Terus ngagai penerang

Saksi-Saksi Jehovah

Pilih bansa jaku Iban

Ni Penyampau Saksi-Saksi Jehovah ba Serata Dunya?

Ni Penyampau Saksi-Saksi Jehovah ba Serata Dunya?

Riput Taun Nginjil * 2018

Penyampau Saksi-Saksi Jehovah ba serata dunya

8,579,909

Eklisia

119,954

Menua sereta endur Saksi-Saksi Jehovah nginjil

240

Baka ni penyampau nya diintung?

Semina sida ti ransing nusui berita manah pasal Perintah Petara ninting bulan nya dikumbai Saksi-Saksi Jehovah. (Matthew 24:14) Tu nyengkaum sida ti udah dibaptisa nyadi seiku ari Saksi-Saksi Jehovah, pia mega sida ti bedau dibaptisa tang udah enggau ba pengawa nginjil.

Kati pengawa tu bebayar?

Nadai. Tu siti peluang ti amat istimewa dalam gerempung kami, nadai kaul enggau pemeri ke diberi. (Kereja Rasul 8:18-20) Iya ke amat, mayuh ari nama orang ke meri nya enda ditemu. Tiap iku Saksi-Saksi Jehovah gaga ati meri awak, pengering, enggau pemisi, kena nyukung pengawa kami ba serata dunya nitihka utai ti ulih dikereja seseiku orang.—2 Korint 9:7.

Baka ni penyampau Saksi ke ransing nginjil nya ditemu?

Ninting bulan, semua Saksi meri riput nginjil sida ngagai eklisia ba endur nya empu. Sida ngereja nya enggau sukarela.

Semua riput ari eklisia nya deka diintung lalu penyampau nya deka dianjung ngagai pampang opis ke semak endur nya. Udah nya, pampang opis nganjung penyampau semua Saksi ngarika menua tauka endur nya ngagai indu opis.

Ba ujung taun riput nginjil *, penyampau ti pemadu mayuh Saksi ngarika tiap iti menua tauka endur ulih ditemu. Udah nya, semua penyampau nya ditambah enggau tiap iti menua bukai ba serata dunya. Riput ti silik ari tiap iti menua deka ditepu dalam laman web kami ba begian “Ba Serata Dunya.“ Semua riput tu meransang kami, baka orang Kristian abad kesatu ti diperansang lebuh ninga pasal riput ke baka tu.—Kereja Rasul 2:41; 4:4; 15:3.

Kati orang ke enda enggau pengawa nginjil dikumbai Saksi?

Taja pan sida ukai Saksi, tang sida dikenaluka ngagai eklisia. Mayuh ari sida datai Ngingatka Pemati Jesus ninting taun. Penyampau sida ulih dipeda ari bida penyampau semua ke datai maya nya sereta enggau bala Saksi. Ba taun 2018, orang ke datai ngagai malam Ngingatka Pemati Jesus nya 20,329,317 iku.

Bisi sekeda nya bedau datai begempuru tang sida agi bulih penguntung ari belajarka Bup Kudus engga pechuma. Ba taun 2018, urung 10,079,709 iku pemelajar Bup Kudus digaga tiap bulan. Tiap iti pemelajar nya engka enggau seiku tauka lebih.

Nama kebuah penyampau Saksi ke dipadahka bala perintah enda sama enggau penyampau Saksi ke dipadahka kami?

Perintah deka ngaga siti banci pasal pengarap enggau chara nanya sida nama pengarap ke dititihka sida. Chunto, U.S. Census Bureau (Biro Pembancian A.S.) bejalaika pansik kena nemu “sekalika orang ti dibanci nya nitihka sesiti pengarap tauka enda.” Biro nya madahka, “asil ari pansik nya, kemayuh agi ari sida mina ngumbai diri bisi pengarap tang ukai amat-amat nitihka pengarap nya.” Kami enda ngira semua orang ke ngaku diri empu Saksi-Saksi Jehovah. Kami mina ngira sapa ke enggau pengawa nginjil sereta meri riput nginjil sida.

^ per. 2 Riput nginjil deka berengkah ari 1 September nyentukka 31 Ogos taun pengudah nya. Chunto, riput nginjil taun 2015 berengkah 1 September 2014 nyentukka ngagai 31 Ogos 2015.

^ per. 16 Riput nginjil deka berengkah ari 1 September nyentukka 31 Ogos taun pengudah nya. Chunto, riput nginjil taun 2015 berengkah 1 September 2014 nyentukka ngagai 31 Ogos 2015.