Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 3

Nama Tuju Petara Ngaga Dunya Tu?

Nama Tuju Petara Ngaga Dunya Tu?
  • Nama tuju Petara ngaga mensia?

  • Baka ni Petara dilaban?

  • Baka ni gaya pengidup kitai ba dunya tu jemah ila?

1. Nama tuju Petara ngaga dunya tu?

TUJU Petara ngaga dunya tu endang ngerinduka ati. Jehovah deka dunya tu penuh enggau orang ke gaga ati sereta gerai. Bup Kudus madah ‘Petara ngaga siti kebun di menua Eden,’ lalu Iya ‘ngasuh semua bansa kayu ti manah dipeda sereta manah ke pemakai tumbuh dia.’ Pengudah Petara ngaga mensia keterubah, Adam seduai Hawa, Iya ngengkahka seduai iya ba endur ti manah alai diau. Petara ngasuh seduai iya: “Beranak betelesak lalu ngemenuhka dunya meh kita sereta bekuasa atas iya.” (Pemungkal 1:28; 2:8, 9, 15) Nyadi, tuju Petara ngaga mensia ngambika sida beranak betelesak, nyaga bala jelu, lalu ngaga serata dunya tu nyadi paradais.

2. (a) Baka ni kitai nemu tuju Petara ngaga dunya tu deka dikeamatka? (b) Nitihka Bup Kudus, orang ke baka ni deka idup belama iya?

2 Kati tuju Petara Jehovah ti deka mensia diau ba dunya paradais ulih dikeamatka? “Aku udah bejaku, lalu utai nya deka dikereja,” ku Petara. (Isaiah 46:9-11; 55:11) Ya, Petara endang deka ngamatka tuju Iya!  Petara madah Iya “nadai ngaga dunya nyadi endur ti sunyi nadai mensia, tang nyadi endur alai mensia diau.” (Isaiah 45:18) Petara deka orang ke baka ni diau ba dunya tu? Lalu, ni pengelama sida ulih diau dia? Ku saut Bup Kudus: “Orang ke lurus deka bempu menua tu lalu diau ditu belama iya.”Masmur 37:29; Pemandang 21:3, 4.

3. Nama utai ti ngenyinu ke ati nyadi ba dunya tu, lalu nama tanya ti patut dipikirka?

3 Tang, utai tu bedau agi nyadi. Diatu orang sakit enggau mati; bisi nya belaya lalu bebunuh pangan diri. Utai ti nyadi ba dunya kitai kemaya hari tu, ukai utai ti dikedeka Petara! Tang, nama kebuah tuju Petara bedau agi dikeamatka? Nadai siti bup sejarah ke ditulis mensia ulih nyaut tanya nya, laban penanggul tu bepun ba serega.

ARI NI PENATAI MUNSUH PETARA

4, 5. (a) Sapa ke bejaku ngagai Hawa ngena ular? (b) Baka ni seiku orang ke manah sereta tau dikearap ulih jai nyadi penchuri?

4 Bup Pemungkal madah pasal penyakal Petara ke ayan ba kebun Eden. Iya dikumbai seiku “ular.” Tang, penyakal tu ukai jelu. Bup Pemandang ngumbai iya “Antu tauka Sitan ke nipu semua dunya.” Iya mega dikumbai “ular ti tuai.” (Pemungkal 3:1; Pemandang 12:9) Iya melikat ti enda ulih dipeda sereta bisi kuasa. Baka seiku orang ke ulih ngasuh nyawa iya didinga datai ari anak patung, melikat nya ngena seiku ular bejaku ngagai Hawa. Melikat nya bisi datai maya Petara nyediaka dunya tu alai mensia diau.—Jop 38:4, 7.

5 Semua utai ti digaga Jehovah sempurna. Tang, ari ni penatai “Antu” tauka “Sitan”? Seiku ari melikat Petara udah ngaga diri nyadi Antu. Nama kebuah iya baka  nya? Kitai nemu, kemaya hari tu orang ke manah sereta tau dikearap ulih jai nyadi seiku penchuri. Baka ni iya ulih nyadi jai? Iya engka ngelakka pengingin ti salah tumbuh ba ati iya. Enti iya terus mikirka nya, pengingin ti salah majak balat. Maya bisi peluang, iya tentu ngereja pengingin salah ti dipikirka iya.—James 1:13-15.

