Terus ngagai penerang

Terus ngagai laman kedua

Saksi-Saksi Jehovah

Iban

Baka ni Aku Ulih Nyadi Seiku Ari Saksi-Saksi Jehovah?

Baka ni Aku Ulih Nyadi Seiku Ari Saksi-Saksi Jehovah?

Chara ngambika ulih nyadi seiku ari Saksi-Saksi Jehovah bisi diterangka Jesus ba bup Matthew 28:19, 20. Ayat tu nerangka nama patut digaga ngambika ulih nyadi murid Kristus, ke nyengkaum bejaku, tauka besaksika pasal Jehovah.

Chara 1: Belajarka utai ke diajar Bup Kudus. Jesus ngasuh bala murid iya “gaga sida nyadi murid…, lalu ajar sida.” (Matthew 28:19, 20) Leka jaku “murid” reti iya “seiku pelajar.” Bup Kudus, kelebih agi utai ke diajar Jesus Kristus ngembuan penerang ngambika nuan bisi pengidup ti lantang. (2 Timoti 3:16, 17) Kami gaga ati nulung nuan belajarka nama utai ke diajar Bup Kudus ngena program belajarka Bup Kudus enggau pechuma.Matthew 10:7, 8; 1 Tesalonika 2:13.

Chara 2: Ngereja utai ke dipelajar nuan. Jesus madah sida ke belajar patut “ngasika semua pesan ti udah diberi [iya].” (Matthew 28:20) Reti iya, nuan ukai semina belajarka Bup Kudus ngambika nambah penemu, tang nuan patut ngaga ubah ba runding enggau ulah nuan. (Kereja Rasul 10:42; Epesus 4:22-29; Hebrew 10:24, 25) Sida ke ngasi pesan Jesus diperansang ngaga pemutus kediri empu ngambika nyerahka pengidup sida ngagai Petara Jehovah.Matthew 16:24.

Chara 3: Dibaptisa. (Matthew 28:19) Ba Bup Kudus, baptisa disamaka enggau dikuburka. (Banding Rome 6:2-4.) Tu ngambarka baka mati ba gaya pengidup ke lama lalu idup nyadi mensia ti baru. Baptisa nuan, nunjukka ngagai orang mayuh nuan udah ngereja dua chara keterubah ti dipadahka Jesus sereta minta Petara meri ati ti beresi.—Hebrew 9:14; 1 Peter 3:21.

Baka ni aku nemu aku udah sedia deka dibaptisa?

Betemu enggau tuai gempuru. Sida deka berandau enggau nuan kena nentuka nuan nemu utai ke diguna, ngereja utai ke dipelajarka nuan, lalu udah nyerahka diri nuan ngagai Petara ketegal pemutus diri empu.—Kereja Rasul 20:28; 1 Peter 5:1-3.

Kati chara tu mega ulih dikena ba anak Saksi?

Au. Kami ngemesaika anak “dalam disiplin enggau ajar Tuhan,” baka ke dipesan Bup Kudus. (Epesus 6:4) Taja pia, lebuh sida mansang besai, sida patut ngaga pemutus kediri empu belajar, nerima, sereta ngereja nama utai ke diajar Bup Kudus sebedau sida ulih dibaptisa. (Rome 12:2) Kelebih agi, tiap iku orang patut ngaga pemutus kediri empu pasal sembah sida.—Rome 14:12; Galatia 6:5.