Terus ngagai penerang

Saksi-Saksi Jehovah

Pilih bansa jaku Iban

Iring pasal Gempuru Pengidup enggau Pengawa Kristian Kitai

Iring pasal Gempuru Pengidup enggau Pengawa Kristian Kitai

Ripih Isi

 

Genteran

Jaku Pemuka

 2

Reta Ari Bup Kudus

 3

Ngemanahka Agi Chara Kitai Nginjil

 4

Pengidup Kristian

 5

Jaku Penutup

 6

Ngemanahka Agi Chara Macha enggau Ngajar

 7

Jaku Lalau

 8

Awak

 9

Penatai Tuai ti Ngabas

 10

Minggu Gempuru Besai Sehari tauka Konvensyen

 11

Minggu Ngingatka Pemati Jesus

 12

Tuai ti Nyaga Gempuru Pengidup enggau Pengawa Kristian

 13

Chairman Gempuru Pengidup enggau Pengawa Kristian

 14

Tuai ti Ngatur Tuai Gempuru

 15

Penyaup Meri Jaku Lalau

 16

Kelas Tambah

 17

Video

 18

1. Gempuru Pengidup enggau Pengawa Kristian deka dipejalai nitihka langkar ba Bup Kereja Pengidup enggau Pengawa Kristian sereta nitihka iring ke bisi dipadah ba baruh tu. Semua penginjil patut diperansang ngambika ulih enggau ngenataika begian pemelajar. Orang ke selalu datai ngagai eklisia mega ulih enggau begian tu enti sida nerima ajar ari Bup Kudus sereta chara pengidup sida sejalai enggau prinsip Bup Kudus.—be lamb. 282.

 2. Jaku Pemuka: 3 minit tauka kurang. Ninting minggu, pengudah lagu enggau sampi pemuka, chairman Gempuru Pengidup enggau Pengawa Kristian deka madahka tusun program, nyengkaum nyebut siti tanya ari Keretas Saut Gempuru Pengidup enggau Pengawa Kristian (lma).

 3. Reta Ari Bup Kudus:

  • Cheramah: 10 minit. Tajuk enggau langkar dua tauka tiga iti buah pekara bisi disediaka dalam Bup Kereja Pengidup enggau Pengawa Kristian. Cheramah tu deka diberi ngagai seiku tuai gempuru tauka seiku penulung gempuru ke dikemendarka. Lebuh betukar ngagai bup baru dalam Bup Kudus ke dibacha ninting minggu, siti video deka dimainka kena madahka pasal bup nya. Pencheramah ulih madahka kaul entara video enggau tema Bup Kudus. Taja pia, iya patut nentuka diri ulih ngenataika buah pekara bukai ke bisi ba bup kereja. Pia mega, enti bisi chukup awak, iya patut ngena gambar ba bup kereja enggau poin ari Bup Kudus kena nerangka utai ke deka dikerandauka ba begian nya.

  • Ngulihka Penemu Bup Kudus ti Berega: 8 minit. Tu begian tanya enggau saut ke enda begunaka jaku pemuka tauka jaku penutup. Begian tu deka diiring seiku tuai gempuru  tauka penulung gempuru ke dikemendarka. Iya ulih magi awak ke deka dikena lebuh berandauka empat iti buah pekara nitihka utai ke diguna ba eklisia. Taja pia, iya patut nanya semua tanya nya. Iya mega ulih milih sekalika semua ayat ba tanya 1 enggau 2 patut dibacha. Orang ke dikangau patut meri saut dalam 30 sikin tauka kurang.

  • Macha Bup Kudus: 4 minit tauka kurang. Begian tu diberi ngagai seiku menyadi Kristian lelaki. Pemelajar dipinta macha ayat ke udah diberi, tang enda ibuh meri jaku pemuka enggau jaku penutup. Chairman gempuru gaga ati deka nulung pemelajar macha enggau betul, ulih dimeretika, lanchar, ditekanka enggau betul, tiun ti ngena, ngetu ba endur ti betul, sereta enggau chara ti ukai digaga-gaga.

