Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 2

Bup Kudus—Bup Ari Petara

Bup Kudus—Bup Ari Petara
  • Nama kebuah Bup Kudus enda sebaka enggau bup bukai?

  • Baka ni Bup Kudus ulih nulung nuan mutarka penusah?

  • Nama kebuah nuan ulih pechaya ke Bup Kudus?

1, 2. Nama kebuah Bup Kudus pemeri ti chukup manah ari Petara?

AGI nuan ingat maya nerima pemeri tauka hadiah ti manah ari kaban nuan? Tentu nuan amat gaga ati, lalu beterima kasih ngagai iya. Pemeri nya nunjukka kaban nuan rindu bendar bekaban enggau nuan.

2 Bup Kudus pemeri ari Petara. Nya alai, kitai patut nerima bup nya enggau gaga ati. Bup Kudus madahka utai ti enda sebaka enggau bup bukai. Chunto, iya madah baka ni langit, bintang, dunya tu enggau mensia keterubah digaga. Bup Kudus mega bisi jaku ajar ti ulih nulung kitai mutarka penusah enggau pengirau ati. Iya nerangka baka ni Petara deka ngenataika peneka Iya enggau ngubah dunya tu nyadi manah agi. Bup Kudus endang pemeri ti chukup manah ari Petara!

3. Nama kebuah Jehovah meri kitai Bup Kudus, lalu nama kebuah tu ngasuh kitai gaga ati?

3 Bup Kudus mega pemeri ti ngagaka ati, laban iya madahka kitai pasal Petara Jehovah. Iya meri bup tu ngagai kitai ngambika kitai ngelala Iya enggau manah agi. Nya alai, Bup Kudus ulih nulung nuan semak ngagai Jehovah.

4. Nama utai ti ngerinduka ati nuan pasal Bup Kudus?

 4 Kati nuan bisi Bup Kudus? Mayuh orang bisi Bup Kudus kediri empu. Enti nuan bisi Bup Kudus, nuan pan sebaka enggau orang bukai. Ba serata dunya tu, Bup Kudus udah dichelak lebih ari 2,500 bansa jaku. Reti nya, 95 pesen orang ba dunya tu ulih macha Bup Kudus. Ninting minggu, lebih ari sejuta Bup Kudus disadung! Pia mega, bebiliun iti Bup Kudus udah dichelak. Nya kebuah, nadai bup bukai ulih telabanka Bup Kudus.

Saksi-Saksi Jehovah udah nyalin Bup Kudus ngagai mayuh bengkah bansa jaku

5. Nama kebuah Bup Kudus ‘endang bepun ari Petara’?

5 Bup Kudus ‘endang bepun ari Petara.’ (2 Timoti 3:16) Nama kebuah? Bup Kudus madah: ‘Mensia, nyebut pesan Petara ti dibai Roh Kudus.’ (2 Peter 1:21) Chunto, baka aki ke ngasuh uchu iya nulis surat. Surat nya madahka jaku ari aki, ukai jaku uchu. Nyadi, surat tu endang surat ari aki, ukai surat ari uchu. Baka nya mega, Bup Kudus madahka jaku ari Petara, ukai jaku ari orang ke nulis iya. Nya kebuah, semua jaku ari Bup Kudus endang amat ‘jaku Petara.’—1 Tesalonika 2:13.

 SEJALAI ENGGAU BETUL

6, 7. Nama kebuah kitai rindu ati meda Bup Kudus sejalai ari pun nyentuk ke ujung?

6 Bup Kudus ditulis dalam kandang lebih ari 1,600 taun. Penulis Bup Kudus idup ba jeman ti enda sebaka enggau pangan diri. Sida mega datai ari chara pengidup ti enda sebaka. Chunto, sekeda sida betanam, berikan enggau ngibun bedus. Iya ke bukai nyadi nabi, hakim enggau raja. Injil Luke ditulis seiku lutur. Taja pan orang ke nulis Bup Kudus datai ari chara pengidup ti enda sebaka, tang jaku Bup Kudus sejalai ari pun nyentuk ke ujung.

7 Bup keterubah ba Bup Kudus, Pemungkal, madah pasal baka ni penusah mensia berengkah. Bup ti penudi, Pemandang, madah pasal dunya tu deka nyadi paradais, tauka kebun ti manah. Bup Kudus mega madah pasal sejarah tauka tusun pengidup mensia dalam timpuh beribu taun, lalu baka ni tuju Petara deka nyadi. Bup Kudus ti sejalai ari pun nyentuk ke ujung ngasuh kitai rindu ati, lalu tu meh utai ti dikedeka kitai pasal bup ari Petara.