6. Baka ni melikat ke bisi kuasa nya nyadi Antu Sitan?

6 Tu meh utai ti nyadi ba Antu Sitan. Iya ninga Petara ngasuh Adam seduai Hawa beranak betelesak ngemenuhka dunya tu. (Pemungkal 1:27, 28) ‘Kapa sida iya nyembah Petara? Sida ulih nyembah aku!’ Sitan engka bepikir baka nya. Nyadi, pengingin ti salah udah tumbuh ba ati iya. Pengujung iya, Sitan ngereja pengingin ti salah nya. Iya nipu Hawa, nyebut utai ti bula pasal Petara. (Pemungkal 3:1-5) Iya nyadi “Antu,” reti iya “orang ti madah bula pasal orang bukai.” Iya mega nyadi “Sitan,” reti iya “Munsuh” tauka “Penyakal.”

7. (a) Nama kebuah Adam seduai Hawa mati? (b) Nama kebuah semua peturun Adam nyadi tuai lalu mati?

7 Antu Sitan udah ngena pemula ngasuh Adam seduai Hawa enda ngasika Petara. (Pemungkal 2:17; 3:6) Tu ngujungka seduai iya mati, munyi ke udah dipadah Petara. (Pemungkal 3:17-19) Udah Adam bedosa, semua peturun iya pan bedosa. (Rome 5:12) Pekara tu ulih disempamaka baka siti chuan kue. Enti chuan nya kempi, baka ni gamal tiap iti kue ti digaga ngena chuan nya? Tentu kempi. Baka nya mega, genap iku mensia “kempi” tauka nerima dosa ari Adam. Nya alai, semua mensia nyadi tuai lalu mati.—Rome 3:23.

8, 9. (a) Baka ni Sitan ngelaban Petara? (b) Nama kebuah Petara enda ngemunaska sida ti ngelaban Iya tekala nya?

8 Maya Sitan ngemai Adam seduai Hawa bedosa, iya ngulu seduai iya ngelaban Petara. Sitan ngelaban chara  Petara merintah. Iya bejaku: ‘Petara nya pemerintah ti jai. Iya bula lalu ngenan utai ti manah ari rayat iya. Mensia enda begunaka Petara merintah sida iya. Sida ulih mutuska diri empu, nama utai ti manah enggau utai ti jai. Sida deka idup manah agi ba baruh perintah aku.’ Baka ni Petara deka nyaut jaku Sitan ke bejai Iya? Sekeda orang bepikir Petara patut ngemunaska aja sida  ti ngelaban Iya. Enti Petara ngemunaska sida ti ngelaban Iya, ulih jaku Sitan nya disaut? Kati chara Petara merintah nya betul?

9 Laban Jehovah lurus enggau sempurna, Iya enda ngemunaska sida ti ngelaban Iya tekala nya. Iya meri masa ti chukup, kena nyaut jaku Sitan ke bejai Iya enggau chara ti ngemuaska ati sereta nentuka Sitan nya bula. Nya alai, Petara meri masa ngagai mensia ngambika sida merintah diri empu ba baruh kuasa Sitan. Kebuah Iya meri mayuh masa sebedau mutarka pekara tu deka dipelajarka ba Pelajar 11 bup tu. Tang diatu, kitai patut berundingka tanya tu: Patut Adam seduai Hawa pechayaka Sitan ke enda kala ngereja siti pan utai manah ke seduai iya? Patut seduai iya ngumbai Jehovah ke udah meri seduai iya semua utai manah, nya Petara ti bula sereta jai? Baka ni enggau nuan empu deh?

10. Baka ni nuan ulih nunjukka diri nyukung Jehovah maya Iya nyaut jaku jai Sitan?

10 Endang manah enti kitai bepikirka tanya tu, laban genap iku kitai napi pekara ti sama kemaya hari tu. Ya, nuan bisi peluang nunjukka diri nyukung Jehovah maya Iya nyaut jaku jai Sitan ti ngelaban Iya. Nuan ulih nerima Jehovah nyadi Pemerintah, lalu nulung nentuka Sitan nya bula. (Masmur 73:28; Jaku Dalam 27:11) Tang, semina mimit aja ari bebiliun iku orang ba dunya tu milih Petara nyadi pemerintah. Pekara tu ngemai ngagai siti tanya ti beguna bendar, Kati Bup Kudus amat ngajar Sitan nya pemerintah dunya tu?

