Laki bini ke tetap ati deka ngumbai tikah sida baka simpul tali ti rat sereta tan belama iya. Ulah ke baka nya ngasuh seduai iya berasai likun laban seduai iya andal, kaling sida deka tetap ati, indah ba maya ti tusah.

Sekeda laki bini meruan begulai laban dipejal diri sebilik tauka masyarakat. Tang iya ke amat, penetap ati bepelasarka pengerindu sereta basa jauh manah agi.

PRINSIP BUP KUDUS: “Nya kebuah lelaki ninggalka apai indai iya, lalu begulai enggau bini iya, lalu seduai iya nyadi siku.”—Pemungkal 2:24.

“Enti nuan bisi penetap ati ba tikah, nuan enda jampat asa ati. Nuan deka jampat ngampun sereta minta ampun. Nuan deka ngumbai penanggul nya baka penguji, tang ukai garis penamat ba tikah.”—Micah.

Lebuh penguji datai, laki bini ke enda tetap ati deka berunding, “Kami enda ngam,” lalu deka berengkah ngiga jalai ngujungka tikah sida.

“Mayuh orang ke baru kawin berunding, sida ulih sarak enti tikah sida enda mujur. Runding ke baka tu nunjukka sida kurang penetap ati ari pun tikah.”—Jean.

UJI MEH DIRI

Lebuh benung belaya . . .

• Kati nuan nesal jadi enggau kaling nuan?

• Kati nuan angan-angan deka idup enggau orang bukai?

• Kati nuan nyebut jaku baka, “Aku deka ninggalka nuan” tauka “Aku deka ngiga orang bukai ke nemu beterima kasih ke aku”?

Enti nuan nyaut “au” ngagai tanya tadi, diatu meh maya iya negapka penetap ati nuan.

BERANDAU MEH ENGGAU KALING PENGIDUP NUAN

• Kati penetap ati kitai ba tikah majak kurang? Enti au, nama kebuah?

• Diatu, nama utai ulih digaga kitai kena negapka penetap ati?

TIP

• Giga meh peluang nulis nota cinta ngagai kaling nuan

• Ayanka penetap ati nuan: Simpan gambar kaling nuan ba mija alai nuan gawa tauka ba lumpit nuan

• Lebuh ba endur gawa tauka ba endur ti jauh, betalipun meh enggau kaling nuan ninting hari

PRINSIP BUP KUDUS: ‘Nadai orang tau nyeraraka utai ti udah ditampilka Petara.’—Matthew 19:6.