Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PELAJAR 18

Baptisa Sereta Kaul Nuan Enggau Petara

Baptisa Sereta Kaul Nuan Enggau Petara
  • Baka ni orang Kristian dibaptisa?

  • Nama patut digaga nuan ngambika ulih dibaptisa?

  • Baka ni orang ulih nyerahka diri ngagai Petara?

  • Nama kebuah dibaptisa?

1. Nama kebuah pemesai ari Etiopia minta dibaptisa?

“PEDA nuan, ditu bisi ai. Nama utai ti tau nagang aku dibaptisa?” Tu utai ti ditanya pemesai ari Etiopia maya jeman rasul. Seiku orang Kristian ke benama Philip udah madahka iya, Jesus nya Messiah ti disemaya. Ati  iya meransang iya ngereja utai ti udah dipelajarka ari Bup Kudus. Dia iya minta dibaptisa!—Kereja Rasul 8:26-36.

2. Nama kebuah nuan patut dibaptisa?

2 Enti nuan udah belajarka bup tu enggau seiku ari Saksi-Saksi Jehovah, nuan ulih betanya, ‘Nama nagang aku ari dibaptisa?’ Diatu nuan udah belajarka semaya ari Bup Kudus pasal pengidup belama iya ba Paradais. (Luke 23:43; Pemandang 21:3, 4) Nuan mega udah belajar pasal orang mati enggau peluang sida deka diidupka baru. (Pengajar 9:5; John 5:28, 29) Nuan engka udah begulai enggau Saksi-Saksi Jehovah ba gempuru Kristian, lalu meda sida nitihka ajar pengarap ti bendar. (John 13:35) Tang iya ke pemadu beguna, nuan udah berengkah bisi kaul enggau Petara Jehovah.

3. (a) Nama perintah ti diberi Jesus ngagai bala murid iya? (b) Baka ni orang dibaptisa?

3 Baka ni nuan nunjukka diri deka ngereja peneka Petara? Jesus madahka bala murid iya: ‘Bejalai . . . ngagai semua bansa lalu gaga sida nyadi murid aku, maptisa sida.’ (Matthew 28:19) Jesus empu nyadi teladan dibaptisa dalam ai. Iya enda dipechik ngena ai tauka pala iya semina ditata ngena ai. (Matthew 3:16) Leka jaku “baptisa” datai ari leka jaku Gerika, reti iya “diselam.” Nya alai, baptisa orang Kristian reti iya diselam abis dalam ai.

4. Baptisa nunjukka nama?

4 Orang ke deka bisi kaul enggau Petara Jehovah patut dibaptisa. Baptisa nunjukka pengeran ati nuan deka ngereja peneka Petara. Tu nunjukka nuan rindu ati ngereja peneka Jehovah. (Masmur 40:7, 8) Taja pia, enti nuan deka dibaptisa, nuan patut nitihka chara ti udah ditetapka.

 BEGUNAKA PENEMU ENGGAU PENGARAP

5. (a) Nama chara ti keterubah ngambika ulih dibaptisa? (b) Nama kebuah gempuru Kristian beguna?

5 Nuan udah nitihka chara ti keterubah. Baka ni? Terus belajarka Bup Kudus ngambika ngelala Petara Jehovah enggau Jesus Kristus. (John 17:3) Tang, mayuh agi utai ti deka dipelajar. Orang Kristian deka ‘dipenuhka enggau penemu pasal peneka Petara.’ (Kolosi 1:9) Datai gempuru Saksi-Saksi Jehovah ulih nulung nuan. Nya alai, kitai patut datai begempuru. (Hebrew 10:24, 25) Seruran datai gempuru deka nulung nuan nambahka penemu pasal Petara.

