Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 17

Semak Ngagai Petara Ngena Sampi

Semak Ngagai Petara Ngena Sampi
  • Nama kebuah kitai patut besampi ngagai Petara?

  • Nama patut digaga kitai ngambika sampi didinga Petara?

  • Baka ni Petara nyaut sampi kitai?

Jehovah “ti udah ngaga langit enggau dunya” deka ningaka sampi kitai

1, 2. Nama kebuah kitai ngumbai sampi nya peluang ti manah, lalu nama kebuah kitai patut meratika ajar Bup Kudus pasal sampi?

DUNYA TU amat mit enti dibandingka enggau semua bintang ke bisi ba langit. Ba Jehovah, “ti udah ngaga langit enggau dunya,” semua bansa baka setitik ai ti dalam beledi. (Masmur 115:15; Isaiah 40:15) Tang, Bup Kudus madah: “Iya [Jehovah] diau semak sida ke ngangauka Iya, ke ngangauka Iya enggau ati ti bendar. Iya meri utai ti dipeguna orang ke ngemesaika Iya. Iya ninga sabak sida.” (Masmur 145:18, 19) Uji pikir nama reti nya! Penempa ti pemadu bekuasa semak enggau kitai, lalu ningaka kitai enti kitai “ngangauka Iya enggau ati ti bendar.” Endang peluang ti manah kitai ulih semak ngagai Petara ngena sampi!

2 Enti kitai deka Jehovah ningaka sampi kitai, kitai patut besampi ngagai Iya ngena chara ti diterima Iya. Baka ni kitai ulih nemu chara nya? Enggau meratika ajar Bup Kudus pasal sampi. Nya alai, kitai patut nemu nama dipadah Bup Kudus pasal utai tu, laban sampi nulung kitai semak agi ngagai Jehovah.

 NAMA KEBUAH BESAMPI NGAGAI JEHOVAH?

3. Nama siti kebuah kitai patut besampi ngagai Jehovah?

3 Siti kebuah kitai patut besampi ngagai Jehovah laban Iya empu ngasuh kitai besampi ngagai Iya. Jaku Iya meransang kitai: ‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih. Lalu pemaik Petara, ti ngelui peragam mensia, deka nyaga ati enggau runding kita dalam Jesus Kristus.’ (Pilipi 4:6, 7) Kitai tentu deka ibuhka atur ti digaga Pemerintah ti Pemadu Tinggi ba dunya!

4. Nama kebuah seruran besampi ngagai Jehovah ngeringka kaul kitai enggau Iya?

4 Kitai mega seruran besampi ngagai Jehovah ngambika kitai ulih ngeringka kaul kitai enggau Iya. Pangan ti bendar ukai semina bejaku maya begunaka utai ari pangan. Tang, pangan ti manah rinduka pangan diri, lalu kaul seduai iya semak agi ketegal bekunsi penemu, pengirau ati enggau asai ati. Kaul kitai enggau Petara Jehovah pan baka nya. Ngena bup tu, nuan udah belajar  mayuh ajar Bup Kudus pasal Jehovah, pemanah Iya enggau tuju Iya. Nuan udah belajar, nuan ulih nyadi pangan Iya. Sampi meri peluang ngagai nuan madahka runding enggau asai ati nuan ngagai Apai ti di serega. Enggau tu, nuan semak agi ngagai Jehovah.—James 4:8.

CHARA KITAI PATUT BESAMPI

5. Nama nunjukka Jehovah enda ningaka semua sampi?

5 Kati Jehovah ningaka semua sampi? Peratika nama utai ti dipadahka Iya ngagai orang Israel ke udu ngelaban Iya maya nabi Isaiah. Ku Jehovah: “Taja pen kita bebendar besampi, tang enggai meh Aku mending, laban jari kita dibalut darah.” (Isaiah 1:15) Nya alai, sekeda pengawa ulih ngasuh Petara enda ningaka sampi kitai. Ngambika sampi kitai didinga Petara, kitai patut nitihka chara besampi ti dikedeka Iya.

