1-2. Nitihka 1 Peter 4:7, 8, nama ulih nulung kitai napi penusah?

KITAI majak semak enggau pengujung “hari ti penudi.” Nya alai, kitai engka napi penusah ti balat. (2 Tim. 3:1) Ambika chunto, pengudah pengawa bepilih dipejalaika ba sebuah endur di Afrika Barat, penyarut enggau laya mayuh nyadi. Lebih ari enam bulan bala menyadi kitai enda ulih bibas mindah ketegal penyarut nya. Nama nulung sida napi penusah tu? Sekeda ari sida diau ba rumah bala menyadi ke bukai ba endur ti likun. Ku seiku menyadi Kristian lelaki madahka: “Lebuh maya tusah, bala bakih bisi enggau aku. Nya ngasuh aku gaga ati. Kami ulih meransang pangan diri.”

² Lebuh ‘Penusah ti Besai’ nyadi, kitai gaga ati enti bala bakih ke rinduka kitai bisi enggau kitai. (Pem. 7:14) Nya alai, kitai enda tau enda negapka agi kaul kitai enggau bala menyadi ari diatu. (Bacha 1 Peter 4:7, 8.) Kitai ulih belajar mayuh agi ari utai ke nyadi ba Jeremiah. Bala bakih ti rapat enggau iya nulung iya nyelamatka diri sebedau pengerusak Jerusalem nyadi. * Baka ni kitai ulih neladan Jeremiah?

3. (a) Nama engka ulih ngasuh Jeremiah ngenyauhka diri? (b) Nama dipadah Jeremiah ngagai Baruk, lalu nama asil iya?

³ Kira-kira 40 taun, Jeremiah diau enggau orang ke enda taluk. Sida tu nyengkaum orang ke berimbai pendiau enggau iya sereta engka sekeda kaban belayan ke datai ari menua iya  empu, Anatot. (Jer. 11:21; 12:6) Taja pia, iya enda ngenyauhka diri. Indah, iya madahka asai ati diri ngagai sekretari iya ke benama Baruk. Lalu kitai mega nemu asai ati iya laban nya bisi ditulis ba Bup Kudus. (Jer. 8:21; 9:1; 20:14-18; 45:1) Lebuh Baruk nulis semua utai ke nyadi ba Jeremiah, seduai iya belajar rindu sereta bebasaka pangan diri.—Jer. 20:1, 2; 26:7-11.

4. (a) Nama pengawa ke diasuh Jehovah gaga Jeremiah? (b) Baka ni pengawa nya ngemansangka kaul Jeremiah enggau Baruk?

⁴ Betaun-taun Jeremiah enggau berani nangkan orang Israel pasal utai ke deka nyadi ngagai Jerusalem. (Jer. 25:3) Kena meransang orang deka agi nesal ati, Jehovah ngasuh Jeremiah nulis jaku tangkan Iya ba gulung surat. (Jer. 36:1-4) Lebuh Jeremiah enggau Baruk beberapa bulan begulai ngereja pengawa ti diberi Jehovah, seduai iya tentu bisi randau ke ulih ngemansangka pengarap pangan diri.

5. Baka ni Baruk nunjukka diri bakih ti manah ke Jeremiah?

⁵ Pengudah gulung surat nya tembu ditulis, Jeremiah ngasuh Baruk madahka jaku tangkan dalam gulung surat nya. (Jer. 36:5, 6) Baruk enggau berani macha gulung surat nya ngagai orang mayuh dalam Rumah Sembiang, taja pan pengawa nya tau ngujungka iya lenyau nyawa. Jeremiah tentu temegah ati ke iya! (Jer. 36:8-10) Bala pemesai orang Judah ninga pasal pengawa Baruk, lalu sida ngasuh iya macha gulung surat nya enggau nyawa ti inggar! (Jer. 36:14, 15) Pengudah nya, sida berunding deka madah ngagai Raja Jehoiakim pasal utai ti udah disebut Jeremiah. Ketegal sida ibuhka Baruk, sida ngasuh iya: “Seduai Jeremiah enda tau enda angkat ari tu lalu belalai. Anang madahka ngagai orang endur alai seduai belalai.” (Jer. 36:16-19) Tu endang jaku lalau ti chukup badas!