Ngulihka penemu ti bendar ari Jaku Petara nya chara ngambika ulih dibaptisa

6. Naka ni penemu Bup Kudus ke patut ditemu nuan ngambika ulih dibaptisa?

6 Endang amat, nuan enda ibuh nemu semua utai ba Bup Kudus enti deka dibaptisa. Pemesai Etiopia udah bisi penemu mimit, tang iya begunaka tulung kena nemu sekeda ajar ari Bup Kudus. (Kereja Rasul 8:30, 31) Baka nya mega, agi mayuh utai ti deka dipelajarka nuan. Iya ke amat, nuan enda nemu abis belajar pasal Petara. (Pengajar 3:11) Tang, sebedau nuan ulih dibaptisa, nuan patut nemu batang ajar Bup Kudus. (Hebrew 5:12) Batang ajar tu nyengkaum pemendar pasal orang mati, nama Petara enggau Perintah Iya.

7. Nama penguntung nuan belajarka Bup Kudus?

7 Tang, bisi penemu aja enda chukup. Laban ‘nadai orang ulih ngerinduka ati Petara enti iya enda arapka Petara.’ (Hebrew 11:6) Bup Kudus madahka kitai, maya sekeda orang ba nengeri Korint kelia menya ninga injil ari bala murid Jesus, sida “arap lalu dibaptisa.” (Kereja Rasul 18:8) Pia mega, belajarka Bup Kudus tau ngasuh nuan arap Bup Kudus nya Jaku Petara, lalu nulung nuan arapka semaya Iya enggau genselan nyawa Jesus.—Josua 23:14; Kereja Rasul 4:12; 2 Timoti 3:16, 17.

 BEKUNSI PEMENDAR BUP KUDUS ENGGAU ORANG BUKAI

8. Nama deka meransang nuan bekunsi enggau orang bukai pasal utai ti udah dipelajarka nuan?

8 Maya pengarap nuan majak mansang, nuan enda ulih nagang diri deka madah pasal utai ti udah dipelajarka nuan. (Jeremiah 20:9) Nuan deka diperansang madah ngagai orang bukai pasal Petara enggau tuju Iya.—2 Korint 4:13.

Pengarap patut meransang nuan bekunsi nama utai ti dipechaya nuan enggau orang bukai

9, 10. (a) Enggau sapa nuan ulih bekunsi pemendar Bup Kudus? (b) Nama patut digaga nuan enti deka enggau ngerembaika injil ti diatur Saksi-Saksi Jehovah?

9 Nuan engka belabuh bekunsi pemendar Bup Kudus ngagai bala kaban belayan, orang ke diau semak nuan enggau orang ke sama kereja. Nyau kelama, nuan engka bisi ati deka enggau ngerembaika injil ti diatur Saksi-Saksi Jehovah. Maya nya, nuan tau madah pasal utai tu ngagai orang ke ngajar nuan Bup Kudus. Enti nuan ngasaika diri ulih enggau nginjil, nuan enggau orang ke ngajar nuan Bup Kudus tau betemu enggau dua iku tuai gempuru.

10 Tu ulih nulung nuan ngelala sida tuai gempuru Kristian ke ngibun nembiak Petara enggau manah agi. (Kereja Rasul 20:28; 1 Peter 5:2, 3) Enti sida tuai gempuru meda nuan nemu enggau arapka batang ajar Bup Kudus, idup sejalai enggau ajar Petara, sereta amat deka nyadi seiku ari Saksi-Saksi Jehovah, sida deka madahka nuan ulih enggau ngerembaika berita manah, lalu nyadi penginjil ti bedau dibaptisa.

11. Nama patut diubah sebedau nuan ulih ngerembaika injil?

11 Tang, nuan patut ngubah sekeda chara pengidup enggau ulah nuan ngambika ulih enggau ngerembaika injil. Tu nyengkaum badu agi ngereja pengawa enda manah ke enda ditemu orang bukai. Nya alai, sebedau  nuan nyadi penginjil ti bedau dibaptisa, nuan patut ngelengkaka penyalah ti besai, baka ulah ti kamah, pemabuk, enggau makai dadah.—1 Korint 6:9, 10; Galatia 5:19-21.

