GAMBARKA nuan bejalai ba jalai ti petang lebuh hari nyauka malam. Taja pan mata panas udah padam, nuan enda takut laban nuan bisi lampu pichit. Lebuh nuan nenggau ke baruh, nuan ulih meda utai ke semak nuan enggau terang. Lalu lebuh nuan nenggau jauh ke mua, nuan ulih meda utai ke jauh enggau terang.

Bup Kudus baka lampu pichit nya. Baka ke udah dikerandauka ba artikel sebedau tu, Jaku Petara ulih nulung kitai napi utai ke semak—penanggul ke ditapi kitai ninting hari ba dunya tu. Tang Bup Kudus ulih ngereja lebih agi ari nya. Bup Kudus nulung kitai meda utai ke deka nyadi jemah ila, lalu nunjukka jalai ti ulih mai pengelantang enggau ati ti puas. (Masmur 119:105) Baka ni chara iya?

Aram kitai meda dua iti chara Bup Kudus ulih meri kitai pengadang ke jemah ila: 1 Bup Kudus nulung kitai nemu pasal tuju pengidup kitai, lalu 2 ngajar kitai chara ngembuan kaul ti meruan enggau Penempa kitai.

Bup Kudus madahka jaku lalau ti ulih dikena napi penanggul. Tang Bup Kudus ukai semina bup ke meri lalau ba pengidup. Ari ke meransang kitai beberatka diri empu, Bup Kudus ngajar kitai beberatka orang bukai. Enggau tu, kitai deka bisi tuju ba pengidup.

Ambika chunto, prinsip Bup Kudus tu: “Beberekat agi orang ke meri, ari orang ke nerima.” (Kereja Rasul 20:35) Agi nuan ingat maya nuan nulung orang bukai lebuh sida begunaka tulung ba belanja? Tauka maya nuan meri awak ninga serebana pangan nuan? Maya nya, nuan tentu berasai puas ati ketegal udah nulung orang bukai.

 Kitai bulih pengelantang lebuh kitai enda ngarapka orang malas pemanah kitai. Seiku pengarang madahka, enti kitai meri lalu enda ngarapka orang bukai malas pemanah kitai, kitai deka bulih mayuh agi ari penyampau ke diberi kitai. Taja pan kitai enda ngarapka diri dibalas—kelebih agi ari orang ke enda ulih malas—kitai nerima upah ari Penempa kitai. Endang amat, kitai besaup enggau Penempa, ke ngumbai pemanah ti dikereja kitai baka ke nyali utai ngagai Iya. (Jaku Dalam 19:17) Iya gaga ati meda pemanah ke dikereja kitai ngagai orang ke baruh ati. Lalu Iya besemaya deka malas pemanah kitai enggau meri kitai pengidup ti meruan ba dunya paradais—pengadang ti chukup manah ke jemah ila!—Masmur 37:29; Luke 14:12-14. *

Kelebih agi, Bup Kudus madahka tuju pengidup ti bendar datai ari nyembah Petara ti bendar iya nya Jehovah. Jaku Iya meransang kitai ngasika Iya sereta meri puji enggau basa. (Pengajar 12:13; Pemandang 4:11) Lebuh kitai ngereja nya, kitai ulih ngasuh Penempa kitai gaga ati. Iya meransang kitai: ‘Nuan enda tau enda bepenemu-dalam . . . nya baru Aku deka lantang ati.’ (Jaku Dalam 27:11) Perundingka—lebuh kitai ngena prinsip Bup Kudus maya ngaga pemutus, kitai ulih ngelantangka ati Apai kitai ti di serega. Nama kebuah? Laban Iya ibuhka kitai lalu deka kitai bulih penguntung ketegal nitihka iring Iya. (Isaiah 48:17, 18) Endang amat, pengidup kitai deka bisi tuju lebuh kitai nyembah Pemerintah dunya raya, iya nya Jehovah, lalu idup sejalai enggau peneka Iya!

Bup Kudus mega ngajar kitai ngambika bisi kaul ti manah enggau Penempa kitai. Ku Bup Kudus, ‘Datai semak ngagai Petara, lalu Iya deka datai semak ngagai kita.’ (James 4:8) Kekadang kitai engka kakang ati sekalika kitai amat ulih bepangan enggau Penempa ti pemadu bekuasa. Tang Bup Kudus madahka, enti kitai ‘ngiga Petara,’ kitai deka “tetemuka Iya,” laban “Iya enda jauh ari kitai siku-siku.” (Kereja Rasul 17:27) Jaku lalau Bup Kudus pasal nyadi pangan Petara meri kitai penguntung ke jemah ila. Baka ni chara iya?

Perundingka: Semua kitai enda ulih rari ari munsuh kitai—pemati. (1 Korint 15:26) Taja pia, Petara nya meruan belama iya. Iya enda nemu mati, lalu Iya mega deka pangan Iya idup belama. Bup Kudus madahka semaya ti ngerinduka ati ari Jehovah ngagai orang ke ngiga Iya: “Awakka sida nyamai diau belama iya!”—Masmur 22:26.

Baka ni nuan ulih meruan bepangan enggau Petara? Terus meh belajar pasal Iya ari Bup Kudus. (John 17:3; 2 Timoti 3:16) Pinta Iya nulung nuan meretika ayat Bup Kudus. Bup Kudus madahka, enti kitai ‘minta ngagai Petara’ penemu-dalam, Iya deka meri nya ngagai kitai. * (James 1:5) Udah nya, bebendar ngena utai ke dipelajarka nuan ba pengidup, ngemendarka Jaku Petara “nyadika lampu tenggau” sereta “nyadika tenggau jalai”—sepemanjai pengidup nuan.—Masmur 119:105.