8. Beri chunto ti nunjukka Bup Kudus nya betul nitihka penemu sains.

8 Bup Kudus endang betul nitihka penemu sains. Bup Kudus ngembuan penemu ti tinggi agi ari penemu orang ke idup maya iya ditulis. Chunto, bup Adat Lewi ngembuan adat chara nyeliahka diri ari penyakit berampit enggau chara nyaga pemeresi ngagai bansa Israel kelia. Maya nya, mayuh bansa bukai ke diau semak sida enda nemu nama-nama pasal utai tu. Dulu kelia, mayuh orang bisi penemu ti salah pasal gamal dunya tu. Tang, Bup Kudus madah dunya tu segala. (Isaiah 40:22, peda nota kaki.) Bup Kudus enggau betul madahka dunya tu “ba langit ti puang.” (Jop 26:7) Endang amat, Bup Kudus  ukai bup sains, tang iya betul nitihka penemu sains. Utai tu endang patut dikearapka kitai pasal bup ari Petara.

9. (a) Nama kebuah kitai madahka Bup Kudus nya betul sereta tau dikearapka nitihka sejarah? (b) Nama kebuah kitai ngumbai penulis Bup Kudus enda bula?

9 Bup Kudus mega betul sereta tau dikearapka nitihka sejarah. Iya madah pasal nama orang sereta peturun sida iya enggau silik. * Kelimpah ari nya, enda baka penulis bup bukai ke enggai madah bansa diri dialahka, penulis Bup Kudus enda bula maya sida madahka diri empu tauka bansa sida dialahka. Chunto, ba bup Penyampau, Moses ngaku diri kena rara ketegal ngaga penyalah ti berat. (Penyampau 20:2-12) Jarang penulis bup sejarah bukai deka madahka penyalah diri. Tang, Bup Kudus bisi, laban iya bup ari Petara.

BUP TI NGEMBUAN PENEMU TI BEGUNA

10. Nama kebuah penemu ti beguna ba Bup Kudus enda ngasuh kitai alit ati?

10 Ketegal Bup Kudus endang bepun ari Petara, iya “beguna kena ngajar, kena ngerara, kena ngaduka utai ti salah.” (2 Timoti 3:16) Ya, Bup Kudus ngembuan penemu ti beguna. Bup Kudus madah pasal pendiau mensia ke bendar. Utai tu enda ngasuh kitai alit ati. Nama kebuah? Laban Petara Jehovah ti nyadi Pengarang Bup Kudus, ngaga kitai mensia! Jehovah nemu runding enggau asai ati kitai manah agi ari kitai empu. Iya nemu nama utai ti diguna kitai ngambika kitai ulih gaga ati. Iya mega nemu jalai pengidup ti patut diseliahka kitai.

11, 12. (a) Nama jaku ajar ti dipadah Jesus ba atas bukit? (b) Nama agi utai beguna ke bisi dipadah ba Bup Kudus, lalu nama kebuah iya agi beguna nyentuk ke diatu?

11 Peratika jaku ajar Jesus ba atas bukit, ke ditulis ba  bup Matthew bab 5 ngagai 7. Jaku ajar Jesus ke tebilang tu madah baka ni kitai tau bulih pengelantang ti bendar, chara mutarka laya enggau besampi, sereta chara ngembuan runding ti betul pasal reta. Jaku Jesus tu ukai aja beguna ngagai orang maya nya, tang mega ngagai kitai kemaya hari tu.

12 Sekeda jaku ajar Bup Kudus ulih dikena kitai ba pengidup diri sebilik, ba endur kereja sereta kaul enggau  orang bukai. Jaku ajar Bup Kudus beguna, lalu seruran meri penguntung ngagai semua orang. Penemu ti bisi ba Bup Kudus dipadahka nabi Isaiah munyi tu: ‘Aku tu Jehovah, Petara kita, ti deka ngajar kita utai ke penguntung kita.’—Isaiah 48:17.

BUP TI MADAHKA UTAI KE DEKA NYADI

Penulis bup Isaiah madah pasal pengerusak Babilon

13. Nama utai ti diasuh Jehovah tulis nabi Isaiah pasal Babilon?

13 Mayuh utai ti ditulis ba Bup Kudus udah nyadi. Chunto, maya kurun ke-8 S.M. Jehovah ngasuh nabi Isaiah madah pasal chara menua Babilon deka dialahka. * (Isaiah 13:19; 14:22, 23) Bala soldadu deka ngelangkangka sungai Babilon, lalu ngalahka menua nya enggau enda beperang. Pia mega, Isaiah madahka nama raja ke deka ngalahka Babilon—Sairus.—Isaiah 44:27–45:2.

14, 15. Baka ni utai ti ditulis Isaiah pasal Babilon deka nyadi?

14 Kira-kira 200 taun udahnya, kena malam 5/6 hari bulan 10 taun 539 S.M., bisi bala soldadu bepalan semak Babilon. Sapa tuai soldadu nya? Raja Persia ke benama Sairus. Semua tu nunjukka pekara ti ditulis Isaiah deka nyadi. Tang, amat ke enda bala soldadu Sairus deka ngalahka Babilon enggau enda beperang, baka ke udah ditulis?

