Terus ngagai penerang

Terus ngagai Ripih Isi

Pengarap—Kualiti ke Nulung Kitai Nyadi Kering

Pengarap—Kualiti ke Nulung Kitai Nyadi Kering

PENGARAP nya siti kualiti ke ulih meri kitai pengering. Ambika chunto, taja pan Sitan deka ngerusak kaul kitai enggau Jehovah, pengarap ulih nulung kitai “madamka semua laja ti beapi-api ti ditimbakka Sitan.” (Eps. 6:16) Enti kitai ngembuan pengarap, kitai ulih tan napi penanggul ti besai. Jesus madah ngagai bala murid iya: “Enti kita bisi pengarap ngemesai igi ensabi, kita ulih bejaku ngagai bukit tu, ‘Mindah ari tu ngagai nyin!’ lalu bukit nya deka mindah.” (Mat. 17:20) Kitai nemu pengarap ulih negapka agi kaul kitai enggau Jehovah. Nya alai, kitai patut berundingka tanya tu: Nama pengarap nya? Baka ni ati kitai bisi kaul enggau pengarap? Baka ni kitai ulih negapka pengarap kitai? Lalu, ngagai sapa kitai patut ngayanka pengarap?—Rom. 4:3.

NAMA PENGARAP NYA?

Pengarap ukai semina arapka penemu ari Bup Kudus laban “indah antu deh arapka [Petara nya bisi], lalu getar-getar takut.” (Jas. 2:19) Nyadi, nama utai ke dikumbai pengarap?

Baka kitai ke andalka siang enggau malam deka seruran bisi, kitai andalka jaku Petara nya endang amat sereta deka dikeamatka

Bup Kudus nerangka pengarap nya bisi 2 bagi. Kesatu, “pengarap nya arapka utai ti disadang.” (Heb. 11:1a) Enti nuan ngembuan pengarap, nuan tentu deka andalka semua utai ke dipadah Jehovah nya endang amat sereta deka dikeamatka. Ambika chunto, Jehovah madah ngagai orang Israel: “Aku udah ngaga siti sempekat enggau siang sereta enggau malam, ngambika seduai iya seruran pegari ba maya ti patut, lalu sempekat nya enda tau dilanggar. Baka nya mega Aku udah ngaga siti sempekat enggau nembiak Aku David . . . Semua sempekat tu enda tau sekali-kali dilanggar.” (Jer. 33:20, 21) Kala nuan irauka mata panas deka ngetu tumbuh tauka padam, lalu ngasuh siang enggau malam nadai agi? Enti nuan pechaya atur ba alam ulih ngasuh bumi mengkang bepusin ba endur iya empu sereta ngelingi mata panas, nuan tentu pechaya Petara Jehovah ke ngaga semua atur ba dunya tu ulih ngamatka semaya Iya!—Isa. 55:10, 11; Mat. 5:18.

Kedua, pengarap nya “arapka utai ti enda dipeda.” Pengarap bepelasar ba bukti ke nunjukka utai ti enda ulih dipeda nya endang nyata. (Heb. 11:1b) Nama reti tu? Enti sema seiku anak mit nanya nuan: ‘Baka ni nuan nemu angin bisi?’ Taja pan nuan enda ulih meda angin, tang nuan ulih nulung anak mit nya beratika bukti ke nunjukka angin nya bisi. Ambika chunto, kitai ulih ninga angin bepuput, lalu meda daun ba pun kayu engkebut sereta utai bukai. Pengudah anak mit nya pechaya semua utai tu endang nyata, iya ulih meretika kebuah nuan pechaya utai ke enda ulih dipeda nuan. Pia mega enggau pengarap. Iya bepelasar ba bukti ti nyata.—Rom. 1:20.