  4. Ngemanahka Agi Chara Kitai Nginjil: 15 minit tauka kurang. Begian tu digaga kena meri peluang ngagai semua belatihka chara sida nginjil lalu ngemanahka agi chara sida nginjil enggau ngajar. Penginjil patut ngena chunto ari begian chara ke ulih dikena berandau ba lambar 1 Bup Kereja Pengidup enggau Pengawa Kristian lebuh ngaga keterubah datai enggau datai ngabas. Sida ulih milih sekalika deka ngena litaricha tauka video ari Perengka kena Ngajar. Kekadang, Bup Kereja Pengidup enggau Pengawa Kristian engka nyediaka iring ke silik agi kena penginjil ngenataika begian sida. Penginjil enda ibuh ngena penerang bukai ketegal deka ngena awak ke diberi. Sekeda begian ke disediaka enggau manah ulih tembu seminit tauka kurang ari nya. Tuai gempuru mega ulih enggau ba begian tu.

  • Video Chara ke Ulih Dikena Berandau: Video chara ke ulih dikena berandau deka dimainka lalu dikerandauka ninting minggu. Video tu deka mandangka chara ngaga keterubah datai, datai ngabas keterubah kali enggau datai ngabas kali kedua. Begian tu deka dikenataika chairman Gempuru Pengidup enggau Pengawa Kristian.

  • Keterubah Datai: Tu begian pemelajar ke ulih diberi ngagai seiku menyadi Kristian lelaki tauka indu. Penulung iya patut seiku ari sida sebilik tauka sama penempa. Sida ulih duduk tauka bediri. Penginjil patut ngena jaku tabi ke ngena ba endur nya. Randau tu patut sama enggau chara ke ulih dikena berandau.

  • Datai Ngabas Keterubah Kali: Tu begian pemelajar ke ulih diberi ngagai seiku menyadi Kristian lelaki tauka indu. Penulung iya patut sama penempa. (km 5/97 lamb. 2) Penginjil enggau penulung iya ulih duduk tauka bediri. Penginjil patut nunjukka utai ti patut disebut lebuh ngaga datai ngabas ngagai orang ke bisi minat maya iya ngaga keterubah datai. Iya patut ngena chunto ari chara ke ulih dikena berandau ba Bup Kereja Pengidup enggau Pengawa Kristian lebuh ngaga begian tu.

  • Datai Ngabas Kali Kedua: Tu begian pemelajar ke ulih diberi ngagai seiku menyadi Kristian lelaki tauka indu. Penulung iya patut sama penempa. (km 5/97 lamb. 2) Penginjil enggau penulung iya ulih duduk tauka bediri. Penginjil patut nunjukka utai ti patut disebut lebuh ngaga datai ngabas ngagai orang ke bisi minat maya iya ngaga datai ngabas kali keterubah. Iya patut ngena chunto ari chara ke ulih dikena berandau ba Bup Kereja Pengidup enggau Pengawa Kristian lebuh ngaga begian tu.

  • Belajarka Bup Kudus: Tu begian pemelajar ke ulih diberi ngagai seiku menyadi Kristian lelaki tauka indu. Penulung iya patut sama penempa. (km 5/97 lamb. 2) Pemelajar enggau penulung iya ulih duduk tauka bediri. Begian tu patut nunjukka lakun pasal pengawa belajarka Bup Kudus ke benung dipejalaika. Enda ibuh ngena jaku pemuka tauka jaku penutup enti poin ti dipelajar pemelajar nadai kaul enggau nya. Pemelajar ulih milih macha semua tauka sekeda genteran lebuh begian tu dikenataika. Chara ngajar ti manah patut dipandangka.

  •   Cheramah: Tu begian pemelajar ke ulih diberi ngagai seiku menyadi Kristian lelaki.

  5. Pengidup Kristian: Pengudah lagu pemuka, 15 minit udah nya, deka bisi siti tauka dua iti begian ke disediaka kena nulung bala ke datai nitihka Jaku Petara. Enti nadai dipadah, begian tu diberi ngagai seiku tuai gempuru tauka seiku penulung gempuru ke dikemendarka. Tang, maya begian utai ti diguna ba eklisia, semina tuai gempuru aja ulih diberi pengawa nya.

