Terus ngagai penerang

Terus ngagai Ripih Isi

 ARTIKEL DIPELAJAR 37

Sedia Nunduk Ngagai Jehovah

Sedia Nunduk Ngagai Jehovah

“Kati kitai enda lebih agi patut nunduk ngagai Apai?”—HEB. 12:9.

LAGU 9 Jehovah ti Pemadu Bekuasa!

DALAM ARTIKEL TU *

1. Nama kebuah kitai patut nunduk ngagai Jehovah?

KITAI patut nunduk * ngagai Jehovah laban Iya ke nempa kitai. Ketegal tu, Iya bisi hak madahka utai ke patut digaga kitai. (Pem. 4:11) Tang siti agi kebuah kitai ngasika Jehovah iya nya, laban chara Iya merintah endang pemadu manah. Ari suba nyentuk ngagai seharitu, mayuh mensia udah merintah atas orang bukai. Tang lebuh kitai mandingka chara mensia enggau chara Jehovah merintah, kitai nemu Jehovah nya Pemerintah ti siru, bepenemu-dalam, penuh enggau pengerindu, sereta kasih.—P-sut. 34:6; Rom. 16:27; 1 Jhn. 4:8.

2. Nitihka Hebrew 12:9-11, nama kebuah kitai patut nunduk ngagai Jehovah?

2 Jehovah deka kitai ngasika Iya. Kitai ngereja nya ukai semina ketegal kitai nangika Iya, tang ketegal kitai rinduka Iya sereta ngumbai Iya, Apai kitai ti penuh enggau pengerindu. Dalam surat Paul ngagai orang Hebrew, iya nerangka kitai patut “nunduk ngagai Apai” ketegal Iya ngelatih kitai “ke penguntung kitai.”—Bacha Hebrew 12:9-11.

3. (a) Baka ni kitai ngayanka diri nunduk ngagai Jehovah? (b) Nama tanya ke deka disaut kitai?

3 Kitai nunduk ngagai Jehovah lebuh kitai enggau naka ulih ngasika Iya ba semua pekara sereta nyeliahka diri ari bepanggai ba penemu diri empu. (J-lam. 3:5) Kitai deka senang agi nunduk ngagai Jehovah enti kitai nemu mayuh agi pasal pemanah ti dikembuan Iya. Nama kebuah? Laban pemanah ti dikembuan Iya ke meransang Iya ngereja semua utai. (Mas. 145:9) Mayuh agi ditemu kitai pasal Jehovah, dalam agi  pengerindu kitai ngagai Iya. Lalu enti kitai rinduka Iya, kitai enda begunaka mayuh atur pasal utai ke ulih enggau enda ulih digaga. Kitai nguji deka nemu asai ati sereta chara Jehovah berunding pasal utai ti dikedekaka Iya ba kitai lalu nyeliahka utai ti enda manah. (Mas. 97:10) Tang, kadang-kadang kitai tusah deka ngasika Jehovah. Nama kebuah? Lalu nama ulih dipelajarka bala tuai gempuru, sida ke apai, enggau sida ke indai ari teladan ke ditetapka Gabenor Nehemiah; Raja David; enggau indai Jesus, Maria? Artikel tu meri saut ngagai tanya nya.

KEBUAH TUSAH DEKA NUNDUK NGAGAI JEHOVAH

4-5. Nitihka Rome 7:21-23, nama kebuah nya engka tusah deka nunduk ngagai Jehovah?

4 Siti kebuah kitai engka tusah deka nunduk ngagai Jehovah iya nya, ketegal semua kitai bedosa lalu enda sempurna. Nya alai, kitai enda senang deka seruran ngasika Petara. Pengudah Adam seduai Hawa angkat ngelaban Petara lalu makai buah ti enda diasuh Iya, seduai iya empu netapka utai ti manah enggau utai ti jai. (P-kal. 3:22) Kemayaharitu, nyauka semua orang baka Adam seduai Hawa. Sida enda bedulika Petara lalu netapka kediri empu utai ti betul enggau salah.

