Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 12

Idup Nitihka Chara ti Ngerinduka Ati Petara

Idup Nitihka Chara ti Ngerinduka Ati Petara
  • Baka ni nuan ulih nyadi pangan Petara?

  • Baka ni pengawa Sitan ke ngelaban Petara bisi kaul enggau nuan?

  • Nama ulah ti enda ngerinduka ati Jehovah?

  • Baka ni nuan ulih idup nitihka chara ti ngerinduka ati Petara?

1, 2. Beri sekeda chunto mensia ke nyadi pangan Jehovah.

ORANG ke baka ni deka dipilih nuan nyadi kaban? Nuan tentu deka bekaban enggau orang ke sama pikir, utai ti dikerindu enggau pendiau. Lalu nuan mega deka semak enggau orang ke lurus sereta manah ati.

2 Sepemanjai pengidup mensia, Petara udah milih sekeda mensia nyadi kaban rapat tauka pangan Iya. Chunto, Jehovah ngangauka Abraham nya pangan Iya. (Isaiah 41:8; James 2:23) Petara ngumbai David nya “orang ke ngerinduka ati Aku” laban iya orang ke dikesayau Jehovah. (Kereja Rasul 13:22) Lalu Jehovah mega “rinduka” nabi Daniel.—Daniel 9:23.

3. Nama kebuah Jehovah milih sekeda mensia nyadi pangan Iya?

3 Nama kebuah Jehovah ngumbai Abraham, David, enggau Daniel pangan Iya? Iya madahka Abraham: “Nuan udah ngasika jaku Aku.” (Pemungkal 22:18) Nya alai, Jehovah semak ngagai orang ke baruh ati ngereja peneka Iya. “Ngasika Aku” ku Iya madah ngagai orang Israel, ‘ngambika Aku nyadika Petara sida, lalu sida  nyadi nembiak Aku.’ (Jeremiah 7:23) Enti nuan ngasika Jehovah, nuan mega ulih nyadi pangan Iya!

JEHOVAH NGERINGKA PANGAN IYA

4, 5. Baka ni Jehovah “meri pengering ngagai orang ke taluk ngagai Iya”?

4 Uji pikir nama reti bepangan enggau Petara. Bup Kudus madah Jehovah ngiga peluang “meri pengering ngagai orang ke taluk ngagai Iya.” (2 Bansa Israel 16:9) Baka ni Jehovah ngayanka pengering Iya ngagai nuan? Siti chara nya dipadah ba Masmur 32:8. Dia kitai macha: “Aku [Jehovah] deka nunjukka jalai ti patut ditengah nuan. Aku deka ngajar sereta meri nuan jaku lalau.”

5 Enda ke jaku tu ngerinduka ati nuan? Iya deka ngiring lalu nyaga nuan maya nuan nitihka jaku lalau Iya. Petara deka nulung nuan ngelaban penguji. (Masmur 55:22) Nyadi, enti nuan nyembah Jehovah enggau pengabis ati, nuan ulih pechaya baka pemasmur ke madah: ‘Aku seruran nemu Jehovah bisi enggau aku. Iya semak aku, lalu nadai utai ulih ngelebuka aku.’ (Masmur 16:8; 63:8) Ya, Jehovah ulih nulung nuan nitihka chara pengidup ti ngerinduka ati Iya. Tang, nuan nemu, bisi munsuh Petara deka nagang nuan.

SITAN NGELABAN PETARA

6. Nama dipadahka Sitan pasal tuju ati mensia?

6 Pelajar 11 nerangka baka ni Antu Sitan ngelaban kuasa merintah Petara. Sitan ngumbai Petara bula enggau bebagi ati laban enda ngelakka Adam seduai Hawa mutus kediri empu utai ti betul enggau utai ti salah. Udah Adam seduai Hawa bedosa, dunya tu belabuh penuh enggau peturun seduai iya. Sitan nanya tuju ati semua mensia. “Mensia ukai nyembah Jehovah ketegal sida rinduka Iya,” ku Sitan. “Beri meh aku peluang, lalu aku  ulih ngelimpangka genap iku orang ari Petara.” Cherita pasal Jop nunjukka, tu meh utai ti dipechaya Sitan. Sapa Jop, lalu baka ni iya bisi kaul enggau pengawa Sitan ke ngelaban Petara?