ASAI ATI KITAI PASAL PENGARAP

Ketegal pengarap bepelasar ba bukti, orang patut “nemu penemu pasal pemendar.” (1 Tim. 2:4) Tang nya enda chukup. Rasul Paul madahka: “Kita arap ngena ati kita.” (Rom. 10:10) Nya alai ngambika ulih ngemansangka pengarap ti sejalai enggau pemendar, orang ukai semina arapka pemendar aja tang mega ngumbai pemendar berega. (Jas. 2:20) Orang ke enda beterima kasih ke pemendar engka nulak bukti ketegal iya enggai ngubah utai ti udah dipechaya iya ngelama tu  tauka ketegal iya deka ngereja utai nitihka peneka iya empu. (2 Pet. 3:3, 4; Jud. 18) Nya kebuah maya jeman Bup Kudus menya, ukai semua orang ke meda kereja ajih ngembuan pengarap. (P-pau. 14:11; Jhn. 12:37) Roh kudus Petara semina ngasilka pengarap ngagai orang ke rinduka pemendar.—Gal. 5:22; 2 Tes. 2:10, 11.

CHARA DAVID NGEMANSANGKA PENGARAP TI TEGAP

Seiku ari nembiak Petara ti ngayanka pengarap ti tegap, iya nya Raja David. (Heb. 11:32, 33) Taja pia, ukai semua sida David sebilik ngembuan pengarap ti baka nya. Ambika chunto, perundingka pasal Eliap, menyadi David ke tuai. Bisi sekali Eliap ngerara David ketegal David irau pasal Goliat ke nyakap orang Israel. Ari tu, Eliap ngayanka diri enda arapka Jehovah. (1 Sam. 17:26-28) Nadai seiku ari kitai bulih pengarap lebuh ada tauka ari apai indai. Baka nya mega, pengarap David dikemansangka ketegal kaul iya empu enggau Jehovah.

Ba Masmur 27, David madahka chara iya ngulihka pengarap ti tegap. (Ayat 1) David belematika utai ke kala nyadi ba iya lalu baka ni Jehovah nulung iya mutarka penusah ke ditapi iya. (Ayat 2, 3) Iya chukup beterima kasihka atur Jehovah pasal sembah. (Ayat 4) David nyembah Jehovah sama enggau sida ke bukai ba langkau sembiang. (Ayat 6) Iya ngangauka Jehovah nengah sampi. (Ayat 7, 8) David mega deka diajar ngena chara Jehovah. (Ayat 11) Pengarap beguna bendar ba David nyentukka iya nanya: “Kini penunga aku enti aku nadai pengarap?”—Ayat 13, NW.

CHARA NEGAPKA PENGARAP

Kitai ulih ngembuan pengarap baka David enti kitai nitihka runding sereta ulah ke dipandangka ba Masmur 27. Ketegal pengarap bepelasar ba penemu ti bendar, kitai patut belajarka Bup Kudus sereta litaricha ke bisi kaul enggau Bup Kudus. Nya baru kitai deka senang agi ngemansangka pengarap. (Mas. 1:2, 3) Kena awak lebuh belematika utai ke dipelajar. Pengawa belemati ulih disemaka enggau tanah ti ami endur pengarap kitai tumbuh. Seraya asai beterima kasih kitai ke Jehovah majak nambah, pengingin kitai ke deka ngemansangka pengarap pan nambah. Lalu tu deka dipandangka kitai ba gempuru sereta lebuh kitai nginjil. (Heb. 10:23-25) Pia mega, kitai mandangka pengarap lebuh kitai “seruran besampi, lalu enda lemi semengat.” (Luk. 18:1-8) Nya alai, “seruran besampi” ngagai Jehovah, lalu andalka Iya deka ngibun kitai. (1 Tes. 5:17; 1 Pet. 5:7) Pengarap ngasuh kitai ngereja utai ti betul, lalu lebuh kitai ngereja nya, pengarap kitai deka nyadi tegap agi.—Jas. 2:22.

