Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 6

Kini Penunga Orang Mati?

Kini Penunga Orang Mati?
  • Nama penyadi ngagai kitai maya kitai mati?

  • Nama kebuah kitai mati?

  • Nama kebuah nuan tau berasai lantang ati maya nemu pemendar pasal pemati?

1-3. Nama tanya ti dipikir orang pasal pemati, lalu nama saut ti diberi mayuh bengkah pengarap?

BERIBU taun mensia bepikirka tanya ti beguna bendar tu. Enda ngira sapa enggau ari ni penatai kitai, saut tanya tu beguna ngagai genap iku kitai.

2 Ba Pelajar 5, kitai udah belajar baka ni tebus Jesus Kristus muka jalai ngagai pengidup belama iya. Ari Bup Kudus, kitai mega udah belajar, jemah ila “pemati nadai agi.” (Pemandang 21:4) Tang diatu, agi bisi pemati. Raja Solomon ke bepenemu madah: “Orang ke idup nemu diri deka mati.” (Pengajar 9:5) Kitai enggau nangka ulih deka idup lama. Tang, kitai engka bepikir nama penyadi ngagai kitai maya kitai mati.

3 Maya orang ti dikesayau mati, kitai balat tusah ati. Kitai engka nanya: ‘Nama penyadi ngagai sida? Ulih kitai betemu baru enggau sida?’ Pengarap ba dunya tu meri saut ti enda sebaka ngagai tanya tu. Sekeda ngajar, udah orang mati, orang manah ke serega, tang orang jai diperinsa ba api neraka. Iya ke bukai ngajar, pengudah mati semengat sida deka begulai enggau semengat peturun sida ke udah mati. Ukai nya aja, bisi mega pengarap ngajar, orang ke udah mati deka nuju menua bukai,  ngambika diakim lalu diadaka baru ngena tubuh bukai.

4. Nama ajar mayuh bengkah pengarap pasal pemati?

4 Ajar semua pengarap tu meri siti penemu—bisi utai terus idup ari tubuh mensia ke udah mati. Ari kelia nyentuk ke diatu, mayuh pengarap ngajar, udah mensia mati sida deka idup belama, ulih meda, ninga enggau bepikir. Tang, baka ni tu ulih nyadi? Kitai idup laban kitai bisi untak kena ngasai enggau bepikir. Maya mati, untak enda idup tauka beguna agi. Nya alai, maya mensia mati sida enda ulih ingat enggau ngasai, laban untak enda idup agi.

NAMA PENYADI NGAGAI KITAI MAYA KITAI MATI?

5, 6. Nitihka ajar Bup Kudus, nama penyadi ngagai orang ke udah mati?

5 Ba Jehovah, Pengaga untak mensia, pemati ukai utai ti nyelai. Iya nemu pemendar. Ari jaku Iya ba Bup Kudus, Iya nerangka nama penyadi ngagai orang ke udah mati. Ajar ti terang tu madah: Maya orang mati, iya nadai agi. Mati enda sama enggau idup. Orang mati enda ulih meda, ninga tauka bepikir. Semua utai dalam tubuh mensia ke udah mati enda idup agi. Kitai nadai nyawa tauka roh ti enda ulih mati. *

Kini ke penunga api dian?

6 Udah Solomon meratika orang ke idup nemu sida deka mati, iya nulis: “Orang ke mati nadai nemu utai.” Iya mega madah orang mati nadai pengerindu tauka pemenchi, lalu “nadai pengawa, nadai runding, nadai penemu, nadai penemu-dalam [ba pendam].” (Pengajar 9:5, 6, 10) Bup Masmur 146:4 madah, maya orang mati, “semua pelan sida lesap.” Nya alai, mensia enda ulih idup pengudah sida mati. Pengidup kitai baka api  dian. Maya api dian padam, iya nadai kini-kini, tang nadai agi. Pia mega, maya mensia mati sida enda idup agi.

NAMA UTAI TI DIPADAH JESUS PASAL PEMATI

7. Baka ni Jesus nerangka pasal pemati?

7 Jesus Kristus mega madah nama penyadi ngagai orang ke udah mati. Kitai nemu pasal utai tu maya kaban rapat Jesus ke benama Lasarus mati. Jesus madahka murid iya: “Pangan kitai Lasarus udah tinduk.” Bala murid Jesus ngumbai iya madahka Lasarus semina tinduk, ngambika iya ulih gerai. Tang, ukai pia. Jesus nerangka: “Lasarus udah mati.” (John 11:11-14) Peratika, Jesus madah pemati nya baka ke tinduk. Lasarus ukai ba serega tauka diperinsa ba api neraka. Iya mega enda betemu enggau melikat tauka peturun iya. Lasarus mega enda diadaka baru nyadi orang bukai. Maya mati, iya semina baka ke tinduk jenak enda bemimpi. Bisi mega ayat Bup Kudus ti bukai madahka, orang mati baka ke tinduk. Chunto, maya anak indu Jairus mati, Jesus madah: “Anang nyabak, laban iya ukai mati, tang tinduk!”—Luke 8:52, 53.