7, 8. (a) Nama ngasuh Jop badas agi ari orang bukai maya nya? (b) Baka ni Sitan nanyaka tuju ati Jop nyembah Petara?

7 Jop idup kira-kira 3,600 taun ti udah. Iya seiku orang ke manah. Jehovah madah: ‘Nadai orang di dunya ke badas sereta lurus baka iya [Jop], ke nangika Petara sereta nyeliahka penyai.’ (Jop 1:8) Jop ngerinduka ati Petara.

8 Sitan nanyaka tuju ati Jop nyembah Petara. Ku Sitan bejaku ngagai Jehovah: “Ukai enda Nuan ke seruran nyaga iya, nyaga ruang bilik enggau semua utai ti diempu iya? Nuan udah merekatka semua utai ti dikereja iya, lalu jelu bedus enggau jelu sapi iya udah nambah-menambah di menua tu. Tang enti Nuan ngunjurka jari Nuan, lalu ngambi semua utai ti dikemisi iya, iya tetap deka nyumpah Nuan mua mata!”—Jop 1:10, 11.

9. Baka ni Jehovah nyaut Sitan, lalu nama kebuah?

9 Sitan ngumbai Jop nyembah Petara ketegal bulih penguntung ari Petara. Sitan mega madahka enti Jop diuji, iya tentu deka ngelaban Petara. Baka ni Jehovah nyaut Sitan? Laban pengawa tu bisi kaul enggau tuju ati Jop, Jehovah ngelakka Sitan nguji Jop. Enggau tu, Jop rinduka Petara—tauka enda—ulih ditemu enggau terang agi.

JOP DIUJI

10. Nama penguji ti ninggang Jop, lalu baka ni iya nerima nya?

10 Enda lama udah nya, Sitan nguji Jop ngena mayuh chara. Jelu Jop dichuri enggau dibunuh. Mayuh orang gaji iya dibunuh. Tu ngujungka iya suntuk penatai pemisi. Udah nya, sepuluh iku anak iya mati dipangkaka kabut ti besai. Taja pan kena penusah ti balat tu, ‘Jop enda bedosa, laban iya enda besalah Petara.’—Jop 1:22.

11. (a) Nama penguji kedua ti diberi Sitan ngagai Jop, lalu baka ni Jehovah mutarka pekara tu? (b) Baka ni Jop napi penyakit iya?

 11 Sitan enggai alah. Iya engka bepikir, taja pan Jop ulih tan ketegal lenyau reta tengkira, orang gaji enggau bala anak, tang iya engka deka ngelaban Petara enti iya sakit. Jehovah ngelakka Sitan nguji Jop ngena penyakit ti kamah enggau pedis. Tang, tu mega enda ngasuh Jop lenyau pengarap ba Petara. Jop 2:10 madah: “Dalam semua utai nya Jop nadai bedosa ngena mulut iya.”

Jop diberekat ketegal iya tetap ati

12. Baka ni Jop nunjukka Sitan nya bula?

12 Jop enda nemu Sitan ke ngasuh iya tusah. Ketegal enda nemu enggau silik pasal Sitan ke ngelaban kuasa merintah Jehovah, nya alai, Jop ngumbai Petara nya pun penusah iya. (Jop 6:4; 16:11-14) Tang, iya agi ngasika Jehovah. Lalu jaku Sitan ke ngumbai Jop nyembah Petara ketegal berunding kediri empu aja, nya jaku bula!

13. Nama nyadi ketegal Jop tetap ati ngagai Petara?

13 Penetap ati Jop udah nulung Jehovah nyaut jaku jai Sitan. Jop endang pangan Jehovah, lalu Petara meri berekat ketegal iya tetap ati.—Jop 42:12-17.