5 Indah sida ke ngelala sereta rinduka Jehovah engka tusah deka nunduk ngagai Iya enggau pengabis ati. Rasul Paul mega napi penanggul ke baka tu. (Bacha Rome 7:21-23.) Baka Paul, kitai deka ngereja utai ti ngena ba mata Jehovah. Tang kitai enda tau enda seruran ngelaban pengingin ke deka ngereja utai ti salah.

6-7. Nama siti agi kebuah ke ngasuh kitai tusah deka nunduk ngagai Jehovah? Beri siti chunto.

6 Siti agi kebuah ke ngasuh kitai tusah deka nunduk ngagai Jehovah iya nya ketegal chara kitai dibesaika. Mayuh penemu mensia enda sejalai enggau peneka Jehovah lalu nya tau ngasuh kitai tusah deka nyeliahka diri ari chara orang ba dunya tu berunding. Peratika siti chunto.

7 Ba sekeda menua, orang ke biak diperansang ngulihka mayuh duit. Seiku menyadi Kristian indu ke benama Mary * napi utai ke baka tu. Sebedau belajar pasal Jehovah, iya belajar ba universiti ti pemadu tebilang di menua iya. Sida Mary sebilik nguji ngansak iya ngulihka kereja ke begaji besai ngambika dipebasa orang. Iya mega inginka nya. Tang, pengudah belajar pasal Jehovah lalu ngembuan pengerindu ke Iya, Mary ngubah juluk ati iya. Taja pia, ku Mary madah: “Kadang-kadang aku tetemuka chara ngulihka mayuh duit, tang aku nemu nya deka nekul aku ari nyembah Jehovah. Ketegal chara aku dibesaika, aku agi tusah deka nagang pengingin ngulihka mayuh duit. Aku minta Jehovah nulung aku nyeliahka diri ari nerima sebarang kereja ke ulih nekul aku gawa ke Iya.”—Mat. 6:24.

8. Nama deka dikerandauka kitai diatu?

8 Baka ke udah dipelajarka kitai, endang manah enti kitai nunduk ngagai Jehovah. Tang lebuh orang ke bisi kuasa baka bala tuai gempuru, sida ke apai, enggau sida ke indai nunduk ngagai Jehovah, sida ulih nulung orang bukai bulih penguntung. Diatu kitai deka berandauka sekeda chunto ari Bup Kudus ke ngajar kitai baka ni ngena kuasa nitihka chara ti ngelantangka ati Jehovah.

UTAI KE ULIH DIPELAJARKA BALA TUAI GEMPURU ARI NEHEMIAH

Bala tuai gempuru sama gawa ba palan gempuru, baka Nehemiah ke sama gawa enggau bala nembiak Jehovah nirika dinding kuta Jerusalem (Peda genteran  9-11) *

9. Nama penanggul ke ditapi Nehemiah?

9 Jehovah udah meri bala tuai gempuru tanggung pengawa nyaga nembiak Iya. (1 Pet. 5:2) Bala tuai gempuru ulih belajar mayuh ari chara Nehemiah mutarka penanggul nembiak  Jehovah. Ketegal Nehemiah gabenor ba menua Judah, iya bisi mayuh kuasa. (Neh. 1:11; 2:7, 8; 5:14) Uji gambarka sekeda penanggul ke ditapi Nehemiah. Iya beratika orang Judah ngereja pengawa ti enda bebasaka Jehovah ba rumah sembiang. Pia mega, sida enda meri pemeri ngagai orang Lewi baka ke diasuh Adat Jehovah. Sida mega enda ngasika adat Jehovah bekaul enggau Hari Sabat lalu sekeda lelaki orang Judah jadi enggau indu ari bansa bukai. Nya alai, Gabenor Nehemiah patut mutarka penanggul nya.—Neh. 13:4-30.

10. Baka ni chara Nehemiah mutarka penanggul orang Judah?

10 Nehemiah enda ngena kuasa iya ngansak orang Judah nitihka penemu iya. Tang, iya minta iring ari Jehovah nengah sampi, lalu ngajar sida pasal Adat Jehovah. (Neh. 1:4-10; 13:1-3) Nehemiah mega baruh ati begulai gawa enggau sida, indah nulung sida nirika baru dinding kuta Jerusalem.—Neh. 4:15.