Jehovah ngaga mensia ngambika idup belama iya ba dunya tu

8. Baka ni kitai nemu ukai asal tuju Petara ke deka mensia mati?

8 Kati nya asal tuju Petara ke deka mensia mati? Ukai! Jehovah ngaga mensia ngambika idup belama iya ba dunya tu. Baka ke udah dipelajarka, Petara ngengkahka mensia keterubah ba dunya ti sempurna. Jehovah merekat seduai iya enggau pengerai ti sempurna sereta meri utai ti manah aja. Bisi apai indai ke sayau ngagai anak  deka ngasuh anak merinsa, nyadi tuai enggau mati? Tentu enda! Jehovah sayauka bala anak Iya, lalu deka sida bulih pengidup ti lantang belama iya ba dunya tu. Pasal mensia, Bup Kudus madah: “[Jehovah] udah meri kitai ati ti keran deka nemu utai ti deka nyadi jemah ila.” (Pengajar 3:11) Petara ngaga kitai enggau ati ti deka idup belama iya. Lalu, Iya udah muka jalai ngambika utai tu ulih nyadi.

 NAMA KEBUAH MENSIA MATI?

9. Nama jaku tangkan ti diberi Jehovah ngagai Adam, lalu nama kebuah perintah tu enda tusah?

9 Nama kebuah mensia mati? Kena nyaut tu, kitai patut beratika utai ti nyadi ba mensia keterubah di dunya tu. Bup Kudus nerangka: ‘Petara Jehovah ngasuh semua bansa kayu ti manah dipeda sereta manah ke pemakai tumbuh dia.’ (Pemungkal 2:9) Tang, bisi siti jaku tangkan. Jehovah madahka Adam: “Nuan tau makai buah ari semua kayu dalam kebun tu, tang nuan enda tau makai buah ari kayu penemu ti tau ngasuh nuan nemu semua utai, laban lebuh nuan makai buah nya, nuan deka mati.” (Pemungkal 2:16, 17) Perintah tu enda tusah dititih laban mayuh agi buah ari pun kayu bukai ulih diempa Adam seduai Hawa. Seduai iya mega bisi peluang ti chukup manah nunjukka diri beterima kasih ngagai Petara, Iya ke meri semua utai nyentuk ke pengidup ti sempurna. Nitihka perintah tu mega nunjukka seduai iya bebasaka penuduk Apai ti di serega, lalu deka nitihka ajar Iya.

10, 11. (a) Baka ni mensia keterubah nunjukka diri enda ngasika jaku Petara? (b) Nama kebuah pengawa Adam seduai Hawa ke enda ngasi nya penyalah ti besai?

10 Tang sayau amat, mensia keterubah enggai ngasika jaku Jehovah. Ngena seiku ular, Sitan nanya Hawa: ‘Kati amat Petara enda nyagi seduai makai buah ari semua kayu ti dalam kebun tu?’ Hawa nyaut: ‘Kami duai tau makai buah ari sebarang kayu dalam kebun tu, tang Petara madahka kami duai enda tau makai buah ari kayu ti ba tengah-tengah kebun, tauka negu buah kayu nya, enggai ke kami duai mati.’—Pemungkal 3:1-3.

11 “Enda seduai mati,” ku Sitan. ‘Petara nemu, lebuh seduai makai buah nya, seduai deka nyadi sebaka enggau Petara, nemu ngelala bida entara utai ti manah  enggau utai ti jai.’ (Pemungkal 3: 4, 5) Sitan deka Hawa pechaya enti iya makai buah nya, iya deka bulih penguntung. Nitih ku iya, Hawa ulih mutus kediri empu pasal utai ti betul enggau utai ti salah; iya ulih ngaga utai ti dikedeka iya empu. Sitan mega ngumbai Jehovah bula maya Iya madahka seduai iya deka mati enti makai buah nya. Hawa pechayaka Sitan. Iya ngambi sekeda buah nya lalu makai iya. Udah nya, iya meri sekeda buah nya ngagai laki iya, lalu laki iya mega makai buah nya. Enggau makai buah nya, seduai iya enda ngasika jaku Petara sereta sengaja ngelanggar perintah Iya, taja pan perintah nya enda tusah dititihka. Seduai iya  nunjukka diri enda bebasaka penuduk Apai ti di serega. Pengawa seduai iya ke enda bebasaka Penempa ti Pengasih, enda ulih diampun!

12. Nama ulih nulung kitai ngasaika ati Jehovah maya Adam seduai Hawa ngelaban iya?

12 Chunto: Baka ni asai ati nuan enti anak ke dijaga nuan ari mit enda ninga jaku, enda bebasa tauka enda sayau ke nuan? Tentu nuan balat tusah ati. Pia mega, Jehovah balat tusah ati maya Adam seduai Hawa ngelaban Iya.