BAKA NI TU BEKAUL ENGGAU NUAN

14, 15. Nama kebuah kitai ngumbai jaku Sitan ukai dituju ngagai Jop aja, tang ngagai semua mensia?

14 Jaku Sitan ukai dituju ngagai Jop aja. Nuan mega bisi kaul. Jaku Jehovah ba Jaku Dalam 27:11 enggau terang madahka: “Nuan enda tau enda bepenemu-dalam, anak, nya baru aku deka lantang ati, lalu ulih nyaut semua orang ke nganu aku.” Jaku tu ke udah ditulis beratus taun udah Jop mati, nunjukka Sitan agi betenahka Petara, lalu nyalahka orang ti nyembah Iya. Enti kitai idup nitihka chara ti ngerinduka ati Jehovah, kitai endang nulung nyaut jaku bula Sitan. Enggau tu, kitai ngagaka ati Petara. Baka ni asai ati nuan pasal utai tu?  Enda ke manah ulih enggau nyaut pemula Sitan tu, taja pan nuan patut ngubah sekeda chara pengidup nuan?

15 Peratika, Sitan madah: “Mensia deka ngelengkaka semua utai, asal nyawa iya idup.” (Jop 2:4) Enggau nyebut “mensia,” Sitan enggau terang madahka tanya iya ukai semina ngagai Jop, tang ngagai semua mensia. Utai tu beguna bendar. Sitan udah nanya sekalika nuan deka nyembah Petara tauka enda. Sitan deka meda nuan enda ngasika Petara, lalu ngelengkaka jalai pengidup ti manah maya kena penusah. Baka ni Sitan deka ngereja tu?

16. (a) Nama chara dikena Sitan ngelimpangka orang ari Petara? (b)  Baka ni Sitan ngena chara tu nguji nuan?

16 Ba Pelajar 10 kitai udah belajar, Sitan ngena mayuh chara ngelimpangka orang ari Petara. Iya “baka singa ti negung, begigaka orang ke deka diempa iya.” (1 Peter 5:8) Kuasa Sitan ulih dipeda maya kaban belayan tauka orang bukai nagang nuan belajarka Bup Kudus enggau nitihka utai ti udah dipelajar. * (John 15:19, 20) Sitan mega “nemu nyaru diri nyadi melikat penampak.” (2 Korint 11:14) Sitan ulih ngena chara ti enda ulih dipeda kena nesatka nuan enggau narit nuan ari jalai pengidup ti dikedeka Petara. Iya mega ulih ngena penusah ati, ngambika nuan ngasaika diri enda chukup manah ba mua Petara. (Jaku Dalam 24:10) Sekalika Sitan nya baka “singa ti negung” tauka nyaru diri nyadi “melikat penampak,” tuju iya endang sama: Iya madah enti nuan kena penguji, nuan deka ngetu nyembah Petara. Baka ni nuan nyaut tanya Sitan lalu nunjukka diri tetap ati ngagai Petara, baka Jop?

 NGASIKA PESAN JEHOVAH

17. Nama kebuah nuan deka ngasika pesan Jehovah?

17 Nuan ulih nyaut penguji Sitan enggau idup nitihka chara ti ngerinduka ati Petara. Baka ni? Bup Kudus madah: ‘Kita enda tau enda rinduka Petara Jehovah kita enggau pengabis ati kita, enggau pengabis semengat kita, enggau pengabis pengering kita.’ (Ulang Adat 6:5) Enti pengerindu nuan ngagai Petara majak dalam, nuan keran deka ngereja utai ti dikedeka Petara ari nuan. ‘Laban reti rinduka Petara nya,’ tulis rasul John, “kitai ngasika pesan Iya.” Enti nuan rinduka Jehovah enggau pengabis ati, nuan deka nemu “pesan Iya ukai utai ti mar dititihka kitai.”—1 John 5:3.

18, 19. (a) Nama sekeda ari pesan Jehovah? (Peda kutak ba lambar 122.) (b) Baka ni kitai nemu Petara enda minta lebih ari utai ti ulih digaga kitai?