6. Nama digaga Jeremiah enggau Baruk pengudah Raja Jehoiakim nunu gulung surat ke ngundan pesan Jehovah?

 ⁶ Raja Jehoiakim balat ringat pengudah ninga jaku ke ditulis Jeremiah. Iya lalu nunu gulung surat nya sereta ngasuh orang nangkap Jeremiah seduai Baruk. Taja pia Jeremiah enda takut. Iya ngambi siti agi gulung surat, lalu meri nya ngagai Baruk. Baruk nuliska semua pesan Jehovah lebuh Jeremiah nandu pesan ke udah ditulis ba gulung surat ti udah ditunu Raja Jehoiakim.—Jer. 36:26-28, 32.

7. Nama nyadi lebuh Jeremiah enggau Baruk begulai gawa?

⁷ Kesuah agi, orang ke selalu begulai enggau pangan diri lebuh napi penanggul deka bisi kaul ti rapat. Nya alai, lebuh Jeremiah enggau Baruk begulai gawa nganti gulung surat ti udah ditunu Raja Jehoiakim, seduai iya ulih ngelala pangan diri lalu bisi kaul ti rapat. Baka ni kitai tau bulih penguntung ari teladan seduai iya?

8. (a) Nama engka nagang kitai ari ngembuan kaul ti rapat enggau orang? (b) Nama kebuah kitai anang ngetu nguji ngemansangka kaul ti rapat enggau orang?

⁸ Kitai engka tusah deka madahka runding enggau asai ati diri enti ati kitai kala dikemediska orang. (J-lam. 18:19, 24) Tauka kitai engka ngasaika diri nadai tentu awak enggau pengering kena ngemansangka kaul ti rapat enggau orang. Taja pia, kitai anang ngumbai nya enda ulih digaga. Enti kitai deka bala menyadi nulung kitai lebuh napi penusah, kitai patut ari diatu belajar arapka sida sereta negapka agi kaul enggau sida. Siti chara nya, kitai ulih madahka runding enggau asai ati diri ngagai sida.—1 Pet. 1:22.

9. (a) Baka ni Jesus nunjukka diri arapka bala bakih iya? (b) Nama kebuah berandau pasal runding enggau asai ati nuan ulih nulung negapka kaul enggau bala bakih? Beri siti chunto.

⁹ Jesus nunjukka diri arapka bala bakih iya. Nya alai iya enda bula sereta enda belalai pasal nama-nama utai lebuh bejaku enggau sida. (Jhn. 15:15) Kitai neladan Jesus lebuh kitai madahka utai ti ngasuh ati kitai gaga, irau, sereta asa ngagai bala bakih. Pendingka enggau manah lebuh bakih nuan bejaku, lalu nuan engka beratika seduai bisi runding, asai ati, enggau juluk ati ti sama. Peratika siti chunto ari seiku menyadi Kristian indu ke benama Cindy. Iya beumur 29 taun, tang bebakih enggau seiku pengerintis ke benama Marie-Louise ke beumur 67 taun. Seduai iya selalu begulai nginjil ninting pagi Hari Empat, sereta berandau pasal mayuh utai enggau pangan diri. Ku  Cindy madahka: “Aku rindu berandau pasal runding sereta asai ati diri enggau bala bakih laban tu nulung aku ngelala sereta meretika sida enggau manah agi.” Baka ke digaga Cindy, lebuh nuan dulu berandau enggau bala bakih pasal runding sereta asai ati diri, lalu mendingka sida lebuh sida bejaku, kaul nuan enggau sida deka tegap agi.—J-lam. 27:9.

10. Nitihka Jaku Dalam 27:17, nama asil iya lebuh kitai begulai gawa enggau bala menyadi Kristian?

¹⁰ Baka Jeremiah enggau Baruk, lebuh kitai begulai gawa enggau bala menyadi Kristian lalu beratika pemanah ke dikembuan sida, kitai ulih belajar ari sida lalu rapat agi enggau sida. (Bacha Jaku Dalam 27:17.) Ambika chunto, kati asai nuan lebuh nginjil lalu ninga bakih nuan enggau berani nerangka kebuah iya arapka utai ti dipechaya iya? Tauka lebuh iya madahka diri andalka Jehovah sereta tuju Iya? Nuan tentu deka ngerapatka agi kaul nuan enggau iya.