NESAL ATI LALU NGUBAH CHARA PENGIDUP

12. Nama kebuah nesal ati nya beguna?

12 Agi bisi chara bukai ti patut dititihka nuan sebedau ulih dibaptisa. Rasul Peter madah: ‘Nesal ati . . . lalu pulai baru ngagai Petara, ngambika dosa kita diampun.’ (Kereja Rasul 3:19) Nesal ati reti iya nuan amat nesal ke penyalah ti udah digaga nuan. Nesal ati tu endang patut digaga orang ke ngereja ulah ti kamah tauka enda. Nama kebuah? Laban semua mensia bela bedosa magang lalu begunaka pengampun ari Petara. (Rome 3:23; 5:12) Sebedau belajarka Bup Kudus, nuan enda nemu nama utai ti dikedeka Petara. Nyadi, baka ni nuan ulih idup sejalai enggau utai ti dikedeka Iya? Nya alai, nesal ati nya beguna.

13. Nama reti ngubah chara pengidup?

13 Pengudah orang nesal ati, iya patut ngubah chara pengidup, tauka ‘pulai baru.’ Nuan ukai semina nesal ati aja. Nuan patut ninggalka chara pengidup lama, lalu bebendar ngereja utai ti betul ari diatu. Nesal ati enggau ngubah chara pengidup endang patut digaga nuan sebedau dibaptisa.

NYERAHKA DIRI EMPU

14. Nama agi chara patut digaga nuan sebedau dibaptisa?

14 Siti agi chara patut digaga sebedau dibaptisa, iya nya nuan nyerahka diri empu ngagai Petara Jehovah.

Udah nuan nyerahka diri empu ngagai Petara dalam sampi?

15, 16. Nama reti nyerahka diri empu ngagai Petara, lalu nama meransang orang ngereja utai tu?

15 Maya nuan nyerahka diri empu ngagai Petara Jehovah  dalam sampi, nuan besemaya deka nyembah enggau ngereja peneka Iya seiku aja, belama iya. (Ulang Adat 6:15) Nama kebuah orang deka ngereja tu? Chunto, baka seiku lelaki ke bepangan enggau seiku indu. Mayuh agi utai ti ditemu iya pasal indu nya enggau meda pemanah ulah iya, iya deka ngasaika diri sayau agi ke indu nya. Nyau kelama, iya deka ngemai indu nya jadi. Amat, jadi enggau indu nya reti iya laki nya deka megai mayuh agi tanggungjawap. Tang, pengerindu meransang iya ngereja utai tu.

16 Maya nuan udah ngelala lalu rinduka Jehovah, nuan diperansang ngereja peneka Iya enggau pengabis ati, belama iya. Barang sapa ke deka nitihka Anak Petara, Jesus Kristus, iya patut “badu agi berundingka diri empu.” (Mark 8:34) Kitai enda ngelakka pengingin tauka juluk ati diri empu nagang kitai ngasika Petara enggau pengabis ati. Sebedau nuan ulih dibaptisa, ngereja peneka Petara Jehovah patut nyadi tuju ati pengidup nuan.—1 Peter 4:2.

ANANG TAKUT ENDA ULIH

17. Nama kebuah bisi orang nagang diri ari nyerahka diri empu ngagai Petara?

17 Sekeda orang nagang diri ari nyerahka diri empu ngagai Jehovah laban sida ngumbai pengawa tu berat. Sida engka takut betanggungjawap ngagai Petara enti sida udah nyerahka diri ngagai Iya. Ketegal takut enggai ke enda ulih tauka enda ngenyamaika ati Jehovah, sida ngumbai manah agi enda nyerahka diri ngagai Iya.

18. Nama ulih meransang nuan nyerahka diri ngagai Jehovah?

18 Maya nuan belajar rinduka Jehovah, nuan deka diperansang nyerahka diri ngagai Iya, lalu nguji enggau naka ulih idup nitihka jalai nya. (Pengajar 5:4)  Pengudah nuan nyerahka diri, nuan tentu deka “nitihka jalai Tuhan,” lalu “ngerinduka ati Iya.” (Kolosi 1:10) Ketegal nuan rinduka Petara, nuan enda ngumbai ngereja peneka Iya tusah. Nuan engka setuju enggau rasul John ke nulis: ‘Reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’—1 John 5:3.

