petara. (John 1:32-34) Pengudah roh kudus Petara nurun ba iya sehari nya, Jesus nyadi Messiah tauka Kristus, orang ke dipilih Petara nyadi Tuai enggau Raja.—Isaiah 55:4.

9 Bup Kudus enggau Petara Jehovah empu udah ngaku Jesus nya Messiah ke disemaya. Bup Kudus mega bisi nyaut dua iti agi tanya ti beguna bendar pasal Jesus Kristus: Ari ni penatai iya? Nama pemanah iya?

ARI NI PENATAI JESUS?

10. Nama ajar Bup Kudus pasal Jesus, sebedau iya datai ke dunya tu?

10 Bup Kudus ngajar, Jesus diau ba serega sebedau iya  datai ke dunya tu. Nabi Mikah madahka Messiah deka ada ba Betlehem. Tang, asal iya ari “dulu kelia.” (Mikah 5:2) Jesus empu mega suah madahka diri diau ba serega sebedau iya nyadi mensia. (John 3:13; 6:38, 62; 17:4, 5) Ba serega, Jesus bisi kaul ti manah enggau Jehovah.

11. Baka ni Bup Kudus nunjukka Jesus nya Anak ti pemadu dikesayau Jehovah?

11 Jesus nya Anak ti pemadu dikesayau Jehovah. Jesus dikumbai “anak ke terubah diadaka ari atas semua utai ti digaga” laban iya utai keterubah ditempa Petara. * (Kolosi 1:15) Bisi kebuah bukai ngasuh Jesus dikumbai Anak ti istimewa. Iya “Anak tunggal.” (John 3:16) Reti iya, Jesus digaga Petara kediri aja. Petara mega ngena Jesus ngaga semua utai. (Kolosi 1:16) Jesus pan dikumbai “Jaku.” (John 1:14) Jesus madahka pesan enggau perintah ari Petara ngagai semua melikat sereta mensia.

12. Nama kebuah kitai nemu Anak tuai enda sebaka enggau Petara?

12 Sekeda orang pechaya Anak keterubah tauka Anak tuai Petara sebaka enggau Iya. Tang, tu ukai ajar ari Bup Kudus. Baka ke dipadah ba genteran sebedau tu, Anak nya ditempa. Reti iya, Anak bisi pun, tang Petara Jehovah nadai pun nadai ujung. (Masmur 90:2) Anak tunggal tu mega nadai kala madahka diri sebaka enggau Apai. Bup Kudus enggau terang ngajar, Apai besai agi ari Anak. (John 14:28; 1 Korint 11:3) Semina  Jehovah nya ‘Petara ti Pemadu Bekuasa.’ (Pemungkal 17:1) Nya kebuah, nadai orang ulih sebaka enggau Iya. *

13. Nama reti maya Bup Kudus madah Anak baka ‘gamal Petara ti enda ulih dipeda’?

13 Jehovah enggau Anak tuai Iya bisi kaul ti rapat bebiliun taun—lama sebedau dunya digaga! Seduai iya endang chukup rinduka pangan diri! (John 3:35; 14:31) Anak tu bisi pemanah ti sebaka enggau Apai iya. Nya kebuah, Bup Kudus ngumbai Anak baka ‘gamal Petara ti enda ulih dipeda.’ (Kolosi 1:15) Baka seiku anak lelaki ke murih apai iya, baka nya mega Anak ti di serega murihka pemanah Apai iya.

14. Baka ni Anak tunggal Jehovah ulih ada nyadi mensia?

14 Anak tunggal Jehovah nurun ari serega lalu datai ke dunya tu nyadi mensia. Tang, nuan engka betanya ‘Baka ni Jesus ulih ada nyadi mensia?’ Jehovah ngaga pengawa ajih ngambika utai tu ulih nyadi. Jehovah mindahka nyawa Anak tuai Iya ari serega ke dalam kandung seiku indu dara bungas bansa Judah ke benama Maria. Jesus enda beapaika mensia, nya kebuah Maria ngadaka anak lelaki ti sempurna lalu meri nama iya, Jesus.—Luke 1:30-35.

NAMA PEMANAH JESUS?

15. Nama kebuah kitai ngumbai kitai ngelala Jehovah enggau manah agi ari Jesus?

15 Utai ti dipadah enggau digaga Jesus maya ba dunya tu, ulih nulung kitai ngelala iya enggau Jehovah manah agi. Nama kebuah? Laban Jesus ngayanka  pemanah Apai iya enggau sempurna. Nya kebuah, Jesus madah ngagai seiku ari murid iya: “Barang sapa udah meda aku, udah meda Apai.” (John 14:9) Empat iti bup ba Bup Kudus ke dikumbai Injil—Matthew, Mark, Luke enggau John—madahka kitai pasal pengidup, pengawa enggau pemanah Jesus Kristus.

16. Nama batang ajar Jesus, lalu jaku ajar iya datai ari sapa?

16 Jesus nya “Pengajar” ti tebilang. (John 1:38; 13:13) Nama utai diajar iya? Batang ajar iya ‘berita manah pasal Perintah Petara’. Perintah Petara nya ba serega, lalu iya deka merintah dunya tu sereta meri pemaik ngagai mensia ke ngasi belama iya. (Matthew 4:23) Jaku ajar ari sapa tu? Jesus madah: ‘Ajar ti dibai aku ukai enggi aku, tang enggi Iya ke ngirumka aku.’ Iya nya, Jehovah. (John 7:16) Jesus nemu Apai iya deka semua mensia ninga berita manah pasal Perintah Petara. Ba Pelajar 8, kitai deka belajar mayuh agi pasal Perintah Petara enggau utai ti deka digaga Perintah tu.