18 Nama pesan Jehovah? Sekeda pesan tu nyengkaum ulah ti patut diseliahka kitai. Chunto, peda  kutak ba lambar 122, ke madah “Seliahka Utai ti Dipegedi Jehovah.” Dia nuan deka meda sekeda ulah ti dikutuk Bup Kudus. Sekeda pengawa nya baka ke enda jai. Tang, lebuh meratika ayat Bup Kudus enggau dalam, nuan deka meda penemu pasal ukum Jehovah. Nuan engka tusah ngubah ulah diri. Tang, idup nitihka chara ti ngerinduka ati Petara meri pengaga ati sereta ngemuaska ati. (Isaiah 48:17, 18) Utai tu ulih digaga nuan. Baka ni kitai nemu?

19 Jehovah enda kala minta lebih ari utai ti ulih digaga kitai. (Ulang Adat 30:11-14) Iya nemu agi utai ti ulih enggau enda ulih digaga kitai. (Masmur 103:14) Pia mega, Jehovah ulih meri kitai pengering kena ngasika Iya. Rasul Paul nulis: ‘Petara endang tau dikarapka, lalu Iya enda nejuka kita diuji lebih ari ti ulih ditatka kita; tang lebuh kita diuji, Iya deka meri kita jalai kena kita  ngelepaska diri, ngambika kita tan natka penguji nya.’ (1 Korint 10:13) Kena nulung nuan betan, Jehovah mega ulih meri nuan “kuasa ti besai.”—2 Korint 4:7.

TERUS NGEMANSANGKA PEMANAH PETARA BA DIRI EMPU

20. Nama pemanah Petara ti patut dikemansangka nuan, lalu nama kebuah tu beguna?

20 Endang amat, semina nyeliahka utai ti dipegedika Jehovah aja enda chukup. Nuan mega patut rinduka  utai ti dikerinduka Iya. (Rome 12:9) Enda ke nuan berasai semak enggau orang ke sama pikir, utai ti dikerindu sereta pendiau? Jehovah pan baka nya. Nya alai, belajar rinduka utai ti dikerinduka Jehovah. Sekeda utai tu dipadah ba Masmur 15:1-5. Dia kitai macha pasal orang ke dikumbai Petara pangan Iya. Pangan Jehovah ngayanka “buah Roh Kudus.” Tu nyengkaum pemanah baka “pengerindu, pengaga, pemaik, pengeliat ati, penyiru, pemadas, penetap ati, penelap, ulih nagang diri.”—Galatia 5:22, 23.

21. Nama deka nulung nuan ngemansangka pemanah Petara ba diri empu?

 21 Selalu macha enggau belajarka Bup Kudus deka nulung nuan ngemansangka pemanah Petara ba diri empu. Pia mega, belajar utai ti dikedeka Petara deka nulung nuan bisi runding ti sama enggau Petara. (Isaiah 30:20, 21) Lebuh pengerindu nuan ngagai Jehovah majak nambah, pengeran nuan deka idup nitihka chara ti ngerinduka ati Petara mega deka nambah.

22. Nama deka diulih nuan enti idup nitihka chara ti ngerinduka ati Petara?

22 Kitai bebendar deka idup nitihka chara ti ngerinduka ati Jehovah. Bup Kudus madah, kitai patut ngelengkaka pengidup ti lama, lalu ngubah iya nyadi mensia ti baru. (Kolosi 3:9, 10) Tang, pasal pesan Jehovah, pemasmur nulis: “Diupah ketegal ngasika utai nya.” (Masmur 19:11) Nuan mega deka ngasaika berekat ti besai enti idup nitihka chara ti ngerinduka ati Petara. Enggau tu, nuan deka nyaut tanya Sitan lalu ngagaka ati Jehovah!

^ per. 16 Tu ukai reti iya orang ke nagang nuan nya di baruh kuasa Sitan. Tang, Sitan petara dunya tu, lalu semua utai ba dunya tu di baruh kuasa iya. (2 Korint 4:4; 1 John 5:19) Nyadi, kitai nemu enda mayuh orang deka nitihka jalai pengidup ti dikedeka Petara, lalu bisi orang deka nagang nuan.