Adam datai ari amau tanah, lalu iya deka pulai ke amau tanah

13. Nitih ku Jehovah, nama penyadi ngagai Adam maya iya mati, lalu nama reti iya?

13 Ketegal Adam seduai Hawa enda ngasika jaku Jehovah, seduai iya mati munyi ti udah dipadah Iya. Adam seduai Hawa nadai agi. Kitai nemu seduai iya enda idup ba dunya roh laban maya Jehovah ngakim Adam ketegal iya enda ngasi, Petara madah: “Nuan deka . . . pulai baru ngagai tanah, laban nuan endang ditempa ari tanah. Nuan endang digaga ari amau, nya alai ngagai amau meh nuan pulai.” (Pemungkal 3:19) Petara ngaga Adam ari amau tanah. (Pemungkal 2:7) Sebedau nya, Adam nadai. Nya alai, maya Jehovah madah Adam deka pulai baru nyadi tanah, reti iya, Adam nadai agi.

14. Nama kebuah kitai mati?

14 Adam seduai Hawa ulih idup nyentuk ke diatu. Tang, ketegal seduai iya milih enda ngasika jaku Petara, seduai iya bedosa lalu mati. Nama kebuah mensia mati? Ketegal dosa Adam ngelekai ngagai semua mensia. (Rome 5:12) Dosa tu baka penyakit ti berampit sereta enda ulih diseliah. Dosa ngemai pemati. Pemati nya munsuh. (1 Korint 15:26) Kitai gaga amat ati laban Jehovah nyediaka tebus kena nyelamatka kitai ari munsuh tu!

 NEMU PEMENDAR PASAL PEMATI MERI PENGUNTUNG

15. Nama kebuah nemu pemendar pasal pemati ulih ngelantangka ati?

15 Ajar Bup Kudus pasal orang ke udah mati ulih ngelantangka ati. Kitai nemu orang ke udah mati enda merinsa tauka tusah ati. Kitai enda ibuh takut ke sida, laban sida enda ulih ngachau kitai. Kitai enda ibuh nulung sida, lalu sida pan enda ulih nulung kitai. Kitai enda ulih bejaku enggau sida, sida mega enda ulih bejaku enggau kitai. Mayuh tuai pengarap ngumbai diri ulih nulung orang ke udah mati. Nya alai, mayuh orang arapka sida, lalu meri sida duit. Tang, nemu pemendar ulih nyaga kitai ari ditipu orang ke ngajar utai ti bula.

16. Sapa ti nesatka ajar mayuh pengarap, lalu baka ni chara iya?

16 Mayuh pengarap enda setuju enggau ajar Bup Kudus pasal orang ke udah mati. Nama kebuah? Laban ajar sida ditesatka Sitan. Iya ngena pengarap pelesu ngasuh orang pechaya, pengudah orang mati, sida deka terus idup ba dunya roh. Sitan ngena pemula tu enggau pemula ti bukai ngelimpangka orang ari Petara Jehovah. Baka ni chara iya?

17. Nama kebuah ajar pasal api neraka enda bebasaka Jehovah?

17 Baka ke udah dipelajar, mayuh pengarap ngajar enti orang ke jai mati, iya deka diperinsa ba api neraka belama iya. Ajar tu enda bebasaka Petara. Jehovah nya Petara ti bepengerindu, lalu enda kala merinsa orang ngena chara tu. (1 John 4:8) Baka ni asai ati nuan maya meda seiku apai nunu jari anak iya ke enda ninga jaku? Deka nuan bebasaka iya tauka semak ngagai iya? Enggai! Nuan tentu ngumbai iya amat jai. Tang, Sitan deka kitai pechaya, Jehovah merinsa orang ba api neraka belama iya!

18. Nama ajar ti bula pasal orang ke udah mati?

 18 Sitan mega ngena sekeda pengarap ngajar, pengudah orang mati, sida deka nyadi roh, lalu patut dipebasaka orang ke agi idup. Nitihka ajar tu, roh orang ke udah mati ulih nyadi kaban ti bisi kuasa, tauka nyadi munsuh ti jai. Mayuh orang pechaya ke pemula tu. Sida takut ke orang ti udah mati, lalu bebasa sereta nyembah sida. Tang, Bup Kudus ngajar, orang ke udah mati nya baka ke tinduk. Nya alai, kitai patut nyembah Petara ti bendar, Jehovah, ti Pengaga enggau Pemeri semua utai.—Pemandang 4:11.

19. Nama ajar Bup Kudus ti bukai ke ulih ditemu nuan, enti nuan udah nemu pemendar pasal pemati?

19 Nemu pemendar pasal orang ke udah mati ulih nyaga nuan ari ditesatka ajar ti bula. Iya mega ulih nulung nuan nemu ajar Bup Kudus ti bukai. Chunto, maya nuan nemu orang ke udah mati enda diau ba dunya roh, semaya pasal pengidup belama iya ba paradais di dunya tu bisi reti ba nuan.

20. Nama tanya ti deka dipelajarka kitai ba Pelajar 7?

20 Kelia menya, seiku lelaki ti lurus ati ke benama Jop nanya: “Enti orang mati, kati iya ulih angkat idup baru?” (Jop 14:14) Kati orang ke udah mati ulih idup baru? Ajar Bup Kudus ti ngelantangka ati ngagai saut tanya tu deka dipelajarka ba Pelajar 7.

^ per. 5 Peda Penerang ba lambar 208-211 kena nemu pasal “nyawa” enggau “roh.”