Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Nama Utai ti Bendar Diajar Bup Kudus?

 PENERANG

1914—Taun ti Beguna Bendar Nitihka Dipadah Bup Kudus

1914—Taun ti Beguna Bendar Nitihka Dipadah Bup Kudus

KIRA-KIRA 40 taun sebedau 1914, nembiak Bup Kudus madah sekeda utai deka nyadi ba taun 1914. Nama utai ti deka nyadi tu, lalu nama nunjukka taun 1914 nya taun ti beguna bendar?

 Baka ke ditulis ba Luke 21:24, Jesus madah: “Jerusalem deka dilunjak orang bansa bukai, nyentuk ngagai maya timpuh orang bansa bukai udah abis.” Kelia menya, Jerusalem nyadi indu nengeri bansa Judah. Iya mega alai bala raja ari peturun Raja David merintah. (Masmur 48:1, 2) Taja pia, bala raja tu enda sebaka enggau bala pemerintah ari bansa bukai. Sida ‘nyadi raja ba kerusi diraja ti udah ditumbuhka Jehovah.’ Sida nyadi pengari Petara. (1 Bansa Israel 29:23) Nya alai, Jerusalem nyadi tanda perintah ari Jehovah.

Baka ni enggau kemaya perintah ari Petara berengkah “dilunjak orang bansa bukai”? Tu nyadi ba taun 607 S.M. maya Jerusalem dialahka orang Babilon. ‘Kerusi diraja ti udah ditumbuhka Jehovah’ nyadi kusung, lalu bala raja ari peturun David teketu. (2 Raja 25:1-26) Kati perintah ari Petara deka “dilunjak” belama iya? Enda, laban melikat  Gabriel madahka Petara Jehovah ‘deka meri iya [Jesus] kerusi diraja aki iya David.’ (Luke 1:32, 33) Nya alai, perintah ari Petara badu agi “dilunjak” maya Jesus nyadi Raja.

Kemaya utai tu nyadi? Jesus nunjukka bansa bukai deka merintah ba siti timpuh ti udah ditetapka. Daniel bab 4 bisi madah ni pengelama timpuh tu. Iya bekaul enggau genera dalam mimpi Raja Nebukadnesar ari Babilon. Iya meda sepun kayu ti besai sereta tinggi ditebang. Tuga iya enda ulih tumbuh agi laban dibelit ngena belulang besi enggau temaga. Seiku melikat madah: “Dalam kandang tujuh taun iya nadai agi.”—Daniel 4:10-16.

Dalam Bup Kudus, pun kayu kekadang dikena nunjukka siti-siti perintah. (Esekiel 17:22-24; 31:2-5) Nya alai, pun kayu ti ditebang nunjukka baka ni perintah ari Petara ti diarika bala raja ba Jerusalem deka teketu. Tang, genera nya madahka ‘Jerusalem deka dilunjak’—dalam kandang “tujuh taun.” Ni pengelama timpuh tu?

Pemandang 12:6, 14 nerangka tiga taun setengah sama enggau “seribu dua ratus enam puluh hari.” Nya alai, “tujuh taun” sama enggau 2,520 hari. Tang, bansa bukai agi ‘ngelunjak’ perintah ari Petara taja pan Jerusalem udah dialahka pengudah 2,520 hari. Nyadi, timpuh “tujuh taun” panjai agi ari 2,520 hari. Nitihka ayat ba Penyampau 14:34 enggau Esekiel 4:6, sehari nyadi setaun. Nya kebuah, timpuh “tujuh taun” tu nyadi 2,520 taun.

Timpuh 2,520 taun berengkah ari bulan 10 taun 607 S.M., maya Jerusalem dialahka orang Babilon, lalu raja ari peturun David ‘dibuai ari kerusi raja.’ Timpuh nya abis ba ujung bulan 10 taun 1914. Maya nya, “timpuh orang bansa bukai” udah abis, lalu Jesus Kristus dituduh nyadi Raja di serega. *Masmur 2:1-6; Daniel 7:13, 14.

 Baka ke dipadah Jesus, bisi utai deka nyadi maya iya nyadi Raja—perang, lapar pungkang, tanah berenyang, penyakit. (Matthew 24:3-8; Luke 21:11) Utai ti nyadi tu nandaka perintah Petara udah berengkah merintah di serega ba taun 1914, lalu “hari ti penudi” dunya ti jai tu belabuh.—2 Timoti 3:1-5.

^ per. 4 Ari bulan 10 taun 607 S.M. ngagai ari bulan 10 taun 1 S.M., timpuh iya 606 taun. Nama taun udah 1 S.M.? Taun 0 S.M.? Ukai, udah nya taun 1 M. Nya alai, ari bulan 10 taun 1 S.M. ngagai bulan 10 taun 1914 M., timpuh iya 1,914 taun. Enti 606 taun ditambah enggau 1,914 taun, kitai bulih 2,520 taun.