NAMA KEBUAH NYA BEGUNA Bisi orang madah, enti kitai datai tumu, nya ulih ngurangka stres.

Tu mega ulih ngemanahka nama kitai empu. Nama kebuah?

Tu nunjukka idup kitai teratur. Enti nuan datai tumu, orang ulih meda nuan ngatur pengidup enggau manah, lalu enda nejuka sebarang utai nagang nuan ngereja utai ke dikedekaka nuan.

Tu nunjukka nuan ulih dikearapka. Ketegal mayuh orang selalu bulaka semaya, enti kitai nguji ngamatka semaya, kitai tentu dikerinduka. Orang ke ulih dikearapka deka dipebasaka bala kaban sereta diri sebilik. Tuke sigi rinduka pekereja ti ulih datai tumu sereta nembuka pengawa. Kesuah iya, sida bulih gaji ti besai sereta ulih dikearapka.

NAMA AJAR BUP KUDUS Bisi sekeda ayat ti madahka pasal nitihka jam ti udah ditetapka.

Ngambika chunto, Bup Kudus madah: “Semua utai patut dikereja enggau menyana, sereta meruan atur magang.” (1 Korint 14:40) Enti dua iku orang udah besemaya deka betemu ba siti endur, seduai iya patut datai ba maya ti udah ditetapka nya. Bup Kudus mega madahka: “Semua utai ti nyadi di dunya ti endang nyadi ba maya ti diletak.” (Pengajar 3:1) Tu nyengkaum “maya betanam enggau maya ngetau.” (Pengajar 3:2) Orang ke bumai patut nanam benih ba maya ti betul ngambika bulih asil ti manah. Pandakka jaku, orang bumai ulih mujur laban sida nemu ni maya ke betul sida patut nanam.

Bup Kudus nerangka kebuah ti berat kitai patut enda bulaka semaya: Laban nya nunjukka kitai bebasaka orang bukai sereta ngumbai awak sida amat berega. (Pilipi 2:3, 4) Tang, orang ke selalu bulaka semaya baka ke ngenchuri awak orang bukai.

“Anang semina berundingka diri empu aja, tang berunding mega ke orang bukai.”—Pilipi 2:4.

NAMA AJAR BUP KUDUS Kitai diperansang ngaga pelan. (Jaku Dalam 21:5)

Enti nuan selalu datai laun, nya engka ketegal nuan kelalu mayuh pengawa. Nyadi, kurangka meh pengawa ti enda amat beguna. Gaga meh pelan ngagai tiap iti semaya ke udah digaga, lalu datai meh tumu. Tu amat beguna laban utai ti enda disadang engka nyadi, ngambika chunto, traffic jam tauka gaya hari ti enda manah.

Bup Kudus mega meransang kitai nemu tatak diri. (Jaku Dalam 11:2) Anang ngaga semaya ti tusah dikeamatka. Enti kelalu mayuh semaya, nya ngasuh nuan sereta orang bukai berasai asa sereta stres!

Nambahka nya, Bup Kudus mega ngasuh kitai ngena awak enggau badas. (Epesus 5:15, 16) Kemeratka utai ti beguna. (Pilipi 1:10) Ngambika chunto, maya nuan benung nganti bas tauka nganti orang bukai, kena meh awak nya macha tauka merambu pelan nuan.

“Bejimat lebuh nuan ngaga pelan, nya baru nuan deka bulih mayuh utai.”—Jaku Dalam 21:5.