Raban ti ngiring nya siti raban ti mit orang Kristian ke bepenemu-dalam pasal Bup Kudus, lalu sida deka nyediaka iring ngagai Saksi-Saksi Jehovah ba serata dunya. Sekeda pengawa berat ke dikemeratka sida nya:

•   Nyediaka litaricha Bup Kudus, utai ke dikena maya begempuru, enggau semua perengka ke dikena bala Saksi-Saksi Jehovah sekula.—Luke 12:42.

•   Ngatur pengawa Saksi-Saksi Jehovah ba serata dunya baka ngemataka pengawa nginjil sereta chara ngatur reta enggau duit pemeri.

 Raban ti ngiring ngena chara ke kala dikena ba abad keterubah. Ba maya nya, “rasul enggau tuai eklisia” megai tanggung pengawa ngaga pemutus ke eklisia. (Surat Kereja Rasul 15:2) Baka bala lelaki ke tetap ati tu, bala Raban ti Ngiring ukai tuai ba gerempung kami. Sida bebendar ngiga iring nitihka ajar Bup Kudus sereta bebasaka Jesus ti udah dipilih Petara Jehovah nyadi Kepala Eklisia.—1 Korint 11:3; Epesus 5:23.

Sapa ke nyadi Raban ti Ngiring?

 Bala Raban ti Ngiring nya Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, enggau Jeffrey Winder. Semua sida gawa ba indu opis di Warwick, New York, Amerika Serikat.

Baka ni Raban ti Ngiring diatur?

 Raban ti Ngiring udah nubuhka enam iti tanggung pengawa kena ngemataka mayuh bengkah pengawa ke dipejalaika kami. Tiap iku Raban ti Ngiring megai siti tauka lebih ari tanggung pengawa.

•   Komiti Ngatur: Matau pasal undang-undang, ngaga atur maya pengerusak alam nyadi, maya seiku ari menyadi ba eklisia diperinsa ketegal pengarap, enggau penusah bukai ke bekaul enggau Saksi-Saksi Jehovah.

•   Komiti Pekereja: Matau atur ngagai pekereja ba Betel..

•   Komiti Pengeluar: Matau pengawa nyelak enggau nganjung litaricha Bup Kudus, pengawa nirika bengunan endur begempuru, opis penyalin, enggau pampang opis.

•   Komiti Nginjil: Matau pengawa nginjil pasal ‘Perintah Petara deka ditusui.’—Matthew 24:14.

•   Komiti Ngajar: Matau pengawa nyediaka utai ti diguna ba pengarap kena gempuru enggau sekula, sereta program audio video.

•   Komiti Pengawa Nulis: Matau pengawa nyelak tauka utai ke dipandangka ba lawan web kami, enggau ngemataka pengawa nyalin.

 Kelimpah ari semua tanggung pengawa tu, Raban ti Ngiring mega bisi aum ninting minggu berandauka utai ti diguna gerempung. Ba aum, sida deka berandauka ayat Bup Kudus nitihka iring roh kudus Petara, ngambi sida ulih beserakup ngaga pemutus ti betul.—Surat Kereja Rasul 15:25.

Sapa penulung Raban ti Ngiring?

 Sida nya orang Kristian ti ulih dipechaya. Sida gawa di baruh iring Raban ti Ngiring. (1 Korint 4:2) Sida bisi pengelandik sereta peneleba pasal tanggung pengawa ke dipatau. Taja pan ukai sida ke ngaga pemutus, tang sida pan ulih meri penemu sereta penerang. Sida mega nulung ngamatka pemutus ti udah digaga, lalu matau tiap iti pengawa ke patut dipejalaika. Sida mega engka diasuh Raban ti Ngiring ngabas bala menyadi kami ngagai mayuh endur, lalu ngenataika begian baka ba aum ninting taun, tauka maya nyerahka sijil Gilead.