ARAPKA JESUS

Ba lemai sebedau Jesus mati, iya madah ngagai bala murid iya: ‘Arapka Petara, lalu arap mega  ke aku.’ (Jhn. 14:1) Nya alai, kitai ukai semina arapka Petara Jehovah aja tang mega arapka Jesus. Baka ni nuan ulih arapka Jesus? Aram beratika tiga iti chara.

Nama reti arapka Jesus?

Kesatu, ngumbai tebus Jesus nya pemeri ari Jehovah ngagai tiap iku kitai. Ku rasul Paul madah: ‘Pengidup aku dalam tubuh tu nya pengidup ulih pengarap aku ke Anak Petara, ke udah rinduka aku lalu udah nyerahka diri ketegal aku.’ (Gal. 2:20) Enti kitai arapka Jesus, kitai pechaya tebus ke diberi iya ulih ngampunka dosa kitai sereta meri pengadang idup belama iya. Tu bukti ke mandangka pengerindu Jehovah ke kitai. (Rom. 8:32, 38, 39; Eps. 1:7) Tu deka nyeliahka kitai ari ngembuan runding ti enda manah pasal diri empu.—2 Tes. 2:16, 17.

Kedua, semak ngagai Jehovah nengah sampi. Tu ulih dikereja ketegal tebus Jesus. Ketegal tu, kitai ulih besampi ngagai Jehovah “enggau ati ti kempang . . . ngambika kitai ulih nerima pengasih lalu nemu berekat, kena nulung kitai lebuh kitai begunaka iya.” (Heb. 4:15, 16; 10:19-22) Sampi deka ngasuh kitai keran agi nyeliahka penguji.—Luk. 22:40.

Ketiga, ngasika Jesus. Rasul John madahka: ‘Barang sapa arapka Anak, bulih pengidup ti meruan belama iya. Barang sapa enda ngasika Anak, nadai bulih pengidup, tang deka natka pengeringat Petara.’ (Jhn. 3:36) Ari ayat tu, John madahka, ulah ti arap nya bisi kaul enggau ulah ti ngasi. Nya alai, nuan arapka Jesus enti nuan ngasika iya. Nuan ngasika iya enti nuan nitihka “adat Kristus,” iya nya, semua utai ke diajar sereta diasuh iya. (Gal. 6:2) Nuan mega ngasika Jesus enti nuan nitihka iring ke disediaka iya nengah “ulun ke tetap ati sereta bepenemu-dalam.” (Mat. 24:45) Lebuh nuan ngasika Jesus, nuan deka bisi pengering kena betan napi penanggul ti besai ke disempamaka baka ribut.—Luk. 6:47, 48.

“KITA, MENYADI, ENDA TAU ENDA NEGAPKA PENGARAP KITA TI PEMADU KUDUS”

Bisi sekali, seiku lelaki madah ngagai Jesus: “Aku arap! Tulung aku ngambika pengarap aku besai agi!” (Mrk. 9:24) Taja pan lelaki tu bisi pengarap, tang iya enggau baruh ati ngumbai diri begunaka mayuh agi pengarap. Baka lelaki tu, bisi maya nya kitai begunaka mayuh agi pengarap. Lalu semua kitai ulih negapka pengarap diri ari diatu. Baka ke udah dipelajarka, kitai negapka pengarap diri lebuh belajarka Bup Kudus lalu belematika iya. Tu deka meransang kitai beterima kasih agi ke Jehovah. Pengarap kitai mega deka tegap agi enti kitai sama enggau bala menyadi nyembah Jehovah, nginjil ngagai orang bukai, sereta seruran besampi. Nambahka nya, lebuh kitai negapka pengarap, kitai deka nerima berekat ti pemadu besai. Bup Kudus meransang kitai: ‘Kita, menyadi, enda tau enda negapka pengarap kita ti pemadu kudus, . . . meruan dalam pengerindu Petara.’—Jud. 20, 21.