  • Gempuru Belajarka Bup Kudus: 30 minit. Tu patut diberi ngagai tuai gempuru ti dikemendarka. (Eklisia ke enda chukup tuai gempuru ulih mega ngena penulung gempuru ti dikemendarka.) Raban tuai gempuru patut milih sapa ke ulih megai begian Gempuru Belajarka Bup Kudus. Menyadi Kristian lelaki ke dipilih patut ngenataika begian tu enggau manah ngambika pengawa belajar tu nitihka jam ti udah ditetapka, ngemeratka ayat kunchi, lalu nulung semua belematika utai ke ulih dipelajar sida. Menyadi Kristian lelaki ke ngiring begian tu deka bulih jaku lalau ti beguna lebuh macha iring pasal chara ngiring Belajarka Menara Jaga. Enti ulih, menyadi Kristian lelaki ke ngiring sereta ke macha patut betukar ninting minggu. Enti chairman Gempuru Pengidup enggau Pengawa Kristian ngasuh begian tu dipandakka, menyadi ke ngenataika begian tu patut mutuska baka ni deka mandakka begian tu. Iya engka ulih milih enda macha sekeda genteran.

  6. Jaku Penutup: 3 minit tauka kurang. Chairman Gempuru Pengidup enggau Pengawa Kristian deka ngelansa baru utai ke udah dikerandauka ba gempuru nya, lalu iya mega nyebut utai ti deka dikerandauka ba minggu ti deka datai. Iya patut madahka poin ke bisi ba Keretas Saut Gempuru Pengidup enggau Pengawa Kristian (lma). Iya ulih nyebut pasal tanya ke deka dikerandauka ba minggu ti deka datai, ngambika bala menyadi Kristian ulih berunding dulu ke tanya nya. Enti agi bisi awak, iya ulih nyebut nama pemelajar ke bisi begian ba minggu ti deka datai. Enti ulih, nama-nama jaku gerah tauka surat ke patut dibacha ke gempuru deka dibacha chairman ba jaku penutup iya. Penerang baka atur pengawa nginjil sereta jadual pemeresi enda patut dipadah ba pentas tang patut dipandangka ba papan penerang. Enti bisi jaku gerah tauka surat enda ulih dibacha dalam timpuh 3 minit tu, chairman patut minta menyadi ke megai begian Pengidup Kristian ngemandakka agi begian sida. (Peda genteran  5 enggau  9.) Gempuru deka ditutup ngena lagu enggau sampi.

 7. Ngemanahka Agi Chara Macha enggau Ngajar: Berengkah ari minggu kena 7 Januari 2019, chairman Gempuru Pengidup enggau Pengawa Kristian patut ngena brosur Ngajar lebuh meri puji sereta jaku lalau. Tiap iku pemelajar patut ngaga poin ti dipelajar ke ayan ba ujung begian pemelajar dalam Bup Kereja Pengidup enggau Pengawa Kristian. Ba minggu keterubah tiap-tiap bulan, chairman Gempuru Pengidup enggau Pengawa Kristian deka berandauka siti poin ti dipelajar ari brosur Ngajar enggau bala ke datai. Ba begian “Tulis Pemansang Ke Udah Digaga Nuan” dalam brosur nya sigi digaga ke pemelajar, lalu chairman enda nulis utai ba begian nya.

  8. Jaku Lalau: Pengudah genap iku pemelajar ngenataika begian sida, chairman Gempuru Pengidup enggau Pengawa Kristian bisi kira-kira seminit kena muji sereta meri jaku lalau nitihka brosur Ngajar. Lebuh chairman madahka begian pemelajar, iya enda ibuh madahka poin ti dipelajar ke deka dikereja pemelajar nya. Taja pia, pengudah begian pemelajar nya abis, sereta pengudah meri jaku puji, chairman ulih madahka poin ti dipelajar pemelajar nya, lalu madahka kebuah pemelajar nya ngereja poin ti dipelajar enggau manah tauka nerangka kebuah pemelajar nya patut ngemeratka poin ti dipelajar nya. Nitihka utai ti patut diguna tiap iku pemelajar, chairman ulih meri lalau ti meransang nitihka brosur Ngajar tauka bup Ministry School. Jaku  lalau nya ulih dipadah maya iya kediri aja pengudah gempuru tauka ba maya ti bukai. Jaku lalau nya ulih bekaul enggau poin ti dipelajar ke dikereja tauka poin ti dipelajar ke bukai.—Peda  genteran 13 enggau  16 kena nemu penerang bukai pasal tanggung pengawa tuai ti nyaga Gempuru Pengidup enggau Pengawa Kristian sereta tanggung pengawa penyaup meri jaku lalau.

