Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 19

Meruan Dalam Pengerindu Petara

Meruan Dalam Pengerindu Petara
  • Nama reti rinduka Petara?

  • Baka ni kitai ulih meruan dalam pengerindu Petara?

  • Baka ni Jehovah meri berekat ngagai orang ke meruan dalam pengerindu Iya?

Kati nuan deka belindung ba baruh Jehovah?

1, 2. Dini kitai ulih tetemuka endur beteduh ti selamat kemaya hari tu?

PIKIRKA! Nuan benung bejalai maya hari kudi. Mua hari chelum. Kilat manchar, guntur balat bemunyi, udah nya ujan bangat nyadi. Nuan berumban ngiga endur beteduh. Nuan tepedaka siti langkau ba tisi jalai. Langkau nya tegap sereta enda tuduh. Naka meh pengaga ati nuan!

2 Kitai diatu benung diau ba dunya ke baka hari kudi. Laban dunya tu charut, lalu majak jai. Dini kitai ulih tetemuka endur beteduh ti selamat, ngambika pengarap kitai enda lemi tauka lenyau peluang idup belama iya? Peratika jaku ajar Bup Kudus: “Barang sapa ke dijaga Iya ti Pemadu Bekuasa, tau nyebut ngagai Iya, ‘Nuan endang penyaga enggau pengelindung aku. Nuan endang Petara aku. Aku manggaika pengarap aku ba Nuan.’”—Masmur 91:1, 2.

3. Baka ni kitai ulih belindung ba baruh Jehovah?

3 Pikirka utai tu! Jehovah, Penempa enggau Pemerintah ti Pemadu Tinggi ba  dunya, ulih nyaga kitai. Iya ulih nyelamatka kitai laban Iya bekuasa agi ari orang tauka utai ti tau ngemedis kitai. Nyema kitai dipediska, Jehovah ulih muai semua pemedis nya. Baka ni kitai ulih belindung ba baruh Jehovah? Kitai patut arapka Iya. Pia mega, Jaku Petara meransang kitai: “Meruan dalam pengerindu Petara.” (Jude 21) Ya, kitai patut meruan dalam pengerindu Petara, ngetanka kaul ti rapat enggau Apai ti di serega. Enggau tu kitai pechaya ulih belindung ba baruh Iya. Tang baka ni kitai bulih kaul tu?

BETERIMA KASIH KE PENGERINDU PETARA

4, 5. Nama sekeda chara ti dikena Jehovah ngayanka pengerindu ngagai kitai?

4 Kitai patut beterima kasih ngagai Jehovah laban Iya udah ngayanka pengerindu Iya ngagai kitai. Enggau tu, kitai ulih meruan dalam pengerindu Iya. Pikirka sekeda ajar Bup Kudus ti udah dipelajarka nuan ari bup tu. Jehovah ti Penempa, udah meri dunya ti manah tu endur kitai diau. Iya udah ngemenuhka dunya tu enggau mayuh pemakai, ai, pemisi asal ari tanah tauka ai, jelu sereta rampa menua ti manah. Petara ti nyadi Pengarang Bup Kudus udah ngayanka nama enggau pemanah Iya ngagai kitai. Pia mega, Jaku Iya madahka Iya udah ngirumka Jesus, Anak ti dikesayau ke dunya tu. Jesus deka merinsa lalu mati ketegal kitai. (John 3:16) Nama reti pemeri tu ngagai kitai? Iya meri kitai peluang ti manah jemah ila.

5 Peluang kitai jemah ila mega bepanggai ba utai bukai ke udah digaga Petara. Jehovah udah nirika Perintah Petara di serega. Enda lama agi, perintah tu deka muai semua pemerinsa, lalu ngaga dunya tu nyadi paradais. Uji pikir! Kitai ulih diau dia dalam pemaik enggau pengelantang belama iya. (Masmur 37:29) Pia mega, Petara udah meri iring baka ni kitai ulih idup enggau chara ti pemadu  manah diatu. Iya mega meri kitai peluang besampi ngagai Iya. Tu sekeda ari chara Jehovah ngayanka pengerindu ngagai semua mensia, nyengkaum nuan.

6. Baka ni nuan beterima kasih ke pengerindu ari Jehovah?

6 Pikirka tanya tu: Baka ni aku beterima kasih ke pengerindu Jehovah? Mayuh deka nyaut, “Aku pan patut rinduka Jehovah.” Kati nuan ngasaika nya? Jesus madah, tu pesan ti pemadu besai: ‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ (Matthew 22:37) Nuan tentu bisi kebuah rinduka Petara. Baka ni kitai ulih rinduka Jehovah enggau pengabis ati, semengat enggau runding?