6. Baka ni chara kitai besampi ngambika didinga Petara, lalu baka ni kitai ulih nitihka chara tu?

6 Maya besampi kitai patut bisi pengarap. (Mark 11:24) Rasul Paul nulis: ‘Nadai orang ulih ngerinduka ati Petara enti iya enda arapka Petara, laban barang sapa datai ngagai Petara enda tau enda arapka Petara endang amat bisi, lalu arapka Iya deka ngupah orang ke ngiga Iya.’ (Hebrew 11:6) Bisi pengarap ti bendar ukai semina nemu Petara nya bisi, Iya ninga tauka nyaut sampi. Tang, pengarap patut diayanka ngena pengawa. Kitai patut ngayanka pengarap kitai ari chara pengidup kitai ninting hari.—James 2:26.

7. (a) Nama kebuah kitai patut baruh ati maya bejaku enggau Jehovah dalam sampi? (b) Baka ni kitai besampi ngagai Petara enggau baruh ati sereta ati ti bendar?

7 Jehovah mega deka orang besampi ngagai Iya enggau baruh ati sereta ati ti bendar. Enda ke kitai patut  baruh ati maya bejaku enggau Jehovah? Maya orang bisi peluang bejaku enggau agong tauka kepala menteri, sida tentu bejaku enggau bebasa laban nemu penuduk pemerintah nya tinggi. Kitai patut lebih agi bebasaka Jehovah maya kitai bejaku enggau Iya! (Masmur 138:6) Pia mega, Iya “Petara ti Pemadu Bekuasa.” (Pemungkal 17:1) Maya kitai besampi ngagai Petara, kitai patut baruh ati laban kitai nemu kitai tu mit enti dibandingka enggau Iya. Enggau tu, kitai deka besampi ari ati kitai, ukai macha ari bup sampi.—Matthew 6:7, 8.

8. Baka ni kitai ngereja utai ti disampika kitai?

8 Siti agi chara kitai besampi ngambika didinga Petara iya nya kitai patut ngereja nitihka utai ti udah disampika kitai enggau naka ulih. Chunto, enti kitai besampi, “Beri ngagai kami sehari tu pemakai umbas dipakai kami,” kitai patut bekereja enggau bebendar. (Matthew 6:11; 2 Tesalonika 3:10) Enti kitai besampi minta tulung kena ngelaban pengelemi diri, kitai patut nyeliahka utai ti ulih ngemai kitai ngagai penguji. (Kolosi 3:5) Kelimpah ari nya, bisi tanya pasal sampi ke patut disaut kitai.

NYAUT SEKEDA TANYA PASAL SAMPI

9. Ngagai sapa kitai patut besampi, lalu dalam nama sapa?

9 Ngagai sapa kitai patut besampi? Jesus ngajar bala murid iya besampi ngagai “Apai kami ti di serega.” (Matthew 6:9) Nya alai, sampi kitai patut dituju semina ngagai Petara Jehovah. Tang, Jehovah deka kitai besampi dalam nama Jesus Kristus. Nama kebuah? Laban baka ke udah dipelajarka ba Pelajar 5, Jesus udah dikirum ke dunya tu nyadi tebus kena ngelepaska kitai ari dosa enggau pemati. (John 3:16; Rome 5:12) Iya dipilih nyadi Imam Besai enggau Hakim. (John 5:22;  Hebrew 6:20) Nya alai, Bup Kudus ngasuh kitai besampi dalam nama Jesus. Ku Jesus: ‘Aku tu meh jalai, pemendar, enggau pengidup. Nadai orang ulih datai ngagai Apai enti enda nengah aku.’ (John 14:6) Ngambika sampi kitai didinga, kitai patut besampi semina ngagai Jehovah nengah Anak Iya.

10. Nama kebuah nadai gaya tubuh tauka penuduk ditetapka maya kitai besampi?

10 Baka ni gaya tubuh tauka penuduk kitai maya besampi? Jehovah enda netapka gaya penuduk, jari tauka tubuh kitai maya besampi. Bup Kudus ngajar kitai ulih besampi enggau mayuh macham gaya. Tu nyengkaum duduk, besugang enggau bediri. (1 Bansa Israel 17:16; Nehemiah 8:6; Daniel 6:10; Mark 11:25) Utai ti pemadu beguna ukai gaya tubuh ti ulih dipeda, tang tuju ati ti betul. Kitai ulih besampi dalam ati enda ngira dini endur kitai, sekalika kitai benung ngereja pengawa tauka maya tusah. Jehovah ningaka sampi nya taja pan orang ke semak kitai enda nemu kitai benung besampi.—Nehemiah 2:1-6.

