Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 9

Kati Kitai Benung Idup ba “Hari ti Penudi”?

Kati Kitai Benung Idup ba “Hari ti Penudi”?
  • Nama utai nyadi maya jeman kitai ke bisi dipadah ba Bup Kudus?

  • Nitihka Jaku Petara, baka ni ulah mensia ba “hari ti penudi”?

  • Nama utai manah dipadah ba Bup Kudus pasal “hari ti penudi”?

1. Ari ni kitai ulih belajar pasal jemah ila?

MAYA meda berita ba TV, kala nuan berunding, ‘Nama deka nyadi ngagai dunya tu?’ Mayuh penusah nyadi enggau ngenyit. Nadai seiku orang nemu utai ti deka nyadi pagila. (James 4:14) Tang, Jehovah nemu utai ti deka nyadi jemah ila. (Isaiah 46:10) Kelia menya, Jaku Iya, Bup Kudus, ukai semina madah pasal utai jai ke benung nyadi diatu, tang mega pasal utai manah ke deka nyadi jemah ila.

2, 3. Nama utai ditanya bala murid Jesus, lalu baka ni iya nyaut sida?

2 Jesus Kristus ngajar orang pasal Perintah Petara ti deka muai semua penyai, lalu ngaga dunya tu nyadi paradais. (Luke 4:43) Orang maya nya deka nemu kemaya Perintah nya deka datai. Indahka bala murid Jesus nanya iya: ‘Nama tanda ti nunjukka nuan deka datai baru, enggau pengujung dunya?’ (Matthew 24:3) Jesus nyaut, semina Petara Jehovah aja nemu kemaya pengujung dunya tu nyadi. (Matthew 24:36) Taja pia, Jesus madah  pekara tu deka nyadi sebedau Perintah Petara mai pemaik enggau pengelikun ngagai mensia. Utai ti dipadah Jesus benung nyadi diatu!

3 Sebedau kitai mansik utai ti nunjukka kitai endang idup ba “pengujung dunya,” aram kitai berandau pasal siti perang ke enda ulih dipeda mensia. Perang tu nyadi ba serega, tang iya bisi kaul enggau kitai.

PERANG BA SEREGA

4, 5. (a) Nama utai nyadi ba serega udah Jesus nyadi Raja? (b) Nitihka Pemandang 12:12, nama utai nyadi ketegal perang ba serega?

4 Ba Pelajar 8, kitai udah belajar pasal Jesus Kristus ke nyadi Raja ba serega maya taun 1914. (Daniel 7:13, 14) Enda lama udah nya, Jesus ngereja siti pengawa. “Perang lalu nyadi di serega,” ku Bup Kudus. “Mikael [nama Jesus ti bukai] enggau bala melikat iya beperang ngelaban naga nya [Antu Sitan], lalu naga nya enggau bala melikat iya beperang ngelaban Mikael enggau bala melikat iya.” * Sitan enggau bala melikat jai, ke dikumbai antu, udah alah ba perang nya. Sida dibuai ari serega ke dunya tu. Bala melikat Petara ke ngasi gaga ati, laban Sitan enggau bala antu iya nadai agi. Tang, mensia enda ulih gaga ati. Bup Kudus madah: “Naka meh penusah tanah . . . laban Sitan udah nurun ngagai kita, balat pedis ati, laban iya nemu timpuh diri nyau deka abis.”—Pemandang 12:7, 9, 12.

