Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PENERANG

Nama Petara—Guna Enggau Reti Iya

Nama Petara—Guna Enggau Reti Iya

BAKA ni ayat Masmur 83:18 ba Bup Kudus nuan disalin? Ba New World Translation of the Holy Scriptures ayat tu madah: “Ngambika orang nemu, nuan ti benama Jehovah, nuan seiku aja ti Pemadu Tinggi di serata dunya tu.” Bisi Bup Kudus bukai mega ngena jaku ti sama. Taja pia, mayuh Bup Kudus enda ngena nama Jehovah. Tang, nama Iya udah diganti ngena gelar “Allah Taala” tauka “Tuhan.” Nyadi, nama patut dikena ba ayat tu? Gelar tauka nama Jehovah?

Nama Petara dalam urup Hebrew

Ayat tu nyebut pasal siti nama. Ayat tu ditulis ngena jaku Hebrew ti asal, lalu iya ngayanka siti nama ti nyelai ari nama ti bukai. Dalam urup Hebrew, nama tu disepil יהוה (YHWH). Dalam jaku Iban nama tu disebut “Jehovah.” Kati nama nya semina ayan sekali aja ba ayat Bup Kudus? Enda. Iya bisi ayan ba Bup Kudus Hebrew ti asal kira-kira 7,000 kali!

Nama kebuah nama Petara tu beguna? Peratika chunto sampi ti diberi Jesus Kristus. Iya belabuh baka tu: “Apai kami ti di serega: Kudus meh nama Nuan.” (Matthew 6:9) Udah nya, Jesus besampi ngagai Petara: “Apai, muliaka nama Nuan.” Petara nyaut ari serega: “Aku udah ngemuliaka iya, lalu Aku deka ngemuliaka iya baru.” (John 12:28) Nya alai, nama Petara nya amat beguna. Tang, nama kebuah mayuh Bup Kudus enda ngena nama Petara, lalu nganti iya ngena gelar?

Bisi dua kebuah. Kesatu, mayuh ngumbai nama nya enda patut dikena laban chara nyebut iya ti asal enda ditemu kemaya hari tu. Jaku Hebrew kelia enda ditulis ngena urup a, e, i, o, u. Nya alai, nadai seiku orang kemaya hari tu nemu baka ni orang jeman Bup Kudus nyebut YHWH. Taja pia, patut tu nagang kitai ari ngena nama Petara?  Maya jeman Bup Kudus, nama Jesus engka disebut Yeshua tauka Yehoshua—nadai seiku pan nemu ni bagi sebut ti betul. Tang, orang ba serata dunya kemaya hari tu nyebut nama Jesus enggau chara ti enda sama, nitihka bansa jaku sida. Sida enda kakang ati ngena nama Jesus taja pan sida enda nemu baka ni orang jeman Jesus nyebut nama iya. Baka nya mega, enti nuan ngagai menua bukai, nama nuan engka disebut lain dalam bansa jaku bukai. Nyadi, enda nemu baka ni nama Petara disebut kelia menya ukai kebuah kitai enda ngena nama nya.

Kebuah kedua orang muai nama Petara ari Bup Kudus ketegal adat lama orang Judah. Sida pechaya nama Petara enda patut disebut. Tu ketegal sida enda entu meretika ukum Bup Kudus ke madah: ‘Anang ngena nama Jehovah Petara kita enggau jalai ti enda bebasaka iya, laban Iya deka ngukum orang ke ngena nama Iya enggau enda bebasaka iya.’—Pemansut 20:7.

Ukum tu nagang ngena nama Petara enggau chara ti salah. Tang, bisi iya nagang ngena nama Petara enggau chara ti bebasa? Nadai. Semua penulis Bup Kudus Hebrew (“Sempekat Lama”) nya orang ke tetap ati, lalu sida idup nitihka Ukum ti diberi Petara ngagai orang Israel kelia. Sida selalu ngena nama Petara. Chunto, sida ngena nama Petara dalam lagu sida. Petara Jehovah mega ngasuh nembiak Iya ngangauka nama Iya, lalu sida nitihka jaku Iya. (Masmur 116:4; Kereja Rasul 2:21) Nya alai, orang Kristian kemaya hari tu enda kakang ati ngena nama Petara enggau bebasa, baka ke digaga Jesus.—John 17:26.

Orang ke nyalin Bup Kudus udah ngaga penyalah ti besai laban sida nganti nama Petara ngena gelar. Sida ngasuh Petara jauh ari mensia, lalu Iya baka ke nadai pengerindu sereta enda ibuh. Tang Bup Kudus meransang mensia ‘nyadi pangan’ Jehovah. (Masmur 25:14) Uji pikirka pasal kaban rapat nuan. Ulih nuan semak ngagai iya enti nuan enda nemu nama iya? Pia mega, enti orang  enda nemu nama Petara, Jehovah, ulih sida semak ngagai Petara? Kelimpah ari nya, enti orang enda ngena nama Petara, sida mega enda nemu reti nama Iya ti manah. Nama reti nama Petara?

Petara empu nerangka reti nama Iya ngagai Moses, nembiak Iya ke tetap ati. Maya Moses nanya pasal nama Petara, Jehovah nyaut: “Aku tu meh Aku.” (Pemansut 3:14) Nota kaki ba ayat tu madah: “Aku deka nyadi sebarang utai Aku deka.” Nya alai, Jehovah ulih ngaga sebarang utai kena ngamatka tuju Iya.

Nyema nuan ulih ngaga sebarang utai ti dikedeka nuan. Nama deka digaga nuan ke kaban nuan? Enti seiku ari sida sakit raya, nuan ulih nyadi lutur ti landik lalu ngeraika iya. Enti seiku agi ari kaban nuan tengkerap, nuan deka nyadi seiku orang kaya ke gerah jari, lalu mantu iya. Tang ke amat, nuan bisi tatak ngereja utai ti dikedeka nuan. Maya nuan belajarka Bup Kudus, nuan deka alit ati meda Jehovah ulih ngaga sebarang utai kena ngamatka tuju Iya. Lalu Iya gaga ati ngena kuasa Iya nulung orang ke rinduka Iya. (2 Bansa Israel 16:9) Mayuh pemanah Jehovah enda ulih diasaika orang ke enda nemu nama Iya.

Nama Jehovah endang patut dikena ba Bup Kudus. Nemu reti nama Iya, lalu ngena nama Iya dalam sembah kitai ulih nulung kitai semak agi ngagai Apai ti di serega, Jehovah.