7. Rinduka Petara patut meransang kitai ngaga nama? Terangka.

7 Nitihka Bup Kudus, rinduka Petara nya beguna bendar. Rinduka Petara patut meransang kitai ngaga nama? Chunto: Nuan deka makai sigi buah apel. Tang, enti orang meri nuan leka buah apel aja, kati nuan puas ati? Tentu enda! Leka buah nya semina pun penatai siti pun kayu ti deka ngasilka buah. Baka leka buah nya, rinduka Petara semina pun aja. Bup Kudus madah: ‘Reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’ (1 John 5:3) Nya alai, enti kitai bisi pengerindu ti bendar ngagai Petara, kitai patut nunjukka iya ari pengawa kitai.—Matthew 7:16-20.

8, 9. Baka ni kitai ulih ngayanka pengerindu enggau terima kasih kitai ngagai Petara?

8 Kitai ngayanka pengerindu ngagai Petara maya kitai nitihka pesan enggau jaku ajar Iya. Tu enda mar digaga. Ukum Jehovah digaga kena nulung kitai bulih pengidup ti manah, ngelantangka ati sereta ngemuaska ati. (Isaiah 48:17, 18) Enggau idup sejalai nitihka iring Jehovah, kitai  ngayanka diri amat beterima kasih ke semua utai ti udah digaga Iya. Tang, mimit aja orang ba dunya tu nunjukka diri beterima kasih. Kitai enggai baka sekeda orang ke idup maya Jesus ba dunya tu. Jesus ngeraika sepuluh iku orang ke sakit lan, tang semina seiku aja ke nikal baru, lalu beterima kasih ngagai iya. (Luke 17:12-17) Kitai tentu deka baka seiku nya, ukai baka semilan iku ke enda beterima kasih!

9 Nama pesan Jehovah ti patut dititihka kitai? Kitai udah berandau pasal pesan nya ngena bup tu, tang aram kitai ngulang sekeda ari pesan nya baru. Nitihka pesan Petara nulung kitai meruan dalam pengerindu Petara.

SEMAK AGI NGAGAI JEHOVAH

10. Terangka nama kebuah terus belajarka pasal Petara Jehovah nya beguna.

10 Belajar pasal Jehovah nya beguna ngambika ulih semak agi ngagai Iya. Pengawa tu enda nemu ngetu. Enti nuan ba luar maya malam ti chelap, nuan  ngangatka diri semak api. Kati nuan deka ngelakka api nya padam? Enda. Nuan tentu nambahka kayu ngambika api majak mau enggau angat. Baka kayu ke ngidupka api, ‘mujur belajarka pasal Petara’ nulung ngeringka pengerindu nuan ngagai Jehovah.—Jaku Dalam 2:1-5.

Baka api begunaka kayu, pengerindu nuan ngagai Jehovah begunaka penemu ngambika enda padam

11. Nama penyadi udah murid Jesus ninga utai ti diajar iya?

11 Jesus deka bala murid iya meruan rinduka Jehovah enggau Jaku Iya. Iya enggai pengerindu sida padam. Udah iya diangkatka ari mati, Jesus ngajar dua iku murid iya pasal sekeda utai ti dipadah ba Sempekat Lama ke udah nyadi ba iya. Udah ninga utai ku Jesus, seduai iya bejaku enggau pangan diri: “Enda ka ati tua asai ke disar api lebuh Iya bejaku enggau tua ba jalai raya tadi, lebuh Iya nerangka Bup Kudus ngagai tua?”—Luke 24:32.

12, 13. (a) Nama udah nyadi enggau pengerindu mayuh orang ngagai Petara sereta Bup Kudus kemaya hari tu? (b) Baka ni kitai ulih ngetanka pengerindu ngambika enda padam?

12 Maya nuan baru nemu ajar Bup Kudus, enda ke ati nuan belabuh gaga, ransing, enggau rinduka Petara? Tentu nuan tauka bala bukai ngasaika nya. Utai ti mar digaga diatu iya nya ngetanka pengerindu ngambika enda padam, tang majak nambah. Kitai enggai nitihka pendiau orang ba dunya kemaya hari tu. Jesus madah: “Mayuh orang enda agi rinduka pangan diri.” (Matthew 24:12) Baka ni nuan ulih ngetanka pengerindu ngagai Jehovah enggau pemendar ari Bup Kudus ngambika enda padam?