5 Uji peratika nama nyadi ketegal perang ba serega. Sitan ngemai pemerinsa, tauka penusah ngagai sida ba dunya tu, laban iya balat ringat. Baka ke udah dipelajar nuan, kitai benung idup ba timpuh ti penuh enggau penusah. Tang, timpuh tu pandak. Sitan nemu “timpuh  diri nyau deka abis.” Bup Kudus ngumbai timpuh tu “hari ti penudi.” (2 Timoti 3:1) Kitai tentu gaga ati laban kitai nemu enda lama agi Petara deka muai kuasa Sitan ari dunya tu! Aram kitai meda sekeda utai ti udah dipadah ba Bup Kudus ke benung nyadi diatu. Utai tu nunjukka kitai benung idup ba hari ti penudi, lalu enda lama agi Perintah Petara deka ngemai berekat ti enda nemu abis ngagai sida ti rinduka Jehovah. Keterubah, aram kitai mansik jaku Jesus pasal empat tanda ti nunjukka kita benung idup ba hari ti penudi.

NAMA UTAI NYADI BA HARI TI PENUDI

6, 7. Baka ni jaku Jesus pasal perang enggau lapar pungkang nyadi kemaya hari tu?

6 “Bansa siti deka beperang ngelaban bansa siti, lalu menua siti deka beperang ngelaban menua siti.” (Matthew 24:7) Bejuta iku mensia udah dibunuh ba perang sekumbang 100 taun tu. Seiku orang ke landik pasal sejarah ari British nulis: “Taun 1901-2000 nya taun ti pemadu mayuh mensia bebunuh. . . . Ba timpuh tu, perang baka ke enda ngetu, lalu laya ngena senyata enda nyadi ba timpuh ti pandak aja.” Nitihka riput ari Worldwatch Institute: “Penyampau orang ke mati ba perang  maya taun 1901-2000 tu, 3 kali lipat ari penyampau orang ke mati ba semua perang ti nyadi kenyau ari maya jeman Jesus nyentuk ke taun 1899.” Lebih ari 100 juta iku orang udah mati ketegal perang kenyau ari 1914. Bejuta iku orang tusah ati ketegal sida udah lenyau orang ti dikesayau ba perang. Kala nuan lenyau orang ti dikesayau ba perang?

7 “Lapar pungkang deka nyadi.” (Matthew 24:7) Bala pemansik madahka, asil pemakai udah mayuh nambah sekumbang 30 taun ti udah. Tang, lapar pungkang mengkang nyadi laban mayuh orang enda chukup duit kena meli pemakai tauka nadai tanah endur betanam. Ba menua ti benung mansang, lebih seribu juta iku orang merinsa ketegal seruran lapar. World Health Organisation nganggarka lebih ari lima juta anak mit mati ketegal enda chukup vitamin ba pemakai tiap taun.

8, 9. Nama utai ti dipadah Jesus pasal tanah berenyang enggau penyakit ti benung nyadi?

8 “Tanah berenyang deka balat nyadi.” (Luke 21:11) Nitihka bala saintis, tiap taun, rata-rata 19 kali tanah berenyang udah ngerusakka rumah lalu ngasuh tanah merekah. Dalam 19 kali tu, bisi tanah berenyang ti chukup kuat ngujungka  rumah balat rusak. Rikut nunjukka kenyau ari taun 1900, tanah berenyang udah munuh lebih ari dua juta iku orang. Siti agi pansik madahka: “Pemansang ba teknoloji semina ngurangka mimit aja penyampau pemati.”

9 “Penyakit deka balat nyadi.” (Luke 21:11) Taja pan bisi pemansang ba pengawa berubat, penyakit baru enggau lama agi ninggang mensia. Siti pansik madahka, 20 bengkah penyakit—nyengkaum batuk rangkai tauka tibi, malaria enggau muang ai—suah nyadi ba orang sekumbang bepuluh taun ti udah. Bisi sekeda penyakit nya tusah diubat. Iya ke amat, bisi 30 bengkah penyakit ti baru. Sekeda penyakit tu nadai ubat, lalu munuh orang.

