Aku ada kena taun 1941. Kami sebilik diau ba Virrat, Finland. Apai indai, mayuh ari kaban belayan aku, sereta madi lelaki enggau madi indu aku mega bengal. Kami ngena jaku bengal bisu enti deka berandau.

Belajarka Utai ti Ngalitka Ati ari Bup Kudus

 Ba sekula asrama aku, ke kira-kira 240 kilometer ari rumah, enda ngemendarka kami ngena jaku bengal bisu. Ba maya nya, sekula ke orang bengal ba Finland amat ngemeratka orang bejaku. Nyadi, kami dipejal belajarka chara orang bejaku sereta beratika kebut mulut orang. Enti cikgu tepedaka kami ngena jaku bengal bisu, sida ngambi pembaris tauka kayu ti alus malu jari kami enggau amat kuat, nyentukka jari kami kembai dalam beberapa hari.

 Pengudah abis sekula menengah, aku tama kolej pertanian. Apai indai aku bisi sebuah ladang, nyadi aku patut belajar pasal perladangan ngambika ulih megai pengawa tu dudi hari. Bisi sekali, maya aku datai ba rumah, aku meda Menara Jaga enggau Peratika! ba atas mija. Apai aku madah, majalah tu nerangka utai ti ngalitka ati ari Bup Kudus, lalu bisi sepasang laki bini datai belajarka Bup Kudus enggau apai indai aku. Sida ngena pen enggau keretas maya ka berandau enggau apai indai aku.

 Apai madahka aku, lebuh Perintah Petara merintah, dunya tu deka nyadi Paradais, lalu orang ke mati deka diidupka baru. Tang, ari ngelama tu aku diajar, orang ke mati deka niki ke serega. Ba runding aku, apai engka salah faham enggau utai ke diajar Saksi-Saksi Jehovah laban sida enda nemu ngena jaku bengal bisu.

 Maya laki bini nya datai ngabas apai indai aku, aku nanya sida pasal utai ke dipadahka apai. Sida madahka utai ke dipadahka apai aku nya betul. Sida nunjukka aku utai ke disebut Jesus pasal pengangkat ari mati ba John 5:28, 29. Sida mega nerangka baka ni Petara deka ngetuka semua penyai ba dunya tu, lalu orang ulih idup belama iya. Dunya tu mega deka penuh enggau pemaik sereta ngembuan pengerai ti sempurna.—Masmur 37:10, 11; Daniel 2:44; Pemandang 21:1-4.

 Aku deka nemu mayuh agi, nyadi aku pan berengkah belajarka Bup Kudus enggau siku Saksi ke benama Antero. Iya enda pandai ngena jaku bengal bisu, nyadi aku nyaut ba bup ke dikena aku belajar lalu nuliska nya ba siti keretas. Udah nya, Antero macha lalu nulis tanya tauka komen tambah. Iya amat sabar ngajar aku ngena chara tu pengelama dua jam tiap minggu.

 Kena taun 1960, aku enggau konvensyen Saksi-Saksi Jehovah lalu program nya bisi disalin ngagai jaku bengal bisu. Mua ke lemai Hari Lima, bisi jaku gerah ke madahka, pengawa baptisa deka diatur ba hari siti. Nya alai, ba pagi Hari Enam, aku pan mai baju mandi sereta kain mandi aku, lalu dibaptisa! a Enda lama udah nya, apai indai enggau dua iku madi aku pan dibaptisa.

Bekunsika Pemendar ari Bup Kudus

 Aku deka bekunsika utai ke dipelajarka aku enggau orang bengal ke bukai. Chara pemadu manah kena narit ati sida nya, ngena jaku bengal bisu. Keterubah, aku enggau ransing nginjil ngagai orang ke bengal ba kawasan kampung aku empu.

 Enda lama udah nya, aku pindah ngagai Tampere, iya nya siti bandar ti besai. Ba dia aku ngiga orang ke bengal. Aku ngiga sida ari rumah ke rumah sereta nanya orang ke bempu rumah sekalika sida nemu sapa-sapa ke bengal. Aku pan berengkah ngajar Bup Kudus ngena chara tu, lalu dalam beberapa taun aja, kawasan Tampere bisi lebih ari 10 iku penginjil ke bengal.

 Kena taun 1965, aku betemu enggau siku menyadi indu ti bajik ke benama Maire. Kami kawin ba taun siti. Maire amat jampat belajarka jaku bengal bisu, lalu iya siku kaling pengidup ti amat setia, sereta bagas sepemanjai kami gawa ke Jehovah pengelama 50 taun.

 Dua taun pengudah kawin, kami bisi siku anak ke benama Marko. Anak kami ulih ninga. Ba rumah iya belajarka jaku Finland, enggau jaku bengal bisu Finland. Marko dibaptisa maya iya beumur 13 taun.

 Udah nya, majak mayuh orang baru enggau raban jaku bengal bisu ba Tampere. Nya alai, kena taun 1974, kami pindah ke bandar Turku. Ba dia nadai Saksi ke bengal. Sekali agi, kami ngiga orang ke bengal ari rumah ke rumah. Pengelama betaun-taun ba Turku, 12 iku orang pemelajar Bup Kudus aku udah dibaptisa.

