Terus ngagai penerang

Terus ngagai laman kedua

Saksi-Saksi Jehovah

Iban

Mantu Orang ke Dijil

Mantu Orang ke Dijil

Ninting hari, orang jil di Amerika Serikat, bisi nulis mayuh surat ngagai opis Saksi-Saksi Jehovah, minta bantu rohani.

Kami nyaut peminta ke baka nya, ngatur bala menyadi Kristian ba gempuru ngambika ngelawa sereta belajarka Bup Kudus enggau orang ke ba rumah jil, ba sepital perintah, ba rumah jil ke nembiak, sereta ba endur ngaduka pendiau orang ke gian dadah.

Ba sekeda rumah jil, bala menyadi Kristian ngatur pengawa begempuru enggau tetap. Ngambika chunto, ba siti rumah jil, 32 iku orang datai mendingka cheramah umum ke dikenatai ba dua iti laman ba rumah jil.

Asil iya amat manah. Seiku orang ke dijil ba nengeri Indiana, ke dijil seumur nyawa ketegal nyadi pemunuh katagori-satu, ngaga mayuh ubah ti manah ba personaliti, lalu udah dibaptisa nyadi seiku ari Saksi-Saksi Jehovah.

Seiku Saksi ke belajar enggau seiku agi orang jil ba rumah jil di California, madahka: “Aku nemu sapa iya suba sereta pemansang ke udah digaga iya. Ubah ke digaga iya udah ngasuh iya ulih dibaptisa.

Mayuh orang jil udah nerima ajar Bup Kudus, taja pan sida nemu tu ulih ngasuh sida lenyau nyawa. Ngambika chunto, sekeda ari sida ke udah pansut ari gang patut diengkah Kediri tauka dipindah ngagai rumah jil ke bukai kena nyaga pengelikun sida.

Kuasa ari Bup Kudus ke ulih ngubah pengidup amat ngerinduka ati nyentukka bala pegawai rumah jil alit ati. Sekeda ari bala pegawai nya udah meri piagam enggau setipikit terima kasih ngagai bala Saksi ke pengawa manah ti dikereja sida kena mantu komuniti.