11. Nitihka 1 Tesalonika 2:7, 8, baka ni bala tuai gempuru patut ngintu bala menyadi Kristian ba eklisia?

11 Bala tuai gempuru engka enda napi penanggul ti sama baka Nehemiah, tang sida ulih neladan iya dalam mayuh chara. Ambika chunto, sida bebendar nulung bala menyadi Kristian. Lalu sida enda ngumbai diri pama agi ari orang bukai ketegal sida ngembuan kuasa. Tang, sida ngintu bala menyadi Kristian ba eklisia enggau siru. (Bacha 1 Tesalonika 2:7, 8.) Ketegal bala tuai gempuru baruh ati sereta rinduka orang, sida bejaku enggau nelap. Andrew, ke udah betaun-taun nyadi tuai gempuru madahka: “Aku beratika, enti bala tuai gempuru manah sereta rindu begulai enggau bala menyadi, tu ngasuh bala menyadi rinduka sida. Pemanah ke dikembuan bala tuai gempuru meransang bala menyadi deka sama bekereja enggau sida.” Seiku menyadi ke benama Tony ti udah lama nyadi tuai gempuru madahka: “Aku nguji nitihka jaku lalau  ba Pilipi 2:3, lalu seruran bebendar ngumbai orang bukai pama agi ari aku. Tu nulung aku ngambika enda ngansak orang bukai ngasika aku.”

12. Nama kebuah bala tuai gempuru patut baruh ati?

12 Bala tuai gempuru patut baruh ati baka Jehovah. Taja pan Jehovah nya Pemerintah ti Pemadu Tinggi ba dunya raya, Iya “nilik ke baruh” lalu nulung orang ke lemi. (Mas. 18:35; 113:6, 7) Bup Kudus mega madahka Jehovah begedika orang ke sumbung.—J-lam. 16:5.

13. Nama kebuah tuai gempuru patut “nagang dilah diri”?

13 Siti chara tuai gempuru nunduk ngagai Jehovah iya nya, patut “nagang dilah diri.” Enti iya enda ngereja nya, iya engka bejaku kasar enggau orang. (Jas. 1:26; Gal. 5:14, 15) Andrew, ke disebut tadi, madahka: “Kadang-kadang, aku deka bejaku kasar enggau bala menyadi ke dikumbai enda bebasaka aku ke nyadi tuai gempuru. Taja pia, aku belematika chunto orang ke tetap ati dalam Bup Kudus, lalu nya udah nulung aku belajar nyadi orang ke baruh ati.” Tuai gempuru nunjukka diri nunduk ngagai Jehovah enti iya bejaku enggau chara ti penuh enggau pengerindu sereta siru ngagai bala menyadi Kristian tauka ngagai bala tuai gempuru ke bukai.—Kol. 4:6.

UTAI KE ULIH DIPELAJARKA SIDA KE APAI ARI RAJA DAVID

14. (a) Nama tanggung pengawa ke udah diberi Jehovah ngagai sida ke apai? (b) Nama dikedekaka Jehovah ari sida?

14 Jehovah udah meri sida ke apai tanggung pengawa nyadi tuai bilik, lalu Iya deka sida ngelatih, ngiring, sereta ngajar anak sida. (1 Kor. 11:3; Eps. 6:4) Tang kuasa ke diberi ngagai sida ke apai bisi tatak. Ketegal Jehovah ke ngepunka ruang bilik, nya alai sida ke apai betanggungjawap ngagai Iya ke semua utai ti digaga sida ngagai diri sebilik. (Eps. 3:14, 15) Sida ke apai nunjukka diri nunduk ngagai Jehovah enti sida ngena kuasa enggau chara ti ngelantangka ati Iya. Sida ulih belajar ari pengidup Raja David.

