Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PENERANG

Patut Orang Kristian Ngena Tanda Regang Dalam Sembah?

Patut Orang Kristian Ngena Tanda Regang Dalam Sembah?

BEJUTA iku orang bebasaka sereta ngena tanda regang dalam sembah. The Encyclopædia Britannica ngumbai tanda regang nya “tanda kena ngelala pengarap Kristian.” Kati orang Kristian patut ngena tanda regang dalam sembah?

Tang ke amat, Jesus ukai mati ba kayu regang. Jaku Gerika dikena nyalin leka jaku “regang” nya stau·rosʹ. Reti iya, “tiang ti lurus tauka kayu.” The Companion Bible madah: “[Stau·rosʹ] ukai reti iya dua batang ramu digaga  melintang. . . Utai ti baka tu nadai disebut dalam jaku Gerika ba [Sempekat Baru] ke ngambarka dua batang ramu.”

Siti agi leka jaku dikena nunjukka utai ti bekaul enggau pemati Jesus. Iya leka jaku Gerika xyʹlon. (Galatia 3:13) Reti iya “ramu” tauka “kayu, belantan, tauka pun kayu.”

Ba bup Hermann Fulda ke dikumbai Das Kreuz und die Kreuzigung (Tanda Regang enggau Pengawa Ngeregang), iya nerangka semina kayu ti selalu dikena maya pengawa ngukum dipejalaika. Nama kebuah? Bup nya madah: “Pun kayu nadai ba endur ngukum orang. Nya alai, siti kayu diujakka ba atas tanah. Jari orang ke ngereja penyalah diangkat ke atas, lalu ditanchang tauka dipantang ba kayu nya. Kaki orang ke ngereja penyalah mega ditanchang tauka dipantang ba kayu nya.”

Tang, penerang ti tau dikearapka datai ari Jaku Petara. Rasul Paul madah: ‘Kristus nebus kitai ari sumpah ti dibai Adat, laban iya udah nejuka diri ditinggang sumpah ngarika kitai, laban endang udah ditulis, “Tulah meh semua orang ke digantung ari kayu.”’ (Galatia 3:13) Ditu Paul ngambi ayat ari Ulang Adat 21:22, 23, ke ditulis ngena jaku Hebrew enggau terang madahka sebatang tiang, ukai kayu regang. Ketegal orang ke diukum mati ngena chara tu dikumbai “tulah,” nya alai orang Kristian enda patut ngias rumah sida ngena engkeramba Jesus ba kayu regang.

Pengudah 300 taun Jesus mati, nadai penerang ti nunjukka orang Kristian ngena tanda regang dalam sembah sida. Taja pia, ba kurun ke-4, seiku raja ti enda arapka Petara ke benama Constantine, udah megai pengarap Kristian ke limpang ari ajar ti bendar. Iya meransang orang ngena tanda regang nyadika tanda orang Kristian. Enda ngira nama tuju ati Constantine, tanda regang nadai sebarang kaul enggau Jesus. Iya ke amat, tanda regang bepun ari orang ke enda arapka Petara. New Catholic Encyclopedia ngaku: “Tanda regang dikena ba adat orang  sebedau jeman Kristian enggau orang ke ukai Kristian.” Penerang bukai ti tau dikearapka mega ngaul tanda regang enggau nyembah engkeramba sereta kena ngintu pengawa peridi orang ke enda arapka Petara.

Tang, nama kebuah tanda tu dikena? Ngambika orang ke enda arapka Petara ulih nerima pengarap Kristian pelesu. Taja pia, ngena sebarang tanda ti bekaul enggau pengarap pelesu dikutuk Bup Kudus. (2 Korint 6:14-18) Ayat ba Bup Kudus mega nagang ngena engkeramba. (Pemansut 20:4, 5; 1 Korint 10:14) Nya alai, orang Kristian enda ngena tanda regang dalam sembah sida.