    9. Awak: Nadai begian patut ngelui awak ke udah diberi, tu nyengkaum begian ari chairman Gempuru Pengidup enggau Pengawa Kristian. Begian pemelajar diketuka enggau chara ti manah enti udah chukup jam. Enti begian bukai ba gempuru bisi ngelui jam, penyaup meri jaku lalau ulih meri jaku lalau maya kediri aja ngagai menyadi nya. Pengelama semua gempuru tu, nyengkaum lagu enggau sampi, iya nya 1 jam 45 minit.

 10. Penatai Tuai ti Ngabas: Lebuh eklisia dilawa tuai ti ngabas, program patut terus dipejalai nitihka Bup Kereja Pengidup enggau Pengawa Kristian, enggau sekeda ubah: Begian Gempuru Belajarka Bup Kudus ba Pengidup Kristian deka diganti enggau cheramah 30 minit ari tuai ti ngabas. Sebedau cheramah tuai ti ngabas, chairman Gempuru Pengidup enggau Pengawa Kristian deka ngelansa program enda lama aja, nyebut program ba minggu ti deka datai, ngenataika jaku gerah ke patut aja, macha surat ke beguna aja, lalu udah nya ngelaluka penatai tuai ti ngabas. Pengudah cheramah, tuai ti ngabas deka nutup gempuru ngena lagu ke dipilih iya. Kelas tambah enda patut dipejalaika ba minggu penatai tuai ti ngabas. Raban gempuru ke ngena bansa jaku bukai ulih begempuru taja pan nya minggu tuai ti ngabas ngelawa eklisia ke megai sida. Tang, raban tu patut enggau eklisia ke megai sida lebuh cheramah tuai ti ngabas.

 11. Minggu Gempuru Besai Sehari tauka Konvensyen: Ba minggu gempuru besai, nadai gempuru deka diatur. Semua utai ke dikerandauka ba gempuru dalam minggu nya patut dipelajarka kediri empu tauka enggau diri sebilik.

 12. Minggu Ngingatka Pemati Jesus: Enti hari Ngingatka Pemati Jesus nya ba tengan minggu, Gempuru Pengidup enggau Pengawa Kristian enda ibuh dipejalaika. Tang gempuru sebedau nginjil patut dipejalaika ba hari Ngingatka Pemati Jesus.

  13. Tuai ti Nyaga Gempuru Pengidup enggau Pengawa Kristian: Seiku tuai gempuru ke dipilih raban tuai gempuru deka nyadi tuai ti nyaga Gempuru Pengidup enggau Pengawa Kristian. Iya betanggungjawap nentuka gempuru tu diatur enggau manah sereta dipejalai nitihka iring ke udah disediaka ditu. Iya patut senang berandau enggau penyaup meri jaku lalau. Sepengudah eklisia nerima Bup Kereja Pengidup enggau Pengawa Kristian, tuai ti nyaga Gempuru Pengidup enggau Pengawa Kristian deka meri pemelajar begian sida ke bisi dalam bup kereja nya. (Peda  genteran 4.) Tiap iti begian pemelajar, nyengkaum poin ti dipelajar pemelajar patut diberi kira-kira tiga minggu sebedau begian nya, lalu tu diberi ngena pom (S-89), Begian Gempuru Pengidup enggau Pengawa Kristian Kitai.

 14. Chairman Gempuru Pengidup enggau Pengawa Kristian: Ninting minggu, seiku tuai gempuru deka nyadi chairman ba Gempuru Pengidup enggau Pengawa Kristian. (Eklisia ke enda chukup tuai gempuru ulih mega ngena penulung gempuru ti dikemendarka.) Iya betanggungjawap nyediaka jaku pemuka enggau jaku penutup sereta berandauka video ba begian chara ke ulih dikena berandau, nyengkaum video ke mandangka poin baru ti dipelajarka ari brosur Ngajar. Pia mega, iya deka madahka dulu semua begian ke bisi maya nya, lalu bepanggai enggau penyampau tuai gempuru ke bisi, iya engka megai begian ke bukai ba gempuru maya nya. Komen ke diberi entara tiap iti begian ba gempuru patut pandak. Raban tuai gempuru patut nentuka  ni bagi tuai gempuru ke ulih megai pengawa tu. Tuai gempuru ti ulih megai pengawa tu deka besilih nyadi chairman. Bepanggai ba endur siti-siti gempuru, tuai ti nyaga Gempuru Pengidup enggau Pengawa Kristian ulih dipilih suah agi nyadi chairman ari tuai gempuru ke bukai. Enti tuai gempuru nya ulih ngiring Gempuru Belajarka Bup Kudus, iya mega ulih dipilih nyadi chairman ba gempuru. Taja pia, kingatka, tuai gempuru ke nyadi chairman patut meri jaku puji sereta jaku lalau ke ulih meransang bala penginjil ke megai begian pemelajar. Chairman mega betanggungjawap nentuka gempuru abis nitihka jam ti patut. (Peda  genteran 6 enggau  9.) Enti chairman deka sereta pentas chukup pemesai, siti mikrofon bediri ulih disediaka ngambika seraya chairman madahka siti-siti begian, menyadi ke seiku da agi ulih nyediaka diri ba mikrofon pencheramah. Pia mega, chairman ulih milih duduk ba pentas lebuh pemelajar ngenataika begian Macha Bup Kudus enggau Ngemanahka Agi Chara Kitai Nginjil. Tu ulih nyeliahka jam ari dibasau.

