Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 13

Baka Ni Petara Meda Nyawa

Baka Ni Petara Meda Nyawa
  • Baka ni Petara meda nyawa?

  • Baka ni Petara meda pengawa bebuai anak?

  • Baka ni kitai bebasaka nyawa?

1. Sapa ngaga semua utai idup?

‘JEHOVAH, endang Petara ti bendar,’ ku nabi Jeremiah. ‘Nuan endang Petara ti idup.’ (Jeremiah 10:10) Pia mega, Petara Jehovah ti Pengaga semua utai idup. Bala melikat bejaku ngagai Iya: “Nuan udah ngaga semua utai, lalu ulih peneka Nuan, sida ditempa, lalu diberi pengidup.” (Pemandang 4:11) Raja David muji Petara ngena lagu: “Nuan endang pun pengidup.” (Masmur 36:9) Nya alai, nyawa nya pemeri ari Petara.

2. Nama digaga Petara kena nyaga pengidup kitai?

2 Jehovah mega nyaga pengidup kitai. (Kereja Rasul 17:28) Iya nyediaka pemakai, ai irup, enggau tanah alai kitai diau. (Kereja Rasul 14:15-17) Jehovah ngaga semua tu ngambika kitai ulih idup nyamai. Tang, enti deka bulih penyamai tu enggau mayuh agi, kitai patut belajarka ukum Petara lalu nitihka ukum Iya.—Isaiah 48:17, 18.

BEBASAKA NYAWA

3. Baka ni Petara meda pengawa Kain ke munuh Abel?

3 Petara deka kitai bebasaka nyawa—enda ngira nyawa kitai empu tauka orang bukai. Maya Adam seduai Hawa menya, anak seduai iya, Kain balat ringat ngagai menyadi iya Abel. Jehovah madahka Kain, pengeringat  ulih ngujungka iya bedosa. Kain enda ibuhka jaku tangkan Petara nya. Iya “ngamuk lalu munuh menyadi iya [Abel].” (Pemungkal 4:3-8) Jehovah ngukum Kain ketegal munuh menyadi iya.—Pemungkal 4:9-11.

4. Ba Adat Moses, baka ni Petara nunjukka nyawa nya berega?

4 Beribu taun udah nya, Jehovah meri orang Israel ukum ngambika sida ulih nyembah Iya. Laban ukum tu diberi nengah nabi Moses, nya alai, ukum nya dikumbai Adat Moses. Siti ari Adat Moses madah: “Anang munuh orang.” (Ulang Adat 5:17) Tu madahka orang Israel, nyawa mensia berega ba mata Petara, lalu sida mega patut bebasaka nyawa orang bukai.

5. Baka ni kitai patut meda pengawa bebuai anak?

5 Baka ni enggau nyawa anak ke agi dalam kandung? Nitihka Adat Moses, munuh tauka muai anak ke agi dalam kandung nya salah. Ya, nyawa anak nya pan berega ba mata Jehovah. (Pemansut 21:22, 23NW; Masmur 127:3) Tu nunjukka bebuai anak nya salah.

6. Nama kebuah kitai enda patut begedika pangan diri?

6 Bebasaka nyawa nyengkaum bisi runding ti manah enggau pangan diri. Ku Bup Kudus: “Semua orang ke begedika pangan diri endang pemunuh, lalu kita nemu, orang ke pemunuh nadai pengidup ti meruan belama iya dalam iya.” (1 John 3:15) Enti kitai deka idup belama iya, kitai patut muai semua pemenchi ke bisi dalam ati kitai. Laban begedika pangan diri nya pun pengawa jai. (1 John 3:11, 12) Nya alai, kitai patut rinduka pangan diri.

7. Nama sekeda pengawa ti enda bebasaka nyawa?

7 Baka ni enggau bebasaka nyawa diri empu? Semua orang enggai mati, tang bisi sekeda orang berantuka nyawa ketegal pengerindang. Chunto, nginsap, makai pinang tauka makai dadah kena merindang diri.  Pengawa nya ulih ngemediska tubuh enggau munuh. Orang ke ngereja pengawa nya enda bebasaka nyawa diri. Pengawa nya enda tuchi ba mata Petara. (Rome 6:19; 12:1; 2 Korint 7:1) Kitai patut ninggalka pengawa nya enti deka diterima Petara. Ninggalka pengawa nya engka tusah, tang, Jehovah ulih nulung kitai. Lalu Iya gaga ati meda kitai bebasaka nyawa ti diberi Iya.