19. Nama kebuah nuan enda ibuh takut nyerahka diri ngagai Jehovah?

19 Nuan enda ibuh sempurna enti deka nyerahka diri ngagai Petara. Jehovah nemu pengurang nuan, lalu enda minta lebih ari utai ti ulih digaga nuan. (Masmur 103:14) Iya deka nuan mujur, lalu deka nyukung enggau  nulung nuan. (Isaiah 41:10) Nuan ulih pechaya enti nuan arapka Iya enggau pengabis ati, Iya “deka nunjukka jalai ti ngena ngagai nuan.”—Jaku Dalam 3:5, 6.

BAPTISA—TANDA NUAN NYERAHKA DIRI

20. Nama kebuah nyerahka diri ngagai Jehovah ukai utai ti dipelalaika?

20 Berunding pasal utai ti udah dikerandauka kitai ulih nulung nuan nyerahka diri ngagai Jehovah dalam sampi. Genap iku orang ke rinduka Petara mega patut  “ngaku ngena mulut . . . lalu diselamatka.” (Rome 10:10) Baka ni nuan ngereja tu?

Baptisa reti iya ninggalka chara pengidup lama, lalu ngereja utai ti dikedeka Petara

21, 22. Baka ni nuan “ngaku ba mua orang mayuh” pasal pengarap nuan?

21 Padah ngagai tuai gempuru ke ngatur pasal nuan ke deka dibaptisa. Iya deka ngatur sekeda tuai gempuru ngambika berandau enggau nuan pasal batang ajar Bup Kudus. Enti sida tuai gempuru tu setuju nuan ulih dibaptisa, sida deka madah nuan ulih dibaptisa ba gempuru besai ti deka datai. * Selalu iya, siti ceramah pasal reti baptisa deka diberi maya nya. Udah nya, orang ke meri ceramah ngasuh orang ke deka dibaptisa nyaut dua iti tanya kena “ngaku ba mua orang mayuh” pasal pengarap sida.

22 Baptisa nunjukka nuan udah nyerahka diri ngagai Petara, lalu diatu nuan nyadi seiku ari Saksi-Saksi Jehovah. Orang ke dibaptisa diselamka abis dalam ai ba mua orang mayuh, nunjukka sida udah nyerahka diri ngagai Jehovah.

RETI BAPTISA

23. Nama reti dibaptisa “dalam nama Apai, Anak enggau Roh Kudus”?

23 Jesus madahka bala murid iya deka dibaptisa “dalam nama Apai, Anak enggau Roh Kudus.” (Matthew 28:19) Reti iya, orang ke deka dibaptisa ngaku penuduk Petara Jehovah enggau Jesus Kristus. (Masmur 83:18; Matthew 28:18) Iya mega ngaku guna roh kudus Petara.—Galatia 5:22, 23; 2 Peter 1:21.

24, 25. (a) Nama reti baptisa? (b) Nama tanya ti deka disaut ba pelajar ti penudi?

24 Taja pia, baptisa ukai semina diselamka dalam ai  aja. Diselamka dalam ai reti iya nuan udah ninggalka chara pengidup lama. Pansut ari ai reti iya nuan diatu idup ketegal deka ngereja utai ti dikedeka Petara. Kingatka mega, nuan udah nyerahka diri ngagai Petara Jehovah, ukai ngagai orang bukai, kereja tauka gerempung ba dunya tu. Pengawa nuan nyerahka diri ngagai Petara enggau dibaptisa nya pun nuan bisi kaul ti manah enggau Petara—kaul ti semak enggau Iya.—Masmur 25:14.

25 Baptisa ukai reti iya udah selamat. Jesus madah: “Orang ke tan datai ke ujung, deka diselamatka.” (Matthew 24:13) Baptisa nya semina pun aja. Nya alai, Baka ni nuan ulih meruan dalam pengerindu Petara? Ba pelajar ti penudi, kitai deka nyaut tanya tu.

^ per. 21 Pengawa dibaptisa selalu diatur ba gempuru besai Saksi-Saksi Jehovah tiap taun.