13 Terus ngulihka penemu pasal Jehovah enggau Jesus. (John 17:3) Peratika tauka pikirka enggau dalam pasal utai ti udah dipelajarka nuan ari Jaku Petara. Tanya diri empu: ‘Nama dipelajarka aku pasal Petara Jehovah ari utai tu? Nama kebuah utai tu meransang aku rinduka Iya enggau pengabis ati, runding enggau semengat?’ (1 Timoti 4:15) Meratika enggau dalam utai ti udah dipelajar deka nulung nuan meruan rinduka Jehovah.

14. Baka ni sampi ulih nulung kitai meruan rinduka Jehovah?

 14 Chara bukai ngambika pengerindu ngagai Jehovah enda padam iya nya seruran besampi. (1 Tesalonika 5:17) Ba Pelajar 17, kitai belajar sampi nya pemeri ti berega ari Petara. Baka mensia ke selalu bejaku enggau pangan diri, kitai mega patut seruran besampi ngagai Jehovah ngambika kitai semak agi ngagai Iya. Maya besampi anang ngulang leka sampi tauka macha ari bup sampi. Tang, sebut leka sampi ari ati ngambika sampi bisi reti. Kitai patut bejaku ngagai Jehovah baka anak bejaku enggau apai ti dikesayau. Kitai deka bejaku enggau bebasa, enda bula sereta ari ati. (Masmur 62:8) Ya, belajar Bup Kudus kediri empu enggau sampi ari ati endang beguna ba sembah kitai, lalu tu nulung kitai meruan dalam pengerindu Petara.

GAGA ATI DALAM SEMBAH NUAN

15, 16. Nama kebuah kitai ngumbai pengawa ngerembaika berita manah pasal Perintah Petara nya peluang ti manah?

15 Belajar Bup Kudus enggau sampi sekeda ari sembah ti patut digaga kitai maya kediri. Tang, diatu kitai deka berandauka sembah ti digaga kitai ba mua orang mayuh: madah ngagai orang bukai pasal pengarap kitai. Kati nuan udah bekunsi sekeda pemendar ari Bup Kudus enggau orang bukai? Enti udah, nuan tentu gaga ati laban bisi peluang ti manah tu. (Luke 1:74) Maya kitai bekunsi pemendar pasal Petara Jehovah, kitai udah enggau ngereja pengawa ti beguna ke diberi ngagai semua orang Kristian ti bendar—ngerembaika berita manah pasal Perintah Petara.—Matthew 24:14; 28:19, 20.

16 Rasul Paul ngumbai pengawa nginjil nya baka reta ti berega. (2 Korint 4:7) Bejaku enggau orang pasal Petara Jehovah enggau tuju Iya, nya pengawa ti pemadu manah ke ulih dikereja nuan. Kitai bekereja enggau Tuan ti pemadu manah, lalu kereja tu meri penguntung ti besai. Enggau  ngereja tu, nuan nulung orang ke bebendar deka semak ngagai Apai ti di serega, lalu nuju jalai ngagai pengidup belama iya! Nadai kereja bukai ti ngemuaska ati, kelimpah ari pengawa nginjil. Pia mega, madah pasal Jehovah enggau Jaku Iya ngemansangka pengarap nuan, lalu ngeringka pengerindu nuan ngagai Iya. Jehovah ingatka utai ti udah dikereja  nuan. (Hebrew 6:10) Bebendar ngereja pengawa tu nulung nuan meruan dalam pengerindu Petara.—1 Korint 15:58.

17. Nama kebuah ngerembaika berita manah beguna bendar diatu?

17 Kingatka, ngerembaika berita manah pasal Perintah Petara nya pengawa ti beguna. Bup Kudus madah: “Majak nusui Jaku nya.” (2 Timoti 4:2) Nama kebuah ngereja pengawa tu beguna bendar diatu? Jaku Petara madah: ‘Hari Jehovah nyau semak-semak amat lalu deka datai enggau jampat!’ (Sepaniah 1:14) Ya, maya Jehovah ngemunaska semua utai ti jai ba dunya tu deka datai enggau jampat. Orang patut dipadahka pasal utai tu! Sida patut nemu diatu meh maya milih Jehovah nyadi Pemerintah ti Pemadu Tinggi. Pengujung dunya tu “enda masau jam [enda lubah, NW].”—Habakuk 2:3.