11. Nama sekeda pekara ti ngirauka ati ke patut disampika kitai?

11 Nama patut disampika kitai? Bup Kudus nerangka: “Enti kitai minta sebarang utai nitihka peneka Iya, Iya [Jehovah] ninga kitai.” (1 John 5:14) Nya alai, kitai ulih besampika semua utai ti sejalai enggau peneka Petara. Kati peneka Iya tu nyengkaum kitai besampi pasal pekara ti ngirauka ati kitai? Ya! Besampi ngagai Jehovah ulih dikumbai baka ke bejaku enggau kaban rapat. “Padahka ngagai Iya semua penusah” kitai. (Masmur 62:8) Kitai patut minta roh kudus ngambika nulung kitai ngereja utai ti betul. (Luke 11:13) Kitai mega ulih minta iring kena ngaga pemutus ti manah enggau minta pengering kena napi penusah. (James 1:5) Maya kitai  bedosa, kitai patut minta pengampun ngena genselan nyawa Kristus. (Epesus 1:3, 7) Endang amat, kitai ukai semina besampi pasal diri empu aja. Kitai mega patut nyengkaum orang bukai dalam sampi kitai—diri sebilik enggau bala ti sama pengarap.—Kereja Rasul 12:5; Kolosi 4:12.

12. Baka ni kitai nunjukka diri beberatka Petara dalam sampi?

12 Pekara ti ngaul Petara Jehovah patut dikemeratka dalam sampi kitai. Kitai endang bisi kebuah muji sereta beterima kasih ke pemanah Iya enggau pengabis ati. (1 Bansa Israel 29:10-13) Jesus meri chunto sampi ke ditulis ba Matthew 6:9-13. Dia iya ngajar kitai besampi ngambika nama Petara dikuduska. Udah nya, Jesus besampi ngambika Perintah Petara datai, lalu peneka Petara nyadi ba dunya tu baka di serega. Udah Jesus nyebut pekara ti ngaul Jehovah, nya baru iya nyebut pekara ti ngirauka ati. Maya kitai beberatka Petara dalam sampi, kitai nunjukka diri enda ngira diri empu aja.

13. Nama dipadah Bup Kudus pasal pemanjai sampi ti diterima Petara?

13 Ni pengelama kitai patut besampi? Bup Kudus nadai netapka ni pengelama kitai patut besampi maya kediri tauka ba mua orang mayuh. Kitai engka ngena sampi ke pandak sebedau makai tauka besampi lama agi maya kitai madahka penusah diri ngagai Petara. (1 Samuel 1:12, 15) Tang, Jesus ngutuk orang ke pepura lama besampi ba mua orang mayuh. (Luke 20:46, 47) Sampi ti baka nya enda didinga Jehovah. Iya ningaka sampi ari ati. Nya alai, pemanjai sampi bepanggai ba utai ti diguna kitai.

Sampi nuan ulih didinga ba sebarang maya

14. Nama reti maya Bup kudus meransang kitai “majak besampi,” lalu nama kebuah tu ngerinduka ati?

14 Ni penyuah kitai patut besampi? Bup Kudus  meransang kitai “seruran besampi” enggau “majak besampi.” (Luke 18:1; Rome 12:12; 1 Tesalonika 5:17) Tang tu ukai reti kitai besampi 24 jam sehari ngagai Jehovah. Bup Kudus ngansak kitai seruran besampi, majak beterima kasih ngagai Jehovah ketegal pemanah Iya ngagai kitai, lalu ngiga Iya ngambika meri iring, pengerindang, enggau pengering. Enda ke tu ngerinduka ati kitai laban nemu Jehovah nadai netapka pengelama tauka penyuah kitai besampi ngagai Iya? Kitai beterima kasih ngagai Apai ti di serega ketegal meri peluang besampi ngagai Iya. Nya alai, kitai selalu ngiga peluang besampi ngagai Iya.

