KETEGAL pengidup balat tusah “ba hari ti penudi,” kitai begunaka lebih agi pengeliat ati. (2 Timoti 3:1-5) Mayuh orang ba dunya tu nadai pengeliat ati. Sida berundingka diri empu aja, rindu bekelikuh, lalu enda ulih nagang diri. Nya alai kitai patut nanya diri empu: ‘Kati aku nadai pengeliat ati baka orang ba dunya tu? Nama reti pengeliat ati? Baka ni aku ulih nyadika pengeliat ati nya sebagi ari personaliti aku?’

Nama reti “pengeliat ati” ke dikena dalam Bup Kudus? Pengeliat ati ukai semina sabar natka penanggul. Iya nulung orang tegap agi. Orang ke liat ati ngarapka siti-siti pekara ulih nyadi manah agi. Iya enda berundingka diri empu, tang iya ibuhka asai ati orang, taja pan orang engka ngemediska ati tauka jai enggau iya. Iya seruran ngarapka kaul iya enggau sida deka manah agi. Kitai enda tekenyit lebuh Bup Kudus madahka pengeliat ati nya datai ari pengerindu. * (Peda nota kaki.) (1 Korint 13:4) Pengeliat ati mega sebagi ari ‘buah roh kudus.’ (Galatia 5:22, 23) Nya alai, nama patut digaga kitai ngambika bisi pengeliat ati?

Ngambika ulih liat ati, kitai patut besampi minta bantu roh kudus Jehovah. Iya deka meri roh kudus Iya ngagai orang ti arapka Iya. (Luke 11:13) Roh kudus nya amat bekuasa, tang kitai patut ngereja utai ti sejalai enggau sampi kitai. (Masmur 86:10, 11) Reti nya kitai enda tau enda enggau naka ulih ninting hari ngayanka pengeliat ati sereta nyadika nya sebagi ari personaliti kitai. Tang, kadang-kadang kitai engka enda mujur. Nama ulih nulung kitai?

Kitai patut belajar sereta belematika teladan ti pemadu badas iya nya Jesus. Lebuh rasul Paul berandau pasal “[“personaliti,” NW] ti baru,” ke nyengkaum pengeliat ati, iya meransang kitai: “Awakka pemaik Kristus merintah dalam ati kita.” (Kolosi 3:10, 12, 15) Ngambika ulih ngereja nya, kitai patut nitihka teladan Jesus lalu enggau pengabis ati arap ba maya ti ngena, Petara deka mutarka penanggul. Enggau tu, kitai enda lenyau pengeliat ati, enda ngira nama utai ti nyadi ngelingi kitai.—John 14:27; 16:33.

Semua kitai dekaka dunya baru jampat datai. Tang lebuh kitai berundingka pasal pengeliat ati Jehovah ngagai kitai, tu tentu meransang kitai deka liat ati agi. Bup Kudus madahka: ‘Jehovah ukai lubah ngamatka semaya Iya, munyi ku sekeda orang, tang Iya sabar enggau kita, laban Iya enggai nejuka indah siku kita dirusak, tang semua nesal ati.’ (2 Peter 3:9) Nya alai lebuh kitai berunding pasal pengeliat ati Jehovah ngagai kitai, tu mega meransang kitai deka liat ati agi ngagai orang bukai. (Rome 2:4) Ni maya kitai patut liat ati?

Bisi mayuh pekara ba pengidup besehari-hari ke ngasuh kitai patut liat ati. Ambika chunto, kitai liat ati enti enda nyelepak bejaku enggau orang taja pan kitai bisi utai ti berat ke deka dipadah. (James 1:19) Kitai mega patut liat ati enti orang bisi ngemediska ati kitai. Ari ke pedis ati, kitai patut ingatka baka ni Jehovah enggau Jesus nerima pengelemi kitai. Seduai iya enda beratika penyalah mit ke digaga kitai. Tang, seduai iya beratika kualiti manah ke dikembuan kitai lalu enggau liat ati meri kitai awak kena ngemansangka kualiti manah ke bisi ba kitai.—1 Timoti 1:16; 1 Peter 3:12.

Kitai mega patut liat ati lebuh orang ngerara penyalah kitai. Terubah engka kitai pedis ati lalu enggai nerima jaku rara nya. Tang Jaku Petara meransang kitai nerima nya enggau chara ti manah. Jaku Petara madahka: “Ati ti liat manah agi ari penyumbung. Anang lengkar. Nuan beli enti nuan bedendam.” (Pengajar 7:8, 9) Nya alai taja pan jaku tuduh nya salah, kitai patut liat ati sereta berunding enggau dalam sebedau kitai ngereja siti-siti utai. Nya meh utai ke digaga Jesus lebuh orang nyebut utai ti salah pasal iya.—Matthew 11:19.