MENSIA KE IDUP BA HARI TI PENUDI

10. Nama ulah ti dipadah ba 2 Timoti 3:1-5 ke bisi diayanka orang kemaya hari tu?

10 Kelimpah ari madahka sekeda utai ti nyadi ba dunya tu, Bup Kudus mega madah ba hari ti penudi ulah mayuh mensia deka berubah. Rasul Paul udah nerangka pekara tu ba 2 Timoti 3:1-5, kitai macha: “Ba hari ti penudi mayuh macham penusah deka nyadi.” Paul madahka orang maya nya deka

  •   berundingka diri empu aja

  • angkunka duit

  • enda ngasika apai indai

  • enda nemu meri terima kasih

  • nadai nemu siruka orang

  • enda nemu nagang diri

  • mangah

  • semina deka ngelantangka diri lalu enda rinduka Petara

  • baka ke bepegai ba agama, tang sida besangkalka kuasa agama nya

11. Baka ni Masmur 92:7 nerangka nama utai ti deka nyadi ngagai orang ke jai?

11 Kati bisi orang ke diau semak enggau nuan ngayanka ulah ti baka nya? Tentu bisi. Ulah ti jai tu diayanka orang ba dini-dini endur. Tu nunjukka enda lama agi Petara deka muai orang ke jai. Bup Kudus madah: “Orang ke jai nyangka ulih tumbuh baka rumput, orang ke ngereja penyalah nyangka tau nyadi kaya-raja, tang sida deka dirusak abis lengis.”—Masmur 92:7.

UTAI MANAH TI NYADI!

12, 13. Baka ni “penemu ti bendar” deka mayuh maya “pengujung dunya”?

12 Baka ke udah dipadah ba Bup Kudus, hari ti penudi penuh enggau  pemerinsa. Tang, ba dunya ti charut tu, bisi utai manah nyadi ba sida ke nyembah Jehovah.

13 “Penemu ti bendar deka mayuh,” ku bup Daniel madah. Kemaya tu deka nyadi? Ba “pengujung dunya.” (Daniel 12:4, NW) Kelebih agi, kenyau ari taun 1914, Jehovah nulung sida ke bebendar nyembah Iya nambahka penemu pasal Bup Kudus. Sida udah belajarka pemendar ti berega pasal nama enggau tuju Petara, genselan nyawa Jesus Kristus, nama penyadi ngagai orang mati sereta pengangkat ari mati. Sida ke nyembah Jehovah mega belajarka chara pengidup ti meri penguntung ngagai sida empu, lalu meri puji ngagai Petara. Sida mega bulih penemu ti terang agi pasal Perintah Petara enggau baka ni perintah tu deka mutarka penusah ba dunya tu. Penemu tu merangsang sida ngaga nama? Saut tanya tu bisi kaul enggau siti agi utai ti dipadahka benung nyadi ba hari ti penudi.

Lalu Berita Manah pasal Perintah Petara deka ditusui di serata dunya, nyadika saksi ngagai semua bansa.’—Matthew 24:14

14. Naka ni berita manah pasal Perintah Petara udah dikerembaika kemaya hari tu, lalu sapa ti benung ngerembaika berita tu?

14 ‘Berita Manah pasal Perintah Petara deka ditusui di serata dunya,’ ku Jesus Kristus madah pasal “pengujung dunya.” (Matthew 24:3, 14) Di serata dunya tu, berita manah pasal Perintah Petara—nama Perintah Petara nya, nama deka digaga iya, enggau baka ni kitai ulih nerima berekat iya—benung dikerembaika ba lebih ari 235 menua ngena lebih ari 600 bengkah bansa jaku. Bejuta iku Saksi-Saksi Jehovah ngerembaika berita manah pasal Perintah tu enggau ransing ati. Sida datai ari “semua raban bansa, menua, enggau jaku.” (Pemandang 7:9) Sida belajar enggau bejuta iku orang ke deka nemu nama utai ti bendar diajar Bup Kudus enggau enda bebayar. Tu amat ngerinduka ati, kelebih agi Jesus udah madahka orang Kristian ti bendar “deka dipegedika semua orang”!—Luke 21:17.

 NAMA DEKA DIGAGA NUAN?