15. Nama kebuah kitai patut nyebut “Amin” ba pengujung sampi maya kediri tauka maya bala mayuh?

15 Nama kebuah kitai patut nyebut “Amin” ba pengujung sampi? Reti “amin” nya “amat,” tauka “nyadi meh baka nya.” Ayat Bup Kudus madah, “Amin” patut disebut ba pengujung sampi maya kediri tauka maya bala mayuh. (1 Bansa Israel 16:36; Masmur 41:13) Maya nyebut “Amin” ba pengujung sampi kitai empu, kitai nunjukka utai ti disebut kitai nya ari ati. Maya kitai nyebut “Amin”—sekalika dalam ati tauka didinga—ba pengujung sampi orang bukai maya bala mayuh, kitai nunjukka diri setuju enggau utai ti disebut iya.—1 Korint 14:16.

BAKA NI PETARA NYAUT SAMPI KITAI

16. Nama utai ti dipechaya kitai pasal sampi?

16 Kati Jehovah amat nyaut sampi? Amat! Kitai bisi kebuah pechaya Jehovah “nyaut sampi” bejuta iku mensia ke besampi ari ati sida. (Masmur 65:2) Jehovah nyaut sampi kitai ngena mayuh chara.

17. Nama kebuah kitai ngumbai Petara ngena bala melikat enggau bala nembiak Iya ba dunya tu kena nyaut sampi?

 17 Jehovah ngena bala melikat enggau bala nembiak Iya ba dunya tu kena nyaut sampi. (Hebrew 1:13, 14) Mayuh orang ke udah besampi minta tulung ngagai Petara ngambika nemu pasal Bup Kudus udah dilawa bala nembiak Jehovah. Tu nunjukka Jehovah ngena bala melikat ngerembaika Berita Manah. (Pemandang 14:6) Jehovah ngena nembiak Kristian nulung kitai kena  nyaut sampi maya kitai bisi penusah.—Jaku Dalam 12:25; James 2:16.

Jehovah ngena nembiak Kristian nulung kitai kena nyaut sampi maya kitai bisi penusah

18. Baka ni Jehovah ngena roh kudus enggau Jaku Iya kena nyaut sampi nembiak Iya?

18 Petara Jehovah mega ngena roh kudus enggau Jaku Iya, Bup Kudus, kena nyaut sampi nembiak Iya. Iya nyaut sampi kitai ke minta tulung ngelaban penguji ngena roh kudus Iya. Roh kudus tu meri kitai iring enggau pengering. (2 Korint 4:7) Tang, suah agi Jehovah nyaut sampi kitai ke minta iring ngena Bup Kudus ngambika kitai ulih ngaga pemutus ti manah. Ayat Bup Kudus ke ulih nulung kitai engka ditemu maya kitai belajarka Bup Kudus kediri enggau maya kitai macha litaricha Kristian, baka bup tu. Ajar Bup Kudus ke patut dikena kitai engka bisi disebut maya gempuru Kristian tauka disebut tuai gempuru.—Galatia 6:1.

19. Nama patut dikingatka kitai enti sampi kitai baka ke enda disaut?

19 Enti Jehovah baka ke lubah nyaut sampi kitai, tu ukai reti Iya enda ulih nyaut sampi nya. Tang kitai patut ingat, Jehovah nyaut sampi nitihka utai ti dikedeka Iya enggau maya ti ditetapka Iya. Iya nemu utai ti diguna kitai enggau baka ni nyaga kitai manah agi ari kitai empu. Iya suah agi ngasuh kitai terus ‘minta, ngiga enggau nekung.’ (Luke 11:5-10) Majak besampi ngagai Petara  ngayanka pengeran ati enggau pengarap kitai ti bendar. Pia mega, Jehovah nyaut sampi ngena chara ti enda disadang kitai. Chunto, pengudah kitai besampi pasal penguji ti nuntung kitai, Iya engka enda muai penusah nya, tang Iya meri pengering kena kitai betan ngelaban penusah nya.—Pilipi 4:13.

20. Nama kebuah kitai patut ngena peluang besampi tu enggau manah?

20 Kitai beterima kasih ngagai Penempa semua utai laban Iya semak ngagai orang ke besampi ngagai Iya enggau ati ti bendar! (Masmur 145:18) Aram meh kitai ngena peluang besampi tu enggau manah. Enggau tu, kitai deka semak agi ngagai Jehovah ti nyaut sampi.