Chara seiku apai besampi nunjukka iya baruh ati (Peda genteran 15-16) *

15. Nama kebuah Raja David nya chunto ti manah ngagai sida ke apai?

15 Jehovah milih Raja David nyadika tuai ukai semina ba ruang bilik iya, tang mega ke semua bansa Israel. Ketegal David nya raja, iya bisi mayuh kuasa. Kadang-kadang iya ngena kuasa enggau chara ti salah lalu ngereja penyalah ti besai. (2 Sam. 11:14, 15) Tang iya ngayanka diri nunduk ngagai Jehovah lebuh nerima disiplin ari Iya. Lebuh David besampi, iya madahka asai ati diri ngagai Jehovah. (Mas. 51:1-4) Pia mega, iya baruh ati sereta nerima jaku ajar ukai semina  ari sida ke lelaki tang mega ari sida ke indu. (1 Sam. 19:11, 12; 25:32, 33) David belajar ari penyalah iya lalu ngenuluka sembah ngagai Jehovah ba pengidup iya.

16. Nama ulih dipelajarka sida ke apai ari Raja David?

16 Nama ulih dipelajarka sida ke apai ari Raja David? Anang ngena kuasa ke diberi Jehovah ngagai nuan enggau chara ti salah. Ngaku penyalah diri, lalu terima meh jaku lalau ti bepelasarka Bup Kudus ari orang bukai. Enti nuan ngereja nya, sida ke sebilik enggau nuan deka bebasaka nuan ketegal ulah nuan ti baruh ati. Lebuh nuan besampi enggau diri sebilik, padahka asai ati nuan ngagai Jehovah, lalu udah nya sida ke sebilik enggau nuan deka nemu nuan bepanggai bendar ba tulung sereta iring ari Jehovah. Keberat agi, kenuluka sembah nuan ngagai Jehovah ba pengidup nuan. (U-dat. 6:6-9) Chunto nuan ti manah nya siti ari pemeri ti pemadu berega ke ulih diberi nuan ngagai diri sebilik.

UTAI KE ULIH DIPELAJARKA SIDA KE INDAI ARI MARIA

17. Nama tanggung pengawa ti diberi Jehovah ngagai sida ke indai?

17 Jehovah mega udah meri sida ke indai tanggung pengawa ti besai, lalu Iya udah meri sida sekeda kuasa atas bala anak sida. (J-lam. 6:20) Utai ke digaga sereta disebut sida ke indai ulih nulung anak seumur idup. (J-lam. 22:6) Peratika utai ke ulih dipelajarka sida ari indai Jesus, Maria.

18-19. Nama ulih dipelajarka sida ke indai ari chunto Maria?

18 Mayuh utai ditemu Maria ari jaku Petara. Maria amat bebasaka Jehovah sereta bisi kaul ti rapat enggau Iya. Iya sanggup ngereja utai ti dikedekaka Jehovah, taja pan nya deka ngubah semua utai ba pengidup iya.—Luk. 1:35-38, 46-55.

Enti indai berasai lelak, iya engka patut bebendar ngayanka penyayau ngagai diri sebilik (Peda genteran 19) *

19 Kita ke indai ulih neladan Maria dalam mayuh chara. Baka ni? Kesatu, nuan patut terus negapka kaul nuan enggau Jehovah enggau belajarka Bup Kudus kediri empu sereta tetap besampi. Kedua, sanggup ngaga ubah ba pengidup ngambika ulih ngelantangka ati Jehovah. Ambika chunto, nuan engka dibesaika apai indai ke jampat pedis ati sereta bejaku kasar enggau bala anak. Nya alai nuan engka ngumbai ngemesaika anak enggau chara tu enda salah. Indah pengudah belajar pasal standard Jehovah, nuan engka agi tusah deka mengkang nelap sereta sabar enggau bala anak nuan. Kelebih agi enti sida enggai ngasika nuan maya nuan benung lelak. (Eps. 4:31) Enti nuan ngasaika baka nya, endang beguna bendar nuan minta tulung ari Jehovah nengah sampi. Seiku indai ke benama Lydia madahka: “Kekadang aku  bebendar besampi ngambika enda kasar jaku maya anak aku enda ngasika aku. Aku indah ngetu dulu bejaku lalu besampi minta tulung ngagai Jehovah. Sampi ulih ngasuh aku sabar.”—Mas. 37:5.