SAPA MERINTAH DUNYA TU?

Kati Sitan ulih meri Jesus semua perintah ba dunya tu enti perintah nya ukai enggi iya?

11, 12. (a) Baka ni penguji ari Sitan ngagai Jesus nunjukka Sitan pemerintah dunya tu? (b) Nama agi utai bukai nunjukka Sitan pemerintah dunya tu?

11 Jesus nadai kala nyakal Sitan nya pemerintah  dunya tu. Bisi sekali, Sitan mandangka ngagai Jesus “semua perintah di dunya tu, enggau semua pengaya sida.” Udah nya Sitan bejanji ngagai Jesus: “Semua utai tu deka diberi aku ngagai nuan, enti nuan deka besugang lalu nyembah aku.” (Matthew 4:8, 9; Luke 4:5, 6) Uji pikir, enti Sitan ukai pemerintah dunya tu, deka iya meri penguji nya ngagai Jesus? Jesus enda nyakal semua perintah ba dunya tu diempu Sitan. Tang, Jesus tentu deka nyakal enti Sitan ukai ba belakang semua perintah tu.

12 Jehovah endang Petara ti Pemadu Bekuasa, sereta ngaga semua utai ti ngalitka ati ba dunya. (Pemandang 4:11) Tang, Bup Kudus nadai kala madahka Petara Jehovah tauka Jesus Kristus pemerintah dunya tu. Indahka Jesus empu enggau terang madah Sitan “pemerintah dunya tu.” (John 12:31; 14:30; 16:11) Bup Kudus pan madahka Antu Sitan “petara dunya.” (2 Korint 4:3, 4) Pasal penyakal tu tauka Sitan, rasul John nulis: “Semua dunya di baruh kuasa Sitan.”—1 John 5:19.

BAKA NI DUNYA SITAN DEKA DIPUNASKA

13. Nama kebuah kitai begunaka dunya baru?

13 Dunya kitai tu majak jai laban penuh enggau perang, pemerintah ti enda lurus, tuai pengarap ti pepura enggau orang jai. Serata dunya tu enda ulih diatur agi. Bup Kudus madah enda lama agi Petara deka ngemunaska penyai ba dunya tu, ba perang Petara ke dikumbai Armagedon. Udah nya, dunya kitai tu deka nyadi siti dunya baru ti manah.—Pemandang 16:14-16.

14. Sapa ti dipilih Petara nyadi Pemerintah ba Perintah Iya, lalu baka ni tu udah dipadahka?

14 Petara Jehovah milih Jesus Kristus nyadi Pemerintah ba Perintah Iya ti di serega. Bup Kudus udah  lama madahka: “Siku anak mit udah ada ke kitai! Siku anak lelaki udah diberi ngagai kitai! Lalu iya deka dikumbai . . . ‘Raja Pemaik.’ Kuasa diraja iya deka majak mansang. Perintah iya deka seruran bisi pemaik.” (Isaiah 9:6, 7) Jesus ngajar nembiak iya besampi pasal perintah tu. Iya besampi: “Datai meh Perintah Nuan. Nyadi meh peneka Nuan di dunya enggau di serega.” (Matthew 6:10) Baka ke deka dipelajar kitai ba Pelajar 8, enda lama agi Perintah Petara deka nganti semua perintah ba dunya tu. (Daniel 2:44) Udah nya, Perintah Petara deka ngaga dunya tu nyadi paradais.

DUNYA BARU UDAH SEMAK!

15. Nama reti ‘dunya ti baru’?

15 Bup Kudus meri semaya tu: ‘Tang nitihka semaya Petara, kitai nganti langit ti baru enggau dunya ti baru, endur alai pengelurus diau.’ (2 Peter 3:13; Isaiah 65:17) Kekadang, Bup Kudus bejaku pasal “dunya,” reti iya orang ke diau ba dunya tu. (Pemungkal 11:1) Nyadi, ‘dunya ti baru’ ke lurus tu, nunjukka mensia ke diterima Petara.