8. Nama kebuah kitai patut nyaga pengelikun diri?

8 Enti kitai bebasaka nyawa, kitai deka nyaga pengelikun diri. Kitai enda berantuka nyawa diri ketegal pengerindang. Kitai deka deriba enggau bejimat, tauka nyeliahka main ti tau nganu nyawa. (Masmur 11:5) Ukum Petara ngagai orang Israel madah: “Lebuh kita ngaga rumah baru, gaga reraga ba tisi perabung rumah nya. Nya baru kita enda betanggungjawap enti orang labuh ari perabung nya lalu mati.” (Ulang Adat 22:8) Nitihka ukum tu, kitai patut nentuka tangga ba rumah likun, ngambika orang enda labuh lalu bakal. Enti nuan bisi kerita, tentuka kerita nya selamat dikena. Anang ngasuh rumah tauka kerita ngenusah nuan tauka orang bukai.

9. Enti kitai bebasaka nyawa, baka ni kitai ngintu jelu?

9 Baka ni enggau nyawa jelu? Nyawa jelu mega berega ba mata Petara. Iya ngemendarka jelu dibunuh nyadika pemakai enggau gari tauka kena nyaga diri ari penusah. (Pemungkal 3:21; 9:3; Pemansut 21:28) Tang, ngemediska jelu tauka munuh sida semina ke pengerindang nya salah, lalu nunjukka kitai enda bebasaka nyawa.—Jaku Dalam 12:10.

BEBASAKA DARAH

10. Baka ni Petara nunjukka nyawa enggau darah bisi kaul?

10 Udah Kain munuh menyadi iya Abel, Jehovah madahka  Kain: “Darah menyadi nuan nyabak ngangauka Aku ari tanah.” (Pemungkal 4:10) Maya Petara bejaku pasal darah Abel, reti nya Iya bejaku pasal nyawa Abel. Kain udah munuh Abel, nya alai, iya patut diukum. Darah tauka nyawa Abel baka ke ngangau minta balas ari Jehovah. Kaul entara nyawa enggau darah mega dipeda udah Bah Besai jeman Noah. Sebedau Bah Besai, mensia semina makai buah, sayur, tepung enggau kachang. Udah Bah Besai, Jehovah ngasuh Noah enggau anak lelaki iya: “Diatu kita tau makai sida[burung, ikan, enggau jelu bukai], lalu kita tau mega makai utai ti tumbuh. Aku meri semua utai nya nyadika pemakai kita.” Tang, Petara netapka perintah tu: “Kita enda tau makai dagin ti agi bedarah, laban darah ngundan seput.” (Pemungkal 1:29; 9:3, 4) Jehovah enggau terang nunjukka nyawa enggau darah bisi kaul.

11. Maya jeman Noah, nama pesan Petara pasal darah?

11 Laban bebasaka nyawa, nya alai, kitai enda makai darah. Ukum Jehovah ngagai orang Israel: ‘Enti orang . . . nangkap jelu tauka burung ti enda tuchi, sida enda tau enda nejuka darah jelu nya neritik ke tanah, lalu ngelamun darah nya ngena tanah. . . . Nya kebuah Jehovah udah madahka ngagai orang Israel, sida enda tau makai dagin ti agi bedarah.’ (Adat Lewi 17:13, 14) Pesan Petara ke enda ngasuh makai darah, keterubah iya dipadah ngagai Noah kira-kira 800 taun sebedau nya. Pesan tu enda berubah. Ku Jehovah: Orang ke nyembah Iya tau makai dagin jelu, tang enda makai darah. Sida patut muai darah nya ke tanah—reti iya, mulaika nyawa utai idup ngagai Petara.

12. Nama pesan pasal darah ke diberi roh kudus maya jeman Jesus ke agi dikena nyentuk ke diatu?

12 Pesan ti sama mega dituju ngagai semua orang  Kristian. Maya jeman Jesus, bala rasul enggau bala tuai ke sama enggau ngiring nembiak Jesus begempuru mutuska pesan ti patut dititihka semua gerempung Kristian. Sida mutuska: “Laban dalam runding Roh Kudus enggau dalam runding kami, kami enda patut nating kita enggau utai bukai, kelimpah ari atur tu, iya nya: anang makai pemakai ti udah diberi ngagai engkeramba, anang makai darah, anang makai jelu ti mati dichekal [darah ti enda dibuai], anang ngereja ulah ti kamah.” (Kereja Rasul 15:28, 29; 21:25) Nya alai, kitai ‘anang makai darah.’ Ba mata Petara, nyeliahka utai tu baka kitai patut nyeliahka diri ari nyembah engkeramba enggau ulah ti kamah.

Nyema seiku lutur enda ngasuh nuan ngirup arak, kati ulih nuan namaka ai arak nya ngagai tubuh ngena jarum?

13. Terangka nama kebuah pesan enda makai darah nya nyengkaum nerima darah.

13 Kati pesan tu nyengkaum nerima darah? Ya. Nyema seiku lutur enda ngasuh nuan ngirup arak, kati ulih nuan namaka ai arak nya ngagai tubuh ngena jarum? Tentu enda! Pia mega, enda makai darah reti iya, kitai enda nejuka sapa-sapa namaka darah ke dalam tubuh kitai.

