Terus ngagai penerang

Terus ngagai Ripih Isi

Utai ti Bendar Pasal Petara enggau Kristus

Utai ti Bendar Pasal Petara enggau Kristus

Taja pan mensia nyembah mayuh petara, tang semina bisi seiku aja Petara ti bendar. (John 17:3) Iya Petara “ti Pemadu Tinggi,” Penempa ke semua utai, enggau Pun semua pengidup. Semina Iya aja meh ti patut nerima sembah kitai.—Daniel 7:18; Pemandang 4:11.

Sapa Petara?

Nitihka leka jaku asal, nama Petara udah ayan KIRA-KIRA 7,000 KALI

JEHOVAH nama Petara

ALLAH TAALA, PETARA, APAI​—Sekeda gelar Jehovah

Sapa Nama Petara? Petara empu nyebut, semina aku aja ti Jehovah. * (Isaiah 42:8) Nama Petara tu kala pansut kira-kira 7,000 kali dalam Bup Kudus. Taja pia, mayuh penyalin Bup Kudus udah nukar nama tu enggau gelar “TUHAN.” Petara deka nuan nyadi pangan Iya. Nya alai, Iya meransang nuan ngena nama Iya.—Masmur 105:1.

Gelar Jehovah. Dalam Bup Kudus, Jehovah mega diberi gelar baka, “Allah Taala,” “ti Pemadu Bekuasa,” “Penempa,” “Apai,” enggau “Raja ke belama-lama iya.” Mayuh sampi ke ditulis dalam Bup Kudus ngembuan gelar Petara enggau nama Iya empu, iya nya Jehovah.—Daniel 9:4.

 Gaya Tubuh Petara. Petara nya roh ke enda ulih dipeda. (John 4:24) Bup Kudus madahka, “Nadai orang udah kala meda Allah Taala.” (John 1:18) Bup Kudus mega madahka asai ati Petara. Mensia ulih ngasuh Iya berasai tusah ati tauka gaga.—Jaku Dalam 11:20; Masmur 78:40, 41.

Kualiti Petara. Petara enda bepilih mata enggau semua orang sereta chara pengidup sida. (Kereja Rasul 10:34, 35) Iya mega Petara ti ‘kasih sereta siru, lubah ringat, sereta mandangka penetap ati enggau pengerindu ti besai.’ (Pemansut 34:6, 7) Petara mega bisi empat iti kualiti ti pemadu tampak.

Kuasa. Iya Petara “ti Pemadu Bekuasa.” Kuasa Iya nadai tatak. Iya ulih ngamatka semua semaya Iya.—Pemungkal 17:1.

Penemu-Dalam. Nadai orang lebih agi bepenemu-dalam ari Petara. Nya alai, Bup Kudus nyebut semina Iya aja “ke nemu semua utai.”—Rome 16:27.

Pengelurus. Semua pengawa Petara seruran lurus. Pengawa Iya “ngena sereta lurus.”—Ulang Adat 32:4.

Pengerindu. Bup Kudus madahka, ‘Petara endang pengerindu.’ (1 John 4:8) Iya ukai semina ngayanka pengerindu, laban Iya empu endang pengerindu. Semua pengawa ke digaga Iya ketegal pengerindu, lalu tu meri mayuh penguntung ngagai kitai ari mayuh macham chara.

Kaul Petara enggau Mensia. Petara nya Apai kitai ti di serega ke amat sayauka kitai. (Matthew 6:9) Enti kitai arapka Iya, kitai ulih nyadi pangan Iya. (Masmur 25:14) Iya indah mai kitai semak ngagai Iya nengah sampi, lalu ‘nyerahka semua pengirau kita ngagai Iya, laban Iya ngibun kita.’—1 Peter 5:7; James 4:8.

Nama Bida entara Petara enggau Kristus?

Jesus ukai Petara. Chara Jesus ditempa enda sebaka enggau mensia, laban iya ditempa Petara kediri. Nya kebuah Bup Kudus ngumbai iya, Anak Petara. (John 1:14) Pengudah nempa Jesus, Jehovah ngena anak tunggal Iya nyadi ‘tukang ti landik’ kena nempa semua utai ke bukai.—Jaku Dalam 8:30, 31; Kolosi 1:15, 16.

 Jesus enda kala ngaku diri Petara. Jesus nerangka, “Aku datai ari Iya [Petara], lalu Iya udah ngirumka Aku.” (John 7:29) Lebuh Jesus bejaku enggau seiku ari murid iya, Jesus ngumbai Jehovah ‘Apai Aku enggau Apai kita, ngagai Petara Aku enggau Petara kita.’ (John 20:17) Pengudah Jesus mati, Jehovah ngangkatka iya idup baru ba serega, lalu meri iya kuasa ti besai.—Matthew 28:18; Kereja Rasul 2:32, 33.

Jesus Kristus Ulih Nulung Nuan Semak Ngagai Petara

Jesus datai ke dunya ngajar kitai pasal Apai iya. Jehovah empu madahka pasal Jesus, “Tu Anak ke dikesayauka Aku. Pendingka Iya!” (Mark 9:7) Jesus ngelala Petara lebih agi ari orang bukai. Iya madahka, “Nadai orang nemu sapa Anak, semina Apai aja; tauka nemu sapa Apai, tang semina Anak aja enggau sebarang orang ke dipilih Anak alai Iya mandangka Apai.”—Luke 10:22.

Jesus neladan kualiti Petara enggau sempurna. Jesus neladan kualiti Apai iya enggau sempurna nyentukka iya madah, “Barang sapa udah meda Aku, udah meda Apai.” (John 14:9) Jesus mai orang semak ngagai Petara, lebuh iya ngayanka pengerindu Jehovah nengah jaku enggau pengawa iya. Iya madah, “Aku tu meh jalai, pemendar, enggau pengidup. Nadai orang ulih datai ngagai Apai enti enda nengah Aku.” (John 14:6) Iya mega nyebut, “Orang ke amat nyembah Apai, deka nyembah Iya dalam Roh enggau pemendar, laban nya gaya orang ke dikedekaka Apai nyembah Iya.” (John 4:23) Gambarka nya! Jehovah ngiga orang ke baka nuan, ti deka nemu pemendar pasal Iya!

^ per. 4 Jehovah nya nama Petara ke bisi ayan ba Bup Kudus. Peda Jaku Penerang, genteran 3 ba Bup Kudus Baru.