Gawa ba Menua Baltik

 Kena taun 1987, Marko dikangauka gawa ba Bethel. Raban jaku bengal bisu kami ba Turku udah amat tegap, nyadi kami pan ngaga pelan deka pindah baru.

 Maya nya, kami ulih bibas nginjil ba Eropah Timur. Nya alai, kena Januari 1992, aku enggau siku menyadi lelaki ke bengal ngagai Tallinn, Estonia.

 Kami ulih betemu enggau siku menyadi indu ke bisi siku abang ke bengal. Taja iya enda minat enggau pesan Perintah Petara, tang iya amat manah ati, lalu nulung kami ngiga mayuh orang ke bengal ba Estonia. Ba malam ke penudi kami ngabas, iya mai kami ngagai siti aum Persatuan Orang Pekak Estonia ba Tallinn. Kami datai tumu lalu ngengkahka majalah enggau bup dalam jaku Estonia enggau Rusia ba atas mija. Kami mujur nyadung lebih ari 100 iti bup enggau 200 iti majalah, sereta bulih nyauka 70 iti alamat. Berengkah ari malam nya meh kami belabuh ngerembaika Berita Manah ngena jaku bengal bisu ba Estonia!

 Enda lama udah nya, aku enggau Maire pan selalu datai ke Estonia lalu nginjil enggau tetap. Kami ngurangka jam ba kereja sekular kami, lalu gawa nyadi pengerintis. Kena taun 1995, kami pindah semak enggau Helsinki ngambika senang agi nepan feri ngagai Tallinn. Pengawa nginjil kami ba Estonia jauh manah agi ari ke disangka kami!

 Kami naka ulih ngajar orang Bup Kudus. Bisi 16 iku pemelajar kami ngaga pemansang nyentukka dibaptisa, nyengkaum dua iku diri menyadi indu ke buta enggau bengal. Maya aku ngajar sida Bup Kudus, aku megai jari sida. Tu dikumbai jaku bengal bisu ngena chara negu.

 Ngajar Bup Kudus ngagai orang ke bengal enda senang. Maya tu, litaricha jaku bengal bisu bedau bisi ba endur kami nginjil. Nyadi aku naka ulih ngena gambar ari litaricha kitai, lalu ngumpul nya nyadi siti bup ke begambar.

 Pampang opis Finland ngasuh aku ngelawa Latvia enggau Lithuania kena nemu nama utai ke ulih digaga kami, kena nulung orang ke ngena jaku bengal bisu ba menua Baltik tu. Beberapa kali kami ngabas menua tu, lalu nulung bala penginjil tempatan ngiga orang ke bengal. Nyadi, aku pan belajarka jaku bengal bisu Estonia, Latvia, enggau Lithuania, nyengkaum sekeda jaku bengal bisu Rusia, ke dikena orang Rusia ti bengal ke diau ba Baltik.

 Tang sayau, pengudah ngabas Estonia enggau menua bukai ba Baltik pengelama lapan taun, Maire kena penyakit Parkinson, lalu kami patut ngetu.

Atur Kena Mantu Orang Bengal

 Kena taun 1997, siti raban penyalin jaku bengal bisu ditumbuhka ba pampang opis Finland. Ketegal kami diau enda jauh ari tu, aku enggau Maire ulih nulung nyediaka litaricha dalam jaku bengal bisu. Nyentukka saritu, kekadang aku pan agi nulung ba pengawa tu. Aku gawa begulai enggau anak kami, Marko. Udah nya, iya enggau bini iya Kirsi nulung lalu ngelatih raban penyalin jaku bengal bisu ba menua bukai.

 Kelimpah ari nya, pampang opis mega ngatur kursus kena nulung penginjil ke ulih ninga belajarka jaku bengal bisu. Lebuh bisi kursus ke baka tu, mayuh agi orang ulih enggau raban sereta raban gempuru jaku bengal bisu, nyukung ba pengawa nginjil enggau gempuru, lalu bejalaika tanggungjawap ba gempuru.

Pengeran Aku ke Deka Nulung Enda Padam

 Kena taun 2004, aku enggau Maire nulung numbuhka Raban Gempuru Jaku Bengal Bisu Finland keterubah kali ba Helsinki. Dalam tiga taun, raban gempuru nya nyadi tegap lalu ngembuan mayuh pengerintis ti ransing.

 Sekali agi, kami ngaga pelan pindah ngagai endur ke begunaka mayuh bantu. Kena taun 2008, kami pindah semak enggau Tampere, lalu pulai baru ngagai raban jaku bengal bisu ke ditinggalka kami 34 taun suba. Setaun udah nya, raban jaku bengal bisu nya nyadi raban gempuru bengal bisu kedua ba Finland.

 Tang ba maya nya meh pengerai Maire majak enda manah. Aku nyaga iya nyentuk meh iya nadai kena taun 2016. Taja pan aku amat lelengauka Maire, aku seruran nganti maya aku begulai baru enggau iya ba dunya baru. Maya nya, nadai agi orang ke sakit.—Isaiah 33:24; Pemandang 21:4.

 Nyentukka diatu, pengeran aku ke deka bekunsika Berita Manah enggau orang ke bengal enda kala padam. Nya meh pengawa ke udah digaga aku 60 taun ke suba!