Terus ngagai penerang

Nota-Nota ba Baruh Mesin Basu

Nota-Nota ba Baruh Mesin Basu

Pengudah dibaptisa nyadi seiku ari Saksi-Saksi Jehovah, Zarina pulai ari menua Rusia ngagai kampung iya ba Asia Tengah. Iya keran deka ngemesaika dua iku anak indu iya nitihka pengarap iya. Tang, ketegal nadai mayuh duit, iya bekunsi siti apartmen satu bilik enggau apai indai sereta menyadi lelaki iya ke biak seduai bini iya. Apai indai Zarina nagang iya ari ngajar anak-anak iya pasal Bup Kudus. Seduai mega ngasuh dua iku anak indu Zarina ngambika enda bejaku enggau iya pasal Bup Kudus.

Zarina bebendar berunding pasal chara iya deka nulung dua iku anak indu iya belajar pasal Jehovah. (Jaku Dalam 1:8) Nya alai, iya bebendar besampi ngagai Jehovah, minta iring enggau penemu-dalam. Udah nya, iya ngereja utai ke sejalai enggau sampi iya. Zarina suah bejalai enggau dua iku anak iya lalu bejaku enggau sida pasal pemanah utai ti ditempa. Pejalai ke enda jauh tu udah nulung anak iya ngembuan minat ngagai Petara ke nempa semua utai.

Pengudah nya, Zarina berundingka siti chara ngambika ulih ngajar dua iku anak indu iya mayuh agi ari bup Nama Utai ti Bendar Diajar Bup Kudus? * Iya nulis genteran enggau tanya nya ba mayuh lembar keretas. Iya mega nambahka sekeda ayat-ayat bukai kena nulung dua iku anak indu iya mereti agi utai ke dipelajar. Udah nya, iya ngelalaika keretas nya enggau siti pinsil ba baruh mesin basu dalam bilik mandi. Lebuh dua iku anak indu iya ba dalam bilik mandi, seduai macha genteran nya lalu nuliska saut.

Nengah chara nya, Zarina ulih belajarka dua iti pelajar ari bup Ajar Bup Kudus ngagai dua iku anak indu iya sebedau sida tetemuka endur bukai alai sida ulih diau. Ba endur ti baru nya, Zarina nadai penanggul kena ngajar anak-anak iya. Ba bulan Oktober 2016, dua iku anak iya dibaptisa. Seduai gaga ati laban indai seduai ngena penemu-dalam enggau pemintar ngambika ulih ngajar sida penemu ti bendar pasal Petara.