11-12. Beri siti chunto pasal baka ni begulai gawa ba pengawa nginjil ulih nulung negapka kaul kitai enggau pangan diri.

¹¹ Peratika dua iti peneleba ke nunjukka begulai gawa ba pengawa nginjil ulih nulung bala menyadi rapat enggau pangan diri. Adeline, seiku menyadi Kristian indu ke beumur 23 taun, mai bakih iya Candice, ngagai endur ke jarang alai nginjil. Ku Adeline madah: “Kami duai deka ransing sereta rindu agi nginjil. Kami deka meransang pangan diri ngambika ulih meri Jehovah utai ti pemadu manah.” Nama asil ke diulih seduai iya ketegal begulai gawa? Ku Adeline: “Pengudah tembu nginjil, kami duai berandau pasal asai ati diri, utai ke meransang ati, sereta pasal chara Jehovah ngiring kami ba pengawa nginjil. Kami duai rindu berandauka utai tu lalu ulih ngelala pangan diri enggau manah agi.”

¹² Laïla enggau Marianne nya dua iku menyadi Kristian indu ke agi rumpas ari menua Perancis. Seduai iya lima minggu nginjil ba Bangui, sebuah indu nengeri di Republik  Afrika Tengah. Ku Laïla ngenang: “Ulah enggau utai ti dikerindu kami duai Marianne enda sama. Tang ketegal ulih berandau enggau manah sereta ngembuan pengerindu ti bendar, kaul kami majak tegap. Lebuh aku beratika Marianne ke ulih jampat nelebaka diri, pengerindu iya ke orang, sereta pengeransing iya ba pengawa nginjil, tu ngasuh aku bebasa agi ke iya.” Nuan enda ibuh pindah ngagai menua bukai enti deka bulih penguntung ke baka tu. Tiap kali nuan nginjil enggau menyadi Kristian, nuan bisi peluang ngelala iya enggau manah lalu negapka agi kaul seduai.

13. Nama ditemu kitai lebuh begulai gawa enggau bakih kitai?

¹³ Kadang-kadang lebuh kitai begulai gawa enggau bakih kitai, kitai ukai semina ulih nemu pemanah ke bisi ba iya, tang mega pengurang iya. Nama ulih nulung kitai mutarka pekara tu? Peratika baru chunto Jeremiah. Aram kitai bejuraika utai ke nulung iya betatika pemanah bala bakih iya sereta utai ke meransang iya ngampun penyalah sida.

14. Nama dipelajar Jeremiah pasal Jehovah? Baka ni nya nulung iya?

¹⁴ Bup 1 enggau 2 Raja sereta bup Jeremiah ke bisi ba Bup Kudus, tentu ditulis Jeremiah. Pengawa nulis bup nya tentu nulung iya nemu agi pasal pengasih Jehovah ke mensia. Ambika chunto, Jeremiah bisi beratika utai ke nyadi ba Raja Ahap lebuh raja nya nesal ati ke pengawa diri ti jai. Jehovah ngelepaska raja nya ari meda semua orang ba ruang bilik iya dibunuh lebuh iya agi idup. (1 Raj. 21:27-29) Jeremiah mega nemu Manasi ngereja mayuh agi dosa ngagai Jehovah enti dibanding enggau Raja Ahap. Tang, Jehovah ngampun penyalah Manasi ketegal iya nesal ati. (2 Raj. 21:16, 17; 2 Ban. 33:10-13) Cherita tu tentu udah nulung Jeremiah neladan pengeliat ati enggau pengasih Jehovah lebuh iya mutarka penanggul enggau bala bakih iya.—Mas. 103:8, 9.