17. Dini endur Jesus ngajar, lalu nama kebuah iya bebendar ngajar orang?

17 Dini endur Jesus ngajar? Iya ngajar ba nengeri, kampung, pasar, rumah enggau dini-dini endur bisi orang. Jesus enda ngarapka orang datai ngagai iya, tang iya ngiga sida. (Mark 6:56; Luke 19:5, 6) Nama kebuah Jesus bebendar nginjil enggau ngajar orang? Laban nya peneka Petara. Jesus seruran ngereja utai ti diasuh Petara. (John 8:28, 29) Jesus mega nusui berita manah laban iya kasih meda bala mayuh ke datai ngagai iya. (Matthew 9:35, 36) Bala mayuh tu enda diajar tuai pengarap sida pemendar pasal Petara enggau tuju Iya. Jesus nemu sida patut ninga berita manah pasal Perintah Petara.

18. Nama pemanah Jesus ti dikerindu nuan?

 18 Jesus bisi pengerindu ti dalam, nyamai enggau begulai sereta manah ati. Nyentukka anak mit pan rindu begulai enggau iya. (Mark 10:13-16) Jesus enda bechiping. Iya begedi ke pengawa nipu enggau enda lurus. (Matthew 21:12, 13) Jeman Jesus kelia, orang indu enda entu dipebasa. Tang, Jesus bebasa ke sida iya. (John 4:9, 27) Jesus mega baruh ati. Bisi sekali, Jesus masu kaki bala murid iya taja pan pengawa nya semina digaga orang ke bepangkat mit.

Jesus ngajar ba dini-dini endur ke bisi orang

19. Nama chunto nunjukka Jesus nemu utai ti diguna orang?

19 Jesus nemu utai ti diguna orang. Baka ni kitai nemu? Maya Jesus meda orang sakit, iya ngeraika sida ngena roh kudus ari Petara. (Matthew 14:14) Chunto, seiku lelaki ke sakit lan tauka sakit kulit datai ngagai Jesus lalu bejaku: “Enti nuan deka, nuan ulih  ngasuh aku tuchi.” Jesus ulih ngasaika pemedis enggau pemerinsa lelaki tu. “Enggau ati ti sinu ke iya Jesus ngunjurka jari lalu negu orang nya, lalu bejaku, ‘Aku deka. Tuchi meh nuan!’” Tekala nya, penyakit lelaki nya lalu gerai! (Mark 1:40-42) Ulih nuan ngasaika pengaga ati lelaki nya?

NGASI NYENTUK KE UJUNG

20, 21. Baka ni Jesus nyadi teladan ngasika Petara?

20 Jesus nyadi teladan ti pemadu manah ngagai kitai. Jesus seruran ngasika Petara, taja pan nerima mayuh macham penusah. Jesus ulih ngelaban penguji ari Sitan. (Matthew 4:1-11) Bisi sekali, bala Jesus sebilik enda pechayaka iya nyentukka sida ngumbai iya “nyau udah gila!” (Mark 3:21) Tang, Jesus enda ngasuh utai tu nagang iya ari ngereja pengawa Petara. Jesus mega  enda ngelaban orang ke beduan sereta merinsa iya.—1 Peter 2:21-23.

21 Jesus mengkang ngasika Petara nyentuk ke iya mati dibunuh. (Pilipi 2:8) Uji peratika pengujung pengidup Jesus maya iya nyadi mensia. Jesus ditangkap, dikutuk saksi pelesu, ditipu bala hakim, diketawaka bala mayuh enggau diperinsa bala soldadu. Sebedau Jesus ngapuska seput iya ba tiang, iya bejaku: “Udah tembu!” (John 19:30) Udah tiga hari Jesus mati, Apai iya ti di serega ngangkatka iya idup baru. (1 Peter 3:18) Pengudah 40 hari, Jesus pulai ke serega. Ba serega Jesus ‘duduk muak ari kanan Petara,’ lalu nganti maya diri nyadi raja.—Hebrew 10:12, 13.

22. Nama utai diulih kitai ari pemati Jesus ke ngasika Petara nyentuk ke ujung?

22 Nama utai diulih kitai ari pemati Jesus ke ngasika Petara nyentuk ke ujung? Pemati iya muka peluang idup belama iya ba dunya paradais. Tu sejalai enggau asal tuju Petara. Pengudah pelajar tu, nuan deka belajar baka ni pemati Jesus muka peluang idup belama iya.

^ per. 7 Peda Penerang ba lambar 197-199, kena nemu utai ti ditulis Daniel pasal Jesus.

^ per. 11 Jehovah mega dikumbai Apai laban Iya nempa kitai. (Isaiah 64:8) Jesus ditempa Petara, nya kebuah iya dikumbai Anak Petara. Melikat ti bukai enggau mensia keterubah, Adam, mega dikumbai anak Petara.—Luke 3:38.

^ per. 12 Peda Penerang ba lambar 201-204, kena nemu Anak tuai enda sebaka enggau Petara.