Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PENERANG

Baka Ni Bup Daniel Madahka Penatai Messiah

Baka Ni Bup Daniel Madahka Penatai Messiah

NABI Daniel idup lebih ari 500 taun sebedau Jesus ada. Taja pia, Jehovah madah ngagai Daniel kemaya Jesus deka dipilih nyadi Messiah tauka Kristus. Daniel dipadah: ‘Peratika utai tu ngambika nuan mereti: Berengkah ari maya  meri atur ngaga Jerusalem baru, nyentuk ngagai maya penatai tuai ke dipilih Petara,’ deka bisi “tujuh kali tujuh taun,” mega bisi “tujuh kali enam puluh dua taun.”—Daniel 9:25.

Keterubah, kitai patut belajar maya berengkah ngitung penatai Messiah. Nitih ku nabi Daniel, iya “berengkah ari maya meri atur ngaga Jerusalem baru.” Ni “maya meri atur” tu berengkah? Nitih ku penulis Bup Kudus, Nehemiah, atur ngaga Jerusalem baru berengkah ari “kedua puluh taun Artaserses nyadi raja besai menua Persia.”  (Nehemiah 1:1; 2:1, 5-8) Orang ke landik pasal sejarah ngaku Artaserses belabuh merintah ba taun 475 S.M. Nya alai, taun ke-20 iya merintah nya taun 455 S.M. Diatu kitai berengkah ngitung maya Messiah datai, iya nya ari taun 455 S.M.

Daniel madah pasal siti timpuh sebedau “Messiah” datai. Iya madah deka bisi “tujuh kali tujuh taun,” mega bisi “tujuh kali enam puluh dua taun”—semua iya 483 taun.

Diatu kitai ngitung iya. Enti kitai ngitung 483 taun ari taun 455 S.M., kitai datai ngagai taun 29 M. Nya meh taun Jesus dibaptisa lalu nyadi Messiah! * (Luke 3:1, 2, 21, 22) Enda ke tu ngeringka pengarap nuan meda utai ti dipadah pasal Jesus udah nyadi?

^ per. 2 Ari taun 455 S.M. ngagai taun 1 S.M. timpuh iya 454 taun. Ari taun 1 S.M. ngagai 1 M. timpuh iya 1 taun (nadai taun kusung). Lalu ari taun 1 M. ngagai taun 29 M. timpuh iya 28 taun. Nya alai, penyampau semua timpuh tu 483 taun (454+1+28). Jesus dibunuh ba taun 33 M. iya nya 7 kali 70 taun. (Daniel 9:24, 26)