20. Nama siti agi penanggul ke engka ditapi sida ke indai? Baka ni sida ulih mutarka penanggul nya?

20 Siti agi penanggul ke engka ditapi sida ke indai iya nya, sida tusah deka ngayanka penyayau ngagai bala anak. (Tit. 2:3, 4) Mayuh ari sida ke indai tu dibesaika apai indai ke nadai tentu bisi kaul ti rapat enggau bala anak. Enti nuan dibesaika enggau chara nya, anang ngulang utai ke digaga apai indai nuan ba anak nuan. Indai ke nunduk ngagai Jehovah patut belajar chara ngayanka penyayau ngagai bala anak. Iya engka tusah deka ngubah chara berunding, asai ati, sereta ulah iya. Tang tu ulih digaga lalu sekeda ubah tu deka meri penguntung ngagai iya sereta diri sebilik.

TERUS NUNDUK NGAGAI JEHOVAH

21-22. Baka ke dipadah ba Isaiah 65:13, 14, nama penguntung ke diulih kitai enti nunduk ngagai Jehovah?

21 Raja David nemu penguntung ke diulih enti nunduk ngagai Jehovah. Ku David madahka: ‘Adat Jehovah endang ngena, lalu ngelantangka ati. Pesan Jehovah endang terang lalu iya ngasuh orang meretika utai. Utai nya meri penemu ngagai aku, ke nembiak Nuan. Aku diupah ketegal ngasika utai nya.’ (Mas. 19:8, 11) Kemayaharitu, kitai ulih meda bida entara orang ke nunduk ngagai Jehovah enggau orang ke nulak jaku lalau ari Iya. Orang ke nunduk ngagai Jehovah deka “belagu gaga ati.”—Bacha Isaiah 65:13, 14.

22 Enti bala tuai gempuru, sida ke apai, enggau sida ke indai sedia deka nunduk ngagai Jehovah, pengidup sida deka manah agi. Pia mega, ruang bilik sida deka lantang agi lalu semua bala menyadi Kristian deka beserakup agi. Kelebih agi, sida ngagaka ati Jehovah. (J-lam. 27:11) Tu meh utai ti pemadu ngagaka ati kitai!

LAGU 123 Tunduk enggau Taluk Ngagai Atur Teokratik

^ per. 5 Artikel tu deka bejuraika kebuah kitai patut nunduk ngagai Jehovah. Artikel tu mega deka berandauka chara bala tuai gempuru, sida ke apai, enggau sida ke indai patut ngena kuasa ke diberi Jehovah ngagai sida. Sida ulih belajar mayuh ari teladan Gabenor Nehemiah; Raja David, enggau indai Jesus, Maria.

^ per. 1 PENERANG JAKU: Leka jaku ngasi enggau nunduk ngembuan reti ti enda manah ba orang ti diansak ngasika seiku-seiku orang. Taja pia, nembiak Petara enda ngumbai baka nya lebuh nunduk ngagai Petara. Nya alai sida milih ngasika Iya.

^ per. 7 Sekeda nama ba artikel tu udah diubah.

^ per. 62 PENERANG PASAL GAMBAR: Seiku tuai gempuru begulai gawa enggau anak lelaki iya ba pengawa nyeruri Palan Gempuru, baka ke digaga Nehemiah lebuh nulung nirika dinding kuta Jerusalem.

^ per. 64 PENERANG PASAL GAMBAR: Seiku apai ngarika sida sebilik besampi ngagai Jehovah.

^ per. 66 PENERANG PASAL GAMBAR: Seiku nembiak lelaki ngena mayuh awak bemain video game lalu enda nembuka kereja sekula. Indai iya ke lelak pengudah abis gawa, enda pedis ati tauka bejaku kasar lebuh ngajar iya.