 15. Tuai ti Ngatur Tuai Gempuru: Kelimpah ari begian pemelajar, tuai ti ngatur tuai gempuru deka magi pengawa ke semua begian bukai ba gempuru. Tu nyengkaum nyediaka jadual sapa ke nyadi chairman ninting minggu, iya nya ari bala tuai gempuru ke udah dipilih raban tuai gempuru. Enggau kereja sama ari tuai ti nyaga Gempuru Pengidup enggau Pengawa Kristian, tuai ti ngatur tuai gempuru patut nentuka jadual pengawa ke gempuru dilekatka ba papan penerang.

  16. Penyaup Meri Jaku Lalau: Enti ulih, pilih meh seiku tuai gempuru ke lama udah nyadi pencheramah megai tanggungjawap tu. Penyaup meri jaku lalau betanggungjawap meri jaku lalau ngagai bala tuai gempuru enggau penulung gempuru pasal semua pengawa ke dikereja sida, nyengkaum begian ba Gempuru Pengidup enggau Pengawa Kristian, cheramah ke bala mayuh, chara ngiring tauka macha maya belajarka Menara Jaga sereta maya Gempuru Belajarka Bup Kudus. Jaku lalau tu semina diberi maya kediri sereta ba maya ti patut aja. (Peda  genteran 9.) Enti bisi beberapa iku bala tuai gempuru ke landik ngajar sereta landik meri cheramah, sida tau betukar megai tanggungjawap tu ninting taun. Penyaup meri jaku lalau enda ibuh meri jaku lalau tiap kali tuai tauka penulung gempuru ngaga pengawa sida.

 17. Kelas Tambah: Bepanggai ba penyampau pemelajar, eklisia ulih ngaga kelas tambah enti begunaka iya. Tiap iti kelas tambah patut bisi pemeri jaku lalau ke layak, enti ulih seiku tuai gempuru. Enti enda, penulung gempuru ti dikemendarka mega tau megai pengawa tu. Raban tuai gempuru patut mutuska sapa ke ulih megai pengawa tu, lalu berunding sekalika orang ti ngiring kelas tu patut betukar tauka enda. Pemeri jaku lalau patut nitihka iring ke dipadah ba  genteran 8. Enti kelas tambah bisi digaga, bala pemelajar patut diasuh mindah ngagai kelas tambah, pengudah Ngulihka Penemu Bup Kudus ti Berega, iya nya dalam begian Reta Ari Bup Kudus. Sida patut begulai baru enggau bala ke bukai pengudah begian Ngemanahka Agi Chara Kitai Nginjil. Enti ulih, lebuh video chara ke ulih dikena berandau dikerandauka, pemelajar ke enggau kelas tambah tu ulih meda tauka ninga randau nya ari endur kelas tambah. Enti enda, pemeri jaku lalau kelas tu ulih mandangka video ngena perengka elektronik.

 18. Video: Sekeda video ke bekaul enggau gempuru tu deka disediaka. Video ke dikena ba gempuru tengan minggu deka disediaka ba aplikasi JW Library lalu ulih dibuka ngena mayuh macham perengka elektronik. Kekadang, video chara ke ulih dikena berandau, ke udah dimainka maya Gempuru Pengidup enggau Pengawa Kristian mega ulih dimainka baru ba gempuru sebedau nginjil.