14, 15. Nama patut digaga orang Kristian enti lutur ngasuh sida nerima darah, lalu nama kebuah?

14 Baka ni enti orang Kristian balat bakal tauka patut beputung? Lutur engka ngasuh nuan nerima darah, enti enda nuan mati. Endang amat, orang Kristian enggai mati. Tang, ketegal bebasaka nyawa ti diberi Petara, sida deka nerima chara berubat bukai ke enda ngena darah.

15 Kati orang Kristian deka ngelanggar ukum Petara ketegal deka idup lama mimit ba dunya tu? Ku Jesus: ‘Barang sapa deka ngidupka nyawa diri, deka ngelenyauka iya, lalu barang sapa ngelenyauka nyawa  diri ketegal aku, deka tetemuka iya.’ (Matthew 16:25) Kitai enggai mati. Tang, enti kitai deka nyelamatka diri lalu ngelanggar ukum Petara, kitai deka lenyau pengidup belama iya. Nya alai, kitai patut arapka ukum Petara enggau pengabis ati taja pan kitai engka mati. Laban Pemeri-Nyawa kitai deka ingatka kitai lalu ngidupka kitai baru.—John 5:28, 29; Hebrew 11:6.

16. Baka ni orang ke ngasika Petara nitihka lalau pasal darah?

16 Kemaya hari tu, orang ke ngasika Petara enggau naka ulih nitihka lalau pasal darah. Sida iya enda makai darah tauka nerima darah maya berubat. * Sida pechaya Pengaga darah nemu utai ti pemadu manah ngagai sida. Kati nuan pechaya?

SEMINA SITI AJA CHARA TI BETUL NGENA DARAH

17. Maya orang Israel kelia, nama siti chara ti betul ngena darah ke diterima Petara Jehovah?

17 Adat Moses madahka semina siti aja chara ti betul ngena darah. Pasal orang Israel kelia, Jehovah madah: “Seput semua utai ti idup endang dalam darah. Nya kebuah TUHAN  udah bejaku ngasuh semua darah dituang magang ba alta, kena muai dosa orang mayuh. Darah, iya nya nyawa, muai dosa.” (Adat Lewi 17:11) Maya orang Israel bedosa, sida deka diampun enti sida nyediaka pemeri ngena jelu enggau darah iya ba atas alta Langkau Sembiang tauka Rumah Petara. Nya alai, darah semina dikena ba pemeri tu.

18. Nama penguntung enggau berekat ti deka diulih kitai ari genselan Jesus?

18 Orang Kristian ti bendar enda di baruh Adat Moses. Nya alai, sida enda nyediaka pemeri ngena jelu enggau darah iya ba atas alta. (Hebrew 10:1) Tang, pemeri orang Israel kelia ngambarka genselan ti berega—iya nya Anak Petara, Jesus Kristus. Ba Pelajar 5 kitai belajar, Jesus udah meri nyawa enggau darah iya nyadika  genselan. Udah nya iya niki ke serega, lalu nyerahka rega genselan darah iya sekali aja ngagai Petara. (Hebrew 9:11, 12) Tu meri peluang ngambika dosa kitai ulih diampun lalu idup belama iya. (Matthew 20:28; John 3:16) Nya amat beguna bendar ngagai kitai! (1 Peter 1:18, 19) Enggau manggaika pengarap ba genselan Jesus kitai ulih diselamatka.

Baka ni nuan bebasaka nyawa enggau darah?

19. Nama patut digaga kitai ngambika ‘enda betanggungjawapka nyawa’ mensia?

19 Kitai beterima kasih ngagai Petara Jehovah ketegal pengerindu Iya meri kitai nyawa! Enda ke tu meransang kitai madah ngagai orang bukai pasal genselan Jesus ke ulih meri pengidup belama iya? Laban bebasaka nyawa mensia ke diberi Petara, kitai diperansang ngereja tu. (Esekiel 3:17-21) Enti kitai ngaga pengawa tu enggau bebendar, kitai ulih bejaku baka rasul Paul: ‘Aku enda betanggungjawapka nyawa kita, laban aku nadai kala enggai madah ngagai kita semua juluk ati Petara.’ (Kereja Rasul 20:26, 27) Chara ti manah kitai bebasaka nyawa enggau darah iya nya kitai madahka orang pasal Petara enggau tuju Iya.

^ per. 16 Peda DVD Transfusion-Alternative Strategies—Simple, Safe, Effective ke dikeluarka Saksi-Saksi Jehovah kena nemu chara berubat bukai ke enda ngena darah. Nuan ulih ngasuh orang bukai nerangka jaku ba DVD nya ngagai nuan.