15. (a) Kati nuan pechaya kitai benung idup ba hari ti penudi, lalu nama kebuah? (b) Nama reti “pengujung” ngagai sida ke ngelaban Jehovah, enggau ngagai rayat Perintah Petara?

15 Laban mayuh utai ti dipadah Bup Kudus benung nyadi diatu, enda ke nuan setuju kitai benung idup ba hari ti penudi? Udah berita manah ke dikerembai ngemuaska ati Petara, “pengujung” sigi datai. (Matthew 24:14) “Pengujung” reti iya maya Petara deka muai penyai ba dunya tu. Jehovah deka ngena Jesus enggau bala melikat ti bisi kuasa ngemunaska semua orang ke sengaja ngelaban Iya. (2 Tesalonika 1:6-9) Sitan enggau bala antu iya enda ulih agi nesatka semua bansa. Udah nya, Perintah Petara ti lurus deka meri berekat ngagai semua rayat iya.—Pemandang 20:1-3; 21:3-5.

16. Nama utai ti patut digaga nuan?

16 Laban pengujung dunya Sitan nyau semak, kitai patut nanya diri empu, ‘Nama patut digaga aku diatu?’ Chukup manah enti kitai terus belajar mayuh agi pasal Jehovah enggau utai ti dikedeka Iya ari kitai. (John 17:3) Belajarka Bup Kudus enggau bebendar. Selalu begulai enggau orang ke ngereja peneka Jehovah. (Hebrew 10:24, 25) Ngulihka penemu ti disediaka Petara Jehovah ngagai semua orang ba serata dunya tu, lalu ubah jalai pengidup nuan ngambika diterima Petara.—James 4:8.

17. Nama kebuah orang jai deka dipunaska enggau ngenyit?

17 Jesus madah mayuh orang enda ibuhka tanda-tanda ti nunjukka kitai diau ba hari ti penudi. Orang jai deka dipunaska enggau ngenyit. Iya deka datai baka penchuri lebuh malam hari. (1 Tesalonika 5:2) Jesus madahka: “Baka lebuh maya Noah menya, baka nya meh gaya penatai Anak Mensia. Laban berapa hari sebedau bah besai nyadi, orang majak makai ngirup, jadi  melaki-bini, nikah, nyentuk ngagai hari Noah tama ke dalam bandung, lalu sida nadai nemu utai, nyentuk ngagai maya ai bah datai lalu nabanka semua sida. Baka nya meh gaya penatai Anak Mensia.”—Matthew 24:37-39.

18. Nama pesan Jesus ti patut didinga kitai?

18 Nyadi, Jesus madah ngagai bala peninga iya: “Bejaga kita, ngambika kita enda gian ngirup, lalu mabuk, lalu selalu irauka pengidup, enggai ke kita enda ngadang lebuh Hari nya ngenyit datai, baka panjuk ti nyintak, laban Hari nya deka datai ngagai semua orang ke diau di serata dunya. Bejaga berari, besampi minta diri kering rari ari semua utai ti deka nyadi, lalu bediri di mua Anak Mensia.” (Luke 21:34-36) Kitai patut ninga pesan Jesus nya. Nama kebuah? Laban semina sida ke diterima Petara Jehovah enggau “Anak Mensia,” iya nya Jesus Kristus, ke bisi peluang diselamatka maya dunya Sitan dipunaska, lalu ulih idup belama iya ba dunya baru ti deka datai!—John 3:16; 2 Peter 3:13.

^ per. 4 Peda Penerang ba lambar 218-219, kena nemu Mikael nya nama Jesus Kristus ti bukai.

Belajar Lebih Agi

PROGRAM BELAJARKA BUP KUDUS

Nama Kebuah Belajar Bup Kudus?

Bup Kudus nyediaka saut ngagai utai ti ditanya bejuta iku mensia ba serata dunya tu. Kati nuan empu deka nemu saut iya?