15. Baka ni Jeremiah neladan pengeliat ati Jehovah lebuh Baruk limpang?

¹⁵ Peratika chara Jeremiah nulung Baruk lebuh Baruk limpang enda lama ari ngereja pengawa iya. Ari nejuka Baruk pia aja, Jeremiah madah ngagai Baruk pasal pesan ari Petara ti nyemetak sereta siru. (Jer. 45:1-5) Nama ulih dipelajarka kitai ari cherita tu?

16. Nitihka Jaku Dalam 17:9, nama patut digaga kitai kena ngetanka kaul enggau bala menyadi Kristian?

¹⁶ Ketegal semua kitai enda sempurna, bala menyadi Kristian kitai tentu bisi ngereja penyalah. Nya alai, lebuh kitai udah nyadi bakih sida, kitai patut bebendar ngetanka kaul nya. Enti sida bisi ngereja penyalah, kitai patut enggau siru madah ngagai sida jaku lalau ti nyemetak ari Bup Kudus. (Mas. 141:5) Lalu enti sida ngemediska ati kitai, kitai patut ngampunka sida. Pengudah ngampunka sida, kitai patut nyeliah ari nyebut pasal penyalah ke udah digaga sida ba kitai. (Bacha Jaku Dalam 17:9.) Ketegal kitai nyau semak enggau pengujung dunya, kitai patut bebendar betatika pemanah ke dikembuan bala menyadi kitai, ukai pengurang sida. Enti kitai ngereja nya, kaul kitai enggau sida deka tegap agi. Tu patut dikereja kitai ari diatu, laban kitai begunaka bakih ti rapat maya Penusah ti Besai dudi hari.

17. Baka ni Jeremiah nunjukka diri bakih ti manah ba maya ti tusah?

¹⁷ Nabi Jeremiah nunjukka diri bakih ti manah ba maya ti tusah. Ambika chunto, maya Jeremiah dibuai ke dalam telaga ti penuh enggau tanah ti luchak, Ebetmelek nyelamatka  iya. Ebetmelek nya seiku ari orang ke bekereja dalam istana raja. Tang udah nya Ebetmelek irauka diri dikemediska bala pemesai. Lebuh Jeremiah nemu pasal tu, iya enda ngelakka Ebetmelek mutarka pekara nya kediri. Taja pan Jeremiah dijil, iya enggau naka ulih bekunsika semaya Jehovah ngagai Ebetmelek.—Jer. 38:7-13; 39:15-18.

18. Nitihka Jaku Dalam 17:17, nama patut digaga kitai lebuh bakih kitai napi penanggul?

¹⁸ Kemayaharitu, bala menyadi kitai napi bemacham penanggul. Ambika chunto, mayuh ari sida napi pengerusak alam tauka penusah ke datai ari mensia. Lebuh nya nyadi, sekeda ari kitai engka ulih mai bakih diau ba rumah kitai. Sekeda ke bukai engka ulih meri bantu baka duit. Tang semua kitai ulih minta Jehovah nulung bala menyadi. Lebuh nemu sida lemi semengat, kitai engka enda nemu utai ke deka disebut tauka digaga. Taja pia kitai agi ulih nulung sida. Ambika chunto, kitai ulih ngiga awak begulai enggau sida. Pendingka sida lebuh sida bejaku enggau kitai. Bekunsika ayat Bup Kudus ke dikerinduka kitai enggau sida. (Isa. 50:4) Lalu keberat agi, tulung sida lebuh sida begunaka kitai.—Bacha Jaku Dalam 17:17.

19. Baka ni kaul ti tegap ulih nulung kitai dudi hari?

¹⁹ Kitai patut keran ngemansang sereta negapka kaul enggau bala menyadi kitai ari diatu. Nama kebuah? Laban munsuh kitai deka nguji mechah-belahka kitai ngena pemula. Sida deka ngasuh kitai badu arapka sereta nyukung bala menyadi kitai. Tang munsuh kitai enda ulih mujur ngereja nya. Sida enda ulih nagang kitai badu rinduka bala menyadi kitai. Nadai utai ke digaga munsuh kitai ulih ngerusak kaul kitai enggau pangan diri. Indah kaul kitai ti tegap nya ukai semina ulih tan maya pengujung dunya aja, tang belama iya!