18. Nama kebuah kitai begulai enggau orang Kristian ti bendar maya nyembah Jehovah?

18 Jehovah deka kitai nyembah Iya begulai enggau orang Kristian ti bendar. Jaku Iya madah: “Aram kitai berundingka chara kitai tau nyungkak pangan diri ngayanka pengerindu lalu ngereja pengawa ti badas, enda ngelengkaka pengawa begempuru, baka sekeda orang, tang meransang pangan diri, lalu bebendar agi ngereja nya laban kita meda Hari Tuhan nyau semak.” (Hebrew 10:24, 25) Maya kitai begulai enggau orang ke sama pengarap ba gempuru Kristian, kitai bisi peluang ti manah muji enggau nyembah Petara ti dikerinduka kitai. Kitai mega meransang pangan diri.

19. Baka ni kitai ulih ngeringka pengerindu enggau pangan diri ba gempuru Kristian?

19 Maya kitai begulai enggau bala bukai ke nyembah Jehovah ba gempuru, kitai ulih ngeringka pengerindu sereta kaul ti manah enggau pangan diri. Kitai patut beratika pemanah pangan diri, baka Jehovah beratika  pemanah kitai. Anang ngarapka pangan diri sempurna. Kingatka, genap iku kitai enda sama pemansang ba pengarap, lalu bisi ngereja penyalah. (Kolosi 3:13) Giga meh peluang begulai semak enggau orang ke rinduka Jehovah, lalu nuan deka mansang dalam pengarap. Ya, nyembah Jehovah enggau bala menyadi ke sama pengarap deka nulung nuan meruan dalam pengerindu Petara. Baka ni Jehovah meri berekat ngagai orang ke tetap ati nyembah Iya ngambika meruan dalam pengerindu Iya?

NGULIHKA “PENGIDUP TI BENDAR”

20, 21. Nama reti “pengidup ti bendar,” lalu nama kebuah tu peluang ti manah?

20 Jehovah meri pengidup ngagai nembiak Iya ke tetap ati, tang pengidup ti baka ni? Kati nuan puas ati enggau pengidup nuan diatu? Mayuh orang deka nyaut “puas ati,” laban sida ngasaika diri agi ulih enseput, makai, tauka ngirup. Maya gaga ati, kitai engka nyebut, “Tu meh pengidup ti bendar!” Tang, Bup Kudus nerangka nadai mensia kemaya hari tu ngembuan pengidup ti bendar.

Jehovah deka nuan bulih “pengidup ti bendar.” Deka nuan?

21 Jaku Petara meransang kitai ngulihka “pengidup ti bendar.” (1 Timoti 6:19) Reti iya, “pengidup ti bendar” nya pengidup ti ulih diterima kitai jemah ila. Ya, maya kitai sempurna, kitai deka ngasaika pengidup nitihka asal tuju Petara. Maya kitai idup ba dunya paradais, kitai nadai sakit agi, bisi pemaik enggau pengelantang. Maya nya meh kitai deka ngasaika “pengidup ti bendar”—idup belama iya. (1 Timoti 6:12) Enda ke tu peluang ti manah?

22. Baka ni nuan tau bulih “pengidup ti bendar”?

22 Baka ni kitai tau bulih “pengidup ti bendar”? Ba pekara tu, Paul meransang orang Kristian “ngereja pemadas,” lalu “kaya dalam pengawa ti badas.” (1 Timoti 6:18) Nya alai, bulih pengidup ti bendar bepanggai ba chara kitai nitihka ajar Bup Kudus. Kati Paul ngumbai kitai  bulih “pengidup ti bendar” ketegal kitai ngereja pengawa ti badas? Ukai, kitai bulih peluang tu ketegal “pengasih” ari Petara. (Rome 5:15) Taja pia, Jehovah gaga ati meri berekat ngagai orang ke nyembah Iya enggau tetap ati. Iya deka meda nuan bulih “pengidup ti bendar.” Pengidup belama iya ti ngelantangka ati sereta penuh pemaik deka nganti orang ke meruan dalam pengerindu Petara.

23. Nama kebuah beguna meruan dalam pengerindu Petara?

23 Genap iku kitai patut nanya diri empu, ‘Kati aku nyembah Petara nitihka chara ti dipadah ba Bup Kudus?’ Enti kitai nyaut “ya” ninting hari, kitai nitihka jalai ti betul. Kitai pechaya Jehovah ulih nyaga kitai maya kitai diau ba dunya ti charut tu. Jehovah mega deka ngiring kitai ngagai dunya baru ti deka datai. Kitai enda sabar deka nganti maya tu datai! Kitai patut gaga ati laban udah milih jalai ti betul ba hari ti penudi tu! Enti nuan milih jalai ti betul nya diatu, nuan deka bulih “pengidup ti bendar,” pengidup ti dikedeka Petara Jehovah, belama iya!