15 Malam nya, orang Babilon benung berami sereta ngasaika diri likun tauka selamat laban bisi dinding ti tinggi sereta besai. Maya nya mega, Sairus enggau pintar ngelimpangka pejalai ai sungai ba menua Babilon ngagai endur bukai. Udah ai chukup langkang, bala soldadu Sairus ngelayang sungai nya lalu mansang semak ngagai dinding menua nya. Tang, baka ni bala soldadu Sairus ulih tama ngagai Babilon? Enda nemu nama  kebuah malam nya pintu kuta Babilon ditejuka tebuka!

16. (a) Nama pengujung ngagai Babilon baka ke dipadah Isaiah? (b) Baka ni kitai nemu nadai agi orang diau ba Babilon baka ke ditulis Isaiah?

16 Pasal Babilon, Bup Kudus madah: “Nadai orang deka diau dia agi. Nadai orang Arab ke bejalai segau-segau, deka nirika langkau kain sida dia, lalu nadai pengibun bedus deka ngasuh raban bedus sida ngulam dia.” (Isaiah 13:20) Bup Kudus ukai aja madah menua tu deka dialahka, tang iya mega madah nadai agi orang deka diau ba Babilon nyentuk ke belama iya. Diatu, nuan ulih meda utai tu amat nyadi. Nadai agi orang diau ba menua Babilon. Kemaya hari tu, tembawai Babilon ulih dipeda ba Iraq, kira-kira 80 km ari Baghdad. Semua jaku Jehovah ti dipadah ngagai Isaiah amat nyadi: “Aku deka nyapu Babilon ngena penyapu, lalu muai semua utai dia.”—Isaiah 14:22, 23.

Tembawai Babilon

17. Nama kebuah utai ti udah dikeamatka ba Bup Kudus ngasuh pengarap kitai teguh agi?

17 Bup Kudus ulih dipechaya, enda ke tu ngasuh pengarap kitai teguh agi? Pia mega, enti Petara Jehovah  ulih ngamatka semaya Iya dulu suba, kitai mega tau pechaya Iya ulih ngamatka semaya Iya ti deka ngaga dunya tu nyadi paradais. (Penyampau 23:19) Endang amat, kita bulih ‘pengarap enggau penemu ti beduduk ba pengadang ke pengidup ti meruan belama iya, ti udah disemaya Petara (Petara enda kala bula) kenyau ari sebedau penumbuh dunya.’—Titus 1:2. *

‘JAKU PETARA IDUP’

18. Nama dipadahka rasul Paul pasal ‘jaku Petara’?

18 Ari pelajar tu, kitai nemu Bup Kudus endang lain ari bup bukai. Bup Kudus sejalai ari pun nyentuk ke ujung, lalu betul nitihka penemu sains enggau sejarah.  Iya mega bisi penemu ti beguna sereta utai ti dipadah ke deka nyadi, ulih dipechaya. Ukai nya aja, rasul Paul mega nulis: ‘Jaku Petara idup sereta bekuasa, tajam agi ari pedang ti bemata dua, ti ngerejang datai ke iya nyeraraka semengat ari roh, nyeraraka buku tulang ari untak tulang; iya ulih ngakim runding enggau niat ati mensia.’—Hebrew 4:12.

19, 20. (a) Baka ni Bup Kudus ulih nulung nuan meresa diri empu? (b) Baka ni nuan ulih nunjukka pengaga ati ke Bup Kudus ti diberi Petara?

19 Macha “jaku” Petara ari Bup Kudus ulih ngubah pengidup kitai enggau manah agi. Iya ulih nulung kitai meresa diri empu enggau silik. Kitai engka ngumbai diri rinduka Petara. Tang, chara kitai nerima Jaku Iya, Bup Kudus, ulih nunjukka runding enggau tuju ati kitai ti bendar.

20 Bup Kudus endang bup ari Petara. Nya kebuah kitai patut macha, belajar sereta rinduka iya. Nuan ulih nunjukka pengaga ati diri ke pemeri Petara tu enggau terus belajarka Bup Kudus. Maya belajar, nuan deka nemu tuju Petara ngaga mensia. Ba Pelajar 3, nuan deka belajarka utai tu.

^ per. 9 Peturun Jesus bisi dipadah ba bup Luke 3:23-38.

^ per. 13 S.M. tauka Sebedau Masihi, taun sebedau Jesus datai ke dunya.

^ per. 17 Pengerusak menua Babilon nya siti ari chunto utai ti ditulis ba Bup Kudus ke udah nyadi. Chunto bukai, pengerusak menua Tire enggau menua Nineweh. (Esekiel 26:1-5; Sepaniah 2:13-15) Bup ke ditulis Daniel mega madah pasal perintah bukai ke deka nganti Babilon merintah dunya. Tu nyengkaum perintah Media-Persia enggau perintah Gerika. (Daniel 8:5-7, 20-22) Peda Penerang ba lambar 199-201, kena nemu utai ti ditulis pasal Messiah, ke nyadi ba Jesus Kristus.