Apai indai kelebih agi patut liat ati lebuh nulung ngemetulka ulah tauka pengingin ti enda manah ba anak sida. Peratika chunto Mattias, ke gawa ba Betel di Scandinavia. Lebuh Mattias agi nembiak, orang ke sama sekula enggau iya ngeleseka iya ketegal utai ti dipechaya iya. Terubah iya, apai indai iya enda nemu pasal utai tu. Tang udah nya seduai iya beratika iya berengkah kakang ati enggau utai ti dipechaya iya. Gillis, apai Mattias, madahka iya enggau bini iya patut liat agi ati ba pekara nya. Mattias deka mansutka tanya baka: “Sapa Petara? Baka ni enti Bup Kudus ukai Jaku Petara? Baka ni kitai nemu sekalika Petara ke deka kitai ngereja utai nya tauka utai tu?” Iya mega nanya apai iya: “Nama kebuah ngakim aku enti aku enda arap sereta enda sepenemu enggau nuan?”

Gillis nerangka: “Kadang-kadang anak lelaki kami duai nanya enggau ati ti ringat, ukai ringat ngagai indai iya tauka aku, tang ngagai pemendar, laban iya ngasaika pemendar nya ngasuh pengidup iya tusah.” Baka ni Gillis nulung anak iya? “Kami duai menyanak  lama bendar berandau.” Kesuah iya, Gillis semina mendingka Mattias lalu nanya iya ngambika ulih meretika asai ati sereta runding iya. Kadang-kadang Gillis nerangka siti-siti utai ngagai anak iya sereta ngasuh iya berundingka utai nya sehari tauka lebih sebedau seduai iya berandauka utai nya baru. Bisi maya iya, Gillis empu begunaka beberapa hari berundingka utai ti udah dipadah anak iya. Enggau suah berandau, Mattias berengkah meretika reti genselan tebus lalu nemu Jehovah rinduka kitai sereta bisi hak merintah kitai. Ku apai iya madahka: “Tu begunaka awak, lalu kesuah iya tusah, tang belubah-lubah, pengerindu ngagai Jehovah tumbuh ba ati iya. Kami duai bini aku amat gaga laban pengeliat ati kami udah nulung anak kami ke agi nembiak mutarka penanggul ke ditapi iya lalu iya nerima pemendar.”

Seraya Gillis enggau bini iya liat ati nulung anak seduai iya, seduai iya arapka Jehovah deka nulung sida. Ku Gillis madahka: “Aku suah madah ngagai Mattias, pengerindu kami ti dalam ngagai iya meransang kami duai indai iya bebendar besampi ngambika Jehovah ulih nulung iya mereti.” Apai indai nya gaga amat ati laban seduai iya liat ati sereta enda alah!

Kitai mega patut liat ati lebuh ngintu utai ti diguna ba diri sebilik tauka pangan ke udah lama sakit. Peratika chunto Ellen * (peda nota kaki), ke mega diau di Scandinavia.

Kira-kira lapan taun ti udah, laki Ellen dua kali kena strok ke ngerusak untak iya. Ketegal nya, laki iya nadai agi ulih ngasaika pengaga ati, penusah ati tauka penyinu. Tu balat ngenusahka ati Ellen. Iya madahka: “Tu begunaka mayuh pengeliat ati sereta sampi.” Ku iya agi: “Ayat ti dikerinduka aku, ke meri aku pengelantang iya nya Pilipi 4:13. Ayat nya madahka: ‘Aku ulih ngereja semua utai ulih Iya ke meri aku pengering.’” Enggau kuasa sereta sukung ari Jehovah, Ellen ulih napi penanggul tu enggau ati ti liat.—Masmur 62:5, 6.

Endang amat, Jehovah nya chunto ti pemadu manah ngayanka pengeliat ati. (2 Peter 3:15) Dalam Bup Kudus, kitai suah macha pasal pengeliat ati Jehovah. (Nehemiah 9:30; Isaiah 30:18) Kati nuan agi ingat, baka ni Jehovah nyaut Abraham lebuh iya beberapa kali nanya pasal pemutus Jehovah ti deka ngerusak nengeri Sodom? Jehovah enda nyelepak lebuh Abraham bejaku. Iya liat ati mendingka tiap iti tanya sereta pengirau Abraham. Udah nya, Jehovah nunjukka Iya udah mendingka utai ke ngasuh Abraham irau ati sereta ngasuh Abraham pechaya, Iya enda ngerusak nengeri Sodom enti sema bisi sepuluh iku aja orang ke nadai penyalah ba nengeri nya. (Pemungkal 18:22-33) Jehovah seruran mending enggau liat ati, lalu Iya nadai kala ngereja utai ti enda patut!

Pengeliat ati nya sebagi ari personaliti baru ti beguna bendar ke patut dikembuan semua orang Kristian. Enti kitai bebendar liat ati, kitai ngemuliaka Apai kitai Jehovah ke liat ati sereta bisi pengibuh. Lalu kitai deka mega nyadi ‘orang ke arap sereta liat ati, ngambika nerima utai ti udah disemaya Petara.’—Hebrew 6:10-12.