Udara ti kamah ulih ngachau utai idup ba bumi. Semina satu peratus aja ari penyampau mensia ba bumi ke ngembuan udara ti beresi, nitihka penerang ke dipadahka Gerempung Pengerai Entarabansa (WHO).

Udara ti kamah ulih ngasuh kitai tusah enseput, kanser paru-paru, penyakit kardiovaskular, sereta ulih ngujungka kira-kira 7,000,000 pemati ninting taun.

Bumi, bisi penau ti semula jadi ngambika udara kitai ulih mengkang beresi kena nyukung utai idup. Proses semula jadi tu ulih tan lama enti mensia mega bekerejasama nyaga pemeresi udara. Peratika sekeda chunto:

• Mayuh orang nemu, pun kayu ulih nyirut karbon dioksida. Tang mayuh orang enda sedar, pun kayu bakau ke bisi ba tepi pantai ulih nyirut karbon dioksida enggau manah agi. Pun kayu bakau ulih nyirut karbon dioksida 5 kali mayuh agi ari utan tropika.

• Nitihka pansik baru-baru tu, sekeda alga ti besai chunto iya baka kelp, ukai aja ulih nyimpan karbon dioksida, tang mega ulih muai iya ari atmosfera. Kelp ke baka daun tu, ngembuan pundi ke penuh enggau gas, nya kebuah kelp ulih melepung jauh. Maya kelp melepung jauh ari pantai, pundi nya ulih meletup, udah nya kelp ke penuh enggau karbon dioksida nya tenggelam jauh ke dalam tasik, lalu mengkang dalam tasik pengelama beratus taun.

• Bukti pasal atmosfera kitai ke ulih nyaga diri ari udara ti kamah nya maya COVID-19 nyadi. Kena taun 2020, maya bisi sekat, mayuh ari kilang sereta perengka pengangkut ba serata dunya enda mansutka udara ti kamah, lalu tu ngasuh keadaan udara maya nya kurang kamah. Nitihka 2020 World Air Quality Report, “lebih ari 80 peratus menua ke dipansik, ngembuan udara ti beresi agi enda lama pengudah atur sekat dipejalaika.”

Perintah majak meransang mayuh industri ngambika ulih ngurangka pengamah udara. Kelimpah ari nya, bala saintis mega terus ngiga idea ti baru kena ngurangka udara ti kamah. Ngambika chunto, sida tetemuka siti proses ngena chara mikrob ngubah utai ti kamah nyadi bahan ti enda betoksik. Nambahka nya, bala pakar pan meransang orang mayuh bejalai kaki tauka ngena basikal, ngambika sida ulih kurang agi ngena perengkah pengangkut ke ulih mansutka udara ti kamah sereta ngurangka ngena tenaga elektrik ba rumah.

Tang nya enda chukup. Tu ulih dipeda enggau terang ari riput kena taun 2022 ke dikeluarka gerempung entarabansa, nyengkaum Gerempung Pengerai Entarabansa (WHO) enggau World Bank.

Kena taun 2020, riput nya madahka, satu per tiga ari mensia ba bumi bepanggai ngagai bahan api sereta teknologi ke ulih ngamahka udara maya sida bepanduk. Sida enda mampu meli perengka bepanduk ke baru tauka ngena bahan api alternatif.

‘Petara Jehovah ngaga lalu mintarka langit. Iya nempa dunya, enggau semua utai ti idup dia. Iya meri pengidup enggau seput ngagai semua mensia di dunya tu.’​—Isaiah 42:5.

Petara ngaga udara sereta kitaran semula jadi kena meresi udara. Petara mega ngembuan kuasa ti nadai tatak sereta pengerindu Iya amat besai ngagai mensia. Nya alai, kitai enda iran ati sereta ulih andal, Petara tentu enda nejuka udara ti kamah ngerusak kitai. Peratika begian artikel, “Petara Besemaya Bumi Kitai deka Diselamatka.”