Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PENGIDUP KRISTIAN

Ngemanahka Agi Pengelandik Kitai ba Pengawa Nginjil—Ngajar Pemelajar Bup Kudus Nyediaka Diri Sebedau Belajar

Ngemanahka Agi Pengelandik Kitai ba Pengawa Nginjil—Ngajar Pemelajar Bup Kudus Nyediaka Diri Sebedau Belajar

NAMA KEBUAH BEGUNA: Enti pemelajar Bup Kudus nyediaka diri sebedau belajar, tu deka nulung sida mereti sereta ngingatka utai ke dipelajar sida. Kelimpah ari nya, sida mega deka jampat agi ngaga pemansang. Indah pengudah dibaptisa, sida patut nyediaka utai ke dikena begempuru enggau nginjil ngambika terus “bejaga.” (Mat. 25:13) Nya alai, nemu nyediaka diri sereta bisi jadual belajar ti manah ulih meri penguntung sepemanjai pengidup sida. Berengkah ari pun, kitai ulih nulung pemelajar nelebaka diri enggau pengawa nyediaka diri sebedau belajar Bup Kudus.

CHARA:

  • Nyadi teladan ti manah. (Rom. 2:21) Lebuh nuan nyediaka diri sebedau belajar enggau pemelajar Bup Kudus nuan, nuan patut berunding pasal utai ke diguna iya. (km 11/15 3) Tejuka iya meda litaricha nuan ke udah digaris

  • Meransang pemelajar nyediaka diri. Enti iya berengkah belajar enggau tetap, padahka kebuah nyediaka diri sebedau belajar Bup Kudus nya beguna lalu terangka penguntung ke diulih. Padahka sekeda chara iya ulih ngena awak nyediaka diri. Lebuh belajarka Bup Kudus, sekeda pengajar ngasuh pemelajar ngena litaricha pengajar nya empu ke udah digaris. Tu ulih nulung pemelajar meda penguntung enti iya nyediaka diri. Beri puji lebuh iya nyediaka diri

  • Ajar chara nyediaka diri. Lebuh sida baru berengkah belajar, sekeda pengajar ngena sesi belajar nya ngajar pemelajar Bup Kudus chara nyediaka diri