16. Nama pemeri berega ari Petara ngagai sida ke diterima Iya, lalu nama patut digaga kitai ngambika bulih pemeri nya?

16 Jesus udah bejanji, sida ke diterima Petara deka bulih “pengidup ti meruan belama iya” ba dunya baru ke deka datai. (Mark 10:30) Buka meh Bup Kudus nuan ba John 3:16 enggau 17:3, lalu bacha meh jaku Jesus pasal utai ti patut digaga kitai ngambika bulih pengidup meruan belama iya. Diatu, kitai meda berekat ari Petara ke bisi ba dunya Paradais ti deka datai.

17, 18. Baka ni kitai ulih pechaya jemah ila deka bisi pemaik enggau pengelikun ba serata dunya tu?

17 Penyai, perang, enggau ulah ti kasar nadai agi.  “Enda lama da agi orang ke jai deka abis; . . . Tang orang ke baruh ati deka bempu menua tu.” (Masmur 37:10, 11) Pemaik deka bisi laban Petara “ngasuh perang badu agi nyadi di serata dunya.” (Masmur 46:9; Isaiah 2:4) Udah nya, “pengelurus ngerembai ngagai semua endur seumur raja, lalu awakka pengaya tan, seagi bulan meri penampak.” Reti iya, pemaik deka meruan belama iya!—Masmur 72:7.

18 Nembiak Jehovah deka idup likun. Orang Israel kelia menya idup likun seagi sida ngasika Petara. (Adat Lewi 25:18, 19) Kitai mega ulih ngasaika pemaik enggau pengelikun ba Paradais!—Isaiah 32:18; Mikah 4:4.

19. Nama kebuah kitai nemu pemakai deka mayuh ba dunya baru Petara?

19 Lapar pungkang nadai agi. “Awakka gandum seruran mayuh di menua,” ku leka lagu Pemasmur. “Awakka bukit penuh laban utai ti ditanam.” (Masmur 72:16) Petara Jehovah deka merekat sida ti lurus lalu “tanah udah mansutka utai ti diketau.”—Masmur 67:6.

20. Baka ni kitai ulih pechaya serata dunya tu deka nyadi paradais?

20 Serata dunya tu deka nyadi paradais. Mayuh endur diau ti manah enggau kebun baru ti ngerinduka ati deka ngemenuhka tanah ba dunya tu. (Isaiah 65:21-24; Pemandang 11:18) Nyau kelama, pemansang deka dikerembai nyentuk ke semua endur ba dunya tu nyadi manah sereta mansutka asil baka kebun Eden. Lalu Petara deka “meri sida chukup utai datai ke semua utai ti idup nadai suntuk utai.”—Masmur 145:16.

21. Nama nunjukka mensia enggau jelu deka begulai manah?

21 Mensia enggau jelu deka begulai manah. Jelu babas  enggau jelu tupi deka begulai makai. Indah ke seiku anak mit pan enda agi takutka jelu ti tau nganu baka kemaya hari tu.—Isaiah 11:6-9; 65:25.

22. Nama deka nyadi ngagai penyakit?

22 Penyakit nadai agi. Jesus deka ngeraika semua penyakit ba serata dunya tu maya Iya nyadi Pemerintah ba Perintah Petara. (Matthew 9:35; Mark 1:40-42; John 5:5-9) Maya nya, nadai orang “deka mutap madahka diri sakit.”—Isaiah 33:24; 35:5, 6.

23. Nama kebuah pengangkat ari mati ngasuh kitai gaga ati?

23 Orang ti dikesayau ke udah mati deka diidupka baru, lalu diberi peluang idup belama iya. Semua orang mati ke dikingatka Petara deka diidupka baru. Amat, Bup Kudus madah, “semua orang ke lurus enggau ke enda lurus deka diangkatka ari mati.”—Kereja Rasul 24:15; John 5:28, 29.

24. Baka ni asai ati nuan pasal pengidup ba dunya Paradais tu?

24 Jemah ila kitai deka ngasaika pemanah ti ngerinduka ati. Enti kitai belajar pasal Petara Jehovah, lalu nyembah Iya, kitai ulih ngasaika pemanah nya! Belajar mayuh agi pasal Jesus Kristus mega beguna, laban iya ke ngenataika semua berekat tu.